TBʼI XNAQʼTZBʼIL TOK TIʼJ T-XKʼOMIL: ¿TIʼ T-XIM DIOS TIʼJ QʼOJ?
Aju t-xim Dios tiʼj qʼoj toj tnejel syent abʼqʼi
Kubʼ qʼoʼn nim nya bʼaʼn kyibʼaj aj Judiy. Ex ik tzeʼn qe kyxeʼchel, xi kyqanin nim maj onbʼil te Dios, noqtzun tuʼnj, toj ambʼil lu aʼye xjal te Roma aj qʼoj. Toj ambʼil aju, ok kybʼiʼn aj Judiy tqanil tiʼj Jesús. ¿Kubʼpe tyekʼun Jesús qa ate Mesías aju otoq tzaj tziyen? Ikju, tuʼntzunju, at nim xjal ok qeʼ kykʼuʼj «tiʼj qa tuʼn kykolpet aj Israel tuʼn» (Lucas 24:21). Noqtzun tuʼnj, mintiʼ e tzaj onin ik tzeʼn kyajbʼil. Axpe ikx e ul soldad te Roma toj abʼqʼi 70 xitil tnam Jerusalén ex xitil tja Dios toj ambʼil aju.
¿Tiʼ bʼaj? ¿Tiquʼn mintiʼ onin Dios kyiʼj aj Judiy tuʼn kyqʼojin ik tzeʼn otoq bʼant tuʼn ojtxe? ¿Ex tiquʼn mintiʼ tzaj tqʼoʼn ambʼil kye tuʼn kyqʼojin tuʼn kyklet tjaqʼ nya bʼaʼn tkubʼtoq kyibʼaj? ¿Moqa otoq chʼixpuj t-ximbʼetz Dios tiʼj qʼoj? Miʼn. Aju otoq chʼixpuj aju kymod aj Judiy. El kyikʼun Tkʼwaʼl Dios aju Jesús ex Mesías (Hechos 2:36). Kyjuʼtzun, chʼixmi kykyaqil xjal toj tnam aju, xi kynajsaʼn kyamiwbʼil tukʼil Dios (Mateo 23:37, 38).
Ya mintiʼtl onin Dios tiʼj kytnam aj Judiy ex tiʼj Txʼotxʼ Tziyen maj. Ex mintiʼtl onin Dios kyiʼj aj kyxiʼ toj qʼoj. Ik tzeʼn kyaj tqʼamaʼn Jesús, aju tkʼiwlabʼil Dios el qʼin kye xjal te Israel ex xi qʼoʼn te juntl akʼaj tnam, aju ok tqʼoʼn Tyol Dios tbʼi yajxitl te «axix tok aj Israel» ex «etzan qe tuʼn Dios» (Gálatas 6:16; Mateo 21:43). Aʼyeju tnejel okslal skʼoʼn maj kubʼ kyyekʼun qa aqe kye axix tok aj Israel etzan tuʼn Dios. Ex toj tnejel syent abʼqʼi, xi qʼamaʼn yol lu kye: «Atzun jaʼlo ma che oke te jun tnam te Dios» (1 Pedro 2:9, 10).
Yajtzun toj tnejel syent abʼqʼi, ¿qʼojinpe Dios tuʼn kytzaqpaj tnejel okslal tjaqʼ tkawbʼil Roma? ¿Moqa tzajpe tqʼoʼn Dios ambʼil tuʼn kyqʼojin tnejel okslal kyiʼj aj qʼoj kyiʼj? Mintiʼ. ¿Tiquʼn? Tuʼnju, ik tzeʼn saj tqʼamaʼn xnaqʼtzbʼil ma kyaj, tej tok qʼoj tuʼn Dios ojtxe, oʼkx te bʼaj ximente toj alkye ambʼil tuʼn tok. Ex toj tnejel syent abʼqʼi mintiʼ tzaj tqʼamaʼn tuʼn kyxiʼ tnejel okslal qʼojil kyiʼj aj qʼoj ex mintiʼ tzaj tqʼoʼn ambʼil tuʼn tbʼant jlu kyuʼn. A jlu in tzaj tyekʼun qa naʼmxtoq tpon ambʼil tuʼn Dios tuʼn tkubʼ tnajsaʼn aju nya bʼaʼn.
Ik tzeʼn bʼant kyuʼn tmajen Dios tej naʼmxtoq tul Jesús, noq e ayon qe okslal toj tnejel syent abʼqʼi tuʼn ttzaj tiʼn Dios xitbʼil tiʼj nya bʼaʼn. Tuʼnju mintiʼ te Dios tzaj tqʼamaʼn tuʼn kyqʼojin kyiʼj aj qʼoj kyiʼj tuʼn kyklet. Ex kyaj tchikʼbʼaʼnxix Jesús jlu kye t-xnaqʼtzbʼen. Mintiʼ kubʼ nej kywitz tuʼn kyxiʼ toj qʼoj, sino aju te xi tqʼamaʼn kye a jlu: «Kykʼujlame qe aj qʼoj kyiʼje [...] ex che naʼne Dios kyiʼj qeju in che ilin kyiʼje ex in che yajlan kyeye» (Mateo 5:44). Ax ikx, ik tzeʼn kyaj qʼamaʼn, kbʼeltoq xiten Jerusalén, ex kubʼ xiten toj tnejel syent abʼqʼi kyuʼn soldad te Roma. Ex xi tqʼamaʼnxix Jesús kye t-xnaqʼtzbʼen tuʼn miʼn kyqʼojin, sino tuʼn kyel oq, ex ik bʼantju kyuʼn (Lucas 21:20, 21).
Ax ikx, tukʼil onbʼil tzaj tqʼoʼn xewbʼaj xjan, kubʼ ttzʼibʼen apóstol Pablo jlu: «Miʼn tzʼaj kyqʼoʼne t-xel mya bʼaʼn, [...] porque in tmaʼn tuj Tuʼjil: Wuʼne kʼajel t-xel; aqine chin qʼolte kastiw, chi Qman» (Romanos 12:19). Atz jatz tiʼn apóstol Pablo jlu toj Levítico 19:18 ex Deuteronomio 32:35, aju otoq tzikʼ nim syent abʼqʼi ttzajlen tqʼamaʼn Dios. Ik tzeʼn in tqʼamaʼn xnaqʼtzbʼil ma kyaj, aju jun tumel ajbʼen tuʼn Dios tuʼn kytzaj tonin qe tmajen aju tej kyklet tuʼn toj qʼoj. Ex aju tyol apóstol Pablo in tzaj tyekʼun qa mintiʼ o chʼixpuj t-ximbʼetz Jehová tiʼj qʼoj. Aju qa in najbʼen qʼoj tuʼn, tuʼn kyklet tmajen ex tuʼn tkubʼ tnajsaʼn nya bʼan. Noqtzun tuʼnj, ik tzeʼn tej naʼmxtoq tul Jesús, oʼkx Dios kbʼajel ximente toj alkye ambʼil tuʼn tok qʼoj ex alkye tuʼn tqʼojin.
A jlu in tzaj tyekʼun qa mintiʼ tzaj tqʼamaʼn Dios kye okslal toj tnejel syent abʼqʼi tuʼn kyxiʼ toj qʼoj. ¿Yajtzun toj ambʼil jaʼlo? ¿Ope tzaj tqʼoʼn Dios ambʼil te jun kʼloj xjal tuʼn kyxiʼ toj qʼoj? ¿Mape pon ambʼil tuʼn tonin kyiʼj tmajen toj qʼoj? ¿Tzeʼn in nela qʼoj toj twitz Dios toj ambʼil jaʼlo? Aju juntl xnaqʼtzbʼil tzul tqʼoʼn tzaqʼwebʼil kyiʼj xjel lu.
