In ul itzʼje toj jun tal tnam te Polonia, aju nya najchaq taʼ tiʼj tnam Alemania. Tbʼaneltoq wanqʼibʼile at, attoq nim awal ex attoq nim tzeʼ. Kʼujlaʼntoq qine kyuʼn ntate ex tzaj kyqʼamaʼn weye tuʼn woke te jun tbʼanel xjal, tuʼn tok tilil wuʼne toj tja xnaqʼtzbʼil ex tuʼn tten jun waqʼune nim toklen.

Tzaj tzyet tuʼn tokx nqʼon wibʼe tjaqʼ nya bʼaʼn tej in xiʼye xnaqʼtzal tiʼj ley toj jun nimaq tja xnaqʼtzbʼil te tnam Wroclaw. Tej najchaq ateʼ qe toj njaye, ok wamiwen wibʼe kyukʼe nya bʼaʼn xjal. Ngantoqe saqchbʼil tiʼj pelot, noqtzun tuʼnj, tej kyten qe nya bʼaʼn wamiwe, in nok tene onil kyiʼj jun kʼloj xjal in che saqchan aʼyeju te Varsovia te Polonia, ex aj tjapun junjun seman in chinxe kyukʼil jaxku tumel in cheʼx saqchal. Tuʼn jlu in nok tene kʼal qʼeʼn, kʼal droga ex at maj in nok bʼiybʼil quʼne kyukʼil qeju in che onin tiʼj juntl kʼloj. In najbʼentoq jlu wuʼne tuʼn tel siktleʼn wiʼje, noqtzun tuʼnj, ojtzqintoq wuʼne qa jakutoq tzaj nya bʼaʼn tiʼj nxnaqʼtzbʼile tiʼj ley qa ma chin tzyete kyuʼn policiy.

Ngantoqe kyukʼil wamiwe tuʼn qxiʼye kyoj tembʼil in tzeʼn discoteca. Tuʼn jlu, nim maj ok qʼoj quʼne toj bʼe. Nim maj in xi qʼiʼne kyuʼn policiy, noqtzun tuʼnj kukxtoq in nok tilil wuʼne tuʼn miʼn ttzaj nya bʼaʼn tiʼj nxnaqʼtzbʼile tiʼj ley, ex at maj bʼant jlu tukʼe pwaq. Ax tok kubʼ nximane qa tbʼaneltoq wanqʼibʼile at. Noqtzun tuʼnj, ax ikx in nultoq toj nwiʼye qa nya bʼaʼn aju in bʼaʼntoq wuʼne. In chinxtoqe tkyaqil domingo toj iglesia tuʼntzun miʼn tkubʼ nnaʼnxixe nya bʼaʼn.

Toj 2004, e pon kabʼe testigo de Jehová njaye, ex in nok tene xnaqʼtzal tiʼj Tyol Dios kyukʼil. El mastl nnikʼe tiʼj tzeʼn jun axix tok okslal ex mas kubʼ nnaʼne nya bʼaʼn. Ojtzqintoq wuʼne qa mintiʼtl tuʼn nkʼane qʼeʼn, tuʼn nkʼane droga ex tuʼn miʼn tok nmojbʼantl wibʼe kyukʼe xjal mintiʼ in xi kybʼiʼn Tyol Dios. Ax ikx el nnikʼe qa iltoq tiʼj tuʼn tchʼixpuj nmode nya bʼaʼn. El nnikʼe tiʼj jlu, noqtzun tuʼnj, mintiʼx jun tiʼ otoq chʼixpuj wuʼne.

Tkyaqil chʼixpuj toj jun qonikʼan tej tok jun qʼoj wuʼne kyukʼe 8 xjal. Tej ttzaj nnaʼn wibʼe toj bʼe, otoq chin bʼaj bʼiyoʼne ex otoq kʼixbʼi nwiʼye. Kubʼ nnaʼne qa chʼixtoq nkyime ex xi nqʼamaʼne jlu te Dios: «Najsama, Jehová, tuʼnju mintiʼ in nok tilil tuʼn tjapun tyola wuʼne. Qa mintiʼ ẍin kyime jaʼlo, ok chin xnaqʼtzale kyukʼil testigo de Jehová  ex kʼokel tilil tuʼn tjapun tyola wuʼne». ¡Ex mintiʼ in kyime! Ex kukx in xnaqʼtzane tiʼj Tyol Dios.

Toj 2006, inxe anqʼil toj tnam Inglaterra. Wajtoqe tuʼn tkambʼet nim pwaq wuʼne tuʼn nmeltzʼaje toj tnam Polonia ex tuʼn tkambʼet jun woklene tiʼj ley. Tej tel mastl nnikʼe tiʼj Tyol Dios, at jun taqikʼ Tyol Dios kuʼpen toj wanmiye. Aju kubʼ ttzʼibʼin apóstol Pablo: «Ax tok ma kubʼ nximane tkyaqil jlu mintiʼtl tajbʼen te weye, noq oʼkx waje tuʼn wojtzqinteye Jesucrist aju Wajawe, porque maʼxix toklen jlu. Tuʼn tlaj Crist ma naj tkyaqil wuʼne, ex tuj nwitze ma tzʼok ik tzaʼn tzʼis, tuʼntzun tknet Crist wuʼne ik tzaʼn jun kambʼabʼl» (Filipenses 3:8). Etz nimaq t-xnaqʼtzbʼil apóstol Pablo tiʼj ley ex ok te jun nya bʼaʼn xjal, ik tzeʼn weye (Hechos 8:3). Noqtzun tuʼnj, el tnikʼ tiʼj alkye mas tbʼanel tanqʼibʼil tuʼn tten: aju tuʼn tajbʼen te Dios ex tuʼn tok tilil tuʼn, tuʼn tel tkanoʼn tiʼj Jesús. Tej nximane tiʼj techel kyaj tqʼoʼn apóstol Pablo, el nnikʼe tiʼj qa mlay chin tzalaje tuʼn jun tbʼanel aqʼuntl ex tuʼn jun nya bʼaʼn nmode. El nnikʼe tiʼj qa jakutoq chin chʼixpuje ik tzeʼn te apóstol Pablo. Tuʼntzunju, kubʼ nximane tuʼn nkyaj tene toj Inglaterra ex tuʼn miʼn tok tililtl wuʼne tuʼn tkambʼet jun aqʼuntl nim toklen tiʼj ley.

Qa mas in nel nnikʼe tiʼj Jehová, mas in kubʼ nnaʼne qa in chin ok laqʼeʼye ttxlaj. Tbʼanel el toj nwitze tej tel nnikʼe qa tajbʼil tuʼn tkubʼ tnajsaʼn kyil qeju ax tok kyajbʼil tuʼn kychʼexpaj (Hechos 2:38). Aj nximane kyiʼj yol ateʼkux toj 1 Juan 4:16, aju qa «ate Dios at tkʼujlalil», in nel nnikʼe tiquʼn in nel tikʼun Dios bʼiybʼil.

Ax ikx tbʼanel el kymod testigo de Jehová toj nwitze. Qʼanchaʼlxix qa in nok tilil kyuʼn tuʼn tjapun Tyol Dios kyuʼn. Wajtoqe tuʼn ntene kyxol erman lu aʼyeju in che tzalaj twitz tkyaqil Txʼotxʼ. Tej tok tilil wuʼne ex tej tchʼexpaj wanqʼibʼile, jaw aʼ nwiʼye ex in noke te testigo de Jehová toj 2008.

Ojtxe, oʼkx in chin ximane wiʼjxe, in chin bʼiyune, in najbʼen droga wuʼne, in chin kʼane nim qʼeʼn ex oʼkx tok nwiʼye tiʼj saqchbʼil pelot. Atzun jaʼlo, o chin chʼexpaje tuʼn Tyol Dios ex in chin tzalaje aj t-xi nqʼoʼne xnaqʼtzbʼil tiʼj Tyol Dios kye txqantl. Ax tok kukx ngane saqchbʼil tiʼj pelot, noqtzun tuʼnj, noq najbʼen wuʼne te jun saqchbʼil.

O chin kubʼ mojeʼye ex in chin tzalaje tukʼil Esther, aju jun tbʼanel okslal. Qgane tuʼn t-xi qyekʼune tiʼ in tzaj tqʼamaʼn Tyol Dios kye qeju xjal in che yolin toj yol polaco tbʼi kyoj junjun tembʼil te Inglaterra. Tzma tnejil maj toj wanqʼibʼile, nimxix in chin tzalaje, tbʼanel in kubʼ nnaʼne ex in nel nnikʼe tiquʼn o chin kubʼ bʼinchane.