1, 2. ¿Tiʼ qajbʼil qkyaqilx aqoʼ in qo ajbʼen te Jehová? Qʼamantza jun techel.

QA MA qoʼx laqʼol jun qloʼ toj kʼaybʼil, ¿tiʼ in nok qqʼoʼn qwitz tiʼj? In noklo qqʼoʼn qwitz tiʼj qa nya nim twiʼ. Noqtzun tuʼnj, maslo in nok qqʼoʼn qwitz tiʼj qa nya ojtxe tkutz qʼiʼn tiʼj tqan, qa tbʼanel taʼ ex qa jaku txi qloʼn. Ojtzqiʼn quʼn qa aju mas tbʼanel qloʼ aju otoq qʼanax.

² Aj tel qnikʼ tiʼj Jehová ex aj tjaw aʼ qwiʼ, ax ikx qajbʼil tuʼn qchʼiy toj qokslabʼil (toj qnimbʼil). Noqtzun tuʼnj, nya atz in qo yolin tiʼj tuʼn qtijen. Atz in qo yolin tiʼj tuʼn kyten tbʼanel qmod ex tuʼn qokxix te tbʼanel tamiw Jehová. Xi tqʼamaʼn apóstol Pablo kye okslal te tnam Éfeso qa ok che chʼiyil toj kyokslabʼil ik tzeʼn te Jesucristo qa at mujbʼabʼil kyxol ex qa kukx sel kynikʼ tiʼj Jesús (Efesios 4:13).

3. ¿Tiʼ ax in bʼaj kyoj nimku Ja te Chmabʼil jaʼlo aju ik tten ik tzeʼn bʼaj kyxol kʼloj okslal te Éfeso?

³ Tej t-xi ttzʼibʼin apóstol Pablo uʼj kye kʼloj okslal te Éfeso, attoq nim okslal otoq che chʼiy toj kyokslabʼil ex otoq tzikʼ nim ambʼil in che ajbʼen te Dios. Noqtzun tuʼnj, ax ikx attoq junjun okslal kyxol aʼyeju kukxtoq il tiʼj tuʼn tkubʼ kychʼiysaʼn kyamiwbʼil tukʼil Dios. Ax  jlu in bʼaj kyoj nimku Ja te Chmabʼil jaʼlo. At nim erman ma tzikʼ nim ambʼil in che ajbʼen te Jehová. Ex at junjuntl naʼmx kychʼiy toj kyokslabʼil. Kyxol qe jlu, ateʼ qeju in jaw aʼ kywiʼ tkyaqil abʼqʼi. Kykyaqil qe jlu il tiʼj tuʼn tok tilil kyuʼn tuʼn kychʼiy toj kyokslabʼil. ¿Yajtzun teya? ¿Ope chʼiya toj tokslabʼila? (Colosenses 2:6, 7.)

4, 5. a) ¿Kykyaqilpe okslal ma che chʼiy tok kyokslabʼil junx qe? b) ¿Alkye junjun yekʼbʼil in tzaj tyekʼun qa ma che chʼiy okslal toj kyokslabʼil? (Qʼonka twitza tiʼj tnejel tilbʼilal.)

⁴ Qa ma tzʼok qqʼoʼn qwitz kyiʼj qloʼ toj kʼaybʼil, aʼyeju otoq che qʼanax, nya kykyaqil junx kyilbʼilal kywitz txqantl. Noqtzun tuʼnj, at junjun tiʼchaq tok kyiʼj aju in tzaj tyekʼun qa ma che qʼanax. Chʼixmi axju in bʼaj kyukʼil okslal ma che chʼiy toj kyokslabʼil. Nya junx qe kykyaqil. Junxitl kyabʼqʼi, junxitl kytnam ex junxitl aju kygan. Noqtzun tuʼnj, at junjun yekʼbʼil in kubʼ kyyekʼun qa ma che chʼiy toj kyokslabʼil. ¿Alkyeqe yekʼbʼil lu?

⁵ Aʼyeju okslal ma che chʼiy toj kyokslabʼil, in nok tilil kyuʼn tuʼn tel kykanoʼn techel kyaj tqʼoʼn Jesús (1 Pedro 2:21). Tqʼama Jesús qa il tiʼj tuʼn tok qkʼujlaʼn Jehová tuʼn tkyaqil qanmi, tuʼn tkyaqil qkʼuʼj ex tuʼn tkyaqil qnabʼil. Ax ikx tqʼama qa il tiʼj tuʼn kyok qkʼujlaʼn txqantl xjal ik tzeʼn in nok qkʼujlan qibʼ (Mateo 22:37-39). Aʼyeju okslal ma che chʼiy toj kyokslabʼil, in nok tilil kyuʼn tuʼn t-xi kybʼiʼn kawbʼil lu. In kubʼ kyyekʼun tukʼil tten kyanqʼibʼil qa aju mas nim toklen toj kywitz aju tuʼn kyok te tamiw Jehová ex tuʼn tten kykʼujlabʼil kyiʼj txqantl.

6, 7. a) Nya oʼkx kʼujlabʼil in kubʼ kyyekʼun okslal qa ma che chʼiy toj kyokslabʼil, ¿alkye junjuntl kymod in kubʼ kyyekʼun? b) ¿Alkye xjel il tiʼj tuʼn qximen tiʼj?

⁶ Noqtzun tuʼnj, ax ikx in nel qnikʼ tiʼj qa nya oʼkx kʼujlabʼil in kubʼ kyyekʼun okslal ma che chʼiy toj kyokslabʼil tuʼnju nya oʼkx kʼujlabʼil in tqʼoʼn xewbʼaj xjan (Gálatas 5:22, 23). Ax ikx tbʼanel xjal qe, mintiʼ in che jaw kyaqpaj ex at kypasens. Ojtzqiʼn kyuʼn tiʼ jaku bʼant kyuʼn aj ttzaj jun nya bʼaʼn, ex qa at jun tiʼ miʼn xjapun twiʼ ik tzeʼn xkubʼ kyximen, in nikʼx bʼis kyuʼn tukʼil qʼuqbʼil kykʼuʼj. Aj kyxnaqʼtzan tiʼj Tyol Dios, in che jyon tiʼj nabʼil aju jaku tzʼonin kyiʼj tuʼn tel kynikʼ tiʼj alkye bʼaʼn ex alkye nya bʼaʼn ex tuʼntzun tajbʼen kyuʼn aj tkubʼ kybʼinchaʼn jun tiʼ. In kubʼ kyin kyibʼ ex in nel kynikʼ tiʼj qa, toj tkyaqil ambʼil, mas bʼaʼn tuʼn kyxi kybʼiʼn tkawbʼil Jehová. * (Qʼonka twitza tiʼj tqanil t-xe t-xaq uʼj.) Ax ikx in nok tilil kyuʼn tuʼn kypakbʼan ex in ok tilil kyuʼn tuʼn tten mujbʼabʼil toj ttnam Jehová.

⁷ Noq jniʼxku ambʼil iqʼin quʼn in qo ajbʼen te Jehová, qkyaqilx il tiʼj tuʼn qximen tiʼj xjel lu: «¿Tiʼ atx tuʼn tbʼant wuʼne tuʼn wokxixe ik tzeʼn Jesús?». Qo xnaqʼtzan tiʼj oxe tiʼ kʼonil qiʼj tuʼn qchʼiy toj qokslabʼil ik tzeʼn te Jesucristo.

8. ¿Tiquʼn in xi qqʼamaʼn qa ojtzqiʼnxixtoq Tyol Dios tuʼn Jesús ex in nelxixtoq tnikʼ tiʼj?

⁸ Ojtzqiʼnxixtoq Tyol Dios tuʼn Jesús ex in nelxixtoq tnikʼ tiʼj. Ik tzeʼn tej oʼkx 12 abʼqʼi iqʼin tuʼn, kyaj ten toj tja Dios tuʼn tyolin kyukʼil aj xnaqʼtzal tiʼjju in tzaj t-xnaqʼtzaʼn Tyol Dios. Kykyaqil qeju ok kybʼiʼn tyol, e jaw labʼin tiʼj (Lucas 2:46, 47). Tej tbʼet ambʼil, ajbʼen Tyol Dios tuʼn tojxix tumel ex ya mintiʼ juntl kyyol aj qʼoj xi kyqʼamaʼn te (Mateo 22:41-46).

9. a) Qa qajbʼil tuʼn qchʼiy toj qokslabʼil, ¿alkye tajlal il tiʼj tuʼn qok lepeʼ tiʼj? b) Aj qxnaqʼtzan tiʼj Tyol Dios, ¿tiʼ il tiʼj tuʼn tok tilil quʼn?

⁹ Qa qajbʼil tuʼn qchʼiy toj qokslabʼil, il tiʼj  tuʼn tbʼant quʼn aju bʼant tuʼn Jesús. Mintiʼ tuʼn tqeʼ qkʼuʼj oʼkx tiʼj junjun xnaqʼtzbʼil nya kwest tuʼn tel qnikʼ tiʼj. Il tiʼj tuʼn tok tilil quʼn tuʼn tel qnikʼ kyiʼj xnaqʼtzbʼil mas nim kyoklen ateʼkux toj Tyol Dios, tuʼnju aju «wabʼj in ajbʼen kye qeju ma che chʼiy, ex ma tzʼok kynabʼl» (Hebreos 5:14). Il tiʼj tuʼn tok «qojtzqintexix» Tyol Dios (Efesios 4:13). Tuʼn tbʼant jlu quʼn, il tiʼj tuʼn qok lepeʼ tiʼj jun tajlal xnaqʼtzbʼil tiʼj Tyol Dios. Ik tzeʼn tuʼn tkubʼ quʼjin Tyol Dios tkyaqil qʼij ex tuʼn xnaqʼtzan qjunalx ex kyukʼil toj qja tkyaqil seman. Aj xnaqʼtzan tiʼj Tyol Dios, il tiʼj tuʼn tok tilil quʼn tuʼn tel qnikʼ tiʼj alkye t-ximbʼetz Jehová ex tiʼ in tnaʼn, ex jakutzun tzʼajbʼen lu quʼn tuʼn tkubʼ qbʼinchaʼn junjun tiʼchaq. Qa ma bʼant jlu quʼn, kchʼiyil qamiwbʼil tukʼil Jehová.

10. ¿Alkye tten in kubʼ kyyekʼun okslal ma che chʼiy toj kyokslabʼil qa kʼujlaʼn kyuʼn aʼyeju nabʼil in tzaj tqʼoʼn Dios?

¹⁰ Nya oʼkx ojtzqiʼn Tyol Dios kyuʼn okslal ma che chʼiy toj kyokslabʼil, ax ikx kʼujlaʼn kyuʼn aʼyeju nabʼil in tzaj tqʼamaʼn Dios. ¿Alkye tten in kubʼ kyyekʼun? In kubʼ kyyekʼun aj tok tilil kyuʼn tuʼn tajbʼen kyanqʼibʼil tuʼn tkubʼ kybʼinchaʼn tajbʼil Dios, maske il tiʼj tuʼn tkubʼ kychʼixpun tten kyanqʼibʼil, kyximbʼetz ex aju alkye tten in bʼant junjun tiʼchaq kyuʼn. In nel kykanoʼn techel kyaj tqʼoʼn Jesús ex in kubʼ kychʼixpuʼn ojtxe kyten tukʼil tbʼanel kymod tuʼn kyok te «tzʼaqlxix ex xjan» (kjawil uʼjit Efesios 4:22-24). Bʼaʼn tuʼn ttzaj qnaʼn qa ajbʼen xewbʼaj xjan tuʼn Dios tuʼn tonin kyiʼj xjal aʼyeju kubʼ kytzʼibʼin Tyol Dios. Tuʼntzunju, aj tkubʼ t-xnaqʼtzaʼn jun okslal  Tyol Dios, in nonin xewbʼaj xjan tiʼj tuʼn tten mas tojtzqibʼil, mas tkʼujlabʼil, ex in nok te jun tbʼanel tamiw Jehová.

11. ¿Tzeʼntoq qe xjal ateʼtoq ttxlaj Jesús tej tten twitz Txʼotxʼ?

¹¹ Tej tten Jesús twitz Txʼotxʼ, ok te jun xjal tzʼaqli. Noqtzun tuʼnj, aju ttat, aju tnan, aʼyeju titzʼin ex qe txqantl xjal ateʼtoq ttxlaj nyatoq tzʼaqli qe. Axpe ikx at maj jaw kyin kyibʼ qeju e ok lepeʼ tiʼj ex oʼkx e ximen kyiʼjx. Jun techel, toj qonikʼan tej chʼixtoq tkyim Jesús e ok ten t-xnaqʼtzbʼen qʼojil tiʼj alkye jun mas nim toklen kyxol (Lucas 22:24). Noqtzun tuʼnj, kukx ok qʼuqeʼ tkʼuʼj kyiʼj qa oktoq che chʼiyil toj kyokslabʼil ex qa che oniltoq tuʼn tten mujbʼabʼil kyxol kʼloj okslal. Kyjuʼtzun, tojx qonikʼan aju, xi tqanin te Jehová tuʼn tonin kyiʼj t-xnaqʼtzbʼen tuʼn tten mujbʼabʼil kyxol ik tzeʼn at kyxol tukʼil ttat. Xi tqʼamaʼn jlu: «Tuʼntzun kyok junx, ik tzaʼn qe junx qoʼ» (Juan 17:21, 22).

12, 13. a) ¿Tiʼ il tiʼj tuʼn qximen tiʼj qkyaqilx? b) ¿Alkye tten el tnikʼ jun erman tiʼj tuʼn tonin tuʼn tten mujbʼabʼil kyxol erman?

¹² Aʼyeju okslal ma che chʼiy toj kyokslabʼil, in nok tilil kyuʼn tuʼn kyonin tuʼn tten mujbʼabʼil kyxol erman (kjawil uʼjit Efesios 4:1-6, 15, 16). Qkyaqilx il tiʼj tuʼn qximen tiʼj alkye tten tuʼn qaqʼunan kyukʼil qerman toj mujbʼabʼil. Tuʼn tbʼant jlu, il tiʼj tuʼn tkubʼ qin qibʼ. Jun techel, qa at jun erman ma kubʼ tbʼinchaʼn jun tiʼ ex nya bʼaʼn sel toj qwitz, ¿tiʼ in bʼant quʼn? ¿Ya mintiʼ in qox yolintl te? ¿Moqa in nok tilil quʼn tuʼn tkyaj nya bʼaʼn toj ttxolil? Qa ma qo chʼiy toj qokslabʼil, ok kʼokel tilil quʼn tuʼn tkyaj nya bʼaʼn toj ttxolil ex tuʼn miʼn t-xi qqʼoʼn toj il.

¹³ Qo ximen tiʼj jun erman aju Uwe tbʼi. Nimxixtoq in tzaj tqʼoj aj tkubʼ kybʼinchaʼn erman junjun nyaxix toj tumel. Noqtzun tuʼnj, pon jun qʼij jatumel kubʼ t-ximen tuʼn t-xnaqʼtzan tiʼjju ikʼ tiʼj David ex ajbʼen Tyol Dios tuʼn tukʼil uʼj Perspicacia. ¿Tiquʼn jaw tjyoʼn aju ikʼ tiʼj David? Tuʼnju ax ikx te David tzaj nya bʼaʼn kyxol kyukʼil junjuntl tmajen Dios. Ik tzeʼn te Saúl, tajtoq tuʼn tkubʼ tbʼiyoʼn David. Toj juntl maj, kyajbʼiltoq aj Israel tuʼn tok kyxoʼn abʼj tiʼj. Axpe ikx toj juntl qʼij, ok ten t-xuʼjil xmayil tiʼj (1 Samuel 19:9-11; 30:1-6; 2 Samuel 6:14-22). Ikʼ tkyaqil jlu tiʼj David, noqtzun tuʼnj, kukx ten tkʼujlabʼil tiʼj Jehová ex kukx ok qʼuqeʼ tkʼuʼj tiʼj. Ax ikx ok te jun xjal aju tzaj qʼaqʼin tkʼuʼj kyiʼj txqantl. Tuʼn tkyaqilju bʼaj t-xnaqʼtzan Uwe, el tnikʼ tiʼj qa iltoq tiʼj tuʼn tel tkanoʼn techel kyaj tqʼoʼn David ex tuʼn tkubʼ tchʼixpuʼn t-ximbʼetz tiʼj junjun tiʼ in bʼant kyuʼn erman aju nyaxix toj tumel. Ax ikx el tnikʼ Uwe qa iltoq tiʼj tuʼn t-xi t-xnaqʼtzan tibʼ tuʼn tkubʼ tnajsaʼn kyil txqantl ex tuʼn tonin tuʼn tten mujbʼabʼil kyxol erman. Qkyaqilxlo il tiʼj tuʼn tel qkanoʼn techel lu.

14. ¿Alkyeqe e jaw tjyoʼn Jesús tuʼn kyok te tamiw?

¹⁴ Tbʼaneltoq xjal te Jesús kyukʼil kykyaqil xjal. Ok tilil tuʼn, tuʼn kyten xjal bʼaʼn tukʼil, qa xinaq, moqa ichan, qa xuʼj, qa kʼwaʼl ex qa tij xjal. Noqtzun tuʼnj, mintiʼ ok tamiwin tibʼ tukʼil alkyexku xjal. Jun maj, xi tqʼamaʼn jlu kye t-apóstol: «Aqeye che okele te wamiwoye qa ma kybʼinchaye aju kxel nmaʼne kyeye» (Juan 15:14). Oʼkx jaw tjyoʼn Jesús tuʼn kyok te tamiw aqeju e ok lepeʼxix tiʼj ex in che ajbʼentoq te Jehová tuʼn tkyaqil kyanmi. Ax ikx qe, nim toklen tuʼn tjaw qjyoʼn qe qamiw kyxol qeju ax tok kʼujlaʼn Jehová kyuʼn. ¿Tiquʼn?

15. ¿Tiquʼn bʼaʼn tuʼn tok kyamiwin kyibʼ kuʼxin kyukʼil qeju ma che chʼiy toj kyokslabʼil?

¹⁵ Aʼyeju kywitz tzeʼ mas in che qʼanax qa in nok tqan qʼij kyiʼj. Aju kʼujlabʼil kyxol erman toj jun kʼloj okslal ik tten ik tzeʼn tqan  qʼij. ¿Tiquʼn? Tuʼnju in nonin kyiʼj okslal tuʼn kychʼiy toj kyokslabʼil. Aya kuʼxin, ¿ojtzqiʼntl tuʼna tiʼ kbʼel tbʼinchaʼna toj tanqʼibʼila? Qa tajbʼila tuʼn tjaw tjyoʼna aju mas bʼaʼn, amiwink tibʼa kyukʼil erman ma bʼet ambʼil in che ajbʼen te Jehová ex in che onin tuʼn tten mujbʼabʼil kyxol erman. O tzikʼxi nim nya bʼaʼn kyiʼj ex jaku che onin tiʼja tuʼn tjaw tjyoʼna aju mas tbʼanel anqʼibʼil. Qa ma tzʼel tpaʼna ambʼil tuʼn ttena kyukʼil, ok che onil tiʼja tuʼn tjaw tjyoʼna aju mas bʼaʼn ex tuʼn tchʼiya toj tokslabʼila (kjawil uʼjit Hebreos 5:14).

16. ¿Alkye tten e onin okslal ma che chʼiy toj kyokslabʼil tiʼj jun ermana tej tzmatoq txin?

¹⁶ At jun ermana Helga tbʼi, in tzaj tqʼamaʼn qa tej chʼixtoq tetz bʼaj xnaqʼtzbʼil tuʼn toj tja xnaqʼtzbʼil, chʼixmi kykyaqil qe tukʼil in che yolin tiʼjju kbʼantel kyuʼn. Nimtoq in kyqʼamaʼn qa kyajtoq tuʼn kyxiʼ xnaqʼtzal toj tja nimaq xnaqʼtzbʼil tuʼntzun tetz jun kyxnaqʼtzbʼil aju jaku tzʼonin kyiʼj tuʼn tkanet jun tbʼanel kyaqʼun. Noqtzun tuʼnj, kubʼ t-ximen Helga tuʼn t-xi tqanin tnabʼil kye erman otoq tzʼok kynabʼil atz jatumel in nok tchmon tibʼ. Kyxol qe jlu, mas nimtoq kyabʼqʼi twitz. Tqʼama Helga qa nimxix e onin qe tiʼj ex qa e onin tiʼj tuʼn tajbʼen toj tkyaqil ambʼil te Dios. Ex tuʼnju nabʼil tzaj kyqʼoʼn te, ok te precursora toj jweʼ abʼqʼi. Ma tzikʼ nim ambʼil tbʼajlen jlu, noqtzun tuʼnj, mintiʼ in tzaj tbʼis Helga tuʼnju ajbʼenxix te Jehová tej tzmatoq txin.

17, 18. Qa qajbʼil tuʼn qajbʼen mastl tuʼn Jehová, ¿tiʼ kbʼantel quʼn?

¹⁷ Qa ma tzʼel qkanoʼn techel kyaj tqʼoʼn Jesús, ok qo chʼiyil toj qokslabʼil. Nya oʼkxju, ax ikx kʼokel qamiwinxixtl qibʼ tukʼil Jehová ex ktel mastl qajbʼil tuʼn qajbʼen te. Iktzun tten qo ajbʼelxix tuʼn Jehová. Xi tqʼamaʼn Jesús kye qeju e ok lepeʼ tiʼj: «Tuʼn tkʼant kyspikʼumale kywitz xjal, tuʼn kylonte aju kyaqʼunbʼene bʼaʼn ex tuʼn tjaw kynimsaʼn tbʼi Kymane aju at tuj kyaʼj» (Mateo 5:16).

¹⁸ Ik tzeʼn ma tzʼel qnikʼ tiʼj, aʼyeju okslal ma che chʼiy toj kyokslabʼil nim jaku che onin toj ttnam Dios. Ax ikx in nel nikʼbʼaj kyiʼj qa ma che chʼiy toj kyokslabʼil tuʼnju alkye tten in najbʼen kynabʼil kyuʼn. ¿Alkye tten in qo tzaj tonin aju in qnaʼn tuʼn tjaw qjyoʼn aju mas bʼaʼn tuʼn tbʼant? ¿Alkye tten in kubʼ qyekʼun qa nim toklen toj qwitz aju in kynaʼn txqantl? Qo xnaqʼtzal tiʼj jlu toj juntl xnaqʼtzbʼil.