1. a) ¿Tiʼ ikʼ tiʼj Pedro tej ttzaj jun kyqʼiqʼ jbʼal toj mar te Galilea? (Qʼonka twitza tiʼj tnejel tilbʼilal.) b) ¿Tiquʼn xi tzyet tuʼn tkux mulqʼaj Pedro toj aʼ?

TOJ jun qonikʼan, ateʼtoq apóstol Pedro kyukʼil junjuntl t-xnaqʼtzbʼen Jesús toj jun bark tuʼn kyikʼx toj mar te Galilea tej ttzaj jun kyqʼiqʼ jbʼal. Noq minabʼen xi kyqʼoʼn kywitz tiʼj Jesús in bʼet tibʼaj aʼ. Xi tqanin Pedro te Jesús qa jakutoq bʼet tibʼaj aʼ ik tzeʼn te. Xi tqʼamaʼn Jesús te qa jakutoq. Etztzun Pedro toj bark ex xi bʼet tuʼn tpon tukʼil Jesús. Noqtzun tuʼnj, tej t-xi bʼet chʼin, xi tzyet tuʼn tkux mulqʼaj toj aʼ. ¿Tiquʼn? Tuʼnju ok tqʼoʼn twitz tiʼj kyqʼiqʼ jbʼal ex tzaj nim t-xobʼil. Xi tqanin Pedro onbʼil te Jesús. Jurat tzyet naj tqʼabʼ tuʼn Jesús ex xi tqʼamaʼn jlu te: «Aya xinaq chʼin tokslabʼla, ¿tiquʼn xjawjeʼ tkʼuʼja?» (Mateo 14:24-32).

2. ¿Tiʼ kʼelel qnikʼ tiʼj toj xnaqʼtzbʼil lu?

² Toj xnaqʼtzbʼil lu, kʼelel qnikʼ tiʼj oxe xnaqʼtzbʼil aju jaku tzʼel qkanoʼn tiʼjju ikʼ tiʼj Pedro. Tnejel, alkye tten kubʼ tyekʼun tnejel qa at qʼuqbʼil tkʼuʼj qa tzultoq onin tuʼn Jehová. Tkabʼ, tiquʼn xi tzyet tuʼn tnaj qʼuqbʼil tkʼuʼj. Ex toxin, tiʼ bʼant tuʼn, tuʼn tten juntl maj qʼuqbʼil tkʼuʼj. Qa ma tzʼel qnikʼ tiʼj jlu, ok kʼonil qiʼj tuʼn tten qʼuqbʼil qkʼuʼj kyuw (1 Corintios 16:13).

3. a) ¿Tiquʼn etz Pedro toj bark ex bʼet tibʼaj aʼ? b) ¿Tiʼ chʼixmi ax o bʼant quʼn?

³ Tej t-xi txkoʼn Pedro tuʼn Jesús, etz Pedro toj bark ex bʼet tibʼaj aʼ. ¿Tiquʼn bʼant jlu tuʼn? Tuʼnju attoq qʼuqbʼil tkʼuʼj tiʼj qa tzultoq onin tuʼn Jehová ik tzeʼn in nonin tiʼj Jesús. Chʼixmi ax jlu o bʼant quʼn. Tej tel qnikʼ toj Tyol Dios qa in txoken Jesús qiʼj tuʼn qok te t-xnaqʼtzbʼen, xi qqʼamaʼn te Jehová tuʼn qajbʼen te ex jaw aʼ qwiʼ, moqa o qo bʼyan. ¿Tiquʼn? Tuʼnju attoq nim qʼuqbʼil qkʼuʼj qa qo tzajel tonin Jehová ex Jesús (Juan 14:1; kjawil uʼjit 1 Pedro 2:21).

4, 5. ¿Tiquʼn nimxix toklen qʼuqbʼil qkʼuʼj?

⁴ Nimxix toklen qʼuqbʼil qkʼuʼj tuʼnju in qo tzaj tonin tuʼn tkubʼ qbʼinchaʼn junjun tiʼchaq aju toj kywitz xjal mlayx bʼant (Mateo 21:21, 22). Ik tzeʼn te Pedro, bʼet tibʼaj aʼ tuʼnju attoq qʼuqbʼil tkʼuʼj. Ax ikx qe, tuʼnju at qʼuqbʼil qkʼuʼj, o bʼant junjun tiʼchaq quʼn aju kwest. Nim qbʼet o kubʼ qchʼixpuʼn tkyaqil qmod. Ex aʼyeju xjal ojtzqiʼn qwitz kyuʼn ojtxe, in nel kynikʼ tiʼj qa junxitl qoʼ jaʼlo. Bʼant junjun chʼixpubʼil lu quʼn tuʼnju kʼujlaʼn Jehová quʼn ex tuʼnju o tzʼonin qiʼj tuʼn tbʼant jlu quʼn (kjawil uʼjit Colosenses 3:5-10). Tuʼn qʼuqbʼil qkʼuʼj, xi qqʼamaʼn te Jehová tuʼn qajbʼen te ex o qo ok te tamiw. Mintiʼwtlo bʼant jlu quʼn noqwit mintiʼ o qo tzaj tonin Jehová (Efesios 2:8).

⁵ Ax ikx nimxix toklen qʼuqbʼil qkʼuʼj tuʼnju in tzaj tqʼoʼn qipumal tuʼn miʼn qkubʼ tuʼn nya bʼaʼn in kubʼ tqʼoʼn Satanás, aju nim tipumal (Efesios 6:16). Ax ikx in qo tzaj tonin qʼuqbʼil qkʼuʼj tuʼn qex twitz nya bʼaʼn. In tzaj ttziyen Jehová qe qa tzul tqʼoʼn tkyaqilju at tajbʼen qe qa at qʼuqbʼil qkʼuʼj tiʼj ex qa atz sok qqʼoʼn qwiʼ tiʼj tuʼn qajbʼen te (Mateo 6:30-34). Ex qa at qʼuqbʼil qkʼuʼj, ok kʼonil qiʼj tuʼn qanqʼin te jumajx toj Tbʼanel Najbʼil (Juan 3:16).

6, 7. a) ¿Alqukʼil jaku tzʼok qmojbʼaʼn aju kyqʼiqʼ ex aju aʼ jaw yukchi tuʼn kyqʼiqʼ jbʼal aju tzaj xobʼ Pedro tuʼn? b) ¿Tiquʼn in xi qqʼamaʼn qa qkyaqilx jaku naj qʼuqbʼil qkʼuʼj?

⁶ Qo yolin juntl maj tiʼj Pedro. ¿Tiquʼn tzaj xobʼ tej tbʼet tibʼaj aʼ? In tzaj tqʼamaʼn Tyol Dios qa el tiʼn twitz tiʼj Jesús ex atz xi tqʼoʼn twitz tiʼj kyqʼiqʼ jbʼal (Mateo 14:30). Xitzun tzyet tuʼn tnaj qʼuqbʼil tkʼuʼj ex tuʼn tkux mulqʼaj toj aʼ. Aju kyqʼiqʼ ex aju aʼ jaw yukchi tuʼn kyqʼiqʼ jbʼal jaku tzʼok qmojbʼaʼn tukʼil junjun nya bʼaʼn ex junjun joybʼil in tzaj qiʼj junjun qʼij. Maske kwest jaku che ela junjun nya bʼaʼn toj qwitz, jaku tzaj tqʼoʼn Jehová qipumal tuʼn tikʼx quʼn. Noqtzun tuʼnj, qa atz sok qqʼoʼn qwiʼ tiʼj nya bʼaʼn, jaku txi tzyet tuʼn tnaj qʼuqbʼil qkʼuʼj tiʼj qa qo tzajel tonin Jehová.

⁷ Qkyaqilx jaku naj qʼuqbʼil qkʼuʼj. ¿Tiquʼn in xi qqʼamaʼn jlu? Tuʼnju in tzaj tqʼamaʼn Tyol Dios qa aju «il aju jurat jaku qo kubʼ tzʼaq tuʼn» atzun aju qa mintiʼ qʼuqbʼil qkʼuʼj (Hebreos 12:1, TNM). Qa atz sok qqʼoʼn qwiʼ tiʼj nya bʼaʼn in tzaj qiʼj ik tzeʼn te Pedro bʼant tuʼn, jaku t-xi tzyet tuʼn tnaj qʼuqbʼil qkʼuʼj. ¿Tzeʼn jaku tzʼel qnikʼ tiʼj qa chʼix tnaj qʼuqbʼil qkʼuʼj? Qo xnaqʼtzan kyiʼj junjun xjel tuʼn tel qnikʼ tiʼj jlu.

8. ¿Tzeʼn jaku naj qʼuqbʼil qkʼuʼj tiʼj tkyaqilju o tzaj ttziyen Jehová?

⁸ ¿Kukxpe qʼuqli qkʼuʼj tiʼj tkyaqilju o tzaj ttziyen Jehová? Jun techel, o tzaj ttziyen Jehová qa chʼix tkubʼ tnajsaʼn aju tokx tjaqʼ tipumal Satanás. Noqtzun tuʼnj, qa ma txi qqʼoʼn ambʼil tuʼn tok qqʼoʼn qwitz tiʼjju achbʼil te twitz Txʼotxʼ, jaku naj qʼuqbʼil qkʼuʼj tiʼj qa chʼix tul xitbʼil (Habacuc 2:3). Juntl techel, o tzaj ttziyen Jehová qa kbʼel tnajsaʼn qil tuʼn chojbʼil bʼant tuʼn Jesús. Ex qatzun kukx in qo ximen tiʼj junjun nya bʼaʼn bʼant quʼn ojtxe, jaku kubʼ qximen qa naʼmx tkubʼ tnajsaʼn Jehová qil (Hechos 3:19). A jlu jaku tzʼel tiʼn tzalajbʼil toj qanmi tiʼj qajbʼebʼil te Jehová ex jaku kyaj qtzaqpiʼn tuʼn qpakbʼan.

9. ¿Tiʼ jaku bʼaj qa nya atl Jehová mas nim toklen toj qanqʼibʼil?

 ⁹ ¿Kuxpe in qo ajbʼen te Jehová tuʼn tkyaqil qkʼuʼj? Qa nim in qo ajbʼen te Jehová, in qo tzaj tonin jlu tuʼn tok qqʼoʼn qwiʼ tiʼj qʼuqbʼil qkʼuʼj tuʼn qanqʼin te jumajx. Noqtzun tuʼnj, ¿tiʼ jaku bʼaj qa ma txi qqʼoʼn ambʼil tuʼn tok junjun tiʼchaq te mas nim toklen toj qanqʼibʼil? Jun techel, jakulo tzʼel bʼaʼn jun aqʼuntl toj qwitz aju jaku tzaj chjoʼn nim twiʼ qkʼuʼj tiʼj, noqtzun tuʼnj, mlay tzaj tqʼoʼn ambʼil qe tuʼn qajbʼenxix te Jehová ik tzeʼn tnejel. A jlu jaku chewix qʼuqbʼil qkʼuʼj tuʼn ex jaku kyaj qtzaqpiʼn tuʼn qajbʼentl te Jehová tuʼn tkyaqil qkʼuʼj (Hebreos 6:10-12).

10. ¿Tiquʼn in xi qqʼamaʼn qa aj tkubʼ qnajsaʼn kyil txqantl in kubʼ qyekʼun qʼuqbʼil qkʼuʼj tiʼj Jehová?

¹⁰ ¿Kwestpe in nel toj qwitz tuʼn tkubʼ qnajsaʼn kyil txqantl? Qa at jun ma tzʼok tbʼinchaʼn jun nya bʼaʼn qiʼj, ¿juratpe in tzaj naj qqʼoj tiʼj ex in kyajpe qtzaqpiʼn tuʼn qyolin tukʼil? Qa in bʼant jlu quʼn, atzlo in nokxix qqʼoʼn qwiʼ tiʼjju in qnaʼn. Atzun qa ma kubʼ qnajsaʼn kyil txqantl, in kubʼ qyekʼun qʼuqbʼil qkʼuʼj tiʼj Jehová. ¿Tiquʼn in xi qqʼamaʼn jlu? Tuʼnju ojtzqiʼn quʼn qa il tiʼj tuʼn tkubʼ qnajsaʼn kyil txqantl qa qajbʼil tuʼn tkubʼ tnajsaʼn Jehová qil (Lucas 11:4). Aj tkubʼ qnajsaʼn kyil txqantl, in kubʼ qyekʼun qʼuqbʼil qkʼuʼj tiʼj qa ktzalajel Jehová qukʼil ex qa kbʼel tnajsaʼn qil. Ex mas nim toklen jlu twitz tuʼn tok tilil quʼn tuʼn t-xi kychjoʼn txqantl aju xbʼant kyuʼn. Ax ikx qeju t-xnaqʼtzbʼen Jesús ojtzqiʼntoq kyuʼn qa il tiʼj tuʼn tten qʼuqbʼil kykʼuʼj tuʼn tkubʼ kynajsaʼn kyil txqantl. Tuʼntzunju, tej t-xi tqʼamaʼn Jesús kye tuʼn tkubʼ kynajsaʼn kyil qeju nim maj in che ilen kywitz, xi kyqʼamaʼn jlu te: «Qʼontza mastl qokslabʼle», moqa qʼuqbʼil qkʼuʼje (Lucas 17:1-5).

11. Qa ma qo tzaj kawin tuʼn juntl, ¿tiʼ mintiʼ tuʼn tbʼant quʼn?

¹¹ ¿In tzajpe qqʼoj aj qtzaj kawin? Aj qtzaj kawin tuʼn juntl, bʼaʼn tuʼn tok qqʼoʼn qwiʼ tiʼj alkye tten jaku tzʼonin kawbʼil qiʼj. Ex nya tuʼn qjyoʼn jun nya bʼaʼn tiʼjju saj qʼonte kawbʼil qe moqa tiʼjju kawbʼil (Proverbios 19:20). Mas bʼaʼn tuʼn tten qʼuqbʼil qkʼuʼj ex tuʼn tkubʼ qximen qa jun ambʼil aju tuʼn tkubʼ qxnaqʼtzan qibʼ tuʼn tten qximbʼetz ik tzeʼn te Jehová.

12. ¿Tiʼ in kubʼ qyekʼun qa tkyaqil maj in qo yolin nya bʼaʼn kyiʼj qeju qʼil twitz aqʼuntl toj ttnam Jehová?

¹² ¿In tzajpe qyol kyiʼj qeju qʼil twitz aqʼuntl toj ttnam Jehová? Tej tok kybʼiʼn aj Israel nya bʼaʼn tqanil kyuʼn qeju 10 xjal i eʼx keʼyil txʼotxʼ, e yolin nya bʼaʼn tiʼj Moisés ex tiʼj Aarón. Kyjuʼtzun, xi tqanin Jehová jlu te Moisés: «¿Jtoj bʼan txi kykolin xjal tuʼn kyikʼun wiʼje? ¿Jtoj bʼan txi kykolin tuʼn miʼn tqeʼ kykʼuʼj wiʼje, ex o bʼant nimku techal wuʼne kyxol?» (Números 14:2-4, 11). Tej kyyolin aj Israel nya bʼaʼn kyiʼj qeju e jaw tjyoʼn Jehová tuʼn kykubʼ nej kywitz, kubʼ kyyekʼun qa mintiʼtoq qʼuqbʼil kykʼuʼj tiʼj. Ax ikx toj ambʼil jaʼlo, qa tkyaqil maj in qo yolin nya bʼaʼn kyiʼj qeju in che ajbʼen tuʼn Jehová tuʼn kykubʼ nej qʼil twitz aqʼuntl toj ttnam, in kubʼ qyekʼun qa chʼix tnaj qʼuqbʼil qkʼuʼj tiʼj Jehová.

13. ¿Tiquʼn mintiʼ tuʼn ttzajxix qbʼis qa ma tzʼel qnikʼ tiʼj qa chʼixtl tkubʼ naj qʼuqbʼil qkʼuʼj?

¹³ Qa ma tzʼel qnikʼ tiʼj qa chʼixtl tkubʼ naj qʼuqbʼil qkʼuʼj aj qximen kyiʼj xjel ma che kyaj, miʼn tzajxix qbʼis. Bʼaʼn tuʼn ttzaj qnaʼn qa axpe ikx te apóstol Pedro tzaj xobʼ ex naj qʼuqbʼil tkʼuʼj. Ex at junjuntl maj, il tiʼj i ex tkawin Jesús kykyaqil t-apóstol tuʼnju noq chʼin qʼuqbʼil kykʼuʼj at (Mateo 16:8). Noqtzun tuʼnj, kukx jaku tzʼel qkanoʼn jun tbʼanel xnaqʼtzbʼil tiʼjju bʼant tuʼn Pedro yajxitl tiʼjju tej t-xi tzyet tuʼn tnaj qʼuqbʼil tkʼuʼj ex tuʼn tkux mulqʼaj toj aʼ.

14, 15. a) ¿Tiʼ bʼant tuʼn Pedro tej t-xi tzyet tuʼn tkux mulqʼaj toj aʼ? b) ¿Alkye tten jaku tzʼok qqʼoʼn qwitz tiʼj Jesús?

¹⁴ ¿Tiʼ bʼant tuʼn Pedro tej t-xi tzyet tuʼn tkux mulqʼaj toj aʼ? In nbʼant-xixtoq te Pedro tnadarin, tuʼn jlu, jakutoq meltzʼaj juntl maj toj bark (Juan 21:7). Noqtzun tuʼnj, mintiʼ bʼant  jlu tuʼn. ¿Tiquʼn? Tuʼnju mintiʼ ok tilil tuʼn, tuʼn tklet tuʼnx tibʼ, sino xi tqʼoʼn twitz tiʼj Jesús ex xi tqanin onbʼil te. Qa ma tzʼel qnikʼ tiʼj qa ma chewix qʼuqbʼil qkʼuʼj, bʼaʼn tuʼn tel qkanoʼn tiʼj Pedro. ¿Alkye tten?

¹⁵ Ik tzeʼn te Pedro, ax ikx qe il tiʼj tuʼn tok qqʼoʼn qwitz tiʼj Jesús (kjawil uʼjit Hebreos 12:2, 3). (Qʼonka twitza tiʼj «Aju in tzaj tqʼamaʼn junjun yol».) Noqtzun tuʼnj, mlay bʼant tuʼn tok qqʼoʼn qe qwitz tiʼj Jesús tuʼn tbʼaqʼ qwitz ik tzeʼn te Pedro. ¿Alkyetzun tten jaku tzʼok qqʼoʼn qwitz tiʼj Jesús? Qa ma kubʼ qxnaqʼtzaʼn aju junjun tiʼchaq bʼant tuʼn ex kyaj t-xnaqʼtzaʼn, ex qa ma tzʼel qkanoʼn techel kyaj tqʼoʼn. Qa ma bʼant jlu quʼn, qo tzajel tonin tuʼn tten juntl maj qʼuqbʼil qkʼuʼj. Qo xnaqʼtzan tiʼj junjun tten tzeʼn jaku tzʼel qkanoʼn tiʼj Jesús.

16. ¿Alkye tten jaku chʼiy qʼuqbʼil qkʼuʼj tuʼn Tyol Dios?

¹⁶ Qkyuwsam qʼuqbʼil qkʼuʼj tuʼn Tyol Dios. Qʼuqlixixtoq tkʼuʼj Jesús tiʼj qa tzajni Xjan Uʼj tukʼil Dios ex qa atz tkuʼx mas tbʼanel nabʼil toj (Juan 17:17). Qa qajbʼil tuʼn tel qkanoʼn tiʼj Jesús ex tuʼn tten jun qʼuqbʼil qkʼuʼj kyuw, il tiʼj tuʼn tkubʼ quʼjin Tyol Dios tkyaqil qʼij, tuʼn tkubʼ qxnaqʼtzaʼn ex tuʼn qximen tiʼjju in nel qnikʼ tiʼj. Ax ikx il tiʼj tuʼn tkubʼ qxnaqʼtzaʼn tzaqʼwebʼil tiʼj junjun qxjel ik tzeʼn jlu: «¿Qʼuqlipe nkʼuʼje qa in qo anqʼin kyoj bʼajsbʼil tqʼijlalil?». Qchʼiysanku qʼuqbil qkʼuʼj tiʼj jlu aj qxnaqʼtzan kyiʼj yol ateʼkux toj Tyol Dios aju in japun twiʼ kyiʼj bʼajsbʼil tqʼijlal. «¿Qʼuqlipe nkʼuʼje qa kjapunel tuʼn Jehová aju o tzaj ttziyen tiʼjju kbʼajel toj ambʼil tzul?» Qchʼiysanku qʼuqbʼil qkʼuʼj tiʼj jlu aj qxnaqʼtzan kyiʼj yol o che japun twiʼ tuʼn Jehová. «¿Qʼuqlipe nkʼuʼje qa aʼyeju nabʼil tkuʼx toj Tyol Dios at kyajbʼen qe toj ambʼil jaʼlo?» Qchʼiysanku qʼuqbʼil qkʼuʼj tiʼj jlu aj qxnaqʼtzan tiʼj kyanqʼibʼil erman o chʼixpuj kyanqʼibʼil tuʼnju in xi kybʼiʼn nabʼil tkuʼx toj Tyol Dios (1 Tesalonicenses 2:13). * (Qʼonka twitza tiʼj tqanil t-xe t-xaq uʼj.)

17. a) ¿Tiʼ onin tiʼj Jesús tuʼn tikʼx nimxix nya bʼaʼn tuʼn? b) ¿Tzeʼn jaku tzʼel qkanoʼn jlu tiʼj Jesús?

 ¹⁷ Qo ximen tiʼjju o tzaj ttziyen Jehová qe. Ximen Jesús tiʼjju otoq tzaj ttziyen Jehová te. Onin jlu tiʼj tuʼn tikʼx nim nya bʼaʼn tuʼn (Hebreos 12:2). Mintiʼ xi tqʼoʼn ambʼil tuʼn tok tqʼoʼn twiʼ tiʼjju jakutoq tzaj tqʼoʼn aju te twitz Txʼotxʼ (Mateo 4:8-10). ¿Tzeʼn jaku tzʼel qkanoʼn jlu tiʼj Jesús? Qo ximen tiʼj tkyaqilju o tzaj ttziyen Jehová qe. ¿Alkye tten jaku bʼant tuʼna? Ximana qa atz taʼtl teya toj Tbʼanel Najbʼil. Tzʼibʼinkuya moqa bʼinchama jun tilbʼilal tiʼjju tajbʼila tuʼn tbʼant atztzu. Moqa jaku kubʼ ttzʼibʼina kybʼi xjal che jawil anqʼin aʼyeju tajbʼila tuʼn tyolina kyukʼil, ex jaku ximana tiʼj tiʼ jaku txi tqʼamaʼna kye. Ximana tiʼj qa ax ikx o tzaj ttziyen Dios jlu teya.

18. ¿Tiʼ jaku tzʼonin qiʼj tuʼn tten mas qʼuqbʼil qkʼuʼj?

¹⁸ Qqaninx mas qʼuqbʼil qkʼuʼj. Xi tqʼoʼn Jesús xnaqʼtzbʼil kye t-xnaqʼtzbʼen tuʼn t-xi kyqanin te Jehová tuʼn ttzaj tqʼoʼn xewbʼaj xjan kye (Lucas 11:9, 13). Aju xewbʼaj xjan in tzaj tqʼoʼn mastl qʼuqbʼil qkʼuʼj tuʼnju a qʼuqbʼil qkʼuʼj atzun jun kyxol qeju in tzaj tqʼoʼn xewbʼaj xjan. Ax ikx jaku txi qqanin te Jehová alkyexix qajbʼil. Jun techel, qa kwest in nela toj qwitz tuʼn tkubʼ qnajsaʼn kyil txqantl, jaku txi qqanin te Jehová tuʼn ttzaj tqʼoʼn nimxix qʼuqbʼil qkʼuʼj ex tuʼn tkubʼ qnajsaʼn kyil txqantl.

19. ¿Alkyeqe qamiw che jawil qjyoʼn?

¹⁹ Qjyonktz qamiw at nim qʼuqbʼil kykʼuʼj. Ok tqʼoʼnxix Jesús twitz tiʼj alkyeqe tamiw tuʼn kyjaw tjyoʼn. E ok apóstol te tbʼanel tamiw tuʼnju kukx e ok lepeʼ tiʼj ex kukx e nimen te (kjawil uʼjit Juan 15:14, 15). Ax ikx qe, il tiʼj tuʼn kyjaw qjyoʼn qamiw aʼyeju at nim qʼuqbʼil kykʼuʼj ex in xi kybʼiʼn Jesús. Aʼyeju tbʼanel amiw mintiʼ in kubʼ kyewin jun tiʼ kyxol. Qa il tiʼj tuʼn ttzaj kyqʼoʼn jun kawbʼil qe, in tzaj kyqʼoʼn. Ex qa aqoʼ il tiʼj tuʼn t-xi qqʼoʼn jun kawbʼil kye, in xi kykʼamoʼn (Proverbios 27:9).

20. ¿Tiquʼn il tiʼj tuʼn qonin kyiʼj txqantl xjal tuʼn tchʼiy qʼuqbʼil kykʼuʼj?

²⁰ Qo onin kyiʼj txqantl tuʼn tchʼiy qʼuqbʼil kykʼuʼj. Onin Jesús kyiʼj t-xnaqʼtzbʼen tuʼn tkyuwset qʼuqbʼil kykʼuʼj tukʼilju bʼant tuʼn ex tukʼilju tqʼama (Marcos 11:20-24). Ax ikx qe il tiʼj tuʼn qonin kyiʼj txqantl xjal tuʼn tchʼiy qʼuqbʼil kykʼuʼj. Iktzun tten ax ikx kchʼiyil qe qʼuqbʼil qkʼuʼj (Proverbios 11:25). ¿Tiʼ jaku bʼant quʼn tuʼn tchʼiy qʼuqbʼil kykʼuʼj txqantl? Aj qpakbʼan ex aj t-xi qchikʼbʼaʼn kye xjal tiquʼn qʼuqli qkʼuʼj qa at Dios, qa in ximen qiʼj ex qa t-ximbʼetz aju tkuʼx toj Tuʼjil Tyol. Ax ikx jaku qo onin kyiʼj txqantl tuʼn tchʼiy qʼuqbʼil kykʼuʼj. Jun techel, qa ma tzʼok qbʼiʼn jun erman in tzaj tyol kyiʼj qeju qʼil twitz aqʼuntl toj ttnam Dios, miʼn tzʼel naj qpan qibʼ tiʼj. Bʼaʼn tuʼn qonin tiʼj tukʼil pasens tuʼn tten mas qʼuqbʼil tkʼuʼj tiʼj Jehová ex tuʼn tok qeʼ tkʼuʼj kyiʼj erman (Judas 22, 23). ¿Tzma txinx teya moqa tzma qʼax teya ex kukx in xiʼya toj tja xnaqʼtzbʼil? Qa ma yolin aj xnaqʼtzal tiʼj xnaqʼtzbʼil qa mintiʼx jun bʼinchal tkyaqil, miʼn tzaj xobʼa, kolina tiʼj qʼuqbʼil tkʼuʼja qa at jun bʼinchal tkyaqil. Jakulo mas tbʼanel tmod aj xnaqʼtzal ex qe tukʼila ktel twitzju in kubʼ t-ximana.

21. ¿Tiʼ o tzaj ttziyen Jehová teyele te junjun qe?

²¹ Onin Jehová ex Jesús tiʼj Pedro tuʼn miʼn ttzaj xobʼtl ex tuʼn tchʼiy juntl maj qʼuqbʼil tkʼuʼj. Ex tej tbʼet ambʼil, ok Pedro te jun tbʼanel techel qwitz aju ten nimxix qʼuqbʼil tkʼuʼj. O tzaj ttziyen Jehová teyele te junjun qe qa qo tzajel tonin tuʼn tten jun qʼuqbʼil qkʼuʼj kyuw (kjawil uʼjit 1 Pedro 5:9, 10). Oklo kʼokel tilil quʼn tuʼn tbʼant jlu, noqtzun tuʼnj, ¡tbʼanelxix qa ma bʼant jlu quʼn!