TBʼI XNAQʼTZBʼIL TOK TIʼJ T-XKʼOMIL
¿Alkyeqe testigos de Jehová?
«Atxix ojtxe ojtzqiʼn Mike wuʼne. Testigo de Jehová te, ex naʼmx tel nnikʼe tiʼj tokslabʼil. ¿Alkyetzun Jehová? ¿Tiquʼn mintiʼ in kubʼ kyikʼsaʼn testigos de Jehová junjun ninqʼij? In tzaj bʼajtoq nkʼuʼje tiʼj qa tokxtoq Mike toj jun secta, moqa jun nya bʼaʼn okslabʼil.» (Chi Becky, te California te Estados Unidos)
«E ok ten nvesine xnaqʼtzal tiʼj Tyol Dios kyukʼil testigo de Jehová ex kubʼ nximane jlu: ‹¿Tiquʼn tok kybʼi te testigo de Jehová? ¿Tiʼ t-xilen?›» (Chi Zenon, te Ontario te Canadá)
«Kubʼ qximane tukʼil nxuʼjile qa noq in che ul testigo de Jehová naʼlte qeye qa at qpaje tuʼnju mintiʼ in qoʼxe toj iglesia. Noqtzun tuʼnj, ax ikx in kubʼtoq qximane qa mintiʼ o kanet aju otoq qo jyone tiʼj kyoj junjun okslabʼil nimaq kyoklen, maslo mlay kanet quʼne toj jun secta ik tzeʼn qe testigos de Jehová.» (Chi Kent, te Washington te Estados Unidos)
«Ax tok, mintiʼtoq ojtzqiʼn wuʼne alkyeqetoq moqa tiʼtoq in tzaj kyxnaqʼtzaʼn.» (Chi Cecilie, te Esbjerg te Dinamarca)
Olo tzʼok tqʼoʼn twitza kyiʼj testigo de Jehová in che pakbʼan kyojele ja, toj bʼe, aj t-xi kyqʼoʼn qe onbʼil tiʼj Tyol Dios ex aj t-xi kyqʼamaʼn qa in che qʼon xnaqʼtzbʼil noq kukx tiʼj Tyol Dios. Axlo ikx aju uʼj at toj tqʼabʼa jaʼlo, junlo testigo de Jehová xi qʼonte teya. Noqtzun tuʼnj, axlo ikx o ximana ik tzeʼn qe xjal ma che tzaj qʼamaʼn jawni ex in kubʼlo t-ximana alkyexix qe testigo de Jehová.
Qa at jun t-ximbʼetza moqa jun t-xjela kyiʼj testigos de Jehová, ¿tiʼ jaku bʼant tuʼna? ¿Jatumel jaku kanet tqanil tuʼna tiʼj tiʼ in kubʼ kyxnaqʼtzaʼn, jatumel in tzaj pwaq kyuʼn tuʼn tbʼant aqʼuntl in bʼant kyuʼn ex tuʼn kyten ja jatumel in che ajbʼen te Dios, ex tiquʼn in che pon tjaya moqa tiquʼn in kubʼ wabʼina kyuʼn toj bʼe?
Aju Cecilie saj qʼamaʼn jawni, tqʼama jlu: «Ok nqʼoʼn nwitze tiʼj nimku tqanil kyiʼj testigos de Jehová toj Internet. Ok nbʼine nimku yol ex nimku ximbʼetz nya bʼaʼn kyiʼj, ex tuʼn jlu ten nya bʼaʼn nximbʼetze kyiʼj.» Noqtzun tuʼnj, tej tyolin Cecilie tukʼilxix jun testigo de Jehová, e tzaj tzaqʼweʼn qeju t-xjel.
Qape ax ikx teya tajbʼila tuʼn tbʼant jlu tuʼna. Qa tajbʼila tuʼn tok tbʼiʼna mas tqanil kyiʼj testigo de Jehová, bʼaʼn tuʼn t-xi tqanina kye. Aqe bʼinchalte uʼj lu ex aqe jaku tzaj kyqʼoʼn mas tbʼanel tzaqʼwebʼil kyiʼj t-xjela (Proverbios 14:15). Kuchiwt tzʼonin tiʼja qeju xnaqʼtzbʼil che ul tuʼn tel tnikʼa tiʼj alkyeqe testigos de Jehová, tiʼ in tzaj kyxnaqʼtzaʼn ex tiʼ in bʼant kyuʼn.
