MA TZʼEL mas te 3,000 abʼqʼi, el tnikʼ Job tiʼj qa jakutoq tzʼel qnikʼ kyiʼj tbʼinchbʼen Jehová aj tok qqʼoʼn qwitz kyiʼj pájaro. Axpe ikx, aju in bʼant kyuʼn o che ajbʼen te junjun techel. Nim maj in yolin Tyol Dios kyiʼj pájaro tuʼn ttzaj kyqʼoʼn jun tbʼanel xnaqʼtzbʼil at toklen tiʼj qanqʼibʼil ex tiʼj qamiwbʼel tukʼil Dios. Qo xnaqʼtzan tiʼj junjun techel.

Ojtzqintoq qe golondrina kyuʼn xjal in che najan toj Jerusalén, tuʼnju in nok kyqʼoʼn kyja tqulile ja moqa tiʼj ja. Axpe ikx ok kyqʼoʼn kyja tiʼj tja Dios jaw tbʼinchaʼn Salomón. Qajlo toj junjun abʼqʼi kanet jun lugar kyuʼn aju tbʼanel ex jatumel jaku che kubʼ kyqʼoʼn kyal.

Jun tiyjil, moqa tyajil, Coré aju xjal kubʼ tzʼibʼinte Salmo 84 ok tqʼoʼn twitz tiʼj kyja golondrina tok tiʼj tja Dios. In najbʼentoq xjal lu jun seman toj qaq xjaw atz, noqtzun tuʼnj, tajtoq tuʼn tok ik tzeʼn qe golondrina attoq jun kyja te jumajx toj tja Dios. Tqʼama jlu: «Tbʼanilxix tjaya Nman Dios aya Tajaw Tkyaqil. Nimxix nganiye tuʼn ntene twitz tjaya». Qe tal pájaro ex qe golondrina «in knet kylugar tuʼn tok kyqʼoʼn kyqʼuʼ tiʼj t-altara tuʼn kyjaw poqʼl kyal, Nman, aya Tajaw Tkyaqil, aya Nreye ex aya Ndiose» (Salmo 84:1-3). Yajtzun qe ex qe qkʼwaʼl, ¿atpe nim qgan tuʼn qten junx tukʼil ttnam Dios ex in qo tzalaj tiʼj qoklen lu? (Salmo 26:8, 12).

Kubʼ ttzʼibʼin t-sanjel Dios Jeremías jlu: «Naqpenaʼteʼ pichʼ siwenya nlikʼikʼinje twitz kyaʼj bʼiʼn tuʼn jtoj tzʼanjtztiʼj». Ax tok ojtzqiʼntoqlo tuʼn Jeremías aj kyikʼ qe cigüeña toj Txʼotxʼ otoq tzaj Tziyen, aʼyeju tzajni qe toj juntl lugar. O tzʼel nikʼbʼaj tiʼj qa aj ttzaj juntl maj kyxul tzeʼ, junlo 300,000 cigüeña in cheʼx toj África ajxi kypon tzmax toj Europa, in che ikʼ toj chqʼajlaj te Jordán. Ik tten ik tzeʼn jun reloj iqʼen kyuʼn aju in nonin kyiʼj tuʼn kymeltzʼaj toj lugar jatumel in che alin ik tzeʼn toj qʼijel. Ik tzeʼn junjuntl pájaro in cheʼx toj juntl lugar, ojtzqiʼn kyuʼn «jtoj cheʼx toj juntl tenbʼil» (Jeremías 8:7, XT).

At jun uʼj in tzaj tqʼamaʼn, «aju mas tbʼanel kyiʼj pájaro aju aj in cheʼx toj juntl lugar ex mintiʼ in che ximen tiʼj tuʼnju ojtzqiʼntl kyuʼn aj kyul itzʼji» (Collins Atlas of Bird Migration). Tzaj tqʼoʼn Jehová kynabʼil qe pájaro in cheʼx toj juntl lugar tuʼn tel kynikʼ tiʼj ambʼil. Atzun kye xjal o tzaj tqʼoʼn kynabʼil tuʼn tel kynikʼ toj alkye ambʼil in che anqʼin (Lucas 12:54-56). Junxitl qe cigüeña qwitz tuʼnju mix aʼl jun in tzaj xnaqʼtzan kye, atzun qe il tiʼj tuʼn tel qnikʼ tiʼj Dios tuʼntzun tel qnikʼ tiʼjju in nikʼ toj ambʼil jaʼlo. Aʼyeqe aj Israel e ten toj ambʼil tej tten Jeremías mintiʼ el kynikʼ kyiʼj tiʼchaq e ikʼ toj ambʼil aju. Ex tzaj tyekʼun Dios kye tiquʼn, tej tqʼama  jlu: «¿Jatumtzun taʼ qa at kynabʼl tuʼnju ma tzʼel kyikʼun nyole?» (Jeremías 8:9).

Jaʼlo at nim yekʼbʼil tiʼj qa in qo anqʼin toj «mankbʼil tqʼijlalil» aju ambʼil in yolin Tyol Dios tiʼj (2 Timoteo 3:1-5). ¿Okpe kʼelel qkanoʼn tiʼj cigüeña tuʼn tel qnikʼ tiʼj toj alkye ambʼil in qo anqʼin?

Nim maj in yolin Tyol Dios kyiʼj tʼiw, moqa águila. Ex ojtzqiʼn qetoq kyuʼn xjal toj Txʼotxʼ otoq tzaj Tziyen. In yolin Tyol Dios tiʼj qa tzmax twiʼ jun pik in kubʼ tqʼoʼn tja ex in jyon twa ex «maxtzun ma jawni in tzaj tkeʼyin tkanbʼ» (Job 39:27-29). In tzaj qʼamaʼn qa jaku til jun ẍik aju chʼixmelo jun kilómetro taʼ (media milla).

Ik tzeʼn te tʼiw in bʼant tuʼn ttzaj tkeʼyin «maxtzun ma jawni», ax ikx te Jehová in bʼant tkeʼyin tiʼjju kbʼajel toj ambʼil tzul. Tuʼntzunju in tqʼamaʼn jlu tiʼjx: «In nqʼoʼne tqanil atxix t-xe tnejel tiʼj ju tzul te bʼajsbʼil; in nqʼoʼne tqanil atxix ojtxi tiʼj ju kbʼajel tuj tqʼijlalil tzul» (Isaías 46:10). Qa kukx xqo ok lepeʼ tiʼj kawbʼil in tzaj tqʼoʼn qe, aju tojtzqibʼil nimxix ex aju tojtzqibʼil tiʼj ambʼil tzul ok tzul tiʼn tbʼanel qe (Isaías 48:17, 18).

Ax ikx in che kubʼ tmojbʼaʼn Tyol Dios qeju tmajen Jehová tukʼil tʼiw. In tqʼamaʼn jlu: «Atzun qeju qʼuql kykʼuʼj tiʼj Qman, kukx ktzajel qʼoʼn kyipun, jaku che lipan mer ik tzaʼn tʼiw» (Isaías 40:31). In xi lipen tʼiw twitz kyaʼj ik tzeʼn aj ttzaj jun kyqʼiqʼ twitz Txʼotxʼ ex aj in jaw kyqʼiqʼ jawl in chex tlikʼen t-xikʼ ex in nokx tqʼoʼn tibʼ toj tuʼntzun t-xi qʼiʼn tuʼn. Nya tuʼnx tipumal in jax tzmax twitz kyaʼj ex in lipen toj junjuntl plaj najchaq. Ax ikx qeju in che yon tiʼj Jehová jaku tzʼok qe kykʼuʼj tiʼj qa kjapunel aju o tzaj ttziyen, tuʼn ttzaj tqʼoʼn «nimxix» kyipumal (2 Corintios 4:7, 8).

Tej chʼixtoq tkyim Jesús, kubʼ ten jun rat ximel tiʼj tnam Judiy ex tqʼama jlu tukʼil nim tbʼis: «Aqeye aj Jerusalén in che kubʼ kybʼyoʼne qe t-sanjel Dios ex in che ok kyxoʼne tuʼn abʼj qeju in che tzaj t-samaʼn Dios kyukʼile. Nimku maj o wajbʼeye tuʼn kyok nchmoʼn qeye ik tzaʼn jun ttxu ekʼ in che ok tchmoʼn qe tal tjaqʼ t-xikʼ, pero mintiʼ o kyajbʼeye» (Mateo 23:37).

Juntl tiʼ in bʼant kyuʼn pájaro aju tuʼn tok kyxqʼuqin qe kyal. Aqeju txkup in kubʼ kyqʼoʼn kyqʼuʼ twitz txʼotxʼ ik tzeʼn qe ttxuʼ ekʼ, il tiʼj tuʼn tok kyxqʼuqin kyibʼ tiʼj nya bʼaʼn. Qa ma tzʼok tqʼon jun ttxuʼ ekʼ twitz tiʼj jun gavilán in jaw oqʼ ex aqeju tal jun rat in cheʼx klol kyibʼ tjaqʼ t-xikʼ. Ax ikx in cheʼx klol kyibʼ tjaqʼ t-xikʼ ik tzeʼn qa at nim qʼij ex jbʼal. Ax ikx te Jesús tajtoq tuʼn t-xqʼuqin kyiʼj qeju in che anqʼintoq toj Jerusalén tiʼj kyajbʼebʼil te Jehová. Toj ambʼil jaʼlo in tzaj tqʼoʼn txokbʼil qe tuʼn qok t-xqʼuqin tiʼjju in tzaj bʼaj qkʼuʼj tiʼj ex tuʼn tchewix aju iqtz in kubʼ qnaʼn toj qanqʼibʼil (Mateo 11:28, 29).

Ax tok, at nim xnaqʼtzbʼil jaku tzʼel qiʼn kyiʼj pájaro. Toj juntl maj aj tok qqʼoʼn qwitz tiʼjju in bʼant kyuʼn, bʼaʼn tuʼn ttzaj qnaʼn aju in kubʼ tmojbʼaʼn Tyol Dios tukʼil. Aj tok qqʼoʼn qwitz tiʼj golondrina, qqʼonk toklen aju tembʼil jatumel in qo kʼulen te Jehová. Qeʼk qkʼuʼj tiʼj qa ktzajel tqʼoʼn Jehová qipumal ik tzeʼn te tʼiw in bʼant tlipen. Qo jyon onbʼil tukʼil Jesús tuʼn tkanet axix tok xnaqʼtzbʼil quʼn aju in qo ok t-xqʼuqin tiʼj nya bʼaʼn, ik tzeʼn te ttxuʼ ekʼ in che ok t-xqʼuqin tal. Ex kukx qkanoʼmil tiʼj cigüeña tuʼn tel qnikʼ tiʼj tiʼ t-xilen aju in bʼaj toj ambʼil jaʼlo.