Jun kʼloj okslal qoʼye ex mintiʼx chʼin qoklene at kyiʼj txqantl okslabʼil. Atoʼye twitz tkyaqil Txʼotxʼ. Aju kytxuylal ninja qʼil twitz aqʼuntl at qxole atz taʼ Estados Unidos. Noqtzun tuʼnj, chʼixmi qkyaqile, in qo anqʼine kyoj txqantl tnam. Axpe ikx at mas te 8 millón qbʼaje, ex in xi qqʼoʼne xnaqʼtzbʼil tiʼj Tyol Dios kyoj mas te 230 nimaq tnam ex junjuntl tembʼil. Iktzun tten in japun quʼne aju tqʼama Jesús: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mateo 24:14).

Jaxku tumel in qo anqʼine, nim kyoklen qe kykawbʼil tnam toj qwitze ex in chex qbʼiʼne, noqtzun tuʼnj, mintiʼ in nokx qʼon qibʼe toj kykawbʼil xjal. Iktzun tten in xi qbʼiʼne aju kawbʼil kyaj tqʼamaʼn Jesús kye okslal tej tqʼama: «Mya te twitz txʼotxʼ qeye». Tuʼntzunju, mintiʼ in nokx qqʼoʼn qibʼe kyxol aj kawil ex mintiʼ in qoʼxe toj qʼoj (Juan 15:19; 17:16). Tuʼn jlu, nim qe testigos de Jehová e okx qʼoʼn pres, ok bʼinchaʼn nim nya bʼaʼn kyiʼj, axpe ikx at junjun e kubʼ bʼiyoʼn tej tok Tkabʼ Nimaq Qʼoj twitz Tkyaqil Txʼotxʼ. At jun xjal te Alemania ten te jun pal, kubʼ ttzʼibʼin jlu kyiʼj testigos de Jehová: «Toj tumel jaku txi kyqʼamaʼn qa oʼkx kye in xi kybʼiʼn aju in tzaj tqʼamaʼn kynabʼil kye tjaqʼ Toxin Reich», moqa Kawbʼil.

Noqtzun tuʼnj, mintiʼ in tzaj tyekʼun jlu qa mintiʼ in qo tene kyxol xjal. Xi tqʼamaʼn Jesús jlu te Dios toj tnaʼj Dios: «Mintiʼ in chin kubʼsane twitza tuʼn kyaj tiʼna tuʼn miʼn kytentl twitz txʼotxʼ» (Juan 17:15). Kyjuʼtzun, in qo aqʼunane, in qoʼxe laqʼol ex in qoʼxe toj tja xnaqʼtzbʼil ik tzeʼn in bʼant kyuʼn qvesine.