¿In nok tqʼoʼn twitza tiʼj alkye tten in nonin Dios tiʼja?
«Ktzajel tyekʼun Qman tipumal kyxol qe tmajen.» (ISAÍAS 66:14)
BʼITZ: 65 EX 26
1, 2. ¿Tiʼ in kubʼ kyximan junjun xjal tiʼj Dios?
AT NIM xjal in kubʼ kyximan qa mintiʼ in nok tqʼoʼn Dios twiʼ tiʼjju in kubʼ qbʼinchaʼn nix tiʼjju in bʼaj qiʼj. Jun techel tiʼj jlu, toj noviembre te 2013, chʼixme kubʼ xitj tkyaqil tnam Filipinas tbʼi tuʼn jun nimxix kyqʼiqʼ jbʼal. Tej otoqxi bʼaj xitbʼil lu, tqʼama alcalde te jun tnam qa mintiʼ e tzaj onin xjal tuʼn Dios tuʼnju in bʼaʼntoq junjuntl aqʼuntl tuʼn Dios.
2 At txqantl xjal in kubʼ kyximan qa mintiʼ in nok tqʼoʼn Dios twitz tiʼjju in bʼant kyuʼn (Isaías 26:10, 11; 3 Juan 11). Tqʼama apóstol Pablo qa toj ambʼil tej tten ateʼ xjal nya kyajbʼil tuʼn ttzaj kynaʼn Dios toj kyanqʼibʼil. Nya bʼaʼn xjal qe, sbʼul qe ex kyajtoq mas tiʼchaq (Romanos 1:28, 29).
3. a) ¿Alkyeqe xjel bʼaʼn tuʼn qximin kyiʼj? b) Toj nimku maj, ¿tiʼ t-xilen aj tyolin Xjan Uʼj tiʼj «tipumal» Dios?
3 Atzun qe ojtzqiʼn quʼn qa in nok tqʼoʼn Jehová twitz tiʼj tkyaqil in bʼant quʼn. Noqtzun tuʼnj, qo ximin kyiʼj xjel lu: «¿Qʼuqlipe nkʼuʼje qa at tkʼuʼj Dios wiʼje? ¿Nokpe nqʼoʼne nwitze tiʼj alkye tten in nonin Dios wiʼje?». Aj tyolin Tyol Dios tiʼj alkye tten in nonin Jehová kyiʼj tmajen, nim maj najbʼen yol «tipumal» Dios tuʼn (kjawil uʼjit Deuteronomio 26:8). (Qʼonka twitza tiʼj «Aju in tzaj tqʼamaʼn junjun yol».) Kyaj tqʼamaʼn Jesús qa ateʼ junjun xjal «kʼokel kykeʼyin Dios», toj juntl yol, kʼelel kynikʼ qa in nonin Dios kyiʼj (Mateo 5:8). ¿In nelpe teya tnikʼ tiʼj jlu? ¿Nokpe tqʼoʼna twitza tiʼj alkye tten in nonin Dios tiʼja toj tanqʼibʼila? In yolin Tyol Dios kyiʼj junjun xjal ok kyqʼoʼn kywitz tiʼj «tipumal» Dios ex in yolin kyiʼj txqantl aʼyeju mintiʼ ok kyqʼoʼn kywitz tiʼj. Toj xnaqʼtzbʼil lu qo xnaqʼtzal tiʼj junjun techel. Toj juntl xnaqʼtzbʼil qo xnaqʼtzal tiʼj tzeʼn in nonin qʼuqbʼil qkʼuʼj tuʼn tel qnikʼ qa in nonin Dios qiʼj.
MINTIʼ EL KYNIKʼ TIʼJ QA ONIN DIOS TIʼJ TTNAM
4. ¿Alkye tten kubʼ kyyekʼun aj qʼoj kyiʼj Israel qa mintiʼ el kynikʼ tiʼj qa onin Jehová tiʼj ttnam?
4 Toj ambʼil ojtxi, nim xjal ok kyqʼoʼn kywitz tiʼj alkye tten onin Dios tiʼj tnam Israel. Jun techel tiʼj jlu, bʼant nim milagr tuʼn Jehová tuʼn tonin tiʼj ttnam tuʼn tetz toj Egipto ex tuʼn tkambʼan tiʼj nim qʼoj ok kyuʼn tuʼn tkambʼet Txʼotxʼ tzaj Tziyen kye (Josué 9:3, 9, 10). Nimku aj kawil ok kybʼiʼn aju bʼant tuʼn Jehová. Noqtzun tuʼnj, ok kychmon kyibʼ tuʼn kyqʼojin «tiʼj Josué ex kyiʼj aj Israel» (Josué 9:1, 2). Tej kyqʼojin aj qʼoj kyiʼj aj Israel, ax ikx ok kyqʼoʼn kywitz tiʼj alkye tten onin Dios tiʼj ttnam. Jun techel tiʼj jlu, ok kyqʼoʼn kywitz tiʼjju bʼant tuʼn Jehová tuʼn tkyaj weʼ Qʼij ex Xjaw «tejxi tkubʼ kyiʼj aj qʼoj kyuʼn» (Josué 10:13). Noqtzun tuʼnj, mintiʼ el kynikʼ tiʼj qa onin Jehová tiʼj ttnam. Tuʼntzunju, mintiʼ e kambʼan kyiʼj aj Israel (Josué 11:20).
5. ¿Tiʼ mintiʼ el tnikʼ aj kawil Acab tiʼj?
5 Tej tbʼet ambʼil, xi qʼoʼn nim maj ambʼil te jun aj kawil tuʼn tok tqʼoʼn twitz tiʼj alkye tten onin Dios tiʼj ttnam. Acab tbʼi aj kawil lu ex nya bʼaʼntoq tbʼinchbʼen. Xi tqʼamaʼn Elías aju t-sanjel Dios te aj kawil qa ya mlay tzaj jbʼal tzmaxi aj t-xi tqʼamaʼn (1 Reyes 17:1). Ax tok, oʼkx Dios jaku tzaj qʼonte tipumal Elías tuʼn ttzaj tqʼamaʼn jtoj tuʼn ttzaj jbʼal juntl maj. Noqtzun tuʼnj, mintiʼ el tnikʼ Acab tiʼj. Yajxitl, xi tqanin Elías te Jehová tuʼn ttzaj t-samaʼn qʼaqʼ toj kyaʼj, ex tzaj ttzaqʼweʼn Jehová tnaʼj Dios. Ax ikx xi tqʼamaʼn Elías te Acab qa ok tzul nim jbʼal tuʼn Jehová. Ex iktzun bʼaj (1 Reyes 18:22-45). Noqtzun tuʼnj, mintiʼ el tnikʼ Acab qa tuʼn Jehová bʼant tkyaqil milagr lu. ¿Tiʼ in tzaj t-xnaqʼtzaʼn qe aju ma qo xnaqʼtzan tiʼj toj taqikʼ lu ex tojju ma kyaj? Qa qaj tuʼn tok qqʼoʼn qwitz tiʼj alkye tten in qo tzaj tonin Dios, il tiʼj tuʼn qximin tiʼj.
EL KYNIKʼ TIʼJ QA ONIN DIOS TIʼJ TTNAM
6, 7. ¿Tiʼ el kynikʼ aj Gabaón ex Rahab tiʼj?
6 Toj ambʼil tej kyten aj Israel, attoq jun tnam Gabaón tbʼi. Aʼyeju xjal lu junxitl qe kywitz txqantl tnam. ¿Tiquʼn? Tuʼnju ok kybʼiʼn tkyaqilju otoq bʼant tuʼn Jehová kyiʼj aj Israel ex el kynikʼ tiʼj qa a Dios onin tiʼj ttnam. Kyjuʼtzun, mintiʼ e qʼojin kyiʼj aj Israel, aju bʼant kyuʼn, ok tilil kyuʼn tuʼn miʼn ttzaj qʼoj kyxol (Josué 9:3, 9, 10). Tbʼanelxix aju bʼant kyuʼn tuʼnju el kynikʼ tiʼj qa onin Jehová tiʼj tnam Israel.
7 Ax ikx el tnikʼ Rahab tiʼj qa in nonintoq Jehová tiʼj ttnam. Nya aj Israel te, noqtzun tuʼnj, otoq tzʼok tbʼiʼn qa etz tiʼn Jehová tnam Israel toj Egipto. Tej kypon kabʼe aj Israel tja Rahab, xi tqʼamaʼn kye qa qʼuqlitoq tkʼuʼj qa kʼonil Jehová kyiʼj tuʼn kyok te tajaw txʼotxʼ aju jatumel in nanqʼintoq. Ex maske ojtzqiʼntoq tuʼn qa tuʼn qʼuqbʼil tkʼuʼj lu jaku tzaj nya bʼaʼn tiʼj kyukʼix toj tja, ok qʼuqeʼ tkʼuʼj tiʼj Dios qa ok kletel tuʼn (Josué 2:9-13; 4:23, 24).
8. ¿Tiʼ el kynikʼ junjun aj Israel tiʼj?
8 Qo yolin juntl maj tiʼj Acab. Tej tok tqʼoʼn twitz tiʼj tej tzaj qʼaqʼ toj kyaʼj, nyatoq taj tuʼn tel tnikʼ tiʼj qa otoq tzaj tbʼiʼn Dios Elías. Noqtzun tuʼnj, at junjun aj Israel el kynikʼ tiʼj qa tuʼn Dios otoq bʼant milagr lu. Tuʼntzunju e jaw ẍchʼin: «Ate Qman [moqa ‹Jehová›TNM] atzun Diosju» axix tok (1 Reyes 18:39).
9. ¿Alkye tten jaku tzʼok qqʼoʼn qwitz tiʼj «tipumal» Jehová toj ambʼil jaʼlo?
9 Ma qo xnaqʼtzan kyiʼj xjal mintiʼ el kynikʼ tiʼj qa onin Jehová kyiʼj tmajen ex kyiʼj junjuntl el kynikʼ tiʼj. Atzun qe qajbʼil tuʼn qok ik tzeʼn qeju el kynikʼ tiʼj. ¿Alkye tten jaku tzʼok qqʼoʼn qwitz tiʼj «tipumal» Jehová toj ambʼil jaʼlo? Jaku tzʼok qqʼoʼn qwitz tiʼj tuʼn qnabʼil (Efesios 1:18). (Qʼonka twitza tiʼj «Aju in tzaj tqʼamaʼn junjun yol».) Tuʼn tbʼant jlu quʼn, il tiʼj tuʼn tok qojtzqiʼnxix Jehová ex qe tmod. Noqtzun tuʼnj, ¿alkyeqe yekʼbʼil at qa in nonin Jehová toj ambʼil jaʼlo kyiʼj qeju kyajbʼil tuʼn kyajbʼen te?
JUNJUN YEKʼBʼIL TIʼJ QA IN NONIN JEHOVÁ QIʼJ TOJ AMBʼIL JAʼLO
10. ¿Tiʼ yekʼbʼil at qa kukx in nonin Jehová kyiʼj qeju kyajbʼil tuʼn kyajbʼen te? (Qʼonka twitza tiʼj tnejel tilbʼilal.)
10 At nim yekʼbʼil tiʼj qa kukx in nonin Jehová kyiʼj qeju kyajbʼil tuʼn kyajbʼen te. Kukx in nok qbʼiʼn alkye tten in che tzaj tbʼiʼn Jehová qe xjal in che qanin onbʼil te toj kynaʼj Dios (Salmo 53:2). Jun techel tiʼj jlu, in pakbʼantoq jun testigo de Jehová aju Allan tbʼi toj tnam Filipinas. Tej in yolintoq tukʼil jun xuʼj, jaw oqʼ xuʼj. ¿Tiʼtoq in bʼaj tiʼj? Tzaj tqʼamaʼn Allan qa tojx prim aju xi tqanin xuʼj toj tnaʼj Dios tuʼn tpon jun testigo de Jehová visitarilte. Otoq xnaqʼtzan xuʼj kyukʼil testigo de Jehová tej txinxtoq. Noqtzun tuʼnj, tej kubʼ mojeʼ xiʼ anqʼil toj juntl tnam ex ya mintiʼtl xnaqʼtzan. Tuʼntzunju xi tqʼoʼn chjonte te Dios tuʼnju jun rat naj tzaj ttzaqʼweʼn tnaʼj Dios. Jaw aʼ twiʼ, moqa bʼyan, tej naʼmxtoq tel jun abʼqʼi.
Il tiʼj tuʼn tok qqʼoʼn qwiʼ tiʼj alkye tten in qo tzaj tonin Jehová (Qʼonka twitza kyiʼj taqikʼ 11 a 13)
11, 12. a) ¿Alkye tten o tzʼonin Jehová kyiʼj tmajen? b) Qʼamantza alkye tten o tzʼonin Jehová tiʼj jun ermana.
11 Toj ambʼil jaʼlo, o tzʼonin Jehová kyiʼj nimku tmajen. Jun techel, tej naʼmxtoq kyok te testigo de Jehová, at junjun in che sichʼintoq, in najbʼentoq droga kyuʼn moqa in nok kyqʼoʼn kywitz kyiʼj nya bʼaʼn tilbʼilal. In tzaj kyqʼamaʼn qa ok tilil kyuʼn tuʼn tkyaj kytzaqpiʼn qe nya bʼaʼn lu, noqtzun tuʼnj, mintiʼ kyaj kytzaqpiʼn. Atzun tej txi kyqanin onbʼil te Jehová, tzaj tqʼoʼn «nimxix» kyipumal, iktzun tten kyaj kytzaqpiʼn aju nya bʼaʼn (2 Corintios 4:7; Salmo 37:23, 24).
12 Ax ikx o tzʼonin Jehová kyiʼj tmajen tuʼn kyex twitz nya bʼaʼn in tzaj kyiʼj. Qo xnaqʼtzan tiʼjju bʼaj tiʼj jun ermana Amy tbʼi. Xi qʼamaʼn te tuʼn t-xiʼ toj jun tal tnam toj Pacífico tuʼn tonin tuʼn tjaw bʼinchet jun Ja te Chmabʼil ex jun ja kye qeju in chex samaʼn pakbʼal toj junjuntl tnam. Noqtzun tuʼnj, junxitl anqʼibʼil toj tnam lu. Nim maj mintiʼ aʼ nix luz, ex kukx in che noj bʼe tuʼn aʼ aj ttzaj nim jbʼal. Nya oʼkxju, ax ikx nanqʼintoq toj jun tal cuart toj jun hotel ex nimtoq in bʼisin kyiʼj toj tja. Jun maj, tzaj tqʼoj tiʼj jun ermana tej in che aqʼunantoq junx. Tej tmeltzʼaj toj tcuart, tzaj tbʼis. Toj ambʼil aju mintiʼtoq luz, tuʼntzunju, attoq toj qlolj. Oktzun ten naʼl Dios te Jehová. Tej tmeltzʼaj luz, kanet jun xnaqʼtzbʼil tuʼn aju tkuʼx toj uʼj Aju Xqʼuqil atz jatumel ateʼkux junjun nabʼil kye qeju in chex samaʼn pakbʼal toj junjuntl tnam. In yolintoq xnaqʼtzbʼil tiʼj alkye tten jaku qo ex twitz bʼis ex twitz nya bʼaʼn kyukʼil txqantl. Kubʼ tnaʼn Amy qa iktzen aku Jehová tzaj yolin te. Tzaj tqʼoʼn jlu tipumal tuʼn kukx tajbʼen te Jehová (Salmo 44:25, 26; Isaías 41:10, 13).
13. ¿Alkyeqe yekʼbʼil at qa in nonin Jehová kyiʼj tmajen tuʼn kykolin tiʼj kyoklen tuʼn kypakbʼan?
13 Ax ikx o tzʼonin Jehová kyiʼj tmajen tuʼn kykolin tiʼj kyoklen tuʼn kypakbʼan (Filipenses 1:7). Jun techel, qa at junjun aj kawil in nok tilil kyuʼn tuʼn miʼn qpakbʼan, o qo xaj kywitz qe jwes tuʼn kykolin qiʼj. Ya o qo kambʼan 268 maj kywitz qe jwes mas nim kyoklen twitz tkyaqil Txʼotxʼ. Jun techel, atxix toj abʼqʼi 2000 o qo kambʼan 24 maj toj Tribunal Europeo de Derechos Humanos. Qʼanchaʼlxix qa mintiʼ jun jaku kubʼ weʼ tuʼn miʼn tonin Jehová tiʼj ttnam (Isaías 54:17; kjawil uʼjit Isaías 59:1).
14. ¿Tiʼ junjuntl yekʼbʼil at qa in nonin Dios qiʼj?
14 Juntl yekʼbʼil qa in nonin Dios qiʼj aju in qo pakbʼan twitz tkyaqil Txʼotxʼ (Mateo 24:14; Hechos 1:8). Juntl yekʼbʼil, in qo ajbʼen qkyaqilx te Jehová toj mujbʼabʼil noq jaʼxku tumel tzajni qoʼ. Mintiʼ juntl kʼloj xjal at mujbʼabʼil kyxol ik tzeʼn jlu. Axpe ikx at junjun xjal mintiʼ in che ajbʼen te Jehová in tzaj kyqʼamaʼn jlu: «Ax tok at Dios kyxole» (1 Corintios 14:25). Ik tzeʼn in nok qqʼoʼn qwitz tiʼj, at nim yekʼbʼil qa in nonin Dios qiʼj (kjawil uʼjit Isaías 66:14). ¿Yajtzun teya? ¿In nok tqʼoʼn twitza tiʼj alkye tten in nonin Jehová tiʼja toj tanqʼibʼila?
¿IN NOK TQʼOʼN TWITZA TIʼJ ALKYE TTEN IN NONIN DIOS TIʼJA?
15. ¿Tiquʼn at maj mintiʼ in nok qqʼoʼn qwitz tiʼj qa in qo tzaj tonin Jehová?
15 At maj mintiʼ in nok qqʼoʼn qwitz tiʼj qa in nonin Jehová qiʼj. ¿Tiquʼn? Tuʼnju at maj oʼkx in nok qqʼoʼn qwiʼ tiʼj nya bʼaʼn in tzaj qiʼj, tuʼntzunju, in nikʼ tnaʼl quʼn qa o tzʼonin Jehová qiʼj. A jlu bʼaj tiʼj Elías. Mintiʼtoq in tzaj xobʼ. Noqtzun tuʼnj, tej tajtoq Jezabel tuʼn tkubʼ tbʼyoʼn Elías, ikʼ tnaʼl tuʼn Elías alkye tten otoq tzʼonin Jehová tiʼj. Tzaj xobʼxix ex tuʼntzunju in tzaj tqʼamaʼn Tyol Dios qa tajtoq tuʼn tkyim (1 Reyes 19:1-4). ¿Alkye tten jakutoq tzaj onin ex jakutoq tzaj qʼuqbʼaʼn tkʼuʼj? Oʼkx qa ma jyon onbʼil tukʼil Jehová (1 Reyes 19:14-18).
16. Aj ttzaj nya bʼaʼn qiʼj, ¿tiʼ kʼonil qiʼj tuʼn tok qqʼoʼn qwitz tiʼj qa in nonin Jehová qiʼj?
16 Chʼixmi axju bʼaj tiʼj Job. Nimxixtoq in bʼaj tkʼuʼj tiʼj nya bʼaʼn tzaj tiʼj ex nya iktoq t-xim ik tzeʼn te Jehová (Job 42:3-6). ¿Yajtzun qe? Aj ttzaj nya bʼaʼn qiʼj atlo maj mintiʼ in nel qnikʼ tiʼj qa in nonin Jehová qiʼj. ¿Tiʼ jaku tzʼonin qiʼj tuʼn tok qqʼoʼn qwitz tiʼj? Qa ma qo ximin tiʼjju in tzaj tqʼamaʼn Tyol Dios tiʼj nya bʼaʼn in tzaj qiʼj. Iktzun tten, axix tok kʼelel Jehová toj qwitz ex jaku txi qqʼamaʼn ik tzeʼn te Job: «Atzun jaʼlo aku qine in chin keʼyin teya».
Atlo maj jaku qo ajbʼen tuʼn Jehová tuʼn qonin kyiʼj txqantl (Qʼonka twitza tiʼj taqikʼ 17 ex 18)
17, 18. a) ¿Toj alkyeqe tten o qo tzaj tonin Jehová toj qanqʼibʼil? b) ¿Tzeʼn o tzʼonin Jehová kyiʼj junjun tmajen toj ambʼil jaʼlo?
17 ¿Nokpe tqʼoʼna twitza tiʼj alkye tten in nonin Jehová tiʼja? Tnejel, ateʼ junjun erman in kynaʼn qa onin Jehová kyiʼj tuʼn tkanet axix tok okslabʼil kyuʼn. Tkabʼ, ateʼ junjuntl in kyqʼamaʼn qa onin Jehová kyiʼj tej tok kybʼiʼn jun chikʼbʼabʼil toj jun chmabʼil. Toxin, ateʼ junjuntl in kyqʼamaʼn qa onin Dios kyiʼj tej tzaj ttzaqʼweʼn jun kynaʼj Dios. Tkyajin, ateʼ junjuntl in kyqʼamaʼn qa onin Dios kyiʼj tuʼn tjapun aju otoq bʼaj kyximan tuʼn kyajbʼen mas te. Tjweʼyin, atlo txqantl in kyqʼamaʼn qa tuʼn tonbʼil Jehová kanet aju at tajbʼen kye tej tkyaj kytzaqpiʼn jun aqʼuntl aju in nel tiʼntoq ambʼil kyiʼj tuʼn kyxiʼ kyoj chmabʼil moqa toj pakbʼabʼil (Hebreos 13:5). Qa at jun tbʼanelxix qamiwbʼil tukʼe Jehová kʼelel qnikʼ qa in nonin qiʼj toj nimku tten.
18 Toj tnam Kenia at jun ermana Sarah tbʼi tqʼama jlu: «Xi nqanine te Jehová qa bʼaʼn tuʼn tkyaj ntzaqpiʼne tuʼn t-xi nqʼoʼne xnaqʼtzbʼil te jun xuʼj tuʼnju toj nwitze mintiʼtoq in kubʼ tqʼoʼn xuʼj toj xnaqʼtzbʼil aju in neltoq tnikʼ tiʼj. Tej in bʼaj naʼne Dios, jaw qʼajt nyolbʼile ex tzaj tqanin qa jaku txiʼ wukʼile toj chmabʼil». ¡Mintiʼtoq ximin jlu tuʼn Sarah! Ax ikx qe, qa in nok qqʼoʼn qwiʼ tiʼj, kʼelel qnikʼ tiʼj qa in nonin Jehová qiʼj. Toj Asia, at jun ermana Rhonna tbʼi tqʼama qa in xi tiʼn ambʼil tuʼn tel qnikʼ tiʼj alkye tten in nonin Jehová qiʼj. Ex tzaj tqʼamaʼn qa aj tok qqʼoʼn qwitz tiʼj, tbʼanelxix tuʼnju in nel qnikʼ qa at nimxix tkʼujlabʼil qiʼj.
19. Qa qajbʼil tuʼn tel qnikʼ tiʼj alkye tten in qo tzaj tonin Jehová, ¿tiʼ mastl il tiʼj tuʼn tbʼant quʼn?
19 Qa qajbʼil tuʼn tok qqʼoʼn qwitz tiʼj alkye tten in qo tzaj tonin Dios, ax ikx il tiʼj tuʼn tten jun qanmi «saq» (Mateo 5:8). A t-xilen jlu qa il tiʼj tuʼn qximin kyiʼj tbʼanel tiʼchaq ex tuʼn tkyaj qtzaqpiʼn nya bʼaʼn bʼinchbʼen (kjawil uʼjit 2 Corintios 4:2). Toj xnaqʼtzbʼil lu ma qo xnaqʼtzan tiʼj qa qajbʼil tuʼn tel qnikʼ tiʼj alkye tten in qo tzaj tonin Jehová, il tiʼj tuʼn tten jun tbʼanel qamiwbʼil tukʼil. Toj juntl xnaqʼtzbʼil qo xnaqʼtzal tiʼj alkye tten in nonin qʼuqbʼil qkʼuʼj tuʼn tel qnikʼ tiʼj alkye tten in qo tzaj tonin Jehová.
