Qa kukx in che yolin kabʼe amiw kyxol, tuʼn jlu in chʼiy kyamiwbʼil. Ax ikx te Dios in txokin qiʼj tuʼn qyolin tukʼil tuʼntzun qok te tamiw. Ax te in tzaj qʼamante jlu qe: «Che kubʼsaltzune nwitze ex che tzajel yoline wukʼile tuj naʼj Dios, atzun weye che tzajel nbʼiʼne» (Jeremías 29:12). Qa kukx in qo yolin tukʼil Dios, qo okel laqʼeʼ mas ttxlaj ex «ax ikx te ktzajel laqʼeʼ» qtxlaj (Santiago 4:8). In tzaj ttziyen Tyol Dios jlu qe: «Niqayin taʼ Qman kyiʼj qeju in che kubʼsan twitz» (Salmo 145:18). Qa mas ma qo naʼn Dios te Jehová, mas kchʼiyil qamiwbʼil tukʼil.

Tqʼama Jesús jlu: «¿Alkye jun xjal kyxole, qa ma tzaj tqanin tkʼwaʼl jun twa pan, maj kxel tqʼoʼn jun abʼj? Ex qa ma tzaj tqanin kʼwaʼl jun tchiʼ kyiẍ, ¿maj kxel tqʼoʼn jun lobʼaj? [...] in xi kyqʼoʼne oyaj bʼaʼn kye kykʼwaʼle, ¿yajtzun te Kymane aju at tuj kyaʼj, mlaypelo tzaj tqʼoʼn aju bʼaʼn kye qeju in che qanin te?» (Mateo 7:9-11). Ikju, taj Dios tuʼn qnaʼn Dios te tuʼnju a «kwentil» qe, ex tajbʼilxix tuʼn tonin qiʼj (1 Pedro 5:7). Nya oʼkxju, ax ikx in tzaj tqʼamaʼn qa bʼaʼn tuʼn qjyon onbʼil tukʼil aj qok weʼ twitz nya bʼaʼn. In tzaj tqʼamaʼn Tyol Dios jlu qe: «Mi jun tuʼn tbʼaj kykʼuʼje tiʼj; tkyaqil kymanxe te Dios tuj kynaʼj Diose; kyqaninxe te, ax ikx kyqʼonxe chjonte te» (Filipenses 4:6).

Aʼyeju in che xnaqʼtzan tiʼj kymod xjal o tzʼel kynikʼ tiʼj qa at nim syent millón xjal at tajbʼen kye tuʼn kynaʼn Dios. Axpe ikx qeju in kubʼ kyximen qa mintiʼ Dios at ex qeju mintiʼ jun okslabʼil nimen kyuʼn in che naʼn Dios. * A jlu in tzaj tyekʼun qe qa bʼinchaʼn maj qoʼ tuʼn qok laqʼeʼ ttxlaj aju Bʼinchal qe. Ex kyaj tqʼamaʼn Jesús jlu: «At tzalajbʼil kye qeju nneʼl kynikʼ tiʼj qa at tajbʼen Dios kye» (Mateo 5:3). Jun tumel tuʼn tbʼant jlu quʼn aju qa kukx ma qo naʼn Dios.

¿Tiʼ jaku bʼaj qa ma tzaj qkʼamoʼn aju txokbʼil in tzaj tqʼoʼn Dios qe tuʼn qok te tamiw?