Aju qʼoj tzaj tiʼn Dios kyiʼj aj Egipto in tzaj tyekʼun qa nya tkyaqil qʼoj nya bʼaʼn in nela toj twitz Dios. Ax ikx toj junjuntl maj, xi tqʼamaʼn kye aj Israel tuʼn kyxiʼ qʼojil. Jun techel, xi tqʼamaʼn kye tuʼn kyqʼojin kyiʼj xjal te tnam Canaán aʼyeju e ok te puro nya bʼaʼn (Deuteronomio 9:5; 20:17, 18). Xi tqʼamaʼn te aj kawil David tuʼn tqʼojin kyiʼj nya bʼaʼn xjal te tnam Filistea. Axpe ikx tzaj tqʼamaʼn Dios tumel te tuʼn tkambʼan toj qʼoj (2 Samuel 5:17-25).

Aju in tzaj tqʼamaʼn Tyol Dios in tzaj tyekʼun qa oʼkx tzaj tqʼoʼn Dios ambʼil tuʼn tok qʼoj qa puro nya bʼaʼn qe xjal ex qa nimxix nya bʼaʼn ok bʼinchaʼn kyiʼj aj Israel. Ex qa iltoq tiʼj tuʼn kyklet tmajen ex tuʼn kukx tten axix tok okslabʼil. Noqtzun tuʼnj, qo xnaqʼtzan tiʼj oxe xnaqʼtzbʼil in tzaj kyyekʼun qeju qʼoj e tzaj tqʼamaʼn Dios.

1. OʼKX DIOS BʼAJ XIMENTE ALKYE KQʼOJIL. Toj jun maj, xi tqʼamaʼn Dios jlu kye aj Israel: «Mya aqeye che qʼojel tuj qʼoj lu». ¿Tiquʼn? Tuʼnju ate Dios tuʼn tqʼojin te kyxel (kychʼixel) (2 Crónicas 20:17; 32:7, 8). Bʼant jlu tuʼn toj nimku ambʼil, ik tzeʼn xqo yolin tiʼj toj twiʼ xnaqʼtzbʼil lu. Atzun toj junjuntl maj, xi tqʼamaʼn Dios kye aj Israel tuʼn kyqʼojin tuʼn kyklet ex tuʼn tok txʼotxʼ te kyetzbʼil aju otoq tzaj ttziyen kye (Deuteronomio 7:1, 2; Josué 10:40).

2. OʼKX DIOS BʼAJ XIMENTE TOJ ALKYE AMBʼIL KʼOKEL QʼOJ. Tukʼil pasens kubʼ kyyoʼn tmajen Dios tuʼn tqʼojin Dios kyiʼj qeju nya bʼaʼn tnam ateʼtoq kytxlaj. Tzmaxi qa ma tzaj tqʼamaʼn Dios kye, in che qʼojin. Nya bʼaʼn ela toj twitz Dios qa oʼkx kye  in bʼaj kyximen tuʼn kyqʼojin. Ikju, in tzaj tyekʼun Tyol Dios qa toj tkyaqil maj tej tjaw kyin kyibʼ aj Israel ex tej tok qʼoj kyuʼn aju mintiʼ otoq tzaj tqʼamaʼn Dios, tzaj nya bʼaʼn kyiʼj tuʼn. *

3. MINTIʼ IN TZALAJ DIOS KYIʼJ XJAL IN CHE KYIM, AXPE IKX QEJU NYA BʼAʼN XJAL. A Dios Qʼol chwinqlal ex a Bʼinchal kye xjal (Salmo 36:9). Tuʼntzunju, nya tajbʼil tuʼn kykyim xjal. Noqtzun tuʼnj, at nim xjal nya bʼaʼn aʼyeju kyajbʼil tuʼn tok kybʼinchaʼn nya bʼaʼn ex kyajbʼil tuʼn tkubʼ kybʼyoʼn txqantl (Salmo 37:12, 14). Tuʼn tkubʼ naj jlu, at maj tzaj tqʼoʼn Dios ambʼil tuʼn tok qʼoj kyiʼj qeju nya bʼaʼn xjal ojtxe. Noqtzun tuʼnj, toj tkyaqil ambʼil tej tonin tiʼj qʼoj ok kyuʼn aj Israel, ten «tqʼaqʼbʼil» tkʼuʼj ex mintiʼ tzaj naj tqʼoj kyiʼj qeju aj qʼoj kyiʼj aj Israel (Salmo 86:15). Jun techel, tzaj tqʼamaʼn kye aj Israel tuʼn t-xi kyqʼamaʼn kye aj qʼoj tuʼn tten mujbʼabʼil kyxol naʼmxtoq t-xi tzyet qʼoj kyukʼil, tuʼntzun t-xi qʼet ambʼil kye aj qʼoj tuʼn tkubʼ kychʼexpuʼn tten kyanqʼibʼil ex tuʼn miʼn tok qʼoj kyukʼil (Deuteronomio 20:10-13). Iktzun tten tzaj tyekʼun Dios qa nya tajbʼil «tuʼn tkyim jun xjal bʼinchal mya bʼaʼn, noq oʼkx» tajbʼil «tuʼn tbʼaj tchʼexpuʼn tmod tuʼntzun tanqʼin» (Ezequiel 33:11, 14-16). *

Ik tzeʼn ma tzʼel qnikʼ tiʼj, tzaj tqʼamaʼn Dios tuʼn tok qʼoj ojtxe, noqtzun tuʼnj, tuʼn tkubʼ tnajsaʼn nim nya bʼaʼn. Ex a Dios —ex nya aʼye xjal— bʼaj ximente toj alkye ambʼil tuʼn tok qʼoj ex alkye tuʼn tqʼojin. ¿In tzajpe tyekʼun jlu qa tgan Dios tuʼn tok qʼoj ex qa tgan tuʼn tel chitj kychkʼel xjal? Nya ik ttenju. In nel tikʼun Dios aju bʼiybʼil (Salmo 11:5). Yajtzun tej tul Jesús, aju Tkʼwaʼl Dios, tzalu twitz Txʼotxʼ toj tnejel syent abʼqʼi, ¿chʼexpajpe t-ximbʼetz Dios tiʼj qʼoj?