«JAKU tzikʼ bʼet kar, ¡pero ax kjel qine xjal chino!». Atzun jlu ok tbʼiʼn Alexandra qʼuqli toj kar akux in yon tuʼn tikʼx toj juntl tnam kyxol kabʼe tnam te Sudamérica. Tej tkuʼtz tuʼn tok tkeʼyin tiʼ in bʼaj, ok tqʼoʼn twitz tiʼj jun xjal chino, in xitoq tqʼamaʼn aju otoq bʼaj tiʼj te xjal in xqʼuqin tuʼn kyikʼx xjal toj juntl tnam pero noq chʼin kastiy in bʼanttoq tuʼn. Tuʼnju in nok tchmon tibʼ Alexandra kyoj kychmabʼil testigos de Jehová toj yol chino, onin tiʼj xjal chino tuʼn tel tnikʼ xjal tiʼj tyol.

Tqʼama xjal qa attoq tuʼj tuʼn tanqʼin toj tnam, noqtzun tuʼnj, otoq chex elqʼan qe tuʼj ex tpwaq. Mintiʼ xi tnimen xjal tyol, axpe ikx kubʼ t-ximen qa in chex tiʼn Alexandra xjal tuʼn kyxi tkʼayin. Yajxitl, xi tnimen aju xi tqʼamaʼn xjal chino te, aju xi tchjoʼn tmult tuʼnju mintiʼtoq tkyaqil tuʼj. Xi tqʼoʼn Alexandra 20 dólar tchʼex xjal. Kukxtoq in xi tqʼoʼn xjal chjonte te Alexandra ex xi tqʼamaʼn xjal te qa oktoq kxel tqʼoʼn t-xel tpwaq ex mastl. Xi tchikʼbʼaʼn Alexandra te qa nya tajtoq tuʼn t-xi tkʼamoʼn pwaq, ex qa in tzalajtoq tuʼnju onin tiʼj xjal, tuʼnju atzun bʼaʼn. Ax ikx, xi tqʼoʼn junjun uʼj te xjal tiʼj Tyol Dios ex xi tqʼamaʼn te tuʼn t-xnaqʼtzan kyukʼil testigos de Jehová.

Tbʼanel aj tok qbʼiʼn aj t-xi qʼet onbʼil kye xjal mintiʼ ojtzqiʼn kywitz. Ax tok, in che onin xjal kyiʼj txqantl qa okslal qeʼ ex qa miʼn ik tzeʼn bʼant tuʼn Alexandra. Noqtzun tuʼnj, ¿xiwtlo tqʼoʼn teya onbʼil te xjal? Aju xjel lu nim toklen, tuʼnju tqʼama Jesús jlu: «Mas at tzalajbʼil kyeye qa at chʼin ma txi kyqʼoʼne te juntl» (Hechos 20:35). Ax ikx, kyaj aj nabʼil tuʼn tel kynikʼ tiʼj jlu tuʼnju o tzʼel nikʼbʼaj tiʼj qa in kubʼ qnaʼn bʼaʼn aj t-xi qqʼoʼn oyaj. Qo xnaqʼtzan tiʼj alkye tten.

Aju txʼolbʼabʼil lu in tzaj tyekʼun qa in qo onin kyiʼj txqantl jaku qo tzalaj. Kubʼ ttzʼibʼin apóstol Pablo qa «aju xjal in xi tqʼoʼn oyaj tukʼil tzalajbʼil, in tzalaj Dios tiʼj». In yolintoq kyiʼj okslal xi kyqʼoʼn oyaj tuʼn kyonin kyiʼj txqantl okslal in che ok weʼtoq twitz nya bʼaʼn (2 Corintios 8:4; 9:7). Tqʼama Pablo qa in che tzalajtoq okslal lu tuʼnju in che onintoq kyiʼj txqantl.

Ax tok, ik tzeʼn o tzeʼl kynikʼ aj nabʼil tiʼj, qa in xi qqʼoʼn oyaj kye txqantl «in txqet jun plaj qcerebro tuʼn aju in kubʼ qnaʼn bʼaʼn tuʼn, aju at toklen tukʼilju tuʼn qten kyukʼil txqantl moqa ik tzeʼn tuʼn tok qeʼ qkʼuʼj qiʼjx». Juntl xnaqʼtzbʼil tqʼama qa «aʼyeju in xi kyoyin pwaq te jun xjal, mas in che tzalaj kywitz qeju in kubʼ bʼaj kypwaq te kyex».

¿O kubʼ t-ximana jun maj qa tuʼnju mintiʼxix tiʼchaq at teya mlayx bʼant tuʼn tonina kyiʼj txqantl ik tzeʼn tajbʼila? Qkyaqilx jaku kubʼ qnaʼn tzalajbʼil aju in kubʼ tnaʼn «xjal in xi tqʼoʼn oyaj tukʼil tzalajbʼil». Qa in xi qqʼoʼn jun oyaj tukʼil tbʼanel qximbʼetz, nya ilxix tiʼj tuʼn t-xi tiʼn nim pwaq. Jun xuʼj testigo de Jehová xi tsamaʼn jun oyaj kye qeju bʼinchalte  uʼj lu tukʼil jun tqanil, aju in tqʼamaʼn: «Kyoj qeju abʼqʼi lu oʼkx chʼin onbʼil o kyaj nqʼoʼne toj Ja te Chmabʼil». Ex tqʼamatl: «Ma tzaj tqʼoʼn Jehová mastl weye twitzju in xi nqʼoʼne te onbʼil. [...] Chjonte tuʼnju in xi kykʼamoʼne aju oyaj in xi nqʼoʼne; in kubʼ nnaʼne bʼaʼn tuʼn jlu».

Ax tok, nya oʼkx tukʼil pwaq jaku qo onin; at nim tten tzeʼn jaku bʼant quʼn.

In tzaj tqʼamaʼn Tyol Dios jlu: «Aju xjal bʼaʼn qʼaqʼan tkʼuʼj tiʼj juntl in tzaj tiʼn bʼaʼn tibʼajx, atzunju xjal in tzalaj tuʼn tyajlanjtz juntl tuʼn, tibʼajx in tzaj tiʼn mya bʼaʼn» (Proverbios 11:17). Aʼyeju bʼaʼn xjal in xi kyqʼoʼn oyaj kye txqantl, ax ikx in xi kyqʼoʼn ambʼil, kyipumal ex junjuntl tiʼchaq. Aju tten kyanqʼibʼil tzeʼn jlu nim in nonin kyiʼj, jun kyxol qeju mas nim toklen in nonin tiʼj kychwinqlal.

In tzaj kyqʼamaʼn junjun tqanil qa aʼyeju xjal in che onin kyiʼj txqantl mintiʼxix in tzaj yabʼil kyiʼj ex bʼis. Ax tok, tbʼanel in ten kychwinqlal. Ax ikx in nonin kyiʼj qeju at jun yabʼil tok kyiʼj ik tzeʼn esclerosis múltiple moqa aju VIH. Ax ikx o tzʼel nikʼbʼaj tiʼj qa aʼyeju xjal kyaj tuʼn tkyaj kykolin tuʼn kykʼan qʼeʼn ex in che nonin kyiʼj txqantl, in nonin jlu kyiʼj tuʼn miʼn t-xi kykʼaʼn qʼeʼn juntl maj ex tuʼn miʼn kykubʼ tzʼaq toj bʼis.

¿Tiquʼn in bʼaj jlu? In kubʼ ximet qa «aju qʼaqʼbʼil qkʼuʼj, aju xtalbʼil ex aju tuʼn t-xi qqʼoʼn oyaj kye txqantl, mintiʼ in xi kyqʼoʼn ambʼil kye nya bʼaʼn qximbʼetz». Ex qa ma qo ximen kyiʼj txqantl jaku tzʼonin qiʼj tuʼn miʼn qsiktexix ex tuʼn miʼn ttzajxix presión arterial qiʼj. Ax ikx qeju o kyim kyukʼil mintiʼxix in tzaj kybʼis qa in che onin kyiʼj txqantl xjal.

Qʼuqlixix qkʼuʼj tiʼj qa ma txi qqʼoʼn oyaj kye txqantl in nonin qiʼj.

Xi tqʼamaʼn Jesús kye t-xnaqʼtzbʼen: «Kyqʼonxe chʼin kye mastl ex ktzajel tqʼoʼn Dios chʼintl kyeye; jun malbʼil tzʼaqlxix ktzajel tqʼoʼn Dios kyeye, nojnixix wen ex nneʼl tilj. Porque ax ju malbʼil kʼajbʼel tuʼn Dios kyeye jatum in xi kymaloʼne te juntl» (Lucas 6:38). Aj t-xi qqʼoʼn jun oyaj kye txqantl, jakulo tzaj kyqʼoʼn chjonte qe ex jaku tzʼonin kyiʼj tuʼn kyqʼoʼn oyaj. Ax tok, qa ma kubʼ qyekʼun qmod lu jaku tzʼonin tuʼn qonin qibʼ qxolx ex tuʼn kyten qamiw.

Junjun xnaqʼtzbʼil in yolin tiʼjju qamiwbʼil kyukʼil txqantl in tzaj tqʼamaʼn qa «aʼyeju xjal kukx in che ximen kyiʼj txqantl in nonin jlu tuʼn tbʼant kyuʼn txqantl xjal». Axpe ikx, «noq oʼkx qa ma jaw kyuʼjin xjal tiʼj xtalbʼil in bʼant kyuʼn txqantl, in nonin kyiʼj tuʼn t-xi kyqʼoʼn oyaj kye txqantl». Tuʼntzunju, ik tzeʼn in tzaj tqʼamaʼn jun xnaqʼtzbʼil, «teyele junjun qe jaku tzʼonin kyiʼj nim xjal, qa ojtzqiʼn kywitz quʼn moqa miʼn». Toj juntl yol, noq tuʼn jun bʼinchbʼen te xtalbʼil jaku txi tzyet ik tzeʼn jun kaden kyxol xjal te jun kojbʼil. ¿Taj teya tuʼn tanqʼina toj jun lugar ik tzeʼn jlu? In nel qnikʼ tiʼj qa noqwit at mas xjal in  xi kyqʼoʼn oyaj kye txqantl, jaku tzʼonin qiʼj qkyaqilx.

Jun techel tiʼjju tzeʼn in nonin aju xtalbʼil kyiʼj txqantl aju bʼaj toj Florida, Estados Unidos. Tej tikʼ jun huracán, jun kʼloj testigos de Jehová e onin kyiʼj xjal. Akux in che yontoq kyiʼj qe tiʼchaq tuʼn tbʼaj bʼinchet chʼintl jun ja, ok kyqʼoʼn kywitz qeju otoq che pon onil qa otoq tzaj nya bʼaʼn tiʼj tpeʼn juntl vecin, kubʼ kyximen tuʼn tbʼaj kybʼinchaʼn juntl maj. Yajxitl, xi tsamaʼn xjal jun carta toj kytxuylal ninja qʼil twitz aqʼuntl kye testigos de Jehová. Xi ttzʼibʼin: «Kukx kxel nqʼoʼne chjonte kyeye. Mas tbʼanel xjal qeye kywitz qeju ojtzqiʼn qe wuʼne». Tuʼnju tajtoq tuʼn t-xi tqʼoʼn chjonte, xi tsamaʼn jun onbʼil aju ok tqʼoʼn tbʼi «aju tbʼanel kyaqʼun Testigos».

Tzaj tqʼamaʼn jun tbʼanel xnaqʼtzbʼil bʼant kyuʼn aj nabʼil qa «bʼalo qʼiʼn kyuʼn xjal aj kyul itzʼji aju kyajbʼil tuʼn kyonin kyiʼj txqantl». Ex tqʼama qa aʼyeju kʼwaʼl «in che ximen kyiʼj txqantl, axpe ikx tzeʼn naʼmxtoq tbʼant kyyolin». Ik tzeʼn in tzaj tqʼamaʼn Tyol Dios, in bʼant jlu quʼn tuʼnju o qo kubʼ bʼinchaʼn «ik tzaʼnx tilbʼilal Dios», toj juntl yol, jaku ten qmod ik tzeʼn te Dios (Génesis 1:27).

Aju xtalbʼil atzun jun tbʼanelxix tmod aju Bʼinchal qe, Jehová Dios. A o tzaj qʼonte qchwinqlal ex tkyaqilju at tajbʼen qe tuʼn qtzalaj (Hechos 14:17; 17:26-28). In qo tzaj tonin Xjan Uʼj tuʼn tok qojtzqiʼnxix aju Qtat toj kyaʼj ex aʼyeju tbʼanel t-ximbʼetz at kye xjal. Ax ikx, in tzaj tqʼamaʼn qe qa o tzaj tqʼoʼn Jehová aju at tajbʼen qe tuʼn qtzalaj toj ambʼil tzul * (1 Juan 4:9, 10). Tuʼnju atz tukʼil Dios tzajni xtalbʼil ex o qo kubʼ tbʼinchaʼn ik tzeʼn tilbʼilal, jaku tzaj tiʼn tbʼanel qe qa ma kubʼ qyekʼun xtalbʼil ik tzeʼn te ex in nonin qiʼj tuʼn qtzaj tkʼiwlaʼn (Hebreos 13:16).

¿Tiʼ bʼaj tiʼj txʼolbʼabʼil tiʼj Alexandra aju ma qo yolin tiʼj tej saj tzyet xnaqʼtzbʼil lu? Juntl xjal tokx toj kar tqʼama qa mlaytoq tzaj qʼoʼn t-xel tpwaq. Noqtzun tuʼnj, aju xjal otoq tzʼonin Alexandra tiʼj xi llamarin kyiʼj junjun tamiw aʼyeju najli qeʼ toj jun tnam jatumel kweʼbʼiltoq kar, iktzun tten xi tqʼoʼn t-xel tpwaq. Ax ikx, xi tbʼiʼn aju xi tqʼamaʼn Alexandra te ex xi tzyet tuʼn t-xnaqʼtzan tiʼj Tyol Dios. Tej tikʼ oxe xjaw, nim jaw tzalaj Alexandra tuʼnju ok tqʼoʼn twitz juntl maj tiʼj xjal, noqtzun tuʼnj, toj jun nimaq chmabʼil toj yol chino aju kubʼ kyikʼsaʼn testigos de Jehová toj tnam Perú. Tuʼn t-xi tqʼoʼn xjal chjonte te tiʼjju otoq bʼant tuʼn tiʼj, xi tqʼoʼn txokbʼil te Alexandra ex qeju xjal e pon tukʼil toj nimaq chmabʼil tuʼn kyxiʼ waʼl toj t-restaurante.

Ax tok, in tzaj tqʼoʼn nim tzalajbʼil qe qa ma qo bʼinchan xtalbʼil ex qa ma qo onin kyiʼj txqantl. Mas tbʼanel qa ma qo onin tiʼj jun xjal tuʼn tok tojtzqiʼn Jehová Dios, aju xjal nim in bʼinchan xtalbʼil (Santiago 1:17). ¿Yajtzun teya? ¿In tzalaja tiʼjju in tzaj tuʼnju in bʼinchana xtalbʼil?