Tkyaqil abʼqʼi, in che kyim nim millón xjal tuʼnju mintiʼ kywa ex tuʼn yabʼil in tzaj tuʼnju at nimxix mebʼayil, moqa prowil. Ateʼ tnam qʼinun, noqtzun tuʼnj, at nim xjal mintiʼ chʼin at kye. In tzaj tqʼamaʼn Tyol Dios qa atxix ojtxi at mebʼayil. (Uʼjinxa Juan 12:8.)

Tuʼn tkubʼ naj mebʼayil, il tiʼj tuʼn tten jun kawbʼil twitz tkyaqil Txʼotxʼ tuʼntzun tbʼaj t-sipen qe tiʼchaq toj tumel. Ax ikx il tiʼj tuʼn tkubʼ tnajsaʼn qe nimaq qʼoj, tuʼnju aju qʼoj atzun jun kyxol qeju nya bʼaʼn in tzaj tiʼn nim mebʼayil. Atzunju kawbʼil lu in tzaj ttziyen Dios. (Uʼjinxa Daniel 2:44.)

O jaw t-skʼoʼn Dios Tkʼwaʼl, Jesucristo, tuʼntzun tkawin kyibʼaj xjal (Salmo 2:4-8). Kʼonil Jesús kyiʼj xjal mebʼa ex kbʼel tnajsaʼn bʼiybʼel ex aju nya bʼaʼn in nok bʼinchan kyiʼj xjal. (Uʼjinxa Salmo 72:8, 12-14.)

A Jesucristo «Nejenel tuʼn kyten xjal tuj txubʼtxaj» ex a kbʼel qʼonte mujbʼabʼil kyxol xjal ex ya mlay che tzaj xobʼtl xjal twitz tkyaqil Txʼotxʼ. Iktzun tten, kykyaqil xjal ktel kyja, ktel jun tbʼanel kyaqʼun ex ktel nimxix kywa. (Uʼjinxa Isaías 9:6, 7; 65:21-23.)