¿Naʼnx tuʼna tej tjaw tzʼaqa jun maj tej tzmatoq tal kʼwaʼla? Qajlo ok qesj tqʼobʼa moqa kʼixbʼi twi tchʼeka. ¿Alkye tten onin ttxuʼya tiʼja? Bʼalo el t-suʼn ex ok tqʼanin jatumel kʼixbʼiya. In noqʼtoqa, noqtzun tuʼnj, jun rat tzaj qʼuqbʼaʼn tkʼuʼja tuʼn ttxuʼya kyukʼil tyol ex tzaj chleʼna tuʼn tukʼil kʼujlabʼil. Tej tzmatoq kʼwaʼla, jun rat naj kanet qʼuqbʼil tkʼuʼja.

Aj tbʼet ambʼil, in qo ok weʼ twitz junjun tiʼchaq mas kwest ex mas nim nya bʼaʼn in tzaj qiʼj. Kwest tuʼn tkanet qʼuqbʼil qkʼuʼj. Bʼisbʼajilxix tuʼnju aʼyeju nya bʼaʼn in che ok weʼ xjal twitz mlayx kyaj toj ttxolil aj kytzaj chleʼn tuʼn kytxuʼ moqa aj tok kyqʼanin. Qo xnaqʼtzan tiʼj junjun techel.

• ¿In bʼisuna tuʼnju o tzʼel qʼiʼn taqʼuna? In tzaj tnaʼn Julián tej tel qʼiʼn taqʼun kubʼ tnaʼn qa mlaytoq tzʼex twitz. In kubʼtoq t-xjelin jlu: «¿Alkyetzun tten che okel nxqʼuqine qe toj njaye? Ma tzʼel nim ambʼil in chin aqʼunane, ¿tiquʼntzun nya tajtl tajaw aqʼuntl tuʼn waqʼunane tukʼil?».

• ¿In tzaj nim tbʼisa tuʼnju o kubʼ kypan kyibʼe tukʼil tukʼila? «Ma tzʼel 18 xjaw in kyaj tzaqpiʼne tuʼn nchmile. Tzaj nimxix nbʼise ik tten ik tzeʼn otoq kubʼ paʼn wanmiye —chi Raquel—. Nya oʼkxtoq at kʼixkʼoj toj wanmiye, ax ikx toj nxmilale. Nimtoq in chin xobʼe».

• ¿Atpe jun yabʼil tiʼja aju kwest tuʼn tqʼanit ex in kubʼ tnaʼna qa mintiʼ in bʼanta? Jakulo kubʼ tnaʼna ik tzeʼn kubʼ tnaʼn Job tej nyatoq tajtl tuʼn tanqʼin ex tzaj tbʼis tej tqʼama jlu: «Ma bʼaj nganiye tuʼn wanqʼine» (Job 10:1). Moqa jaku kubʼ t-ximana ik tzeʼn te Luis, te 80 abʼqʼi in tzaj tqʼamaʼn jlu: «At maj in kubʼ nnaʼne qa noq in chin ayone tiʼj jtoj chin kyime».

• ¿Yajtzun qa taja qʼuqbʼil tkʼuʼja tuʼnju o kyim jun toj tjaya? «Tej tok nbʼiʼne qa otoq kyim nkʼwaʼle toj jun aksident toj avión, mintiʼ xi nnimane —tqʼama Robert—. Yajxitl tzaj nim nbʼise..., aju bʼis in kubʼ tmojbʼaʼn Tyol Dios ik tzeʼn jun spad in nex toj qanmi» (Lucas 2:35).

Toj ambʼil tej ttzaj nim bʼis, kanet qʼuqbʼil kykʼuʼj Julián, Raquel, Luis ex Robert, kanet kyuʼn alkye jakutoq tzaj qʼonte kye: aju Dios at nimxix tipumal. ¿Alkye tten in tzaj tqʼuqbʼaʼn qkʼuʼj? ¿Jakupe tzaj tqʼuqbʼaʼn Dios tkʼuʼja aj ttzaj nya bʼaʼn tiʼja?