1, 2. a) ¿Tiquʼn kʼujlaʼntoq Marta tuʼn Jesús? b) ¿Tiʼ nya toj tumel bʼant tuʼn Marta?

¿ALKYETOQ tmod Marta at, aju tanabʼ Lázaro? In tzaj tqʼamaʼn Tyol Dios qa ok Marta te tamiw Jesús ex kʼujlaʼntoq tuʼn. Ax ikx kʼujlaʼntoq ex attoq kyoklen junjuntl xuʼj toj twitz Jesús. Kʼujlaʼntoq María, aju juntl tanabʼ Lázaro tuʼn. Ax ikx kʼujlaʼntoq ttxuʼ tuʼn, aju María tbʼi (Juan 11:5; 19:25-27). Noqtzun tuʼnj, ¿tiquʼn kʼujlaʼntoq Marta tuʼn Jesús?

² Kʼujlaʼntoq Marta tuʼn Jesús tuʼnju tbʼanel xjal ex tbʼanel aqʼunal, ex mas tuʼnju attoq nim qʼuqbʼil tkʼuʼj. Qʼuqlitoq tkʼuʼj Marta tiʼj qa a Jesús aju Mesías otoq tzaj tziyen ex in xi tnimentoq tkyaqil t-xnaqʼtzbʼil Jesús (Juan 11:21-27). Noqtzun tuʼnj, nya tzʼaqli te Marta ex at maj el txalpaj. Jun techel, tej tpon Jesús visitaril Marta atz tja tzaj tqʼoj ex xi tqʼamaʼn jlu te Jesús: «Tat, ¿mintiʼpe nnoʼk tqʼoʼna kwent tiʼj wermaniye, ma chin kyaj tqʼoʼn njunalxe tiʼj aqʼuntl? Qʼmanxa te tuʼn tonin wukʼile» (kjawil uʼjit Lucas 10:38-42). ¿Tiquʼn tzaj tqʼoj Marta? ¿Ex tiʼ xnaqʼtzbʼil jaku tzʼel qiʼn tiʼj tzaqʼwebʼil xi tqʼoʼn Jesús te?

3, 4. a) ¿Tiquʼn xi tqʼamaʼn Jesús te María qa tbʼanel aju otoq bʼant tuʼn? b) ¿Tiʼ xnaqʼtzbʼil el tnikʼ Marta tiʼj? (Qʼonka twitza tiʼj tnejel tilbʼilal.)

³ In tzalajtoq Jesús tuʼnju xi txkoʼn tuʼn Marta ex María kyja, tuʼntzunju, xi t-xnaqʼtzaʼn nim tiʼchaq nim toklen kye. Tajbʼiltoq María tuʼn tel tnikʼ tiʼj tkyaqilju in tqʼamaʼn Jesús, tuʼntzunju, kubʼ qeʼ naj bʼilte. Noqtzun tuʼnj, ¿tiʼ bʼant tuʼn Marta? Ax ikx te jakutoq kyaj ttzaqpiʼn aju in bʼant tuʼn, tuʼntzun tbʼin tiʼj Jesús. Noqwit ik bʼant tuʼn, xiwtlo tqʼamaʼn Jesús te qa tbʼanel aju bʼant tuʼn.

⁴ Noqtzun tuʼnj, mintiʼ ok tqʼoʼn Marta twiʼ tiʼj Jesús. Atz ok tqʼoʼn twiʼ tiʼj tuʼn tbʼaj bʼinchet wabʼj ex junjuntl tiʼ tuʼn tkubʼ tnaʼn Jesús bʼaʼn. Tej tok tqʼoʼn twitz tiʼj qa mintiʼ in nonintoq terman tiʼj tzaj tqʼoj ex xi tqʼamaʼn te Jesús. Ojtzqiʼntoq tuʼn Jesús qa at nim aqʼuntl in bʼant tuʼn Marta ex kyjuʼtzun xi tqʼamaʼn jlu te tukʼil kʼujlabʼil: «Marta, Marta, nimxix in bʼisuna tiʼj tkyaqil taqʼuna ex in bʼaj tkʼuʼja tiʼj». Ax ikx xi tqʼamaʼn qa maswitlo bʼaʼn noqwit mintiʼ kubʼ tbʼinchaʼn Marta jun matij wabʼj. Ex xi tqʼamaʼn te María qa tbʼanel otoq bʼant tuʼn tuʼnju ok tqʼoʼn twiʼ tiʼj. Tqʼama qa mas tbʼanel aju bʼant tuʼn María ex qa mintiʼ jun jaku tzʼel qʼinte te. Tej tbʼet ambʼil, mintiʼlo tzaj tnaʼn aju wabʼj waʼn tiʼj, noqtzun tuʼnj, mintiʼ ik tnaʼl tuʼn tkyaqilju tqʼama Jesús. Tejxi tikʼ 60 abʼqʼi tqʼama apóstol Juan jlu: «Ex kʼujlaʼnxix Marta tuʼn Jesús, tukʼix titzʼin» (Juan 11:5). Tuʼn jlu in nel qnikʼ tiʼj qa kubʼ tqʼoʼn Marta toj xnaqʼtzbʼil aju xnaqʼtzbʼil xi tqʼoʼn Jesús te ex tuʼntzunju, kukx ajbʼen te Jehová tej tanqʼin.

5. a) Toj ambʼil jaʼlo, ¿tiquʼn kwest tuʼn tok qqʼoʼnxix qwiʼ tiʼjju tuʼn qajbʼen te Jehová? b) ¿Alkye xjel tzul tzaqʼweʼn toj xnaqʼtzbʼil lu?

⁵ Ik tzeʼn ma tzʼel qnikʼ tiʼj, toj ambʼil ojtxi ateʼtoq tiʼchaq jaku tzʼok kyqʼoʼn tmajen Jehová kywiʼ tiʼj. Noqtzun tuʼnj, toj ambʼil jaʼlo at mas tiʼchaq jaku tzʼok qqʼoʼn qwiʼ kyiʼj twitzju tuʼn qajbʼen te Jehová. Toj uʼj Aju Xqʼuqil etz toj kastiy te 1 te abril te 1959, tqʼama qa iltoq tiʼj tuʼn tok kyxqʼuqin kyibʼ okslal tiʼj tuʼn miʼn tok kyqʼoʼn kywiʼ kyiʼj junjun tiʼchaq in bʼant kyuʼn xjal. Axpe ikx, toj ambʼil aju, tkyaqil qʼij attoq junjun tiʼchaq tzma in che etz toj kywitz xjal. Ik tzeʼn qe uʼj, radio, cine ex aju televisión atzunju mas e ajbʼen kyuʼn xjal. Ax ikx tqʼama Aju Xqʼuqil qa chʼixtoq tul kanin xitbʼil, oklo che eletz junjuntl tiʼchaq kyuʼn xjal aʼyeju jaku tzʼok qqʼoʼn qwiʼ kyiʼj. Ex atzun in bʼaj. Toj ambʼil jaʼlo at nim tiʼchaq jaku tzʼel kyiʼn nim ambʼil qe. ¿Tiʼ jaku bʼant quʼn tuʼn tel qkanoʼn aju techel tiʼj María ex tuʼn tok qqʼoʼnxix qwiʼ tiʼjju tuʼn qajbʼen te Jehová?

6. ¿Alkye tten in najbʼen kyuʼn tmajen Jehová aʼyeju tiʼchaq tzma in che etz kyuʼn xjal?

⁶ O che ajbʼen junjun tiʼchaq in che bʼant kyuʼn xjal kyuʼn tmajen Jehová tuʼn kypakbʼan. Jun techel, tej naʼmxtoq tikʼ ex tej tzmatoq in nikʼ Tnejel Nimaq Q’oj twitz Tkyaqil Tx’otx’, o qo pakbʼan tukʼil onbʼil in tzaj tqʼoʼn jun programa aju attoq qe tilbʼilal tukʼil tcoloril, tukʼil tqʼajqʼajel wibʼaj ex tukʼil video toj. A jlu ok tbʼi te «Foto-Drama de la Creación». Tuʼnju onbʼil tzaj tqʼoʼn programa lu, el kynikʼ nim millón xjal te nimku tnam tiʼj qa toj chʼintl ambʼil tzul tiʼn Jesús mujbʼabʼil twitz tkyaqil Txʼotxʼ. Ex ajbʼen aju radio quʼn tuʼn t-xi qiʼn tbʼanil tqanil tiʼj Kawbʼil kye nim millón xjal twitz tkyaqil Txʼotxʼ. Atzun toj ambʼil jaʼlo in najbʼen Internet quʼn tuʼn qpakbʼan kye kykyaqil xjal, axpe ikx kye qeju najchaq in che anqʼin.

7. a) ¿Tiquʼn mintiʼ tuʼn tajbʼenxix quʼn aju at twitz txʼotxʼ? b) ¿Tiʼ il tiʼj tuʼn tok qxqʼuqin qibʼ tiʼj? (Qʼonka twitza tiʼj tqanil t-xe t-xaq uʼj.)

⁷ Tqʼama apóstol Pablo tuʼn miʼn tajbʼenxix aju at twitz txʼotxʼ quʼn (kjawil uʼjit  1 Corintios 7:29-31). Tuʼntzunju, il tiʼj tuʼn tok qxqʼuqin qibʼ tuʼn miʼn tok qqʼoʼn nim ambʼil kyiʼj tiʼchaq at twitz txʼotxʼ. Nya kykyaqil qe tiʼchaq nya bʼaʼn. Noqtzun tuʼnj, qa mintiʼ ma txi qbʼiʼn aju nabʼil tqʼama apóstol Pablo, jaku tzʼel kyiʼn qe tiʼchaq te twitz txʼotxʼ nim ambʼil qe. Ex tuʼn jlu jaku mlaytl tzʼok qqʼoʼn qwiʼ tiʼjju mas nim toklen, aju tuʼn qajbʼen te Jehová (kjawil uʼjit Efesios 5:15-17). ¿Alkyeqe tiʼchaq jaku tzʼel kyiʼn nim ambʼil qe? Aʼyeju saqchbʼil, tuʼn quʼjin kyiʼj uʼj, tuʼn tok qqʼoʼn qwitz tiʼj televisión, tuʼn qxiʼ bʼetil, tuʼn qxiʼ laqʼol, tuʼn t-xi qsamaʼn tqanil toj yolbʼil, tuʼn tok qqʼoʼn qwiʼ kyiʼj tqanil moqa tiʼj alkyeqe otoq che kambʼan tiʼj jun saqchbʼil, tuʼn qjyoʼn alkye jun kʼuxbʼil mas akʼaj o tzʼetz ex alkyexku junjuntl tiʼchaq nim kywiʼ. Ex at junjun in che naqʼet kyiʼj jlu (Eclesiastés 3:1, 6). * (Qʼonka twitza tiʼj tqanil t-xe t-xaq uʼj.)

8. ¿Tiquʼn nim toklen tuʼn miʼn tok qkʼujlaʼn qe tiʼchaq at twitz txʼotxʼ?

⁸ In nok tilel tuʼn Satanás tuʼn tok qqʼoʼn qwiʼ kyiʼj tiʼchaq at twitz txʼotxʼ ex tuʼn miʼn qajbʼentl te Jehová. Ok tilel tuʼn, tuʼn kykubʼ tzʼaq tnejel okslal ex toj ambʼil jaʼlo axju in bʼant tuʼn qiʼj (2 Timoteo 4:10). Noqtzun tuʼnj, in tzaj tqʼamaʼn Tyol Dios tuʼn tok qkʼujlaʼn Jehová ex nya qe tiʼchaq at twitz txʼotxʼ. ¿Tiquʼn? Tuʼnju qa ik ma bʼant quʼn, kxel qbʼiʼn Jehová ex qo okel te tamiw (1 Juan 2:15-17). Tuʼntzunju, bʼaʼn tuʼn qximen tiʼj qa in nok qqʼoʼn qwiʼ kyiʼj tiʼchaq at twitz txʼotxʼ. Qa in nok qqʼoʼn qwiʼ kyiʼj, bʼaʼn tuʼn tbʼaj qchʼixpuʼn naj aju in bʼant quʼn.

9. a) ¿Alqiʼj iltoq tiʼj tuʼn tok kyqʼoʼn t-xnaqʼtzbʼen Jesús kywiʼ tiʼj? b) ¿Alkye tten kubʼ tqʼoʼn Jesús techel kywitz t-xnaqʼtzbʼen?

⁹ Ik tzeʼn ma qo xnaqʼtzan tiʼj, xi t-xnaqʼtzaʼn Jesús te Marta tuʼn miʼn tok tqʼoʼn twiʼ kyiʼj junjun tiʼchaq nya nim kyoklen. Ex chʼixme axju xi t-xnaqʼtzaʼn kye t-xnaqʼtzbʼen. Xi tqʼamaʼn kye tuʼn tok kyqʼoʼn kywiʼ tiʼj Kawbʼil ex tuʼn kyajbʼen te Jehová (kjawil uʼjit Mateo 6:22, 33). Nya oʼkxju, ax ikx kubʼ tqʼoʼn jun tbʼanel techel kywitz, tuʼnju mintiʼ ten nim tiʼchaq te. Axpe ikx, mintiʼ ten jun tja moqa jun piẍ ttxʼotxʼ (Lucas 9:58; 19:33-35).

10. ¿Alkye tbʼanel techel kyaj tqʼoʼn Jesús qwitz?

¹⁰ Mintiʼ xi tqʼoʼn Jesús ambʼil te jun tiʼ tuʼn tok tqʼoʼn twiʼ tiʼj tuʼntzun miʼn tpakbʼan. Jun techel, tej tikʼ chʼin ambʼil tej in pakbʼantoq toj tnam Capernaum, xi kyqʼamaʼn xjal te tuʼn tkyaj ten mas ambʼil kyukʼil. Noqtzun tuʼnj, ¿tiʼ bʼant tuʼn Jesús? Mintiʼ ok tqʼoʼn twiʼ tiʼjju tzaj qʼamaʼn te ex xi tqʼamaʼn qa iltoq tiʼj tuʼn t-xiʼ pakbʼal tiʼj Kawbʼil kyoj junjuntl tnam (Lucas 4:42-44). Iktzun bʼant tuʼn. Nim bʼe bʼaj tbʼetin Jesús tuʼn t-xi tiʼn tbʼanel tqanil kye xjal. Ex maske tzʼaqli te Jesús, ok tilel tuʼn, tuʼn taqʼunan ex at maj kubʼ sikt ex iltoq tiʼj tuʼn tajlan (Lucas 8:23; Juan 4:6).

11. a) ¿Tiʼ bʼant tuʼn Jesús tej t-xi tqanin jun xjal onbʼil te? b) ¿Tiʼ xi t-xnaqʼtzaʼn Jesús kye t-xnaqʼtzbʼen?

 ¹¹ Jun maj, tej in xi t-xnaqʼtzaʼntoq Jesús jun tiʼ nim toklen kye t-xnaqʼtzbʼen. Noq minabʼen pon jun xjal ex xi tqʼamaʼn jlu te: «Xnaqʼtzal, qʼmanxa te ntzike tuʼn tkubʼ tmij qetzbʼile». Noqtzun tuʼnj, mintiʼ onin Jesús tiʼj xjal. ¿Tiquʼn? Tuʼnju in xi tqʼoʼntoq xnaqʼtzbʼil kye t-xnaqʼtzbʼen ex nya tajtoq tuʼn tok tqʼoʼn twiʼ tiʼj juntl tiʼ. Aju bʼant tuʼn, ajbʼen ambʼil lu tuʼn, tuʼn kyxi t-xnaqʼtzaʼn tuʼn miʼn tbʼaj kykʼuʼj kyiʼj qe tiʼchaq quʼn jaku tzʼok kyqʼoʼn kywiʼ tiʼj junjuntl tiʼ ex nya tuʼn kyajbʼen te Dios (Lucas 12:13-15).

12, 13. a) ¿Tiʼ bʼant tuʼn Jesús toj tja Dios toj tnam Jerusalén? b) Tej t-xi tqʼamaʼn apóstol Felipe qa kyajbʼiltoq xjal tuʼn kyyolin tukʼil Jesús, ¿tiʼ bʼant tuʼn?

¹² Tej chʼinxtoq tkyim Jesús tzalu twitz Txʼotxʼ, kwest e ok qe qʼij lu (Mateo 26:38; Juan 12:27). Ojtzqiʼntoq tuʼn qa kʼikʼel toj nim kʼixkʼoj ex tuʼn tkyim. Noqtzun tuʼnj, ojtzqiʼntoq tuʼn qa il tiʼj tuʼn tbʼant nim tiʼchaq nim toklen tuʼn naʼmxtoq tpon ambʼil tuʼn tkubʼ bʼyoʼn. Jun techel, tej atxtoq jweʼ qʼij tuʼn tkyim, okx toj tnam Jerusalén tibʼaj jun tal bur. Nim xjal e tzalaj tiʼj Jesús ex ok kyqʼoʼn ik tzeʼn aj kawil te kye (Lucas 19:38). Toj juntl qʼij, mintiʼ tzaj xobʼ Jesús tej kyex tlajoʼn qeju xjal in che kʼayin toj tja Dios ex in che sbʼun kyiʼj xjal tuʼn tkanet mas kypwaq (Lucas 19:45, 46).

¹³ E pon junjun xjal te Grecia atz toj tnam Jerusalén ikʼsal aju Xjan Qʼij kyukʼil xjal judiy. Tej tok kyqʼoʼn kywitz tiʼjju bʼant tuʼn Jesús, etz kywitz tiʼj. Tuʼntzunju, xi kyqanin te apóstol Felipe qa jakutoq bʼant tuʼn tok kyqʼoʼn kywitz tiʼj Jesús ex tuʼn kyyolin tukʼil. Noqtzun tuʼnj, mintiʼ xi tqʼoʼn Jesús ambʼil kye. Mintiʼ te Jesús jyon kyiʼj xjal tuʼn kyonin tiʼj moqa tuʼn kykolin tiʼj. Aju mas nim toklen toj twitz Jesús, aju tuʼn tbʼant tuʼn aju tzaj tqʼamaʼn Jehová te, toj juntl yol, tuʼn tkyim tuʼn qpaj. Ex xitzun tnaʼn kye qeju t-xnaqʼtzbʼen qa chʼixtoq tkyim ex qa ax ikx qeju lepchiqeʼk tiʼj jaku txi kyqʼon kyibʼ tuʼn kykyim. Ex tqʼamatl kye qa ma txi kyqʼon kyibʼ tuʼn kykyim, tzultoq tqʼoʼn Jehová kyoklen ex tzultoq qʼoʼn kychwinqlal te jumajx. Xilo tqʼamaʼn apóstol Felipe tbʼanel tqanil lu kye qeju xjal te tnam Grecia (Juan 12:20-26).

14. Ok tqʼoʼnxix Jesús twiʼ tiʼj pakbʼabʼil, noqtzun tuʼnj, ¿alkye junjuntl tiʼchaq bʼant tuʼn toj tanqʼibʼil?

¹⁴ Tej tten Jesús twitz Txʼotxʼ, ok tqʼoʼnxix twiʼ tiʼj tuʼn tpakbʼan, noqtzun tuʼnj, nya oʼkx jlu bʼant tuʼn. Jun techel, ojtzqiʼn quʼn qa xiʼ Jesús tojlo jun mejebʼleʼn, atz jatumel ok aʼ tuʼn te tbʼanel vin (Juan 2:2, 6-10). Ax ikx, xi tkʼamoʼn junjun txokbʼil tzaj qʼoʼn te tuʼn t-xiʼ waʼl kyja tamiw ex kyja junjuntl xjal kyajbʼiltoq tuʼn tel kynikʼ tiʼjju in xi t-xnaqʼtzaʼn (Lucas 5:29; Juan 12:2). Noqtzun tuʼnj, aju mas nim toklen toj twitz Jesús, aju tuʼn tel tpaʼn ambʼil tuʼn tnaʼn Dios, tuʼn tten tjunalx ex tuʼn tajlan (Mateo 14:23; Marcos 1:35; 6:31, 32).

15. a) Ik tzeʼn tqʼama apóstol Pablo, ¿tiʼ il tiʼj tuʼn tbʼant kyuʼn okslal? b) ¿Alkye tbʼanel techel kyaj tqʼoʼn apóstol Pablo qwitz?

¹⁵ Tqʼama apóstol Pablo qa ik kyten okslal ik tzeʼn qeju in che okx toj jun ojqelan nim tqan. Qa qajbʼil tuʼn qkambʼan, il tiʼj tuʼn tel qiʼn tkyaqil iqtz qibʼaj aju jaku qo kyaj weʼ tuʼn (kjawil uʼjit Hebreos 12:1). Ax apóstol Pablo kyaj qʼonte jun tbʼanel techel qwitz. Jakutoq tzʼok te jun nejenel kye okslabʼil qʼinun ex nim toklen. Noqtzun tuʼnj, mintiʼ xi tqʼoʼn ambʼil te jlu ex atz ok tqʼoʼn twiʼ «tiʼj alkyeju mas bʼaʼn». Pakbʼan toj tkyaqil ambʼil ex bʼet kyoj nimku tnam ik tzeʼn Siria, Asia Menor, Macedonia ex Judea. Tukʼil nim tzalajbʼil yon tiʼj oyaj tuʼn tanqʼin te jumajx toj kyaʼj. Tuʼntzunju, tqʼama jlu: «Ma tzikʼ tnaʼl wuʼne aju ma kyaj  wiʼjxiye, ex nnoʼk tilil wuʼne tuʼn nkanune tiʼj ju tkubʼ nwitze. Ljoʼnx wuʼne tuʼn nkanune tiʼj jatum tok nwitze tuʼn nkʼmonteye jun oyaj» (Filipenses 1:10; 3:8, 13, 14). Ex tuʼnju mintiʼtoq t-xuʼjil, attoq mas ambʼil tiʼj tuʼn tajbʼen te Jehová ex mintiʼ junjuntl tiʼ tuʼn tok tqʼoʼnxix twiʼ tiʼj (1 Corintios 7:32-35).

16, 17. a) Qa mejebʼni qoʼ moqa nya, ¿alkye tten jaku tzʼel qkanoʼn techel kyaj tqʼoʼn apóstol Pablo? b) ¿Alkye tten el kykanoʼn jun mejebʼleʼn te tnam Gales aju techel kyaj tqʼoʼn apóstol Pablo?

¹⁶ Ax ikx toj ambʼil jaʼlo, ateʼ junjun tmajen Jehová o kubʼ kyximen tuʼn kukx kyten kyjunalx tuʼntzun kyajbʼen mas te Jehová (Mateo 19:11, 12). Chʼixme kykyaqil qeju nya mejebʼni qe, mas at chʼintl ambʼil kyiʼj kywitz qeju o che kubʼ mojeʼ. Noqtzun tuʼnj, qa mejebʼni qoʼ moqa nya, qkyaqilx bʼaʼn tuʼn qximen tiʼj qa at jun tiʼ in nok qqʼoʼnxix qwiʼ tiʼj tuʼntzun miʼn qajbʼenxix te Jehová. Jun techel, atlo junjun qe il tiʼj tuʼn tkubʼ tchʼixpuʼn junjun tiʼchaq o qo naqʼet tiʼj tuʼntzun miʼn tbʼaj qnajsaʼn ambʼil ex tuʼn qajbʼen mas te Jehová.

¹⁷ Qqʼonk qwiʼ tiʼjju ikʼ tiʼj jun mejebʼleʼn aju Mark ex Claire kybʼi ex atz in che anqʼin toj tnam Gales (Reino Unido). Naʼmxtoq kykubʼ mojeʼ, e ok te precursor regular tej tetz bʼaj kyxnaqʼtzbʼil toj tja xnaqʼtzbʼil. Tejtzun kykubʼ mojeʼ, kukx e ok te precursor. Noqtzun tuʼnj, kyajbʼiltoq tuʼn kyajbʼen mas te Jehová, tuʼntzunju, kubʼ kyximen tuʼn miʼn ttentl nim tiʼchaq kye. In tzaj tqʼamaʼn Mark qa kyaj kytzaqpiʼn jun kyja jatumel attoq oxe cuart toj ex kyaj ttzaqpiʼn taqʼun te nikʼjan qʼij, tuʼntzun kyonin tuʼn kyjaw bʼinchet ja twitz tkyaqil Txʼotxʼ. Kyoj qeju 20 abʼqʼi ma che ikʼ, o che onin tuʼn kyjaw bʼinchet Ja te Chmabʼil kyoj nim tnam atz África. At maj o che kyaj ten chʼixmi mintiʼ kypwaq, noqtzun tuʼnj, kukx o che ok xqʼuqin tuʼn Jehová. In tzaj tqʼamaʼn Claire qa mintiʼ juntl tiʼ in tzaj tqʼoʼn mas tzalajbʼil kye twitzju in che ajbʼen tkyaqil qʼij te Jehová. Toj ambʼil lu, kanet tbʼanel kyamiw ex tkyaqil maj at aju at tajbʼen kye. Ax ikx in tzaj tqʼamaʼn qa aʼyeju tiʼchaq o che kyaj kytzaqpiʼn, mlay tzʼok kymojbʼaʼn tukʼilju tzalajbʼil in kynaʼn tuʼnju in che ajbʼen te Jehová toj tkyaqil ambʼil. At txqantl tmajen Jehová in kubʼ kynaʼn ik tzeʼn mejebʼleʼn lu. * (Qʼonka twitza tiʼj tqanil t-xe t-xaq uʼj.)

18. ¿Tiʼ bʼaʼn tuʼn tkubʼ qxjelin?

¹⁸ Qkyaqilx bʼaʼn tuʼn tkubʼ qxjelin jlu: «¿Ilpelo tiʼj tuʼn wajbʼene mas te Jehová tuʼn tkyaqil wanmiye? ¿In xipe nqʼoʼne ambʼil tuʼn tok nqʼoʼne nwiʼye kyiʼj junjuntl tiʼchaq ex nya tiʼjju mas nim toklen? Qa ikju, ¿tiʼ jaku bʼant wuʼne?». Bʼaʼn tuʼn qximen tiʼj qa il tiʼj tuʼn quʼjin ex tuʼn qxnaqʼtzan mas tiʼj Tyol Dios. Toj juntl xnaqʼtzbʼil kʼelel qnikʼ tiʼj alkye tten jaku bʼant quʼn.