¿Tiʼ teya t-xim tiʼj? ¿Bʼaʼnpe in nela qʼoj toj twitz Dios? Ex qa bʼaʼn, ¿alqiʼj in nonin aj tok jun qʼoj toj ambʼil jaʼlo? Aju tzaqʼwebʼil kyiʼj xjel lu, jaku chʼexpaj t-ximbʼetza tuʼn tiʼj qʼoj. Qqʼonku jun techel: noqwit ma tzʼok tbʼiʼna qa nya oʼkx bʼaʼn in che ela qʼoj toj twitz Dios, sino ax ikx ok kʼonil kyiʼje toj jun qʼoj, oklo ktzalajela ex oklo kʼokel qʼuqeʼ tkʼuʼja qa ok kbʼel kyiʼj aj qʼoj kyuʼne. Noqtzun tuʼnj, ¿tiʼ teya jaku tnaʼ qa ma tzʼok tbʼiʼna qa atz kʼonil Dios kyiʼj aj qʼoj? Oklo kʼokel tena ximel tiʼj alqiʼj tuʼn tonina.

Nyalo oʼkx kximela tiʼj alqiʼj kʼonila. Aj tel tnikʼa tiʼj alkye t-xim Dios tiʼj qʼoj, jaku chʼixpuj t-ximbʼetza tiʼj Dios. Qa ax ikx teya in tzaj nya bʼaʼn tiʼja tuʼn qʼoj in nok kyuʼn xjal, tajlo teya tuʼn tok tbʼiʼna tzaqʼwebʼil kye xjel lu: «¿Tganpe Dios qʼoj ex ape in tzaj qʼonte nim nya bʼaʼn in nikʼ toj qʼoj ik tzeʼn in kubʼ kyximen junjun xjal? ¿Moqa mintiʼ te Dios toklen tiʼj qʼoj ex mintiʼ te in tzaj bʼaj tkʼuʼj qa bʼaʼn ateʼ xjal ex qa in tzaj nya bʼaʼn kyiʼj?».

Jaku tzʼetz twitza tiʼj tzaqʼwebʼil in tzaj tqʼoʼn Tyol Dios kyiʼj jlu aju junxitl twitzju in kubʼ kyximen xjal. Axpe ikx, aju t-xim Dios tiʼj qʼoj naʼmx tchʼixpuj atxix ojtxe. Qo xnaqʼtzan tiʼj tiʼ in tzaj tqʼamaʼn Tyol Dios tiʼj t-ximbʼetz Dios ten tiʼj qʼoj ojtxe ex toj tnejil syent abʼqʼi tej tten Jesús twitz Txʼotxʼ. A jlu jaku tzʼonin qiʼj tuʼn tel qnikʼ tiʼj alkye t-xim Dios at tiʼj qʼoj toj ambʼil jaʼlo ex qa kukx ktel qʼoj kyxol xjal toj ambʼil tzul moqa mlay.