LU TIMOTEO ma tzikʼ bʼet tja tuʼn tkyaqil tkʼuʼj ex atz tok twiʼ tiʼjju at twitz. In nok lepeʼ kyiʼj tukʼil kyoj bʼe aʼyeju ojtzqiʼnxix tuʼn. In kyaj tnam Listra tuʼn tiʼjxi aju tokx tibʼaj jun tal witz toj chqʼajlaj. In jaw tzeʼn Timoteo aj ttzaj tnaʼn tnan ex tyaʼ aʼyeju in kubʼ kyewin taʼl kywitz tuʼnju ma tzikʼ bʼet Timoteo. ¿Okpe kʼajetz tqʼoʼn Timoteo twitz tiʼjxi?

Atzunte apóstol Pablo in najtz tqʼoʼn junjun maj twitz tiʼj Timoteo ex in tzaj tzeʼn toj twitz tuʼn tok tqʼuqbʼaʼn tkʼuʼj. Ojtzqiʼn tuʼn Pablo qa kukx in tzaj tchʼixwi Timoteo, noqtzun tuʼnj, in tzalaj tuʼnju in nok tilil tuʼn kuʼxin lu. Junlo 20 abʼqʼi iqʼin tuʼn Timoteo ex nimxix nimen Pablo tuʼn ex kʼujlaʼn tuʼn. Kukx in najbʼen Pablo te Dios ex at nim tipumal. Ma txiʼ Timoteo tukʼil najchaq, moqa laqʼche, tiʼj tja. Ok che bʼetel tuʼn kyqan ex toj bark, ex che okel weʼ twitz nim nya bʼaʼn toj bʼe. Mintiʼ bʼiʼn tuʼn Timoteo qa tzul juntl maj qʼolbʼel kye toj tja moqa miʼn.

¿Tiquʼn kubʼ t-ximen kuʼxin lu tuʼn tbʼant jlu tuʼn? ¿Tzajpe tbʼanel te tuʼnju bʼant jlu tuʼn? ¿Alkye xnaqʼtzbʼil jaku tzʼel qkanoʼn tiʼj qʼuqbʼil tkʼuʼj Timoteo?

Qo ximen jaʼlo tiʼj ambʼil tej atxtoq kabʼe abʼqʼi tuʼn tikʼ bʼet Timoteo. Atzlo toj tal tnam Listra jaw chʼiy Timoteo aju nya junx tok kyiʼj txqantl tnam tibʼaj jun witz ex jatumel at nim kʼul. In noktoqlo yol griego toj kywiʼ xjal, noqtzun tuʼnj, at kyex kyyol, aju licaónico tbʼi. Pon jun qʼij jatumel tzaj jun tiʼ toj lugar lu aju mintiʼxix te in nikʼ toj: e pon samaʼn Pablo tukʼil Bernabé atztzu ex otoq che tzaj toj tnam Iconio, aju attoq niqayin. Tej in che pakbʼan, ok tqʼoʼn Pablo twitz tiʼj jun xjal mintiʼ in bʼant tbʼet ex kubʼ tyekʼun qʼuqbʼil tkʼuʼj. Tuʼntzunju, kubʼ tqʼanin Pablo (Hechos 14:5-10).

Nim xjal toj tnam Listra in kubʼ kyximen qa in najbʼen kyxmilal xjal kyuʼn dios aʼyeju otoq che ten atztzu toj ambʼil ojtxe. Kyjuʼtzun, kubʼ kyximen xjal qa aju dios Hermes, moqa Mercurio, otoq tzʼok te Pablo ex aju dios Zeus, moqa Júpiter, otoq tzʼok te Bernabé. Ok tilil kyuʼn qe okslal lu, aʼyeju mintiʼ in jaw kynimsan kyibʼ, tuʼn miʼn tkubʼ kyqʼoʼn xjal oyaj kywitz tuʼn kyjaw nimsaʼn (Hechos 14:11-18).

Noqtzun tuʼnj, ateʼ junjun xjal toj tnam Listra mintiʼ kubʼ kyximen qa dios Pablo tukʼil Bernabé, sino qa ax tok ex tbʼanel aju bʼant kyuʼn. Ik tzeʼn Eunice, aju jun xuʼj aj Judiy ex mejebʼni tukʼil jun grieg xjal, * tukʼil tnan aju Loida tbʼi ok kybʼiʼn tukʼil tkyaqil kykʼuʼj aju kyqʼama Pablo tukʼil Bernabé. Ok kybʼiʼn aju kyajtoq kykyaqil Judiy tuʼn tok kybʼiʼn: aju qa otoq tzul Mesías ex qa otoq che japun yol tuʼn aʼyeju e kyaj qʼamaʼn tiʼj toj Tyol Dios.

 ¿Tzeʼn onin tiʼj Timoteo aju tej tpon Pablo? Otoq txi xnaqʼtzaʼn Tyol Dios te Timoteo atxix tej kʼwaʼlxtoq, aju kubʼ tzʼibʼen toj yol hebreo, (2 Timoteo 3:15). Ik tzeʼn te tnan ex tyaʼ, el tnikʼ Timoteo qa in tzajtoq kyxnaqʼtzaʼn Pablo tukʼil Bernabé aju axix tiʼj Mesías. Qo ximen tiʼj xjal mintiʼtoq in bʼant tbʼet aju kubʼ tqʼanin Pablo. Atxix tej kʼwaʼltoq Timoteo, nimlo maj ok tqʼoʼn twitz tiʼj kyoj bʼe te Listra. ¡Ex jaʼlo lutoq in bʼet toj tnejel maj! Tuʼntzunju, e ok Eunice ex Loida te okslal tiʼj Jesucristo, ax ikx te kuʼxin Timoteo. At nim xnaqʼtzbʼil jaku tzʼel kykanoʼn tatbʼaj ex chmambʼaj kyiʼj Eunice ex Loida. Jaku che ok te jun tbʼanel techel kye qʼa ex txin toj ambʼil jaʼlo.

Nimle e tzalaj okslal te tnam Listra tuʼnju akʼaj qʼuqbʼil kykʼuʼj. Noqtzun tuʼnj, ax ikx el kynikʼ tiʼj qa tzultoq nya bʼaʼn kyiʼj tuʼn jlu. Aʼyeju aj qʼoj Judiy te Iconio ex te Antioquía e kanin toj Listra ex e ok ten qʼamalte kye xjal tuʼn kyok ten mastl qʼojil tiʼj Pablo ex tiʼj Bernabé. Jurat naj tzaj kyqʼoj xjal ex i eʼx lepeʼ tiʼj Pablo tuʼn tok kyxoʼn abʼj tiʼj. Nimxix ok bʼiyoʼn Pablo ex kubʼ tzʼaq kyuʼn twitz Txʼotxʼ. Ex kyjukʼuʼn tiʼjxi tnam ex kubʼ kyximen qa otoq kyim (Hechos 14:19).

Aʼyeju t-xnaqʼtzbʼen Jesús te Listra e kanin jatumel taʼ ex ok kytxolin kyibʼ tiʼj. ¡Tbʼanel kubʼ kynaʼn tej tjaw yukchi Pablo, tej tjaw weʼ ex tej mintiʼ tzaj xobʼ tuʼn tokx juntl maj toj tnam! Toj juntl qʼij, xiʼ tukʼil Bernabé toj tnam Derbe tuʼn kukx kypakbʼan. Tej kyonin kyiʼj xjal tuʼn kyok te t-xnaqʼtzbʼen Jesús toj tnam aju, ten juntl maj kyipumal tuʼn kymeltzʼaj toj Listra maske jakutoq tzaj nim nya bʼaʼn kyiʼj. ¿Tiquʼn e meltzʼaj? Tuʼnju «in kykyuwsaʼntoq kyanmi qe okslal, ex in kyqʼoʼntoq kynabʼl tuʼn kyweʼxix tuj kyokslabʼl». Qo ximen tiʼj Timoteo, tej tok ten bʼil tiʼj Pablo ex Bernabé, etzlo twitz kyiʼj. Xi kyqʼamaʼn kye okslal qa tbʼanelxix aju qʼuqbʼil kykʼuʼj toj ambʼil tzul ex, tuʼntzunju, in noktoq tilil kyuʼn maske at nim nya bʼaʼn. Xi kyqʼamaʼn jlu kye: «Ilxix tiʼj tuʼn ttzaj nim yajbʼil qe, tuʼntzun qokx tuj tkawbʼil Dios» (Hechos 14:20-22).

Ok tqʼoʼn Timoteo twitz tiʼj qa in che japuntoq yol lu tuʼn apóstol Pablo tuʼnju in xitoq tqʼamaʼn tbʼanel tqanil kye xjal ex attoq nim ikʼbʼil. El tnikʼ Timoteo tiʼj qa oktoq kʼelel ikʼun kyuʼn t-vesin qa ma tzʼoktoq lepeʼ tiʼj techel kyaj tqʼoʼn Pablo. Axpe ikx ttat, nyalo bʼaʼn ela jlu toj twitz. Noqtzun tuʼnj, mintiʼ xi tqʼoʼn ambʼil te alkyexku tuʼn miʼn tajbʼen te Dios. Toj ambʼil jaʼlo, ax ikx ateʼ nim kuʼxin ik  kyten ik tzeʼn Timoteo. In kubʼ kyyekʼun qa at kynabʼil aj tjaw kyjyoʼn kyamiw aʼyeju at nim qʼuqbʼil kykʼuʼj tuʼn kyonin kyiʼj ex tuʼn tok kyqʼuqbʼaʼn kykʼuʼj tuʼntzun kukx kyajbʼen te Dios. Ax ikx kye, mintiʼ in xi kyqʼoʼn ambʼil te ikʼbʼil tuʼn miʼn kyajbʼentl te Dios axix tok.

Tej tikʼ kabʼe moqa oxe abʼqʼi, meltzʼaj Pablo toj Listra, ik tzeʼn saj qʼamaʼn tej saj tzyet xnaqʼtzbʼil lu. Nimxixlo e tzalaj qeju toj tja Timoteo tuʼnju pon juntl maj apóstol Pablo kyukʼil, ex a Silas pon tukʼil. Axlo ikx te Pablo o tzalaj tej tmeltzʼaj. Jakutoq tzʼok tqʼoʼn twitz tiʼj alkye tten otoq chʼiy ijaj kyaj tawaʼn tiʼj axix tok. Ik tzeʼn Loida tukʼil tal aju Eunice tbʼi, tbʼanel okslal qetoq ex in tzalajtoq Pablo kyiʼj tuʼnju «axix tok» qʼuqbʼil kykʼuʼj attoq (2 Timoteo 1:5). ¿Yajtzun kuʼxin Timoteo?

Ok tbʼiʼn Pablo qa otoq chʼiy kuʼxin toj tokslabʼil, mas twitzju tej tten Pablo toj tnejel maj. Nya oʼkx qe erman toj tnam Listra «in che yolin bʼaʼn tiʼj» Timoteo, ax ikx qeju ateʼtoq toj tnam Iconio aju 32 kilómetros taʼtoq tiʼj tnam Listra (Hechos 16:2). ¿Tiʼ otoq bʼant tuʼn Timoteo tuʼn kyyolin erman bʼaʼn tiʼj?

Attoq nabʼil kye kuʼxin toj «Xjan Tuʼjil» aju xi xnaqʼtzaʼn te Timoteo tuʼn tnan ex tuʼn tyaʼ atxix tej kʼwaʼltoq (2 Timoteo 3:15). Jun kyxol jlu in tqʼamaʼn: «Ximana tiʼj Dios aju bʼinchan teya, akux kuʼxuna» (Eclesiastés 12:1). Mas el tnikʼ Timoteo tiʼj jlu tej tok te okslal tiʼj Jesucristo. El tnikʼ tiʼj qa aju jun tumel tuʼn t-ximen tiʼj Bʼinchal te aju qa ma pakbʼan tiʼj Jesucristo aju tkʼwaʼl Dios. Chebʼe chebʼe el tchʼixwi ex mintiʼ tzaj xobʼ tuʼn t-xi tqʼamaʼn tbʼanel tqanil.

Aqeju xinaq, moqa ichan, qʼil twitz aqʼuntl kyxol okslal, ok kyqʼoʼn kywitz tiʼj qa otoq chʼiy Timoteo toj tokslabʼil. Tbʼanel-lo ela toj kywitz aju alkye tten in nok tqʼuqbʼaʼn Timoteo kykʼuʼj qeju ateʼ ttxlaj. Ex aju mas nim toklen aju in tzajtoq tqʼoʼn Jehová twitz tiʼj. Tzaj tqʼamaʼn Dios junjun yol tuʼn tikʼ tiʼj Timoteo, atzlo in yolin tiʼj aqʼuntl kbʼanteltoq kyxol nimku kʼloj okslal yajxitl. Tej tpon Pablo toj tnam Listra, el tnikʼ tiʼj qa jakutoq tzʼonin kuʼxin tiʼj aj t-xiʼ samaʼn kyoj tnam. Bʼaʼn ela toj kywitz ermano aʼyeju ojtzqiʼntoq Timoteo kyuʼn. Kubʼ kyqʼoʼn kyqʼabʼ tibʼaj twiʼ tuʼn tkubʼ kyyekʼun qa otoq jaw jyoʼn tuʼn tbʼant jun aqʼuntl nim toklen tuʼn te Dios (1 Timoteo 1:18; 4:14).

Mintiʼtoqlo ximen tuʼn Timoteo ex etzlo twitz tej tel tnikʼ qa attoq nim qʼuqbʼil kykʼuʼj erman tiʼj. Otoq bʼant tten tuʼn t-xiʼ tukʼil Pablo. * ¿Tiʼtzulo tqʼama ttat Timoteo, aju nya okslal, tej tok tbʼiʼn qa tajtoq tkʼwaʼl tuʼn tjapun jun toklen aju otoq tzaj tkʼamoʼn? Atlo te junxitl t-xim tiʼj tuʼn tbʼant tuʼn tkʼwaʼl. Yajtzun tnan ex tyaʼ Timoteo, ¿tiʼtzulo kyqʼama? Nimxixlo e tzalaj tiʼj ex mintiʼlo kubʼxix kyyekʼun qa in tzaj bʼajtoq kykʼuʼj tiʼj aju jaku tzaj tiʼj Timoteo.

Tej saj tzyet xnaqʼtzbʼil lu, ma yolin tiʼj prim, moqa qlax, tej t-xi tzyet juntl tumel tanqʼibʼil Timoteo junx tukʼil Pablo aju che xeltoq qʼiʼn tuʼn kyoj nimku tnam. Tej tel laqʼeʼ tiʼj Listra, tkyaqil tqʼajqʼajel abʼj ex kʼul tjaqʼ tqan in tzajtoq tyekʼun qa xitoq t-xiʼ kyoj lugar aju mintiʼ ojtzqiʼn tuʼn. Tej tex qʼij ex tej otoq che bʼet nim, kanin Pablo, Silas ex Timoteo toj tnam Iconio. Xi tzyet tuʼn tok tqʼoʼn kuʼxin twitz tiʼj alkye tten xi kyqʼoʼn Pablo tukʼil Silas tqanil tiʼjju mankbʼil otoq bʼaj kyximen apóstol ex ansyan te Jerusalén, ex alkye tten e onin kyiʼj okslal te Iconio tuʼn tchʼiy qʼuqbʼil kykʼuʼj (Hechos 16:4, 5). Noqtzun tuʼnj, tzmatoq in xi tzyet t-xnaqʼtzbʼil Timoteo.

Tej kybʼaj kyvisitarin qe kʼloj okslal te Galacia, ya mintiʼ e bʼettl kyoj nimxix bʼe te Roma. Atz e bʼettl kyoj bʼe nim kyqan te Frigia, tnejel i eʼx jawni te tnam ex yajxitl i eʼx tuj telex qʼij. E ok lepeʼ tiʼj bʼe tzaj yekʼun kye tuʼn t-xew Dios, e pon Troas ex e jax toj bark tuʼn kypon toj tnam Macedonia (Hechos 16:6-12). Toj ambʼil aju, otoq tzʼel tnikʼ Pablo qa nimxix tajbʼen Timoteo te. Xi t-samaʼn toj tnam Berea tukʼil Silas (Hechos 17:14). Axpe ikx xi tqʼoʼn ambʼil tuʼn t-xiʼ kuʼxin lu tjunalx toj Tesalónica. Ok tilil tuʼn Timoteo tuʼn tel tkanoʼn techel otoq tzʼok  tqʼoʼn twitz tiʼj ex onin tuʼn chʼiy qʼuqbʼil kykʼuʼj okslal toj tnam aju (1 Tesalonicenses 3:1-3).

Tqʼama Pablo jlu tiʼj Timoteo: «Mintiʼ juntl at wukʼile ik tzaʼn te Timotey, at tkʼuʼj kyiʼje tuʼn tonin kyukʼile» (Filipenses 2:20). Nya noqx gan qʼamanjtz yol lu tiʼj Timoteo: qʼamanjtz jlu tuʼnju nimxix aqʼunan Timoteo, kubʼ tin tibʼ ex ikʼx nya bʼaʼn tuʼn. ¡Tbʼanelxix techel lu kye kuʼxin jaʼlo! Qa tzma kuʼxin teya, miʼn tzʼel naj tiʼj tkʼuʼja qa kʼokel ojtzqiʼn twitza tuʼnju in bʼant tuʼna jaʼlo. At jun tbʼanel ambʼil teya: aju tuʼn tten jun tbʼanel tbʼiya qa ma kubʼ tqʼoʼna Jehová tnejel toj tanqʼibʼila, qa tbʼanel xjala ex qa nim kyoklen txqantl toj twitza.

Kyoj qeju 14 abʼqʼi e ikʼ, aqʼunan Timoteo nim ambʼil ttxlaj apóstol Pablo, aju tamiw. Nim tzalaj tukʼil, ax ikx e ok weʼ twitz nim nya bʼaʼn junx (2 Corintios11:24-27). Toj jun maj, axpe ikx okx toj cárcel tuʼnju in pakbʼan (Hebreos 13:23). Ik tzeʼn te Pablo, nimtoq kʼujlaʼn qe erman tuʼn Timoteo ex in tzaj bʼajtoq tkʼuʼj kyiʼj. Xi ttzʼibʼen Pablo jlu te: «Kukx in tzaj nnaʼne tej tetz taʼl twitza» (2 Timoteo 1:4). Ax ikx oqʼ Timoteo kyukʼil qeju in che oqʼtoq, tuʼnju in noktoq tilil tuʼn, tuʼn tkubʼ tnaʼn aju in kynaʼn txqantl ex in xi tqʼoʼntoq onbʼil ex qʼuqbʼil kykʼuʼj (Romanos 12:15). Ax ikx qe, ilwitlo tiʼj tuʼn tel qkanoʼn jlu qkyaqilx.

Ax tok ok Timoteo te jun tbʼanel tmajen Dios. Tuʼntzunju, nya oʼkx xi tqʼamaʼn Pablo te tuʼn t-xiʼ visitaril kye kʼloj okslal tuʼn tok tqʼuqbʼaʼn kykʼuʼj, ax ikx xi tqʼamaʼn te tuʼn tok tqʼoʼn kyoklen xinaq te ansyan ex te onil kye ansyan aʼyeju at kynabʼil (1 Timoteo 5:22).

Nimxixtoq kʼujlaʼn Timoteo tuʼn Pablo; ik tzeʼn jun tbʼanel tatbʼaj, onin tiʼj ex xi tqʼoʼn tnabʼil. Nim maj xi tnaʼn te qa iltoq tiʼj tuʼn tok t-xqʼuqin toklen aju otoq tzaj tqʼoʼn Dios te ex qa iltoq tiʼj tuʼn kukx tok tilil tuʼn (1 Timoteo 4:15, 16). Xi tqʼamaʼn te tuʼn miʼn ttzaj tbʼis tiʼj tkuʼxumal ex tiʼj junjuntl tiʼchaq in bʼant tuʼn ex tuʼn kukx tkubʼ tbʼinchaʼn aju bʼaʼn toj ambʼil iltoq tiʼj tuʼn tbʼant tuʼn (1 Timoteo 1:3; 4:6, 7, 11, 12). Axpe ikx xi tqʼoʼn Pablo tnabʼil tiʼj alkye tten tuʼn tqʼanit chʼin, tuʼnloju nimtoq in tzaj tyabʼ tkʼuʼj (1 Timoteo 5:23).

Tej tbʼet ambʼil, el tnikʼ Pablo tiʼj qa chʼixtoq tkubʼ bʼiyoʼn, kyjuʼtzun, kubʼ t-ximen tuʼn t-xi ttzʼibʼen mankbʼil tuʼj te Timoteo. Xi tkubʼsaʼn jlu te: «Tzʼok tililx tuʼna tuʼn tul naja keʼyilte weye» (2 Timoteo 4:9). Nimxixtoq tkʼujlabʼil Pablo tiʼj Timoteo, axpe ikx tqʼama jlu tiʼj: «Nkʼwaʼle at-xix nkʼuʼje tiʼj ex okslalxix tiʼj Qajaw» (1 Corintios 4:17). Tuʼntzunju, in nel qnikʼ tiʼj tiquʼn tajbʼiltoq tuʼn tten tukʼil kyoj qeju bʼajsbʼil qʼij te tanqʼibʼil. Yajtzun qe, ¿in nokpe qqʼuqbʼaʼn kykʼuʼj txqantl? ¿In che jyonpe txqantl qiʼj aj kyok weʼ twitz nya bʼaʼn?

¿Ponxpe Timoteo tukʼil Pablo tej naʼmxtoq tkubʼ bʼyoʼn? Mintiʼ bʼiʼn quʼn. Noqtzun tuʼnj, jaku tzʼok qʼuqeʼ qkʼuʼj tiʼj qa ok tilil tuʼn, tuʼn tok tqʼuqbʼaʼn tkʼuʼj Pablo ex qe txqantl. Jaku txi qʼamet qa anqʼin Timoteo ik tzeʼn t-xilen tbʼi, aju in tqʼamaʼn jlu: «aju in nimen te Dios». Nya oʼkx kye kuʼxin o kyaj tqʼoʼn Timoteo jun tbʼanel techel, ax ikx qe qkyaqilx.