Aju axix tok tiʼj jlu in tzaj tqʼuqbʼaʼn qkʼuʼj. In tzaj tqʼoʼn Dios twitz tiʼj tkyaqil nya bʼaʼn in tzaj toj ambʼil jaʼlo ex o bʼaj t-ximen tuʼn tel tiʼn (Salmo 72:13, 14). In tzaj ttziyen Dios jlu toj Tuʼjil Tyol: «Ktzajel tqʼoʼn Dios ojlabʼl kyeye, aqeye in che yajlanjtze». ¿Jtoj? Aj «tyekʼunte tibʼ Qajaw Jesús, ktzajel tuj kyaʼj kyukʼix qe t-anjel at nim kyipumal [...]. Tzul qʼolte kastiw kye qeju kykʼiʼ tuʼn kyojtzqiʼnte Dios, ex mintiʼ in xi kyniman aju tqanil kolbʼil tuʼn Qajaw Jesucrist» (2 Tesalonicenses 1:7, 8). A jlu kbʼajel toj ambʼil tzul aj tkubʼ tyekʼun tibʼ Jesús aju in yolin Tyol Dios tiʼj aj ttzaj tqʼamaʼn jlu: «Tuʼntzintla kyqʼojin toj nintz tqʼijil Dios, a nimxix tipin», aju ax ikx tok tbʼi te Armagedón (Apocalipsis 16:14, Akʼaj Tuʼjil Tyol qMan, 16).

Nya xjal che ajbʼel tuʼn Dios toj qʼoj tzul tiʼn toj ambʼil tzul, sino a Jesucristo aju Tkʼwaʼl kyukʼix t-anjel nim kyipumal che ajbʼel tuʼn, tuʼn tkubʼ kynajsaʼn nya bʼaʼn. Tzmax toj kyaʼj tzul xitbʼil tibʼaj tkyaqil nya bʼaʼn (Isaías 11:4; Apocalipsis 19:11-16).

Mintiʼ o chʼexpaj t-xim Dios tiʼj qʼoj toj ambʼil jaʼlo. Kukx bʼaʼn in nela toj twitz tuʼn tok qʼoj tuʼn kykubʼ tnajsaʼn nya bʼaʼn xjal ex aju nya bʼaʼn at twitz Txʼotxʼ. Noqtzun tuʼnj, ik tzeʼn o bʼaj atxix ojtxe, oʼkx Dios at toklen tuʼn tbʼaj t-ximen toj alkye ambʼil tuʼn tok qʼoj ex alkye ktel toj. Ik tzeʼn ma tzʼel qnikʼ tiʼj, o bʼaj t-ximen Dios tuʼn tkubʼ tnajsaʼn qe nya bʼaʼn xjal ex tuʼn tel tiʼn nya bʼaʼn toj jun qʼoj aju o txi  tqʼoʼn toklen Jesucristo, aju Tkʼwaʼl, tuʼn tul tiʼn. A t-xilen jlu qa aʼyeju qʼoj in che ok kyuʼn xjal toj ambʼil jaʼlo, nya bʼaʼn in nela toj twitz Dios maske in kubʼ kyximen qa in che qʼojin toj tumel.

Qqʼonku jun techel tiʼj jlu, at kabʼe kʼwaʼl kyitzʼin kyibʼ in che ok ten qʼojil ex atzunte mambʼaj mintiʼ at tja. In weʼ chʼin qʼoj kyuʼn ex in xi kyyolin kytat toj yolbʼil. Jun kyxol qe jlu in xi tqʼamaʼn qa a juntl saj tzyunte qʼoj ex axju in xi tqʼamaʼn juntl. Kykabʼel in xi kyqʼamaʼn te kytat, ex teyele te junjun in ayon tuʼn tonin ttat tiʼj. Noqtzun tuʼnj, aj kybʼaj tbʼiʼn tatbʼaj, in xi tqʼamaʼn kye tuʼn miʼn kyqʼojintl ex tuʼn kyayon tiʼj aj tmeltzʼaj ja tuʼntzun tkyaj nya bʼaʼn toj ttxolil. In kubʼ kyyoʼn kʼwaʼl chʼin ambʼil tuʼn tpon kytat, noqtzun tuʼnj, in che ok ten qʼojil juntl maj. Aj tpon tatbʼaj ja, mintiʼ in tzalaj kyiʼj kʼwaʼl ex in kubʼ tqʼoʼn kykastiw tuʼnju mintiʼ xi kybʼiʼn aju saj tqʼamaʼn kye.

Toj ambʼil jaʼlo, chʼixmi tkyaqil maj in xi kyqanin tnam onbʼil te Dios aj kyxiʼ toj qʼoj. Noqtzun tuʼnj, mintiʼ in nonin Dios kyiʼj. Quʼn in tzaj tqʼamaʼn jlu toj Tyol: «Miʼn tzʼaj kyqʼoʼne t-xel mya bʼaʼn» (Romanos 12:17, 19). Ax ikx o tzaj tqʼamaʼn jlu kye xjal: «Txulekuya twitz Qman ex noq ayona tiʼj ok tul onil teya», ex ok kbʼantel jlu tuʼn toj Armagedón (Salmo 37:7). Nya bʼaʼn in nela toj twitz Dios ex in jaw kynimsan kyibʼ tnam toj twitz qa mintiʼ in che ayon tiʼj Dios ex in nok kyqʼoʼn qʼoj kyuʼnx kyibʼ. Atz toj Armagedón tzul tiʼn te Dios tqʼoj ex kbʼel tnajsaʼn tkyaqil qʼoj in nok kyxol tnam, ex kwebʼil «tkyaqil qʼoj tuʼn tuj tkyaqil twitz txʼotxʼ» (Salmo 46:9; Isaías 34:2). Ikju, kbʼel naj tkyaqil qʼoj toj Armagedón.

Aju aj tkubʼ najsaʼn qʼoj atzun jun kʼiwlabʼil tzul tiʼn Tkawbʼil Dios. Yolin Jesús tiʼj gobierno lu toj jun naʼj Dios tej tqʼama jlu: «E ttzaj ju tkawbʼila. Bʼant-xwit ju tajbʼila twitz txʼotxʼ ik tzaʼn in bʼant tuj kyaʼj» (Mateo 6:10). Nya oʼkx kbʼel tnajsaʼn Tkawbʼil Dios aju qʼoj, ax ikx kbʼel tnajsaʼn aju in tzaj tiʼn qʼoj, * ik tzeʼn qe xjal nya bʼaʼn (Salmo 37:9, 10, 14, 15). Tuʼntzunju, qajbʼilxix tuʼn tpon naj ambʼil tuʼn tok qqʼoʼn qwitz kyiʼj qeju kʼiwlabʼil tzul tiʼn Tkawbʼil Dios (2 Pedro 3:13).

¿Jniʼtzun ambʼil il tiʼj tuʼn tkubʼ qyoʼn tuʼn tel tiʼn Tkawbʼil Dios tkyaqil yajbʼil, bʼiybʼil ex nya bʼaʼn? Aʼyeju yol e kyaj qʼamaʼn toj Tyol Dios, in che japun kywiʼ ex in tzaj tyekʼun qa in qo anqʼin kyoj «mankbʼil tqʼijlalil» nya bʼaʼn toj ambʼil jaʼlo (2 Timoteo 3:1-5). * Chʼix tpon ambʼil tuʼn t-xi tzyet tuʼn tkawin Tkawbʼil Dios aj tbʼaj Armagedón.

Ik tzeʼn saj qʼamaʼn toj tnejel taqikʼ, aʼyeju xjal che kyimel toj qʼoj lu, aʼyeju «mintiʼ in xi kyniman aju tqanil kolbʼil tuʼn Qajaw Jesucrist» (2 Tesalonicenses 1:8). Noqtzun tuʼnj, ik tzeʼn ma tzaj qʼamaʼn, mintiʼ in tzalaj Dios tiʼj jun xjal aj tkyim, axpe ikx qa nya bʼaʼn xjal aju xkyim (Ezequiel 33:11). Tuʼnju nya «tajbʼil Qajaw tuʼn tnaj jun xjal» toj Armagedón, in nok tilil tuʼn, tuʼn t-xi pakbʼet tbʼanel tqanil «tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» nya bʼaʼn (2 Pedro 3:8, 9; Mateo 24:14; 1 Timoteo 2:3, 4). Ikju, tuʼnju in che pakbʼan testigo de Jehová twitz tkyaqil Txʼotxʼ jaʼlo, in xi qʼet ambʼil kye xjal tuʼn tel kynikʼ tiʼj Dios, tuʼn t-xi kybʼiʼn tbʼanel tqanil tiʼj Jesús ex tuʼn kyanqʼin twitz jun Txʼotxʼ jatumel miʼn tentl qʼoj.