1. a) ¿Tiʼ tzaj tqʼamaʼn apóstol Juan qe tuʼn tbʼant quʼn? b) ¿Tiquʼn il tiʼj tuʼn qximen tiʼj nimxix tkʼujlabʼil Jehová qiʼj?

TQʼAMA apóstol Juan jlu: «Che ximane tiʼj, maʼxix tkʼujlalil Qman Dios qiʼj» (1 Juan 3:1). Kyukʼil yol lu, tzaj tqʼamaʼn apóstol Juan qe tuʼn qximen tiʼj nimxix tkʼujlabʼil Jehová qiʼj ex tiʼj alkye tten in tzaj tyekʼun jlu qe. Qa ma qo ximen tiʼj jlu, kʼokel qamiwinxix qibʼ tukʼil Jehová ex kʼokel qkʼujlaʼn mastl.

2. ¿Tiquʼn kwest in nel toj kywitz junjun tuʼn tkubʼ kyximen qa kʼujlaʼn qeʼ tuʼn Dios?

² Noqtzun tuʼnj, bʼisbʼajilxix tuʼnju at junjun xjal mintiʼ in nok qeʼ kykʼuʼj tiʼj qa kʼujlaʼn qeʼ tuʼn Jehová. In kubʼ kyximen qa mintiʼ in ximen Dios kyiʼj. Qa oʼkx at Dios tuʼn kytzaj tqʼoʼn tkawbʼil moqa noq tuʼn tkubʼ tqʼoʼn kykastiw qeju mintiʼ in che nimen te. At junjun okslabʼil in kubʼ kyxnaqʼtzaʼn qa nya tbʼanel tmod Dios ex qa mlay bʼant tuʼn tten qkʼujlabʼil tiʼj. Atzun txqantl xjal in kubʼ kyximen qa kʼujlaʼn kykyaqil xjal tuʼn Dios noq tiʼxku in kubʼ kybʼinchaʼn. Atzun qe, o tzʼel qnikʼ tiʼj toj Tyol Dios ex ojtzqiʼn axix tok quʼn tiʼj Jehová. In tzaj tqʼamaʼn Tyol Dios qe qa kʼujlabʼil te ex qa  tuʼn tkʼujlabʼil lu, tzaj t-samaʼn Tkʼwaʼl tuʼn tkyim tuʼn qpaj (Juan 3:16; 1 Juan 4:8). Noqtzun tuʼnj, kukx atlo junjun tmajen Jehová kwest in nel toj kywitz tuʼn tkubʼ kyximen qa kʼujlaʼn qeʼ tuʼn Jehová. In kubʼlo kyximen jlu tuʼnju at jun tiʼ ikʼ toj kyanqʼibʼil.

3. ¿Tiquʼn jaku txi qqʼamaʼn qa kʼujlaʼn qoʼ tuʼn Jehová?

³ ¿Tiquʼn jaku txi qqʼamaʼn qa kʼujlaʼn qoʼ tuʼn Jehová? Tuʼnju a kubʼ bʼinchante qe ex o tzaj tqʼoʼn qchwinqlal (kjawil uʼjit Salmo 100:3-5). Kyjuʼtzun, in tzaj tqʼamaʼn Tyol Dios qa ok qʼoʼn tbʼi Adán te «tkʼwaʼl Dios» (Lucas 3:38). Ax ikx kyaj t-xnaqʼtzaʼn Jesús qa a Jehová Qtat (Mateo 6:9). Tuʼntzunju, kʼujlaʼn qoʼ tuʼn Jehová ik tzeʼn jun tbʼanel mambʼaj kʼujlaʼn qeʼ tkʼwaʼl tuʼn.

4. a) ¿Tzeʼn tmod Jehová tuʼnju jun Mambʼaj te? b) ¿Tiʼ kʼelel qnikʼ tiʼj toj xnaqʼtzbʼil lu ex toj juntl?

⁴ At junjun xjal ok bʼinchaʼn nya bʼaʼn kyiʼj tuʼn kytat tej tzmatoq tal kʼwaʼl qe. Tuʼntzunju, kwestlo in nel toj kywitz tuʼn tkubʼ kyximen qa jaku ten tkʼujlabʼil jun mambʼaj. Noqtzun tuʼnj, mlayx tzʼok tbʼinchaʼn Jehová nya bʼaʼn qiʼj. Ate mas tbʼanel Mambʼaj jaku ten qe (Salmo 27:10). Nimxix kʼujlaʼn qoʼ tuʼn ex in qo ok t-xqʼuqin te nimku tten. Ex qa mas xqnaʼ tkʼujlabʼil, mas ktel qkʼujlabʼil tiʼj (Santiago 4:8). Toj xnaqʼtzbʼil lu, kʼelel qnikʼ tiʼj kyaje tumel in tzaj tyekʼun Jehová tkʼujlabʼil qiʼj. Ex toj juntl xnaqʼtzbʼil kʼelel qnikʼ tiʼj kyaje tumel tzeʼn jaku t-xi qyekʼun te qa at qkʼujlabʼil tiʼj.

5. ¿Tiʼ in tzaj tqʼoʼn Jehová qe qkyaqilx?

⁵ Tej tten apóstol Pablo toj tnam Atenas, ok tqʼoʼn twitz tiʼj qa nojni tnam tuʼn kydios xjal ex qa in kubʼ kyximen xjal qa aqe kydios in tzaj qʼonte kychwinqlal. Tuʼntzunju, xi tqʼamaʼn Pablo kye qa a Jehová «aju Dios bʼinchante txʼotxʼ ex tkyaqilju at twitz». Ax ikx xi tqʼamaʼn kye qa «ax in qʼonte qchwinqlal ex qxew qkyaqil ex tkyaqilju at» ex qa «tuʼn Dios itzʼ qoʼ, ex tuʼn in qo yukch, ex tuʼn atoʼ» (Hechos 17:24, 25, 28). In tzaj tqʼoʼn Jehová tkyaqilju at tajbʼen qe tuʼn qanqʼin ex tuʼn qtzalaj tiʼj qchwinqlal. Qo xnaqʼtzan tiʼj junjun tiʼchaq o tzaj tqʼoʼn qe tuʼnju kʼujlaʼn qoʼ tuʼn.

6. ¿Tzeʼn najbʼil o tzaj tqʼoʼn Jehová qe tuʼn qanqʼin twitz? (Qʼonka twitza tiʼj tnejel tilbʼilal.)

⁶ Jun techel, o kubʼ tbʼinchaʼn Jehová jun tbʼanel qnajbʼil jatumel tuʼn qanqʼin (Salmo 115:15, 16). Kyxol kykyaqil planeta e kubʼ tbʼinchaʼn, oʼkxlo Txʼotxʼ jatumel atoʼ nim toklen. O tzʼel kynikʼ junjun aj xnaqʼtzal tiʼj qa ateʼtl txqantl planeta tiʼjxi Txʼotxʼ. Noqtzun tuʼnj, naʼmx tkanet jun kyuʼn jatumel jaku ten chwinqlal twitz. Nya oʼkx kubʼ tbʼinchaʼn Jehová Txʼotxʼ tuʼn qanqʼin twitz, ax ikx kubʼ tbʼinchaʼn tuʼn tok te tbʼanel, tuʼn qten bʼaʼn toj, tuʼn miʼn qtzaj xobʼ toj ex tuʼn qtzalaj tiʼj qchwinqlal twitz (Isaías 45:18). Qa ma qo ximen tiʼj tbʼanel Txʼotxʼ o tzaj tqʼoʼn Jehová qe, in nel qnikʼ tiʼj qa ax tok kʼujlaʼn qoʼ tuʼn Jehová (kjawil uʼjit Job 38:4, 7 ex Salmo 8:3-5).

7. ¿Alkye juntl tten o tzaj tyekʼun Jehová qa kʼujlaʼn qoʼ tuʼn?

⁷ Ax ikx o tzaj tyekʼun Jehová qa kʼujlaʼn qoʼ tuʼn tej qkubʼ tbʼinchaʼn tuʼn tkubʼ qyekʼun qmod ik tzeʼn te (Génesis 1:27). Tuʼntzunju, jaku qnaʼ tkʼujlabʼil ex jaku ten qkʼujlabʼil tiʼj. Ojtzqiʼn tuʼn Jehová qa in tzaj tiʼn jlu ax tok tzalajbʼil qe, ik tzeʼn qe kʼwaʼl in che tzalaj qa in kynaʼn tkʼujlabʼil kytat. Ax ikx kyaj t-xnaqʼtzaʼn Jesús qa qo tzalajel qa ma qo ok laqʼeʼ ttxlaj Jehová (Mateo 5:3). In tzaj tqʼamaʼn Tyol Dios qa «tkyaqil in tzaj tqʼoʼn Dios qe ex nimxix in tzaj tqʼoʼn tuʼn qtzalaj tiʼj» (1 Timoteo 6:17). Qʼanchaʼlxix qa in tzaj tqʼoʼn Jehová nim tiʼchaq qe ex qa kʼujlaʼn qoʼ tuʼn (Salmo 145:16).

8. ¿Tiquʼn qajbʼil tuʼn qtzaj t-xnaqʼtzaʼn Jehová?

⁸ Aʼyeju tatbʼaj kʼujlaʼn kykʼwaʼl kyuʼn, kyajbʼil tuʼn tel bʼaʼn tkyaqil kye kykʼwaʼl toj kyanqʼibʼil. Noqtzun tuʼnj, at nim tatbʼaj toj ambʼil jaʼlo mintiʼ in xi kynimen aju in tzaj tqʼamaʼn Tyol Dios. Tuʼntzunju, mintiʼ in bʼant tuʼn t-xi kyxnaqʼtzaʼn kykʼwaʼl tiʼj alkyexix bʼaʼn ex alkyexix nya bʼaʼn. Tuʼn jlu, mintiʼ in che tzalaj kykʼwaʼl ex mintiʼ in nel kynikʼ tiʼj tiʼ jaku bʼant (Proverbios 14:12). Atzunte Jehová in tzaj tqʼoʼn aju mas tbʼanel onbʼil kye tkʼwaʼl, tuʼnju ate «Dios axix tok» (Salmo 31:5). In tzaj t-xnaqʼtzaʼn qe aju axix tok tiʼj ex tzeʼn jaku qo ajbʼen te. Ax ikx in qo tzaj t-xnaqʼtzaʼn tiʼj alkye mas tbʼanel qanqʼibʼil jaku ten (kjawil uʼjit Salmo 43:3). Qo xnaqʼtzan tiʼj alkyeqe xnaqʼtzbʼil in tzaj t-xnaqʼtzaʼn Jehová qe aju in tzaj tyekʼun qa nimxix tkʼujlabʼil qiʼj.

9, 10. a) ¿Tiquʼn in qo tzaj t-xnaqʼtzaʼn Jehová tiʼj alkye te? b) ¿Tiʼ in tzaj t-xnaqʼtzaʼn Jehová qiʼj?

⁹ Tnejel, in qo tzaj t-xnaqʼtzaʼn Jehová tiʼj junjun tiʼchaq nim toklen tiʼj tuʼnju tajbʼil tuʼn tok qojtzqiʼn alkyete (Santiago 4:8). Kyjuʼtzun, in tzaj t-xnaqʼtzaʼn tbʼi qe. Axpe ikx mas in kanet tbʼi quʼn toj Tuʼjil Tyol twitz alkyexku juntl bʼibʼaj. Ax ikx in tzaj tqʼamaʼn Tyol Dios alkyeqe tmod Jehová. Jun techel, qa ma tzʼok qqʼoʼn qwitz tiʼj tbʼinchbʼen, in nel qnikʼ tiʼj qa at tnabʼil ex qa at tipumal (Romanos 1:20). Ex qa ma kubʼ quʼjin Tyol, in nel qnikʼ tiʼj qa tzʼaqli te ex qa kʼujlaʼn qoʼ tuʼn. Qa mas sok qojtzqiʼn Jehová, mas qo okel laqʼeʼ ttxlaj.

¹⁰ Ax ikx in qo tzaj t-xnaqʼtzaʼn Jehová tiʼj junjun tiʼchaq nim toklen qiʼj. In tzaj tqʼamaʼn qe qa tzajni qoʼ kyiʼj toj tja. Ax ikx in tzaj tqʼamaʼn qe tiʼ kbʼantel quʼn tuʼn qajbʼen  te toj mujbʼabʼil. In tzaj tqʼamaʼn Tyol Dios qa mintiʼ o qo kubʼ tbʼinchaʼn Jehová tukʼil ambʼil tuʼn tkubʼ qximen alkye bʼaʼn ex alkye nya bʼaʼn (Jeremías 10:23). Ojtzqiʼn tuʼn alkye jaku tzaj tiʼn mas tbʼanel qe. Tuʼntzunju, oʼkx qa ma txi qbʼiʼn ex qa ma qo nimen te qo tzalajel ex qo tel toj mujbʼabʼil. Aju ax tok nim toklen lu, o tzaj tyekʼun Jehová qe tuʼnju kʼujlaʼn qoʼ tuʼn.

11. ¿Tzeʼn ambʼil in tzaj ttziyen Jehová qe?

¹¹ Aju jun tbʼanel mambʼaj, in tzaj bʼaj tkʼuʼj tiʼjju jaku tzaj kyiʼj tkʼwaʼl toj ambʼil tzul ex tajbʼil tuʼn kytzalaj. Noqtzun tuʼnj, chʼixmi kykyaqil xjal toj ambʼil jaʼlo mintiʼ ojtzqiʼn kyuʼn tiʼ ktzajel kyiʼj toj ambʼil tzul. In bʼaj kynajsaʼn kyanqʼibʼil tiʼj aqʼuntl tuʼn tbʼant junjun tiʼchaq aju mlay ten toj nim ambʼil (Salmo 90:10). Tuʼntzunju, nimxix in xi qqʼoʼn chjonte tuʼnju o qo tzaj t-xnaqʼtzaʼn Jehová tuʼn qtzalaj jaʼlo ex o tzaj ttziyen jun tbʼanel ambʼil qe toj ambʼil tzul.

12. ¿Alkye tten onin Jehová tiʼj Caín ex tiʼj Baruc?

¹² Tej ttzaj tqʼoʼn Jehová twitz tiʼj qa chʼixtoq tkubʼ tbʼinchaʼn Caín jun tiʼ puro nya bʼaʼn, ok tilil tuʼn, tuʼn tonin tiʼj. Xi tqʼamaʼn te tuʼn tkubʼ tchewsaʼn tqʼoj ex tuʼn tkubʼ tchʼixpuʼn tmod. Qa ma bʼanttoq jlu tuʼn, tzultoq kʼiwlaʼn tuʼn Jehová (Génesis 4:6, 7). Mintiʼ xi tbʼiʼn Caín jlu ex tzaj nim nya bʼaʼn tiʼj tuʼn (Génesis 4:11-13). Toj juntl maj, ok tqʼoʼn Jehová twitz tiʼj qa aju jun tmajen aju Baruc tbʼi, otoq sikti ex in tzajtoq tbʼis tuʼnju attoq jun nya bʼaʼn t-ximbʼetz at. Kyjuʼtzun, xi tqʼamaʼn Jehová te qa iltoq tiʼj tuʼn tkubʼ tchʼixpuʼn t-ximbʼetz. Xi tbʼiʼn Baruc, ex a jlu onin tiʼj tuʼn tkyaj anqʼin (Jeremías 45:2-5).

13. ¿Alqiʼj kubʼ kyxnaqʼtzan kyibʼ tmajen Jehová ojtxe tej ttzaj nimxix nya bʼaʼn kyiʼj?

¹³ In tzaj tqʼoʼn Jehová onbʼil ex kawbʼil qe tuʼnju kʼujlaʼn qoʼ tuʼn. Nya oʼkx in qo tzaj tkawin qa il tiʼj, ax ikx in qo tzaj tonin tuʼn qok te mas tbʼanel xjal (Hebreos 12:6). Onin Jehová kyiʼj tmajen ojtxe tuʼn kyok te mas tbʼanel xjal. Ik tzeʼn te José, Moisés ex David, xi tqʼoʼn Jehová ambʼil tuʼn tikʼ nimxix nya bʼaʼn kyiʼj. A jlu onin kyiʼj tuʼn tkubʼ kyxnaqʼtzan kyibʼ tiʼj junjun tiʼchaq aju ajbʼen kyuʼn tej t-xi tqʼoʼn Jehová mas kyoklen. Aj tkubʼ quʼjin toj Tyol Dios alkye tten tzaj tqʼoʼn Jehová onbʼil kye tmajen ex alkye tten onin kyiʼj tuʼn kyok te mas tbʼanel xjal, in nel qnikʼ tiʼj qa nimxix tkʼujlabʼil qiʼj (kjawil uʼjit Proverbios 3:11, 12).

14. ¿Alkye tten in tzaj tyekʼun Jehová tkʼujlabʼil qiʼj qa ma kubʼ qbʼinchaʼn junjun tiʼ nyaxix toj tumel?

¹⁴ Qa ma kubʼ qbʼinchaʼn junjun tiʼ nyaxix toj tumel, in tzaj tyekʼun Jehová tkʼujlabʼil qe qa ma tzaj qkʼamoʼn tkawbʼil. ¿Alkye tten in bʼant tuʼn? Aju t-sanjel Dios Isaías tbʼi tqʼama qa «ate Dios at nim xtalbʼil tukʼil tuʼn tkubʼ tnajsaʼn kyil xjal» (Isaías 55:7). Ex aju aj kawil David tqʼama jlu tiʼj Jehová: «Ate Qman in kubʼ najsante tkyaqil wile, in chin bʼanixe tuʼn tuj tkyaqil nyabʼile. Ate Qman in klonte weye te kamik ex txolin wiʼje tuʼn tkʼujlalil ex tuʼn tqʼaqʼbʼil tkʼuʼj» (Salmo 103:3, 4, 12). Ik tzeʼn in nel qnikʼ tiʼj, tajbʼil Jehová tuʼn tkubʼ tnajsaʼn qil toj tkyaqil ambʼil. Noqtzun tuʼnj, il tiʼj tuʼn ttzaj qkʼamoʼn onbʼil ex kawbʼil in tzaj tqʼoʼn qe ex tuʼn tkubʼ qchʼixpuʼn aju il tiʼj tuʼn tbʼant. Bʼaʼn tuʼn ttzaj qnaʼn qa in qo tzaj tkawin Jehová tuʼnju kʼujlaʼn qoʼ tuʼn (Salmo 30:5).

15. ¿Alkye juntl tumel in tzaj tyekʼun Jehová qe qa kʼujlaʼn qoʼ tuʼn?

¹⁵ Aju jun tbʼanel mambʼaj, in che ok t-xqʼuqin tkʼwaʼl tiʼj nya bʼaʼn. Ax jlu in bʼant tuʼn Jehová qukʼil. In tzaj tqʼamaʼn Salmo 97:10 qa in kolin Jehová tiʼj kychwinqlal qeju kukx in che ajbʼen te ex in che kyklet tuʼn kyiʼj xjal nya bʼaʼn. Ximana tiʼj jlu: aj tel  qnikʼ tiʼj qa at jun tiʼ taj tuʼn tokx toj qwitz, jurat naj in qo kolin tiʼj qwitz. Ax ikx te Jehová, jurat naj in qo ok t-xqʼuqin qa at jun nya bʼaʼn chʼix ttzaj qiʼj. In bʼant jlu tuʼn tuʼnju kʼujlaʼn qoʼ tuʼn (kjawil uʼjit Zacarías 2:8).

16, 17. ¿Alkye tten in che ok t-xqʼuqin Jehová tmajen?

¹⁶ Kukx o che ajbʼen anjel tuʼn Jehová tuʼn kyok t-xqʼuqin tmajen (Salmo 91:11). Jun techel, toj junx qonikʼan e kyim 185,000 soldad tuʼn jun anjel tuʼn tkolin tiʼj ttnam Jehová (2 Reyes 19:35). Toj ambʼil tej kyten tnejel okslal, i etz Pedro, Pablo ex junjuntl toj cárcel kyuʼn anjel (Hechos 5:18-20; 12:6-11). Tzma in nikʼ chʼin ambʼil jaʼlo, ok jun qʼoj toj tnam África aju tzaj tiʼn nim nya bʼaʼn. Attoq bʼiybʼel, attoq elqʼabʼil, at nim xjal e kubʼ byolarin ex e kyim nim xjal toj tkyaqil tnam. Mintiʼx jun testigo de Jehová kyim, noqtzun tuʼnj, at nim xi naj tkyaqil tiʼchaq kye. Kukx kubʼ kynaʼn qa e ok xqʼuqin tuʼn Jehová. Otoq tzikʼ nim nya bʼaʼn kyiʼj, noqtzun tuʼnj, kukx e tzalaj. Tej tkanin jun kyxol qeju qʼil twitz aqʼuntl twitz tkyaqil Txʼotxʼ kyukʼil ex tej t-xi tqanin kye tzeʼn ateʼ. Tzaj kyqʼamaʼn qa tkyaqil bʼaʼn taʼ tuʼn onbʼil in tzaj tqʼoʼn Jehová.

¹⁷ Noqtzun tuʼnj, ax ikx at junjun tmajen Dios o che kubʼ bʼyoʼn tuʼnju kukx in che ajbʼen te Dios. Ik tzeʼn ikʼ tiʼj Esteban, aju jun t-xnaqʼtzbʼen Jesús, ex junjuntl. A jlu in tzaj tyekʼun qa at maj in tzaj tqʼoʼn Jehová ambʼil tuʼn kykyim tmajen. Noqtzun tuʼnj, ax tok in nok t-xqʼuqin ttnam aj ttzaj tqʼoʼn tqanil kye tiʼj junjun ttramp Satanás (Efesios 6:10-12). Jaku che kanet kawbʼil lu quʼn toj Tuʼjil Tyol ex kyoj onbʼil in che etz tuʼn ttnam. Jun techel, in tzaj tqʼamaʼn Jehová qa aju junjun tembʼil te Internet, aju kʼujlabʼil tiʼj pwaq ex aju junjun película, junjun uʼj, junjun videojuegos ateʼkux yaẍbʼil ex bʼiybʼil kyoj nya bʼaʼn qe. Qʼanchaʼlxix qa kʼujlaʼn qoʼ tuʼn Jehová ex tajbʼil tuʼn qok t-xqʼuqin.

18. ¿Tiʼ in kubʼ tnaʼna tuʼnju in nel tnikʼa qa at tkʼujlabʼil Jehová tiʼja?

¹⁸ Tej t-ximen Moisés tiʼj tkyaqil ambʼil ajbʼen te Jehová, ok qʼuqeʼ tkʼuʼj tiʼj qa kʼujlaʼn tuʼn Dios. Tuʼntzunju tqʼama jlu: «Qo tnojsama tuʼn tkʼujlalila ok tkubʼ qʼij, ex qo bʼitzale tuʼn tzalajbʼil tuj tkyaqil qʼij te qanqʼibʼle» (Salmo 90:14). Qnaʼntz qeju yol tqʼama apóstol Juan: «Che ximane tiʼj, maʼxix tkʼujlalil Qman Dios qiʼj» (1 Juan 3:1). Aj tel qnikʼ ex aj tkubʼ qnaʼn tkʼujlabʼil Jehová, ¡in kubʼ qnaʼn qa nimxix qoklen o tzaj tqʼoʼn!