Naʼmxtoq tkubʼ tbʼinchaʼna jun tiʼ, jakulo kubʼ t-ximana jlu: «¿Ti tbʼanel tzul tiʼn weye?». Qa ax xjel lu ma kubʼ qximen tiʼj naʼj Dios, ¿myapetzulo toj tumel? Nya tkyaqil maj nya toj tumel. Qkyaqilx qajbʼil tuʼn tel qnikʼ tiʼj qa at tajbʼen qe qa ma qo naʼn Dios. Axpe ikx kubʼ t-xjelin Job aju jun xjal tzʼaqli jlu: «Qa ma tzaj ntxkoʼne [¿okpe chin tzajel tzaqʼweʼne tuʼn? TNM]» (Job 9:16).

Tojju xnaqʼtzbʼil ma kyaj, ma tzʼel qnikʼ tiʼj qa nya oʼkx jun kostumbr at kyxol okslabʼil aju naʼj Dios ex nya oʼkx in kubʼ qnaʼn bʼaʼn tuʼn. In tzaj tbʼiʼn aju Dios axix tok qeju naʼj Dios. Qa ma qo naʼn Dios toj tumel ex qa ma txi qqanin qe tiʼchaq at kyoklen te, in qo tzaj tbʼiʼn. Nya oʼkxju, ax ikx in tzaj tqʼamaʼn qe tuʼn qok laqʼeʼ ttxlaj (Santiago 4:8). Tuʼntzunju, ¿tiʼ jaku qo yon tiʼj qa kukx ma qo naʼn Dios? Qo xnaqʼtzan tiʼj.

Aj tok weʼya twitz nya bʼaʼn, ¿in kubʼ tnaʼna qa in tzaj bʼaj tkʼuʼja tuʼn? Kyoj ambʼil aju, in tzaj tqʼamaʼn Tyol Dios jlu qe: «Miʼn che qʼajene tuʼn kynaʼne Dios» ex «tkyaqil kymanxe te Dios tuj kynaʼj Diose» (1 Tesalonicenses 5:17; Filipenses 4:6). Ex kye qeju in che qanin onbʼil te, in tzaj ttziyen Tyol Dios jlu kye: «Kyjaʼtzun kqebʼil kykʼuʼje tuʼn Dios; mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin kyanmiye ex kyximbʼetze» (Filipenses 4:7). Jaku kubʼ qnaʼn bʼaʼn qa ma txi qqʼamaʼn tkyaqilju in tzaj bʼaj qkʼuʼj tuʼn teju Qtat at toj kyaʼj. Ax Tyol Dios in tzaj qʼamante tuʼn tbʼant jlu quʼn: «Qʼonkja qe tbʼisa tuj tqʼabʼ Qman, ate ktzajel qʼonte tipuna tuʼn tikʼx tuʼna» (Salmo 55:22).

Twitz tkyaqil Txʼotxʼ, nim xjal in kubʼ kynaʼn tbʼanel aj kynaʼn Dios. At jun xuʼj te tnam Corea del Sur, aju  Hee Ran tbʼi tqʼama jlu: «Maske in che tzaj nya bʼaʼn wiʼje, aju kwest, aj nnaʼne Dios kyiʼj in kubʼ nnaʼne ik tzeʼn otoq tzʼel jun iqtz wibʼaje ex qa kukx jaku tzʼok tilel wuʼne». In tzaj tqʼamaʼn Cecilia, aju in nanqʼin atz Filipinas jlu qe: «In tzaj bʼaj nkʼuʼje kyiʼj wale txin. Ax ikx in nok nxqʼuqine ntxuʼye ex ya mintiʼtl in nel tnikʼ alkye qine. Tuʼnju onbʼil in tzaj tqʼoʼn naʼj Dios weye, bʼaʼn in nex junjun qʼij wuʼne toj aqʼuntl. Ojtzqiʼn wuʼne qa kʼonil Jehová wiʼje tuʼn nxqʼuqine kyiʼj toj njaye».

¿At teya toj nimxix siktlen? ¿In tzaj xobʼa qa ma tzaj jun nya bʼaʼn toj tanqʼibʼila moqa in nok weʼya twitz jun nya bʼaʼn? Qa ma naʼna Dios teju Dios «kukx in tqʼuqbʼaʼn qkʼuʼj», kbʼel tnaʼna bʼaʼn. In tzaj ttziyen Tyol Dios qe qa «in tqʼuqbʼaʼn Dios qkʼuʼj tuj tkyaqil yajbʼil»  in tzaj qiʼj (2 Corintios 1:3, 4). Toj jun maj, tej in tzajtoq bʼaj tkʼuʼj Jesús, «kubʼ ẍmejeʼ, ok ten naʼl Dios». ¿Tiʼtzun bʼaj yajxitl? Kubʼ «tyekʼun tibʼ jun anjel tzajni tuj kyaʼj» ex xi qʼoʼn «tipun» tuʼn (Lucas 22:41, 43). Ax ikx te Nehemías, aju jun xjal tzʼaqli, tzaj t-xobʼil kyuʼn xjal nya bʼaʼn tuʼnju kyajbʼiltoq xjal tuʼn miʼn tbʼant tajbʼil Dios tuʼn Nehemías. Xi tqanin Nehemías jlu toj tnaʼj Dios: «Nman Dios, chin tonintza tuʼn tpon bʼaj aqʼuntl wuʼne». Aju bʼaj yajxitl, in tzaj tyekʼun qa onin Dios tiʼj tuʼn miʼn ttzaj xobʼtl ex tuʼn kukx tbʼant tajbʼil Dios tuʼn (Nehemías 6:9-16). In tzaj tqʼamaʼn Reginald te tnam Ghana jlu qe: «Aj nnaʼne Dios, mas kyoj ambʼil nya bʼaʼn, in kubʼ nnaʼne ik tzeʼn otoq txi nmane qe nbʼise te jun xjal jaku tzʼonin wiʼje ex aju in tzaj ttziyen weye qa mintiʼ jun tiquʼn tuʼn tbʼaj nkʼuʼje». Ax tok, qa ma qo naʼn Dios, in tzaj tqʼuqbʼaʼn Dios qkʼuʼj.

Jaku chʼixpaj qanqʼibʼil ex kyanqʼibʼil toj qja kyuʼn junjun tiʼchaq in bʼant quʼn. ¿Tiʼ jaku bʼant quʼn tuʼn miʼn qel txalpaj? In tzaj tqʼamaʼn Tyol Dios jlu: «Qa at jun kyxole atx taj tnabʼl, qaninx tnabʼl te Dios, ex ktzajel tqʼoʼn Dios tnabʼl; porke ate Dios nimxix in tzaj tqʼoʼn kye kykyaqil» tukʼil tzalajbʼil (Santiago 1:5). Qa ma txi qqanin qnabʼil te Dios, in najbʼen t-xew tuʼn, tuʼntzun tonin qiʼj tuʼn tjaw qjyoʼn alkye mas bʼaʼn. Tzaj ttziyen Jesús qe qa tzul tqʼoʼn Dios «aju Xewbʼaj Xjan kye qeju in che qanin te» (Lucas 11:13).

Axpe ikx te Jesús xi tqanin onbʼil te Ttat tej naʼmxtoq tjaw tjyoʼn alkye mas nim toklen. Tej tjaw tjyoʼn qeju 12 t-apóstol, ex «jun qonikʼan» tuʼn Jesús tuʼn tnaʼn Dios (Lucas 6:12).

Ik tzeʼn te Jesús kubʼ tnaʼn, nim xjal in kubʼ kynaʼn tbʼanel aj tel kynikʼ tiʼj alkye tten onin Dios kyiʼj tej tjaw kyjyoʼn aju mas bʼaʼn. In tzaj tqʼamaʼn Regina, aju in nanqʼin atz Filipinas, qa ok weʼ twitz nim nya bʼaʼn: aju tuʼn tok t-xqʼuqin qe toj tja tej tkyim tchmil, naj taqʼun ex tuʼn kychʼiyset qe tal aʼyeju txin qe tuʼn tjunalx. ¿Tiʼ onin tiʼj tuʼn tjaw tjyoʼn aju mas bʼaʼn? In tzaj tqʼamaʼn jlu: «Aju naʼj Dios, atzun jun tumel in kanet wuʼne tuʼn tok qeʼ nkʼuʼje tiʼj Jehová». Ax ikx te Kwabena, aju in nanqʼin toj tnam Ghana, in tzaj tqʼamaʼn tiquʼn in naʼn Dios: «Attoq jun tbʼanel waqʼune tuʼn kybʼinchet ja, noqtzun tuʼnj, ya mintiʼtl ten waqʼune. Tej wok tene ximel kyiʼj tiʼchaq jaku bʼant wuʼne, ok tilel wuʼne tuʼn t-xi nqanine onbʼil te Dios tuʼntzun tjaw njyoʼne alkye mas bʼaʼn. In nokxix qeʼ nkʼuʼje tiʼj qa o tzʼonin Jehová wiʼje tej tjaw njyoʼne jun aqʼuntl in tzaj tqʼoʼn aju at tajbʼen weye ex tuʼn wajbʼene te Dios». Ax ikx teya, jaku tzaj tkʼamoʼna tonbʼil Dios qa ma naʼna Dios tiʼjju at toklen tukʼil tamiwbʼila tukʼil.

Noq oʼkx ma qo yolin tiʼj junjun tbʼanel jaku tzaj tkʼamoʼna qa ma naʼna Dios. (Tuʼn tel tnikʼa kyiʼj mas, qʼonka twitza tiʼj « Aju tbʼanel in tzaj tuʼn naʼj Dios».) Qa tajbʼil teya tuʼn ttzaj tiʼn naʼj Dios tbʼanel teya, tnejel, bʼaʼn tuʼn tok tojtzqiʼna Dios ex tuʼn tok tojtzqiʼna tkyaqilju in tzaj ttziyen qe. Bʼaʼn tuʼn tyolina tukʼil jun testigo de Jehová tuʼntzun tonin tiʼja tuʼn tel tnikʼa tiʼj Tyol Dios. * A jlu jaku bʼant tuʼna tnejel tuʼntzun tok laqʼeʼya ttxlaj aju in tzaj bʼinte «aju qnaʼj» Dios (Salmo 65:2).