Aju tyol Samuel, Teresa ex Magdalene in tzaj tyekʼun qa at nim tiquʼn in che naʼn xjal Dios, at junjun naʼj Dios ax tok kywitz junjuntl. Ateʼ xjal in che naʼn Dios tuʼn tkyaqil kykʼuʼj ex ateʼ junjuntl axju in xi kyqʼamaʼn tkyaqil maj ex nya atz in jatz toj kyanmi. Noqtzun tuʼnj, noq alqiʼjxku in che naʼn xjal Dios, ik tzeʼn tuʼn kykambʼan toj tja xnaqʼtzbʼil, tiʼj jun saqchbʼil mas kygan tiʼj ex junjuntl tuʼn kyten bʼaʼn kyukʼil toj kyja moqa tiʼj alkyexku juntl tiʼ. At nim millón xjal in kubʼ kynaʼn qa il tiʼj tuʼn kynaʼn Dios. Tuʼnju xi qanin junjun xjel kye xjal, el nikʼbʼaj tiʼj qa axpe ikx qeju mintiʼ jun kyokslabʼil, at maj in che naʼn Dios.

Yajtzun teya, ¿in naʼna Dios? Qa ikju, ¿tiʼ in xi tqanina te Dios? Qa naqʼli teya tuʼn tnaʼna Dios moqa miʼn, jakulo kubʼ t-xjelina jlu: ¿Atpe tajbʼen aju tuʼn qnaʼn Dios? ¿Atpe jun in tzaj bʼinte qe? At jun aj tzʼibʼil kyiʼj uʼj tqʼama qa aju naʼj Dios noq oʼkx in najbʼen «tuʼn tkubʼ kynaʼn xjal bʼaʼn [...;] ik tzeʼn at jun kiẍ kyukʼil ex in che yolin tukʼil». At junjun aj qʼanel axju in kubʼ kyximen, in nok kyqʼoʼn naʼj Dios te «juntl tumel tuʼn kyqʼanit xjal». Yajtzun teya, ¿tiʼ teya t-ximbʼetz tiʼj? ¿In che naʼnpe xjal Dios noq tuʼnju ma che naqʼet tiʼj, ik tzeʼn in kubʼ kyximen junjuntl, moqa noq oʼkx in che naʼn xjal Dios tuʼn tkubʼ kynaʼn bʼaʼn?

Junxitl te Tyol Dios in tzaj t-xnaqʼtzaʼn. In tzaj tqʼamaʼn Tyol Dios qa aju naʼj Dios, nya oʼkx in kubʼ kynaʼn xjal bʼaʼn tuʼn. In tzaj t-xnaqʼtzaʼn qa at jun in bʼin kyiʼj naʼj Dios in che bʼant ex in chex qanit toj tumel. ¿Axpe tok jlu? Qo xnaqʼtzan kyiʼj junjun yekʼbʼil.