AJU sacapuntas ik keʼyin ik tzeʼn jun bark qʼiʼn tuʼn Jordan, jakulo kubʼ qximen qa nya nim toklen. Pero a jlu atzun jun tiʼchaq mas nim toklen te te. In tzaj tqʼamaʼn jlu: «Tzaj tqʼoʼn jun kyamiw toj njaye weye tej tal kʼwaʼl qine, aju Russell tbʼi». Tej tkyim Russell, ok tbʼiʼn Jordan qa nim toklen xjal lu te tchman ex kye ttat, ex nim otoq tzʼonin kyiʼj tej kyok weʼ twitz nya bʼaʼn. «Tuʼnju ojtzqiʼn junjuntl tqanil wuʼne tiʼj Russell, in nok nqʼoʼne mas nim toklen tal oyaj tzaj tqʼoʼn weye», chi Jordan.

Aju techel lu in tzaj tyekʼun qa atlo jun oyaj nya nim toklen toj twitz jun xjal moqa mintiʼ tajbʼen te, noqtzun tuʼnj, te jun xjal aju bʼaʼn qʼoʼn chjonte nim toklen te te. Toj Tyol Dios in tzaj qʼamaʼn tiʼj jun oyaj mintiʼ ojtzqiʼn quʼn jteʼ twiʼ ex in tzaj qʼamaʼn jlu tiʼj: «Tuʼnju nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl, tuʼntzun miʼn kynaj kykyaqil qeju ma che okslan wiʼje, noq oʼkx tuʼn tten kychwinqlal te jumajx» (Juan 3:16).

¡Tuʼn oyaj lu jaku tzaj tqʼoʼn chwinqlal te jumajx teju xjal in xi kʼamonte! ¿Atpe juntl oyaj mas nim toklen? Maske nya nim toklen jlu kye junjun xjal, noqtzun tuʼnj, kye okslal axix tok nimxix toklen moqa wiʼyilxix (Salmo 49:8; 1 Pedro 1:18, 19). ¿Tiquʼntzun tzaj tqʼoʼn Dios Tkʼwaʼl te oyaj kye xjal?

In tzaj tchikʼbʼaʼn apóstol Pablo kyukʼil yol lu: «Ik tzaʼn noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal» (Romanos 5:12). Aju tnejel xinaq Adán kubʼ tbʼinchaʼn il tej mintiʼ niman te Dios, ex tuʼnju otoq txi tqʼamaʼn Dios te kubʼ qʼoʼn tkastiw tuʼn tkyim. Tuʼn tpaj Adán, kykyaqil xjal in che kyim.

 «Porque aju chojbʼil qe in tzaj tqʼoʼn il, atzun tuʼn qkyim; atzunju oyaj in tzaj tqʼoʼn Dios qe, tuʼn tten qchwinqlal te jumajx tuʼn qmojbʼabʼl qibʼ tukʼil Jesucrist aju Qajaw» (Romanos 6:23). Tuʼn kyetz xjal tjaqʼ kamik, tzaj tsamaʼn Dios Tkʼwaʼl, Jesucristo, tzalu twitz Txʼotxʼ tuʼn t-xi tqʼoʼn tchwinqlal tzʼaqli te chojbʼil kyil kykyaqil xjal. Noq tuʼn chojbʼil lu, aʼyeju in nok qeʼ kykʼuʼj tiʼj Jesús jaku ten kychwinqlal te jumajx (Romanos 3:24).

Tiʼj tkyaqil kʼiwlabʼil in tzaj tqʼoʼn Dios kye qeju in che ajbʼen te noq tuʼn Jesús, tqʼama apóstol Pablo jlu: «Chjonte Dios tuʼnju toyaj maʼxix ma tzaj tqʼoʼn qe, mintiʼ in knet yol quʼn tuʼn t-xi qchikʼbʼaʼn, tuʼnju tbʼanilxix» (2 Corintios 9:15). Ax tok, aju chojbʼil atzun jun oyaj mas nim toklen aju mlay bʼant tchikʼbʼet quʼn. Kyxol qeju oyaj o che tzaj tqʼoʼn Dios qe, ¿tiquʼn a chojbʼil atzun oyaj mas nim toklen? ¿Tiquʼn junxitl twitz junjuntl oyaj o tzaj tqʼoʼn Dios qe? * ¿Ex tzeʼn kxel qqʼoʼn chjonte tiʼj? Kyoj qeju kabʼe xnaqʼtzbʼil tzul qʼoʼn tzaqʼwebʼil kyiʼj xjel lu.