1, 2. ¿Alkye tten o qo tzaj t-xnaqʼtzaʼn Jehová tuʼn tten qkʼujlabʼil?

AJU jun tbʼanel tatbʼaj in chex t-xnaqʼtzaʼn tkʼwaʼl tukʼil techel in kubʼ tqʼoʼn kywitz. Aj t-xi tyekʼun tkʼujlabʼil kyiʼj, ax ikx in chex t-xnaqʼtzaʼn tuʼn tten kykʼujlabʼil. Ax jlu in bʼant tuʼn Jehová qiʼj. Mijun kʼujlaʼn qoʼ tuʼn ik tzeʼn te tuʼnju «tnejel ma qo kʼujlanjtz tuʼn» (1 Juan 4:19).

² ¿Tiquʼn in tzaj tqʼamaʼn Xjan Uʼj qa tnejel o qo ok tkʼujlaʼn Jehová? Tuʼnju tzaj t-samaʼn Tkʼwaʼl tuʼn tkyim tuʼn qpaj «tej aj ilxtoq qoʼ» (Romanos 5:8). Bʼant chojbʼil lu tuʼn Jehová tuʼn qetz tkloʼn tjaqʼ tipumal il ex kyimen. Tukʼe jlu kubʼ tqʼoʼn jun tbʼanel techel qwitz ex o qo tzaj t-xnaqʼtzaʼn tuʼn tten qkʼujlabʼil ex tuʼn t-xi qqʼoʼn chʼin kye txqantl tiʼjju at qe (1 Juan 4:10). Nya oʼkxju, ax ikx tuʼnju chojbʼil lu, jaku qo ok te tamiw Jehová ex jaku kubʼ qyekʼun qa kʼujlaʼn quʼn.

3, 4. ¿Tzeʼn in kubʼ qyekʼun qa kʼujlaʼn Jehová quʼn?

³ Aju kʼujlabʼil atzun tmod Jehová mas nim toklen at. Tuʼntzunju, tqʼama Jesús qa aju kawbʼil mas nim toklen aju: «Kykʼujlamtzune Qman Dios tuʼn tkyaqil kyanmiye, tuʼn tkyaqil kykʼuʼje, tuʼn tkyaqil kynabʼle, ex tuʼn tkyaqil kyipumale» (Marcos 12:30). Tajbʼil Jehová tuʼn tok qkʼujlaʼn tuʼn tkyaqil qanmi. Nya  bʼaʼn in nel toj twitz qa mas sok qkʼujlaʼn juntl xjal moqa juntl tiʼ twitztl te. Noqtzun tuʼnj, aju qkʼujlabʼil tiʼj Jehová nya oʼkx tuʼn tkubʼ qnaʼn. Ax ikx tajbʼil te tuʼn tok qkʼujlaʼn tuʼn tkyaqil qnabʼil, tuʼn tkyaqil qipumal, toj juntl yol, tuʼn tkyaqilju in kubʼ qximen ex tuʼn tkyaqilju in tkubʼ qbʼinchaʼn (kjawil uʼjit Miqueas 6:8).

⁴ Ik tzeʼn tqʼama Jesús, il tiʼj tuʼn tkubʼ qyekʼun qkʼujlabʼil tiʼj Jehová tuʼn tkyaqil qximbʼetz ex tuʼn tkyaqilju in bʼant quʼn. Qa ax tok kʼujlaʼn Jehová quʼn, a kʼokel te mas nim toklen toj qanqʼibʼil. Toj xnaqʼtzbʼil ma kyaj, el qnikʼ tiʼj kyaje tumel in tzaj tyekʼun Jehová qe qa kʼujlaʼn qoʼ tuʼn. Toj xnaqʼtzbʼil lu, kʼelel qnikʼ tiʼj alkye tten jaku tzʼok qkʼujlaʼn mastl Jehová ex alkye tten jaku kubʼ qyekʼun.

5. Qa ma qo ximen tiʼj tkyaqilju in tzaj tqʼoʼn Jehová qe, ¿tiʼ qajbʼil tuʼn tbʼant quʼn?

⁵ Qa at jun ma tzaj tqʼoʼn jun oyaj qe, in nok tilil quʼn tuʼn t-xi qqʼoʼn chjonte. Jun tumel tuʼn t-xi qyekʼun jlu aju qa ma tzʼajbʼen oyaj quʼn. Tqʼama apóstol Santiago qa in tzaj tqʼoʼn Jehová nim tiʼchaq qe (Santiago 1:17). In tzaj tqʼoʼn Jehová qe tkyaqilju at tajbʼen tuʼn qanqʼin ex tuʼn qtzalaj. Ex nim in xi qqʼoʼn chjonte tiʼj jlu. In nel qnikʼ qa nimxix kʼujlaʼn qoʼ tuʼn Dios ax ikx qe qajbʼil tuʼn t-xi qyekʼun te qa kʼujlaʼn quʼn. ¿Ape teya jlu in tnaʼn?

6. ¿Tiʼ iltoq tiʼj tuʼn tbʼant kyuʼn aj Israel qa kyajbʼiltoq tuʼn kukx ttzaj tqʼoʼn Jehová tbʼanel tiʼchaq kye?

⁶ Xi tqʼoʼn Jehová nim tbʼanel tiʼchaq kye aj Israel. Toj nimku syent abʼqʼi xi tqʼoʼn aju at tajbʼen kye tuʼn kyanqʼin. Ax ikx xi tqʼoʼn qe tley kye tuʼn tel kynikʼ tiʼj tiʼ iltoq tiʼj tuʼn tbʼant kyuʼn (Deuteronomio 4:7, 8). Jun techel, in tzajtoq tqʼamaʼn ley kye qa iltoq tiʼj tuʼn t-xi kyqʼoʼn «aju tbʼanilxix tiʼj tnejel twitz» kyawal te Jehová (Éxodo 23:19). Qa kyajbʼiltoq tuʼn kukx ttzaj tqʼoʼn Jehová qeju tbʼanel tiʼchaq, iltoq tiʼj tuʼn kynimen te ex tuʼn t-xi kyqʼoʼn aju mas tbʼanel te. Iktzun tten kbʼeltoq kyyekʼun qa in xi kyqʼoʼn chjonte te Jehová (kjawil uʼjit Deuteronomio 8:7-11).

7. ¿Tzeʼn jaku tzʼajbʼen qqʼinumabʼil quʼn tuʼn t-xi qyekʼun te Jehová qa kʼujlaʼn quʼn?

⁷ Ax ikx qe jaku txi qyekʼun te Jehová qa kʼujlaʼn quʼn aj t-xi qqʼoʼn «oyaj te tiʼj» qqʼinumabʼil (Proverbios 3:9). Jun tumel tuʼn tbʼant jlu quʼn, aju qa ma txi qqʼoʼn pwaq tuʼn kyonit qerman jatumel in nok qchmon qibʼ ex qe qerman ateʼ twitz tkyaqil Txʼotxʼ. At junjun qe, nya nim tiʼchaq at qe, noqtzun tuʼnj, qkyaqil jaku tzʼajbʼen quʼn aju at qe tuʼn t-xi qyekʼun te Jehová qa at qkʼujlabʼil tiʼj (2 Corintios 8:12). Noqtzun tuʼnj, nya oʼkx tumel lu jaku kubʼ qyekʼun qkʼujlabʼil tiʼj Jehová. Qo xnaqʼtzan kyiʼj txqantl tumel.

8, 9. a) ¿Alkye juntl tumel tuʼn t-xi qyekʼun te Jehová qa kʼujlaʼn quʼn? b) ¿Tiʼ bʼant tuʼn Mike kyukʼil toj tja?

⁸ Juntl tumel tuʼn t-xi qyekʼun te Jehová qa kʼujlaʼn quʼn aju qa ma tzʼok qʼuqeʼ qkʼuʼj tiʼj. ¿Tiquʼn? Qa ma tzaj qnaʼn, kyaj t-xnaqʼtzaʼn Jesús qe tuʼn miʼn ttzaj bʼajxix qkʼuʼj tiʼj alkye tten jaku kanet quʼn aju at tajbʼen qe. In tzaj ttziyen Jehová qa tzul tqʼoʼn aju at tajbʼen qe qa ma tzʼajbʼen qanqʼibʼil quʼn tuʼn qajbʼen te (Mateo 6:31-33). Qʼuqli qkʼuʼj tiʼj qa kjapunel jlu tuʼn. In xi qqʼamaʼn jlu tuʼnju qa kʼujlaʼn jun xjal quʼn, in nok qeʼ qkʼuʼj tiʼj. Qa mas sok qeʼ qkʼuʼj tiʼj Jehová, mas kxel qyekʼun te qa kʼujlaʼn quʼn (Salmo 143:8). Kyjuʼtzun, bʼaʼn tuʼn qximen tiʼj jlu: «¿In xipe nyekʼune te Jehová qa kʼujlaʼn wuʼne tukʼil aju alkye tten in najbʼen ambʼil ex wipumale wuʼne? ¿In kubʼpe nyekʼune tkyaqil qʼij qa qʼuqli  nkʼuʼje tiʼj qa tzul tqʼoʼn Jehová aju at tajbʼen weye?».

⁹ Qo ximen tiʼj jun ermano kyukʼix toj tja, aju Mike tbʼi. Atxix tej tzmatoq qʼa, tajbʼiltoq tuʼn t-xiʼ pakbʼal toj juntl tnam. Tej otoqxi kubʼ mojeʼ ex otoqxi che ul kabʼe tkʼwaʼl, kukx tajbʼiltoq tuʼn t-xiʼ pakbʼal toj juntl tnam. Kubʼ tuʼjin kyukʼil toj tja aʼyeju junjun xnaqʼtzbʼil in che yolin kyiʼj erman i eʼx anqʼil kyoj junjuntl tnam tuʼn kyonin toj pakbʼabʼil. Tuʼntzunju, kubʼ kyximen tuʼn miʼn ttentl nim tiʼchaq kye. Xi kykʼayin kyja ex i eʼx anqʼil toj juntl ja mas chʼin. Ex bʼaj t-ximen Mike tuʼn miʼn taqʼunantl nim. Toj ambʼil jaʼlo, in tzalaj kyukʼix toj tja tuʼnju in che ajbʼen te Dios toj juntl tnam. In tzaj tqʼamaʼn Mike qa o tzʼok tqʼoʼn twitz tiʼj alkye tten in japun aju kyaj ttziyen Jesús, aju tkuʼx toj Mateo 6:33.

10. ¿Tiquʼn il tiʼj tuʼn tel qkanoʼn tiʼj David ex tuʼn qximen tiʼjju in tzaj t-xnaqʼtzaʼn Jehová qe toj Tuʼjil Tyol?

¹⁰ Aju aj kawil David el tpaʼn ambʼil tuʼn t-ximen kyiʼj tkawbʼil Jehová ex kyiʼj tbʼinchbʼen. Tuʼntzunju, tqʼama jlu: «Tiʼj kyaʼj in tyekʼun tibʼ tajwalil Dios». Ax ikx tqʼama qa «aju tley Qman Dios» tzʼaqli taʼ, qa jaku tzʼok qeʼ qkʼuʼj tiʼj, qa in tzaj tqʼoʼn qipumal ex qa in qo tzaj tonin tuʼn tten qnabʼil. Tuʼnju ximen David tiʼj jlu, ten tajbʼil tuʼn t-xi tyekʼun te Dios qa at tkʼujlabʼil tiʼj. Ex tqʼama qa tajbʼiltoq tuʼn ttzalaj Jehová kyiʼj t-ximbʼetz ex kyiʼj tbʼinchbʼen (Salmo 19:1, 7, 14). Ik tzeʼn te David, il tiʼj tuʼn qximen tiʼjju o kubʼ tbʼinchaʼn Jehová ex tiʼjju in tzaj t-xnaqʼtzaʼn qe toj Tuʼjil Tyol. Iktzun tten qo okelxix te tamiw Jehová ex kxel qyekʼun te qa kʼujlaʼn quʼn.

11. ¿Tzeʼn jaku tzʼajbʼen quʼn aju in tzaj t-xnaqʼtzaʼn Jehová qe tuʼn t-xi qyekʼun te qa kʼujlaʼn quʼn? (Qʼonka twitza tiʼj tnejel tilbʼilal.)

¹¹ Toj ambʼil jaʼlo, in tzaj t-xnaqʼtzaʼn Jehová nim tiʼchaq qe tiʼj, tiʼj tbʼinchbʼen, tiʼjju in tzaj ttziyen ex tiʼj Tuʼjil Tyol. Aju at twitz Txʼotxʼ in tzaj tqʼamaʼn kye xjal tuʼn tel kynikʼ tiʼj nimku tiʼchaq toj tja nimaq xnaqʼtzbʼil, noqtzun tuʼnj, a jlu in xi tnajsaʼn kykʼujlabʼil xjal tiʼj Dios. Atzunte Jehová, nya oʼkx tajbʼil tuʼn tel qnikʼ tiʼj nimku tiʼchaq. Ax ikx tajbʼil tuʼn tel qnikʼ tiʼj alkye mas bʼaʼn tuʼn tbʼant. Tajbʼil tuʼn tajbʼen quʼn aju in tzaj t-xnaqʼtzaʼn qe tuʼn qten toj bʼaʼn ex tuʼn kyten txqantl toj bʼaʼn (Proverbios 4:5-7). ¿Tzeʼn jaku bʼant jlu quʼn? Jun tumel aju qa ma qo onin kyiʼj xjal «tuʼn tel kynikʼ tiʼj ju yol axix tok» tuʼntzun kyklet (1 Timoteo 2:4). Qa ma txi qxnaqʼtzaʼn kye kykyaqil xjal aju kbʼantel tuʼn Tkawbʼil Dios qiʼj, kbʼel qyekʼun qa kʼujlaʼn Jehová quʼn ex qe xjal (kjawil uʼjit Salmo 66:16, 17).

12. ¿Tiʼ tqʼama jun ermana tzma txin tiʼj jun oyaj tzaj tqʼoʼn Jehová te?

 ¹² Ax ikx qeju qʼa ex txin jaku che ximen tiʼj tkyaqilju in tzaj tqʼoʼn Jehová kye ex tiʼj tkyaqilju in tzaj t-xnaqʼtzaʼn kye. Jun techel, at jun ermana aju Shannon tbʼi in tzaj tqʼamaʼn tiʼ tnaʼ toj Nimaq chmabʼil aju «Devoción piadosa» tbʼi. Qʼiʼntoq 11 abʼqʼi tuʼn ex qʼiʼntoq 10 tuʼn titzʼin. Toj jun ambʼil te nimaq chmabʼil xi qʼamaʼn kye kykyaqil txin ex qʼa tuʼn kykubʼ qeʼ toj jun lugar paʼn maj kye. Ax ikx kubʼ qeʼ Shannon atztzu. Tnejel, tzaj xobʼ, yajxitl, jaw tzalaj tej ttzaj qʼoʼn teyele te junjun qʼa ex txin jun tuʼj aju Los jóvenes preguntan. Tqʼama Shannon qa tukʼilju oyaj tzaj tqʼoʼn Jehová kubʼ tnaʼn qa axix tok at Jehová ex qa nimxix tkʼuʼj tiʼj. Ex in xi tqʼoʼn chjonte te Jehová tiʼj tkyaqil tbʼanel oyaj in tzaj tqʼoʼn qe.

13, 14. ¿Tiʼ qximbʼetz ktel aj ttzaj tqʼoʼn Jehová kawbʼil qe?

¹³ In tzaj tqʼamaʼn Tyol Dios qa in xi tqʼoʼn Jehová kawbʼil kye qe xjal kʼujlaʼn tuʼn «ik tzaʼn jun mambʼaj in che kubʼ tkawin tkʼwaʼl» (Proverbios 3:12). ¿Tiʼ qximbʼetz ktel aj ttzaj tqʼoʼn Jehová kawbʼil qe? Jakulo kubʼ qnaʼn bʼis ex junjuntl tiʼ. Noqtzun tuʼnj, bʼaʼn tuʼn ttzaj qkʼamoʼn aju kawbʼil in tzaj tqʼoʼn Jehová qe. Iktzun tten kxel qxnaqʼtzan qibʼ tuʼn tkubʼ qbʼinchaʼn bʼaʼn ex tuʼn tkubʼ qnaʼn mujbʼabʼil toj qanmi (Hebreos 12:11). Miʼn tzʼel qikʼun aju kawbʼil ex miʼn qo jaw qʼojin qa nya qgan aju in tzaj qʼamaʼn qe. Qa ma txi qbʼiʼn Jehová ex qa ma bʼaj qchʼixpuʼn aju il tiʼj tuʼn tbʼant, kbʼel qyekʼun qa kʼujlaʼn Jehová quʼn.

¹⁴ Toj ambʼil tej tanqʼin t-sanjel Jehová aju Malaquías tbʼi, in xitoq kyqʼoʼn judiy nya tbʼanel oyaj te Jehová. Tuʼntzunju, kyuw i ex kawin tuʼn Jehová (kjawil uʼjit Malaquías 1:12, 13). Nim maj i eʼx kawin tuʼn Jehová, noqtzun tuʼnj, mintiʼ xi kybʼiʼn. Tej tjapun bʼaj twiʼ, il tiʼj kubʼ tqʼoʼn Jehová kykastiw (Malaquías 2:1, 2). ¿Tiʼ in tzaj t-xnaqʼtzaʼn jlu qe? Qa mintiʼ ma txi qbʼiʼn tkawbʼil Jehová ex qa nya nim toklen toj qwitz, ya mlay qo oktl te tamiw.

15. ¿Alkyeqe ximbʼetz il tiʼj tuʼn tel qikʼun?

¹⁵ Chʼixmi kykyaqil xjal toj ambʼil jaʼlo in jaw kynimsan kyibʼ ex oʼkx in che ximen kyiʼjx. Nim xjal nya kygan tuʼn kyxi kawin moqa tuʼn t-xi qʼamaʼn kye tiʼ kbʼantel kyuʼn. Ex qatzun qa ma txi kykʼamoʼn nabʼil, nya tuʼn tkyaqil kykʼuʼj in japun kyuʼn. Atzunte  Tyol Dios in tzaj tqʼamaʼn qa mintiʼ tuʼn tten qximbʼetz ik tzeʼn jlu. Il tiʼj tuʼn t-xi qxnaqʼtzan qibʼ tuʼn tel qnikʼ tiʼj tiʼ tajbʼil Jehová ex tuʼn tjapun quʼn (Romanos 12:2). In najbʼen ttnam Jehová tuʼn, tuʼn ttzaj tqʼoʼn qnabʼil toj ambʼil at tajbʼen qe. Jun techel, in tzaj tqʼamaʼn alkye tmod jun xinaq tuʼn tten tukʼil jun xuʼj ex alkye tmod jun xuʼj tuʼn tten tukʼil jun xinaq ex alkye tten jaku che jaw qjyoʼn tbʼanel qamiw ex tbʼanel qsaqchbʼil. Aj ttzaj qkʼamoʼn tkawbʼil Jehová ex aj kyjapun quʼn tuʼn ttzalaj qiʼj, in xi qyekʼun te qa in xi qqʼoʼn chjonte te kyiʼj nabʼil in tzaj tqʼoʼn qe ex qa at qkʼujlabʼil tiʼj (Juan 14:31; Romanos 6:17).

16, 17. a) Naʼmxtoq tkubʼ qximen tiʼ kbʼantel quʼn, ¿tiquʼn il tiʼj tuʼn tok tilel quʼn tuʼn tel qnikʼ tiʼj tiʼ t-ximbʼetz Jehová tiʼj? b) Mintiʼ ok qʼuqeʼ kykʼuʼj aj Israel tiʼj Jehová, ¿tiʼ bʼant kyuʼn?

¹⁶ In cheʼx kʼwaʼl jyol kytat tuʼn t-xi kyqanin onbʼil kye ex tuʼn kyok xqʼuqin kyuʼn. Axpe ikx qeju ma che chʼiy in xi kyqanin onbʼil kye kytat. ¿Tiquʼn? Tuʼnju ojtzqiʼn kyuʼn qa, maske jaku kubʼ kyximen jun tiʼ kyuʼnx kyibʼ, jaku tzaj kyqʼoʼn kytat tbʼanel nabʼil kye. Chʼixme axju in bʼant tuʼn Jehová. In tzaj tqʼoʼn Jehová ambʼil qe tuʼn tkubʼ qximen aju kbʼantel quʼn. Noqtzun tuʼnj, tuʼnju in nok qʼuqeʼ qkʼuʼj tiʼj ex kʼujlaʼn quʼn in xi qqanin te tuʼn qtzaj tonin. Ex naʼmxtoq tkubʼ qximen tuʼn tbʼant jun tiʼ quʼn, in nok tilel quʼn tuʼn tel qnikʼ tiʼj tiʼ t-ximbʼetz Jehová at tiʼj. Aj t-xi qqanin onbʼil te Jehová, in tzaj tqʼoʼn t-xew qe tuʼn tkubʼ qbʼinchaʼn aju bʼaʼn (Filipenses 2:13).

¹⁷ Toj ambʼil tej tten Samuel, chʼixtoq kykubʼ aj Israel kyuʼn xjal te tnam Filistea. Atzun qe aj Israel mintiʼ ok qʼuqeʼ kykʼuʼj tiʼj Jehová ex mintiʼ xi kykanin te tiʼ jaku bʼant kyuʼn, sino kubʼ kyximen tuʼn t-xi kyiʼn kajon kʼubʼel ley toj qʼoj. Kubʼ kyximen qa tuʼn jlu kʼonil Jehová kyiʼj tuʼn kykambʼan kyiʼj kyajqʼoj. Mintiʼ ok tilel kyuʼn tuʼn tel kynikʼ tiʼj tiʼ t-ximbʼetz Jehová at tiʼj jlu. Oʼkx kubʼ kybʼinchaʼn aju kye bʼaʼn el toj kywitz. ¿Tiʼ tzaj kyiʼj tuʼn jlu? E kyim 30,000 soldad aj Israel (kjawil uʼjit Proverbios 14:12). Ex aju mas nya bʼaʼn aju e kyaj ten aj Filistea tukʼil kajon kʼubʼel ley (1 Samuel 4:2-4, 10, 11).

18. Ik tzeʼn in tqʼamaʼn Salmo 42:5, 6 ex Proverbios 3:5, 6, ¿tiʼ kbʼantel quʼn?

¹⁸ Jun xjal kʼujlaʼnxitoq Jehová tuʼn kubʼ ttzʼibʼin qa tej tok weʼ twitz junjun nya bʼaʼn, ok qʼuqeʼ tkʼuʼj tiʼj Dios qa tzultoq onin tuʼn ex qa kkolil tiʼj (Salmo 42:5, 6). ¿In kubʼpe tnaʼn teya ikju? In noklo qʼuqeʼ teya tkʼuʼj tiʼj Jehová. Noqtzun tuʼnj, qkyaqilx jaku txi qxnaqʼtzan qibʼ tuʼn tok qʼuqeʼ mastl qkʼuʼj tiʼj Jehová. In tzaj tqʼamaʼn Tyol Dios jlu: «Qeʼk tkʼuʼja tiʼj Qman tuʼn tkyaqil tanmiya ex mya tuʼn tok qeʼ tkʼuʼja tiʼj texa tnabʼla. Naʼntza Qman tiʼj tkyaqilju kbʼantel tuʼna, ex a Qman kxel ẍaqlun teya tuj bʼe jiqun tiʼj» (Proverbios 3:5, 6).

19. ¿Alkye tten kbʼel tyekʼuna qa kʼujlaʼn Jehová tuʼna?

¹⁹ Ik tzeʼn ma qo xnaqʼtzan tiʼj, tnejel o qo kʼujlanjtz tuʼn Jehová. Iktzun tten o qo tzaj t-xnaqʼtzaʼn tuʼn tten qkʼujlabʼil tiʼj. Kukx qo ximen tiʼj tkyaqilju o bʼant tuʼn qiʼj ex tiʼj nimxix tkʼujlabʼil qiʼj. Qyekʼunx te Jehová qa kʼujlaʼn quʼn tuʼn tkyaqil qanmi, tuʼn tkyaqil qkʼuʼj, tuʼn tkyaqil qnabʼil ex tuʼn tkyaqil qipumal (Marcos 12:30).