1, 2. ¿Tiquʼn junxitl qoʼ kywitz qe txkup?

AQO xjal, nya ik qoʼ ik tzeʼn qe txkup, moqa jil, tuʼnju in bʼant qyolin, qtzʼibʼin, quʼjin ex in nel qnikʼ tiʼj tiʼ kyajbʼil junjuntl xjal tuʼn ttzaj kyqʼamaʼn qe. Ax ikx in bʼant qnaʼn Dios ex jaku txi qbʼitzen jun bʼitz te Jehová. Naʼmx tel kynikʼ aj nabʼil tiʼj tiquʼn in bʼant nim tiʼchaq tuʼn qcerebro.

² Ex nya oʼkx in bʼant qyolin, ax ikx o qo kubʼ tbʼinchaʼn Jehová tuʼn tbʼant junjuntl tiʼchaq quʼn ex tuʼn jlu, junxitl qoʼ kywitz qe txkup (Salmo 139:14, TNM; Apocalipsis 4:11). Tuʼnju o qo kubʼ tbʼinchaʼn Jehová ik tzeʼn te tilbʼilal, o tzaj tqʼoʼn ambʼil qe tuʼn tkubʼ qximen tiʼ kbʼantel quʼn (Génesis 1:27). Tuʼnju in bʼant qyolin, jaku kubʼ qximen qa kʼajbʼel quʼn moqa miʼn tuʼn tjaw qnimsaʼn Jehová ex tuʼn qajbʼen te.

3. ¿Tiʼ o tzaj tqʼoʼn Jehová qe tuʼntzun tjaw qjyoʼn alkye mas bʼaʼn?

³ O tzaj tqʼoʼn Jehová Tyol qe tuʼntzun tel qnikʼ tiʼj tzeʼn tuʼn tjaw qnimsaʼn ex tzeʼn tuʼn qajbʼen te. Toj ambʼil jaʼlo, jaku jaw uʼjit tkyaqil moqa junjun plaj Tyol Dios kyoj mas te 2,800 yol. Aj tjaw quʼjin Tyol Dios ex aj qximen tiʼj, in xi qxnaqʼtzan qibʼ tuʼn qximen ik  tzeʼn te Jehová (Salmo 40:5; 92:5; 139:17). Ex qa ma qo ximen ik tzeʼn te, jaku jaw qjyoʼn alkye mas bʼaʼn ex jaku qo anqʼin te jumajx (kjawil uʼjit 2 Timoteo 3:14-17).

4. a) ¿Tiʼ t-xilen aju tuʼn qximen? b) ¿Alkyeqe xjelbʼitz che xel tzaqʼwet toj xnaqʼtzbʼil lu?

⁴ Aju tuʼn qximen, a t-xilen jlu qa il tiʼj tuʼn qkubʼ tenxix ximil tiʼj jun tiʼ ex tuʼn tok qqʼoʼnxix qwiʼ tiʼj (Salmo 77:12; Proverbios 24:1, 2). Nimxix toklen tuʼn tel qpaʼn ambʼil tuʼn qximen tiʼjju in nel qnikʼ tiʼj Jehová ex Jesús (Juan 17:3). Toj xnaqʼtzbʼil lu, che xel tzaqʼwet qe xjelbʼitz lu: ¿Tiʼ jaku tzʼonin qiʼj tuʼn qximen tiʼjju in kubʼ qxnaqʼtzaʼn? ¿Alkyeqe tiʼchaq bʼaʼn tuʼn qximen kyiʼj? ¿Tiʼ jaku bʼant quʼn tuʼn kukx qximen ex tuʼn qtzalaj tiʼj?

5, 6. ¿Tiʼ jaku tzʼonin qiʼj tuʼn ttzaj qnaʼn jun xnaqʼtzbʼil ex tuʼn telxix qnikʼ tiʼj?

⁵ Jaku bʼant junjun tiʼchaq quʼn ex nya il tiʼj tuʼn qximen kyiʼj, ik tzeʼn tuʼn tjatz qxew, tuʼn qbʼet moqa tuʼn qbʼet tibʼaj jun biciclet. Noqtzun tuʼnj, ¿axpe jlu in bʼaj qiʼj aj quʼjin? Atlo maj in qo uʼjin ex ax ikx in qo ok ten ximil tiʼj juntl tiʼchaq. ¿Ti jaku bʼant quʼn tuʼn miʼn tbʼaj jlu qiʼj? Il tiʼj tuʼn tok qqʼoʼnxix qwiʼ tiʼjju in kubʼ quʼjin ex tuʼn qximen tiʼj tiʼ t-xilen. Ex aj tbʼaj quʼjin jun taqikʼ moqa jun subtítulo tiʼj jun xnaqʼtzbʼil, bʼaʼn tuʼn tkubʼ qxjelin jlu: «¿Tiʼ xnaqʼtzbʼil in tzaj tqʼoʼn jlu weye? ¿Mape tzʼelxix nnikʼe tiʼj?».

⁶ O tzʼel kynikʼ aj nabʼil tiʼj qa mas jaku tzaj qnaʼn jun xnaqʼtzbʼil qa ma kubʼ quʼjin tukʼil chʼin tqʼajqʼajel qwiʼ ex nya oʼkx tuʼn tok qqʼoʼn qwitz tiʼj. Ex ojtzqiʼn jlu tuʼn Jehová, tuʼnju a bʼinchal qe. Tuʼntzunju, xi tqʼamaʼn te Josué tuʼn ‹t-ximan tiʼj› ley, moqa ik tzeʼn in tzaj tqʼamaʼn txol yol lu toj yol hebreo qa tuʼn tjaw tuʼjin «tukʼil chʼin tqʼajqʼajel twiʼ» (kjawil uʼjit Josué 1:8). Qa ma kubʼ quʼjin Tyol Dios ik tzeʼn jlu, kʼonil qiʼj tuʼn tok qqʼoʼnxix qwiʼ tiʼj ex tuʼn ttzaj qnaʼn aju in jaw quʼjin.

7. ¿Jatumel ex alkye ambʼil jaku qo ximen? (Qʼonka twitza tiʼj tnejel tilbʼilal.)

⁷ Ax tok, at maj kwest tuʼn tok qqʼoʼnxix qwiʼ ex tuʼn qkubʼ tenxix ximel tiʼjju in qo xnaqʼtzan tiʼj. Atlo maj tuʼnju siktni qoʼ moqa tuʼnju at junjuntl tiʼ in che qʼajt qtxlaj. Tuʼntzunju, bʼaʼn tuʼn qximen jatumel jaku tzʼok qqʼoʼnxix qwiʼ tiʼj ex qa nya siktni qoʼ. Jun techel, ximen aj kawil David te qonikʼan (Salmo 63:6). Ax ikx te Jesús jyon jun lugar jatumel jaku bʼant tuʼn t-ximen ex tuʼn tnaʼn Dios (Lucas 6:12).

8. a) ¿Alkyeqe tiʼchaq bʼaʼn tuʼn qximen kyiʼj? b) ¿Tiʼ in tnaʼn Jehová aj tok tqʼoʼn twitz tiʼj qa in qo yolin tiʼj kyukʼil txqantl xjal?

⁸ Nya oʼkx jaku qo ximen tiʼjju in kubʼ quʼjin toj Tyol Dios. Ax ikx bʼaʼn tuʼn qximen kyiʼj junjuntl tiʼchaq. Jun techel, aj tok qqʼoʼn qwitz kyiʼj tbʼinchbʼen Dios, bʼaʼn tuʼn tkubʼ qxjelin jlu: «¿Tiʼ in tzaj t-xnaqʼtzaʼn jlu weye tiʼj Jehová?». Iktzun tten ktel qajbʼil tuʼn qnaʼn Dios tuʼn t-xi qqʼoʼn chjonte te. Qatzun atoʼ kyukʼil txqantl xjal, jaku txi qqʼmaʼn kye aju in kubʼ qnaʼn (Salmo 104:24; Hechos 14:17). In nok tqʼoʼn Jehová twitz qiʼj ex in jaw tzalaj aj qximen tiʼj, aj qnaʼn Dios te ex aj qyolin tiʼj kyukʼil txqantl xjal. In tzaj tqʼamaʼn Tyol Dios jlu: «Twitz Qman o tzʼibʼet jun libro jatum in che tzaj naʼn qe xjal bʼaʼn che niman te Qman ex in che ximan tiʼj» (Malaquías 3:16).

9. a) ¿Tiʼ xi tqʼamaʼn apóstol Pablo te Timoteo? b) ¿Tiʼ jaku qo ximen tiʼj naʼmxtoq qex pakbʼal moqa tuʼn qxiʼ qʼol xnaqʼtzbʼil tiʼj Tyol Dios?

⁹ Xi tqʼamaʼn apóstol Pablo te Timoteo tuʼn t-ximin tiʼj tiʼ jaku tzaj kyiʼj txqantl tuʼn tyol, tuʼnju in bʼanttoq tuʼn ex tiʼjju in xi t-xnaqʼtzaʼn (kjawil uʼjit 1 Timoteo  4:12-16). Ax ikx qe, bʼaʼn tuʼn qximen kyiʼj tiʼchaq lu. Jun techel, aj tkubʼ qbʼinchaʼn qten tuʼn qxiʼ qʼol xnaqʼtzbʼil tiʼj Tyol Dios, il tiʼj tuʼn tel qpaʼn ambʼil tuʼn qximen. Jaku qo ximen tiʼj jun xjel moqa tiʼj jun techel aju jaku tzʼonin tiʼjju in xnaqʼtzan tiʼj Xjan Uʼj tuʼn tok te tamiw Dios. Qa ma bʼant jlu quʼn, kʼonil qiʼj tuʼn tchʼiy mas qʼuqbʼil qkʼuʼj ex ktel mas qgan tuʼn t-xi qqʼoʼn xnaqʼtzbʼil. Ax ikx bʼaʼn tuʼn qximen naʼmxtoq qex pakbʼal (kjawil uʼjit Esdras 7:10). Jaku kubʼ quʼjin aju uʼj te Hechos moqa bʼaʼn tuʼn qximen kyiʼj taqikʼ Tyol Dios moqa kyiʼj uʼj che kjel qqʼoʼn kye xjal. Ax ikx jaku tzʼonin qiʼj tuʼn tok tilel quʼn tuʼn qpakbʼan (2 Timoteo 1:6). Nya oʼkxju, ax ikx bʼaʼn tuʼn qximen tiʼj alkyeqe tiʼchaq in bʼaj kykʼuʼj xjal tiʼj jatumel in qo pakbʼan ex tiʼ kxel qqʼamaʼn kye tuʼntzun tten kyajbʼil tiʼj tbʼanel tqanil. Iktzun tten kʼajbʼel Tyol Dios quʼn toj tumel aj qpakbʼan (1 Corintios 2:4).

10. ¿Alkye junjuntl tiʼchaq bʼaʼn tuʼn qximen kyiʼj?

¹⁰ ¿Alkye junjuntl tiʼchaq bʼaʼn tuʼn qximen kyiʼj? Qa in kubʼ qtzʼibʼin jun tbʼanel tqanil toj jun uʼj kyoj chmabʼil moqa kyoj nimaq chmabʼil, bʼaʼn tuʼn tel qpaʼn ambʼil tuʼn tok qqʼoʼn juntl maj qwitz kyiʼj ex bʼaʼn tuʼn tkubʼ qxjelin jlu: «¿Tiʼ el nnikʼe tiʼj Tyol Dios ex tiʼj ttnam Jehová?». Ax ikx bʼaʼn tuʼn qximen tiʼjju in kubʼ quʼjin toj uʼj Aju Xqʼuqil ex ¡Despertad!, ex kyiʼj uʼj in che etz kyoj nimaq chmabʼil. Ex qpaʼmil ambʼil aj tjaw quʼjin aju ikʼ toj tanqʼibʼil jun erman toj uʼj Anuario, tuʼntzun tkuʼpin toj qanmi. Aj quʼjin kyiʼj qe uʼj, bʼaʼn tuʼn tkubʼ qsqitin aju tqanil mas nim toklen moqa bʼaʼn tuʼn tkubʼ qtzʼibʼin jun tqanil tojx quʼj. A jlu kʼonil qiʼj tuʼn kytzaj qnaʼn xnaqʼtzbʼil nim kyoklen ex yajxitl, jaku tzʼajbʼen quʼn aj tkubʼ qbʼinchaʼn jun chikʼbʼabʼil moqa aj qxiʼ visitaril jun erman ex qa jun xjal tajbʼil tuʼn tel mas tnikʼ tiʼj Tyol Dios. Aj qximen, mas nim  toklen tuʼn tel qpaʼn ambʼil kʼajbʼel quʼn tuʼntzun tkuʼpin xnaqʼtzbʼil toj qanmi ex tuʼntzun t-xi qqʼoʼn chjonte te Jehová.

11. a) ¿Alkye mas nim toklen tuʼn qximen tiʼj? b) ¿Tiquʼn nim toklen tuʼn qximen tiʼj Tyol Dios? (Qʼonka twitza tiʼj tqanil t-xe t-xaq uʼj.)

¹¹ Kyxol kykyaqilju tiʼchaq bʼaʼn tuʼn qximen kyiʼj, aju mas nim toklen aju Tyol Dios. ¿Yajtzun qa ma pon jun qʼij jatumel mlay tzaj qʼoʼn ambʼil tuʼn tten Tyol Dios qukʼil? * (Qʼonka twitza tiʼj tqanil t-xe t-xaq uʼj.) Jakulo bʼant tuʼn tel qʼin Tyol Dios qe, noqtzun tuʼnj, mintiʼ jun jaku tzʼel qʼinte qe tuʼn qximen tiʼjju o kyaj toj qwiʼ, ik tzeʼn qe taqikʼ Tyol Dios ex qe bʼitz (Hechos 16:25). Qo tzajel tonin Jehová tukʼil xewbʼaj xjan tuʼn ttzaj qnaʼn xnaqʼtzbʼil otoq qo xnaqʼtzan tiʼj ex tuʼn kukx qajbʼen te (Juan 14:26).

12. ¿Tiʼ jaku bʼant quʼn tuʼn quʼjin tiʼj Tyol Dios tkyaqil qʼij?

¹² ¿Tiʼ jaku bʼant quʼn tuʼn quʼjin tiʼj Tyol Dios tkyaqil qʼij? Jaku tzeʼl qpaʼn junjun qʼij tuʼn tkubʼ qbʼinchaʼn qten kyiʼj taqikʼ Tyol Dios che jawil uʼjit toj junjun seman toj Xnaqʼtzbʼil tuʼn Tbʼant Qpakbʼan ex bʼaʼn tuʼn qximen kyiʼj. Kyoj junjuntl qʼij, jaku jaw quʼjin junjun piẍ tiʼj uʼj te Mateo, Marcos, Lucas moqa Juan, ex bʼaʼn tuʼn qximen tiʼjju bʼant tuʼn Jesús ex tiʼjju xi t-xnaqʼtzaʼn (Romanos 10:17; Hebreos 12:2; 1 Pedro 2:21). Ex tuʼn tel qiʼn tbʼanel xnaqʼtzbʼil tiʼjju in jaw quʼjin, jaku che ajbʼen junjuntl uʼj quʼn aju in tzaj kychikʼbʼaʼn toj ttxolil tkyaqilju bʼant tuʼn Jesús toj tanqʼibʼil (Juan 14:6).

13, 14. a) ¿Tiquʼn nim toklen tuʼn kukx qximen tiʼj Jehová ex tiʼj Jesús? b) ¿Tzeʼn jaku tzʼonin qiʼj qa ma qo ximen tiʼj Jehová ex tiʼj Jesús?

¹³ Qa ma qo ximen tiʼj Jehová ex tiʼj Jesús, jaku qo tzaj tonin tuʼn qchʼiy toj qokslabʼil ex tuʼn tchʼiy qʼuqbʼil qkʼuʼj (Hebreos 5:14; 6:1). Qa nya nim ambʼil in qo ximen tiʼj Jehová, chebʼe chebʼe jaku qo el laqʼeʼ ttxlaj ex jaku naj qamiwbʼil at tukʼil (Hebreos 2:1; 3:12). Tqʼama Jesús qa mintiʼ ma txi qbʼiʼn tuʼn tkyaqil qkʼuʼj aju in jaw quʼjin toj Tyol Dios, aju ‹nimku tiʼchaq, aju qʼinumabʼl ex achbʼil› jaku qo el kypaʼn tiʼj Jehová (Lucas 8:14, 15).

¹⁴ Tuʼntzun aju, nim toklen tuʼn kukx qximen tiʼj Tyol Dios ex tuʼn tok qojtzqiʼnxix Jehová junjun qʼij. A jlu, kʼonil qiʼj tuʼn tok tilel quʼn tuʼn tel qkanoʼn qe tmod (2 Corintios 3:18, TNM). Qa ma tzʼok tilel quʼn, kukx kʼokel qojtzqiʼn Jehová ex qeju tmod te jumajx. ¡Jun tbʼanelxix qoklen jlu! (Eclesiastés 3:11.)

15, 16. a) ¿Alkye tten in nonin qiʼj qa ma qo ximen tiʼj Jehová ex tiʼj Jesús? b) ¿Tiquʼn at maj kwest tuʼn tkanet ambʼil quʼn tuʼn qximen tiʼj Tyol Dios? c) ¿Tiquʼn tbʼanel qa ma tzʼok tilel quʼn tuʼn qximen tiʼj Tyol Dios?

¹⁵ Qa ma qo ximen tiʼj Jehová ex tiʼj Jesús, a jlu kʼonil qiʼj tuʼn kukx tok tilel quʼn tuʼn qajbʼen te Jehová. Ex a jlu, jaku tzʼel kykanoʼn txqantl erman ex qeju xjal in qo pakbʼan kye. Nya oʼkxju, ax ikx aj qximen tiʼjju bʼant tuʼn Jehová tej tzaj t-samaʼn Jesús tuʼn tkyim tuʼn qpaj, in nel qnikʼ tiʼj qa nimxix toklen tuʼn tten qamiwbʼil tukʼil Dios (Romanos 3:24; Santiago 4:8). At jun ermano te tnam Sudáfrica aju Mark tbʼi, okx qʼoʼn toj cárcel oxe abʼqʼi tuʼnju kukx in najbʼen te Jehová. In tzaj tqʼamaʼn qa aju tuʼn qximen ik tten ik tzeʼn jun tiʼ qganxix tiʼj ex in tzaj tqʼoʼn tzalajbʼil qe. Qa mas in ximen Mark, mas in nel tnikʼ kyiʼj junjuntl  tiʼchaq tiʼj Jehová. Ax ikx, aj ttzaj bʼaj tkʼuʼj ex in bʼisun, in jaw tuʼjin Tyol Dios ex in nel tpaʼn chʼin ambʼil tuʼn t-ximen tiʼj. A jlu in nonin tiʼj tuʼn tqeʼ tkʼuʼj.

¹⁶ At maj kwest tuʼn tkanet ambʼil quʼn tuʼn qximen tiʼj Tyol Dios. ¿Tiquʼn? Tuʼnju at nim tiʼchaq twitz txʼotxʼ aju jaku tzʼel tiʼn nim ambʼil qe. Jun ermano te tnam África aju Patrick tbʼi, in tzaj tqʼamaʼn qa at nim tiʼchaq tuʼn tbʼant tuʼn tkyaqil qʼij. At maj at junjun tiʼchaq in tzaj bʼajxix tkʼuʼj kyuʼn. ¿Tiʼtzun in bʼant tuʼn aj ttzaj jlu tiʼj? Tnejel, in xi tqʼamaʼn te Jehová toj tnaʼj Dios aju in tzaj bʼaj tkʼuʼj tuʼn ex iktzun tten in kubʼ tnaʼn bʼaʼn tuʼntzun t-ximen. Ax tok, in xi tiʼn chʼin ambʼil, noqtzun tuʼnj, in kubʼ tnaʼn qa mas nqayin taʼ ttxlaj Jehová. Ax ikx, a jlu in nonin tiʼj tuʼn telxix tnikʼ kyiʼj t-xnaqʼtzbʼil Jehová (Salmo 94:19). Ik tzeʼn ma tzʼel qnikʼ tiʼj, qa ma jaw quʼjin Tyol Dios tkyaqil qʼij ex qa ma qo ximen tiʼj, tzul tqʼoʼn nim tbʼanel qe toj nimku tten. Tbʼanelxix qa ma bʼant jlu quʼn (Hechos 17:11).

17. ¿Toj alkye ambʼil in uʼjin teya tiʼj Tyol Dios?

¹⁷ At junjun in jaw kyuʼjin Tyol Dios, in che ximen ex in che naʼn Dios te prim moqa te qlax. Ateʼ junjuntl in bʼant jlu kyuʼn te tmij qʼij, moqa te nikʼjan qʼij, aj kyajlan. Ex junjuntl mas bʼaʼn in nela toj kywitz tuʼn tbʼant jlu kyuʼn te qale moqa naʼmxtoq kyxiʼ wtal. Atzun junjuntl in che uʼjin chʼin te prim ex chʼintl te qonikʼan (Josué 1:8). Noq alkyexku or in qo uʼjin, tkyaqil qʼij bʼaʼn tuʼn tel qpaʼn chʼin ambʼil kyiʼj junjuntl tiʼchaq nya nim kyoklen tuʼn tajbʼen quʼn tuʼn quʼjin ex tuʼn qximen tiʼj Tyol Dios (Efesios 5:15, 16).

18. ¿Tiʼ in tzaj ttziyen Jehová kye qeju in che ximen tiʼj Tyol ex in nok tilel kyuʼn tuʼn tkubʼ kybʼinchaʼn aju in nel kynikʼ tiʼj?

¹⁸ In tzaj ttziyen Jehová qa tzul tkʼiwlaʼn qeju in che ximen tiʼj Tyol ex in nok tilel kyuʼn tuʼn tkubʼ kybʼinchaʼn aju in nel kynikʼ tiʼj (kjawil uʼjit Salmo 1:1-3). Kyaj tqʼamaʼn Jesús qa mas in che tzalaj qeju in xi kybʼiʼn ex in kubʼ kybʼinchaʼn aju in tzaj tqʼamaʼn Tyol Dios (Lucas 11:28). Noqtzun tuʼnj, aju mas nim toklen aju qa ma qo ximen tiʼj Tyol Dios tkyaqil qʼij, kʼonil qiʼj tuʼn tten jun qanqʼibʼil aju kjawil tnimsaʼn Jehová. Ex tzul tqʼoʼn Jehová jun qanqʼibʼil toj tzalajbʼil toj ambʼil jaʼlo ex jun qchwinqlal te jumajx toj Tbʼanel Najbʼil (Santiago 1:25; Apocalipsis 1:3).