Junjun xjel in tzaj ttzaqʼweʼn Tyol Dios
¿Okpe che jawil anqʼin qeju xjal o che kyim?
Ax tok, aju tzaj qʼonte chwinqlal jaku tzaj tqʼoʼn juntl maj
A Jehová qʼol «chwinqlal» (Salmo 36:9). Tuʼntzunju, jaku kubʼ qximen qa tzul tqʼoʼn kychwinqlal qeju xjal o che kyim. In tzaj ttziyen Tyol Dios qe qa kbʼantel jlu tuʼn toj ambʼil tzul. (Uʼjinxa Hechos 24:15.) ¿Tiquʼn tajbʼil Dios tuʼn kyjaw anqʼin kyimni?
Aju Bʼinchal qe kukx tajbʼil tuʼn qanqʼin te jumajx (Génesis 1:31; 2:15-17). Ex aju t-ximbʼetz lu, naʼmx tchʼexpaj. In tzaj tbʼis aj tok tqʼoʼn twitz tiʼj alkye tten qanqʼibʼil at: nimxix nya bʼaʼn in tzaj toj qanqʼibʼil ex nya nim ambʼil in qo anqʼin. (Uʼjinxa Job 14:1, 14, 15.)
¿Jatumel che anqʼil qeju xjal che jawil anqʼin?
¿Kubʼpe tbʼinchaʼn Dios xjal tuʼn tanqʼin toj kyaʼj? Mintiʼ. Kubʼ tbʼinchaʼn Dios qe anjel tuʼn kyanqʼin toj kyaʼj, ex atzun qeju xjal, e kubʼ tbʼinchan tuʼn kyanqʼin twitz Txʼotxʼ (Génesis 1:28; Job 38:4, 7). Qa ma qo ximen tiʼj jlu ex tiʼjju tej kyjaw anqʼin xjal tuʼn Jesús. ¿Jatumel e jaw anqʼin qeju xjal lu? Atz tzalu twitz Txʼotxʼ. Ax jlu kbʼantel aj kyjaw anqʼin xjal toj ambʼil tzul: che anqʼil tzalu twitz Txʼotxʼ. (Uʼjinxa Juan 5:28, 29; 11:44.)
Noqtzun tuʼnj, ax ikx o che jaw tjyoʼn Dios jun kʼloj xjal tuʼn kyjaw anqʼin toj kyaʼj, atz jatumel ktel jun kyxmilal mintiʼ qʼanchaʼl (Lucas 12:32; 1 Corintios 15:49, 50). Aju kʼloj xjal lu, che kawil junx tukʼil Jesús tibʼaj tkyaqil twitz Txʼotxʼ. (Uʼjinxa Apocalipsis 5:9, 10.)