«Junx el qʼiʼn qaqʼune tukʼil nxuʼjile —tqʼama Seth—. * Kabʼe abʼqʼi e onin qe toj qjaye qiʼje tuʼn qanqʼine ex at maj in kanet junjun qaqʼune. Tuʼn tkyaqil jlu, tzaj depresión tiʼj nxuʼjile Priscilla tbʼi, ex atzun weye kubʼ nnaʼne nya bʼaʼn.

»¿Alkye tten o exe twitz nya bʼaʼn lu? Kukxtoq in che tzaj tnaʼn Priscilla qe tyol Jesús toj Mateo 6:34, jatumel in tzaj tqʼamaʼn qa mintiʼ tuʼn tbʼaj qkʼuʼj tiʼjju te nchiʼj, tuʼnju junxichaq bʼis in tzaj toj junjun qʼij. Ax ikx, in tzaj qʼoʼntoq tipumal kyuʼn tnaʼj Dios tuʼn kukx tok tilil tuʼn, tuʼn tex twitz nya bʼaʼn. Atzun weye tzaj qʼuqbʼaʼn nkʼuʼje tuʼn Salmo 55:22. Ik tzeʼn bʼant tuʼn salmista, kyaj nqʼoʼne qe nbʼise toj tqʼobʼ Jehová ex kubʼ nnaʼne onbʼil tzaj tqʼoʼn weye. At jun waqʼune jaʼlo, noqtzun tuʼnj, kukx in nok tilil quʼne tuʼn miʼn tten nim tiʼchaq qeye ex in qo ok lepeʼye tiʼjju nabʼil tqʼama Jesús toj Mateo 6:20-22. Tuʼn tkyaqil jlu, at jun tbʼanel qamiwbʼile qxole ex tukʼil Dios».

In tzaj tqʼamaʼn Jonathan jlu: «Tej tkubʼ naj qkʼaẍe kyukʼil toj njaye, tzaj nim nxobʼile. Ya mintiʼtoqtl qpwaqe, noqx gan otoq qo aqʼunane 20 abʼqʼi. Tzaj qʼoj qxole tukʼil nxuʼjile tuʼn tpaj pwaq. Axpe ikx mlaytoq tzʼajbʼen tarjeta te crédito quʼne tuʼnju in qo xobʼe qa mlaytoq txi kʼamon.

»Noqtzun tuʼnj, onin Tyol Dios ex xewbʼaj xjan qiʼje tuʼn tjaw qjyoʼne aju mas bʼaʼn. Ok tilil wuʼne tuʼn tbʼant alkyexku aqʼuntl, maske jun aqʼuntl nya nim toklen ex ok tilil quʼne tuʼn miʼn t-xi qnajsaʼne pwaq tiʼj junjun tiʼchaq mintiʼxix kyajbʼen. Tuʼnju testigo de Jehová qoʼye, e onin qe qermane qiʼje. Tzaj kyqʼuqbʼaʼn qkʼuʼje tuʼn tok qqʼoʼne qoklene ex tzaj kyqʼoʼn  junjuntl tbʼanel onbʼil qeye tej qok weʼye twitz nya bʼaʼn».

«Tej noq minabʼen in kyaj tzaqpiʼne tuʼn nchmile, tzaj nim nqʼoje ex kubʼ nnaʼne nim kʼixkʼoj —tqʼama Raquel—. Tzaj nimxix nbʼise, noqtzun tuʼnj, in nok laqʼeʼye ttxlaj Dios ex tzaj qʼuqbʼaʼn nkʼuʼje tuʼn. Tkyaqil qʼij in chin naʼne Dios te ex tzaj tqʼoʼn mujbʼabʼil toj wanmiye. Ik tten ik tzeʼn kubʼ tqʼanin wanmiye.

»Tuʼn onbʼil tzaj tqʼoʼn Tyol Dios, mintiʼ kux nkʼuʼne qʼoj toj wanmiye ex tuʼn miʼn ttzaj nimxix nqʼoje. Kubʼ nnaʼne ik tzeʼn weʼye qe yol tqʼama Pablo toj Romanos 12:21: ‹Miʼnwt kubʼ tiʼja tuʼnju mya bʼaʼn, noq oʼkx tuʼn tkubʼ tiʼj mya bʼaʼn tuʼna tuʼnju tbʼinchbʼena bʼaʼn›.

»Onin jun tbʼanelxix wamiwe wiʼje tuʼn tok tilil wuʼne tuʼn wexe twitz nya bʼaʼn. Tzaj tyekʼun Eclesiastés 3:6 weye ex tukʼil kʼujlabʼil tzaj tqʼamaʼn weye qa ‹at tqʼijlalil tuʼn t-xi naj› jun tiʼ quʼn. Aju nabʼil lu kwest tuʼn t-xi qbʼiʼn, noqtzun tuʼnj, atzun jlu wajtoqe. Toj ambʼil jaʼlo, at junjun akʼaj tiʼ waje tuʼn tbʼant wuʼne toj wanqʼibʼile».

In tzaj tqʼamaʼn Elizabeth jlu: «Aj tkubʼ tpan tibʼa tukʼil tukʼila, tajxixa onbʼil. Tzaj qʼoʼn onbʼil lu weye tkyaqil qʼij tuʼn jun tbʼanel wamiwe. Oqʼ junx wukʼile, tzaj tqʼuqbʼaʼn nkʼuʼje ex kubʼ tyekʼun tkʼujlabʼil wiʼje twitzju tuʼn wel tikʼune. Qʼuqlixix nkʼuʼje qa ajbʼen tuʼn Jehová tuʼn tel bʼis wiʼje».

Luis, aju ma qo yolin tiʼj toj tnejel xnaqʼtzbʼil toj uʼj lu, at jun yabʼil tiʼj tanmi, kabʼe maj chʼixme kyim tuʼn. In nok 16 or oxígeno tiʼj toj jun qʼij. «Kukx in chin naʼne Dios ex aj in bʼaj naʼne Dios te Jehová, in kubʼ nnaʼne qa in nonin t-xew wiʼje. In tzaj tqʼoʼn naʼj Dios wipumale tuʼn wexe twitz nya bʼaʼn, at qʼuqbʼil nkʼuʼje tiʼj Dios ex qʼuqli nkʼuʼje tiʼj qa in ximen wiʼje».

In tzaj tqʼamaʼn Petra, te mas 80 abʼqʼi, jlu: «Waje tuʼn tbʼant nimku tiʼchaq wuʼne..., noqtzun tuʼnj, mlayx bʼant. Kwest tuʼnju aj tok nqʼoʼn nwitze tiʼj qa mintiʼxixtl wipumale. In kubʼ nnaʼne qa mintiʼ wipumale ex il tiʼj tuʼn nkʼane qʼanbʼil. Nim maj in chin ximane tiʼjju xi tqanin Jesús te tman: ‹Kuchiwt tuʼn miʼn tikʼx jlu wuʼne›. Noqtzun tuʼnj, tzaj qʼoʼn tipumal tuʼn Jehová. Axju in bʼant tuʼn wukʼile. Aju naʼj Dios  atzun qʼanbʼil weye tkyaqil qʼij, in kubʼ nnaʼne bʼaʼn otoqxi chin bʼaj nnaʼne Dios» (Mateo 26:39).

Ax ikx te Julián in kubʼ t-ximen jlu, aju ma tzʼel 30 abʼqʼi tok jun yabʼil tiʼj aju esclerosis múltiple tbʼi. «O kubʼ nchʼexpuʼne nqʼuqbʼile in najbʼen toj waqʼune toj empresa tukʼil jun silla de ruedas —chi tzaj tqʼamaʼn—, mas tbʼanel wanqʼibʼile jaʼlo tuʼnju in najbʼen wuʼne tuʼn wonine kyiʼj txqantl. Aj wonine kyiʼj txqantl xjal in nonin wiʼje tuʼn miʼn tkubʼxix nnaʼne kʼixkʼoj ex in japun tyol Jehová aj in tzaj tqʼamaʼn qa kʼonil qiʼj aj qok weʼ twitz nya bʼaʼn. Ik tzeʼn te Pablo, jaku txi nqʼamaʼne qa ‹tkyaqil jaku tzikʼx wuʼne ex jaku bʼant wuʼne›, tuʼnju in tzaj tqʼoʼn Dios wipumale» (Filipenses 4:13).

«Tej tkyim ntate toj jun aksident tuʼn kar, mintiʼtoq in xi nnimane —tqʼama Antonio—. Nya bʼaʼn ela jlu te weye, tuʼnju noq in bʼettoq ntate toj bʼe. Noqtzun tuʼnj, mlaytoq bʼant jun tiʼ wuʼne. Tej naʼmxtoq tkyim, ten jweʼ qʼij mintiʼ yukch. In noktoq tilil wuʼne tuʼn miʼn njaw oqʼe twitz ntxuʼye, qatzun njunalxe atine in chin oqʼe nim. Kukxtoq in kubʼ nxjeline jlu: ‹¿Tiquʼn? ¿Tiquʼn?›.

»Kyoj qeju nya bʼaʼn qʼij lu, kukx xi nqanine te Jehová tuʼn ntzaj tonine tuʼn tok nxqʼuqine aju in kubʼtoq nnaʼne ex tuʼn ttzaj tqʼoʼn mujbʼabʼil weye. Chebʼe chebʼe el nbʼise. Tzaj nnaʼne aju in tzaj tqʼamaʼn Tyol Dios qa ‹noq minabʼen in tzaj mya bʼaʼn› tiʼj alkyexku xjal. Tuʼnju mintiʼ te Dios in nikʼan yol, qʼuqli nkʼuʼje tiʼj qa kʼokel nqʼoʼne nwitze tiʼj ntate juntl maj aj tjaw anqʼin» (Eclesiastés 9:12; Juan 11:25; Tito 1:2).

Ax ikx te Robert in kubʼ t-ximan jlu, aju ma qo yolin tiʼj toj tnejel xnaqʼtzbʼil, in tzaj tqʼamaʼn jlu: «Ajtoq qbʼaj nnaʼne Dios tukʼil nxuʼjile, in kubʼ qnaʼne mujbʼabʼil in yolin Filipenses 4:6, 7 tiʼj. Aju mujbʼabʼil lu onin qiʼje tuʼn qyoline kyukʼil periodistas tiʼj qʼuqbʼil qkʼuʼje tiʼjju tuʼn kyjaw anqʼin kyimni juntl maj. Maske kyim qkʼwaʼle toj aksident toj avión, in tzaj qnaʼne qeju tiʼchaq tej qanqʼine toj tzalajbʼil junx tukʼil. Ex mas in nok qqʼoʼn qwiʼye kyiʼj tiʼchaq lu.

»Tej ttzaj kyqʼamaʼn junjun testigos de Jehová qeʼye qa otoq tzʼok kyqʼoʼn kywitz qiʼje toj televisión in qo yoline tiʼjju nimen quʼne ex mintiʼxixtoq in tzaj qbʼise, xi qqʼamaʼne kye qa bʼant jlu quʼne tuʼnju nimku erman in che naʼn Dios qiʼje. Ax tok tzaj qʼuqbʼaʼn qkʼuʼje tuʼn Jehová tuʼnju nimku tqanil oktz toj qyolbʼile».

Kykyaqil qeju techel lu in tzaj kyyekʼun qa jaku tzaj tqʼuqbʼaʼn Dios kykʼuʼj qeju in che ok weʼ twitz alkyexku nya bʼaʼn. ¿Jakupe tzaj qʼuqbʼaʼn teya tkʼuʼj tuʼn Dios? Jaku. Noq alkyexku nya bʼaʼn in nok weʼya twitz, jaku kanet onbʼil tuʼna tuʼn texa twitz. * Tuʼntzunju, jyona tiʼj Jehová, aju Dios «kukx in tqʼuqbʼaʼn qkʼuʼj» (2 Corintios 1:3).