Nim xjal in kubʼ kyximen qa noq in bʼaj kynajsaʼn ambʼil tiʼj naʼj Dios tuʼnju mintiʼ jun in bʼin kyiʼj. At junjuntl o che naʼn Dios, noqtzun tuʼnj, in kubʼ kynaʼn qa mintiʼ o tzaj tzaqʼweʼn kynaʼj Dios. At jun xjal in kubʼ t-ximin qa mintiʼ Dios at, kubʼ t-ximen tzeʼn Dios ex oktzun ten naʼl Dios ik tzeʼn jlu: «Maske noq oʼkx t-xe nẍkine qʼamantza jun tiʼ». Ex tqʼamatl qa ate Dios «mintiʼx tzaj qʼajt».

Atzunte Tyol Dios in tzaj tqʼamaʼnxix qa at jun Dios in tzaj tbʼiʼn qe naʼj Dios. Kyaj tzʼibʼin toj Tyol Dios qe yol lu xi qʼamaʼn te jun tnam toj ambʼil ojtxi: «Ktzajel tzʼeʼy tkʼuʼj Qman kyiʼje ok tbʼinte in che schʼine ex in che qanine onbʼil, ex oʼkx ok kybʼinjtze tuʼn, che tzajel tzaqʼweʼne tuʼn» (Isaías 30:19). Juntl taqikʼ Tyol Dios in tzaj tqʼamaʼn jlu: «Atzunju kynaʼj Dios qe xjal tzʼaqlxix, in xi tkʼmoʼn Qman tukʼil tzalajbʼil» (Proverbios 15:8).

Ax ikx, ateʼ techel toj Tyol Dios kyiʼj naʼj Dios o che tzaj bʼiʼn. In tzaj tqʼamaʼn jun taqikʼ Tyol Dios jlu tiʼj Jesús: «O naʼn Dios ex o kubʼsanxix wen, [...] porque at tipumal Dios tuʼn tklet Crist tuj kamik tuʼn; ex tzaj tbʼiʼn Dios» te, ex jaw anqʼin tuʼn Dios (Hebreos 5:7). Ax ikx in che kanet juntl techel quʼn toj uʼj te Daniel 9:20, 21 ex 2 Crónicas 7:1.

Qa ikju, ¿tiquʼn ateʼ junjun xjal in kynaʼn qa mintiʼ jun in tzaj bʼinte kynaʼj Dios? Qa qajbʼil tuʼn qtzaj bʼiʼn tuʼn Jehová *, aju bʼinchal Xjan Uʼj, il tiʼj tuʼn qnaʼn Dios oʼkx te. Mintiʼ tuʼn qnaʼn Dios kywitz junjuntl dios nix kye qeju qxeʼchel. Ax ikx tajbʼil Dios tuʼn «txi qqanin te [...] ik tzaʼnx ju tajbʼil», moqa toj juntl yol, aju bʼaʼn in nela toj twitz. Qa ma bʼant quʼn ikju, jaku tzʼok qeʼ qkʼuʼj tiʼj qa «in qo tzaj tbʼiʼn» (1 Juan 5:14). Kyjuʼtzun, qa qajbʼil tuʼn qtzaj tbʼiʼn Dios, il tiʼj tuʼn tok qojtzqiʼnxix te ex tuʼn t-xi qnimen.

At nim xjal qʼuqli kykʼuʼj tiʼj qa nya oʼkx jun kostumbr naʼj Dios kyxol okslabʼil, in nok qeʼ kykʼuʼj tiʼj qa ax tok in tzaj tbʼiʼn Dios qe naʼj Dios ex in che tzaj ttzaqʼweʼn. In tzaj tqʼamaʼn Isaac, te tnam Kenia jlu: «Xi nqanine onbʼil te Dios tuʼn tel nnikʼe tiʼj Tyol. Yajxitl, ul jun xjal wukʼile ex tzaj tqʼoʼn onbʼil weye». Atzun te Hilda, aju in nanqʼin atz Filipinas, tajbʼiltoq tuʼn tkyaj ttzaqpiʼn tuʼn t-sichʼin. Nim maj ok tilel tuʼn, tuʼn tkyaj ttzaqpiʼn, noqtzun tuʼnj, mintiʼ kanet tumel tuʼn. Tuʼntzunju, xi tqʼamaʼn tchmil te qa bʼaʼn tuʼn t-xi tqanin onbʼil te Dios. Tejxi tbʼaj naʼn Hilda Dios, tqʼama jlu: «In jaw labʼine tiʼj tonbʼil Dios. Xi tzyet tuʼn mintl ttzaj wajbʼile tuʼn nsichʼine. O bʼant tuʼn tkyaj nsichʼine».

Qa aju teya in bʼaj tkʼuʼj tiʼj at toklen tukʼilju «tajbʼil» Dios, ¿mlaypelo tzaj onina tuʼn?