¡Aju tbʼanel najbʼil! At junjun tbʼanel tqanil tiʼj tuʼn qxiʼ bʼetil toj jun «tbʼanel najbʼil» najchaq jatumel jaku kubʼ qnaʼn bʼaʼn ex tuʼn tikʼ tnaʼl quʼn tkyaqilju in bʼaj qkʼuʼj tiʼj. Noqtzun tuʼnj, qkyaqilx ojtzqiʼn quʼn qa aj qmeltzʼaj qja kukx ateʼ qeju nya bʼaʼn.

Aju tuʼn qximen tiʼj jun tbʼanel najbʼil, mlay tzʼetz qiʼn jlu toj qwiʼ. Ex jakulo kubʼ qxjelin jlu: «¿Noqpe jun witzikʼ aju tbʼanel najbʼil? ¿Tiquʼn qajxix tuʼn tel qnikʼ tiʼj? ¿Kpolpe jun qʼij jatumel kbʼantel?».

Nim xjal kukx in che ximen tiʼj tbʼanel najbʼil atxix ojtxe. Nim xjal kyajtoq tuʼn tel mas kynikʼ tej tok kybʼiʼn qa in yolin Tyol Dios tiʼj «txqan awal tuj Edén tuj tjawitz qʼij». ¿Tiquʼn tbʼaneltoq najbʼil lu? In tzaj tqʼamaʼn Tyol Dios jlu: «Jawtzun tchʼisan Qman Dios tuj txʼotxʼ lu tkyaqil wiq tzeʼ tbʼanilxix keʼyin ex bʼaʼn tloʼnjtz twitz». In yolintoq tiʼj jun tbʼanel najbʼil, ex aju mas tbʼanel twitz tkyaqil «aju tzeʼ in tqʼoʼn chwinqlal» tkubʼtoq toj mij, moqa toj tnikʼjan (Génesis 2:8, 9).

Ax ikx, in tzaj tqʼamaʼn txʼolbʼabʼil te Génesis kyaje nim aʼ in bʼet toj tbʼanel najbʼil. Toj ambʼil jaʼlo at kabʼe ax kybʼi tok: Aju nim aʼ Tigris (moqa Hiddekel) ex Éufrates (Génesis 2:10-14). Aʼyeju aʼ lu in che ikʼx toj tnam Irak, jatumel ten tnam Persia ojtxe, ex in nok kymojbʼan kyibʼ tukʼil golfo Pérsico.

Tuʼntzunju, mintiʼ tuʼn qjaw labʼin qa aju tbʼanel najbʼil jun tiʼ nim toklen toj kyanqʼibʼil xjal te Persia. Jun techel, at jun alfombra te Persia kyoj abʼqʼi 1500 aju atz taʼ toj Museo de Arte de Filadelfia (Pensilvania, Estados Unidos), in tzaj tyekʼin jun tbʼanel najbʼil nojni kyuʼn tzeʼ ex bʼech. Aju tok tiʼj alfombra in tzaj tyekʼin aju in tzaj tchikʼbʼaʼn Tyol Dios tiʼj tbʼanel najbʼil te Edén. Ax ikx, aju yol tbʼanel najbʼil atz tzajni tiʼj jun ojtxe yol te Persia aju t-xilen «tqan bʼech tok peʼn tiʼj».

Kyoj nim tnam ex yol at kytxʼolbʼabʼil xjal in yolin tiʼj tbʼanel najbʼil. Tej tchʼiy kybʼet xjal twitz Txʼotxʼ, teyele junjun xjal xi kyiʼn junjun tqanil tiʼj tnejel txʼolbʼabʼil, ex tej tbʼet ambʼil ok kymojbʼaʼn tukʼilju nimen kyuʼn ex kyukʼil txʼolbʼabʼil in bʼant toj junjun lugar. Axpe ikx toj ambʼil jaʼlo, chʼixme kykyaqil xjal in najbʼen yol tbʼanel najbʼil kyuʼn aj kyyolin tiʼj jun lugar tbʼanelxix.

Ateʼ junjun xjal jyol tiʼchaq tzaj kyqʼamaʼn qa kanet tbʼanel najbʼil kyuʼn aju xi naj. Jun techel, tej t-xiʼ nejenel Charles Gordon te Gran Bretaña visitaril islas Seychelles toj abʼqʼi 1881, jaw labʼin tuʼnju tbʼanelxix chqʼajlaj te Mai —aju kyetzbʼil xjal jaʼlo— aju ok tqʼoʼn tbʼi te tbʼanel najbʼil te Edén. Toj 1492, aju bʼetil Cristóbal Colón te tnam Italia kubʼ t-ximen qa chʼixtoq tjyet tbʼanel najbʼil te Edén tuʼn tej tpon toj isla La Española, aju at jaʼlo kyoj tnam República Dominicana ex Haití.

Toj uʼj te txʼolbʼabʼil toj ambʼil jaʼlo aju Mapping Paradise tkuʼx mas te 190 ojtxe mapa toj, nim kyxol qe jlu tkuʼx tilbʼilal Adán tukʼil Eva toj tej ateʼtoq toj tbʼanel najbʼil te Edén. Jun kyxol qe jlu at jun mapa mintiʼ ojtzqiʼn aju jatz qʼiʼn toj jun uʼj te Beato de Liébana kyoj abʼqʼi 1200. Tibʼaj mapa at jun tilbʼilal tukʼil tbʼanel najbʼil toj tnikʼjan, jatumel in che etz kyaje aʼ toj kyaje plaj: Tigris, Éufrates, Pisón ex Guihón. In kubʼ ximet qa a jlu in kubʼ techlaʼn tuʼn tchʼiy kybʼet okslal twitz tkyaqil Txʼotxʼ. Aʼyeju techel lu in tzaj kyyekʼin qa maske mintiʼ ojtzqiʼn jatumel ten tbʼanel najbʼil te Edén, kukx in che ximen xjal qa tbʼanelxix.

Jun bʼinchal poema John Milton tbʼi te Inglaterra aju anqʼin kyoj abʼqʼi 1600, ok ojtzqiʼn kyuʼn xjal tuʼnju kubʼ tbʼinchaʼn poema Aju  Tbʼanel Najbʼil xi naj, atz jatz tiʼn toj uʼj te Génesis aju in yolin tiʼj il kubʼ tbʼinchaʼn Adán ex tej tetz lajoʼn toj Edén. Toj tuʼj, yolin tiʼjju yol kyaj tziyen qa jaku che anqʼin xjal te jumajx tzalu twitz Txʼotxʼ. Kubʼ ttzʼibʼin jlu: «Tkyaqil twitz Txʼotxʼ kʼokel te Tbʼanel Najbʼil». Yajxitl kubʼ tbʼinchaʼn tkabʼ plaj poema aju tok tbʼi, Ma kubʼ bʼinchaʼn juntl maj Tbʼanel Najbʼil.

Ax tok, tbʼanel in nela aju ximbʼetz kye nim xjal tiʼj tbʼanel najbʼil o txi naj. Qa ikju, ¿tiquʼn mintiʼ in che ximen xjal tiʼj? In tzaj tqʼamaʼn uʼj Mapping Paradise qa «aʼyeju xjal in che xnaqʼtzan tiʼchaq tiʼj Dios [...] mintiʼ in nok kyqʼoʼn kywiʼ tiʼjju jatumel ten tbʼanel najbʼil».

Nim qe okslabʼil in tzaj kyxnaqʼtzaʼn qa aj qkyim in qoʼx toj kyaʼj, ex nya tuʼn qten toj jun tbʼanel najbʼil tzalu twitz Txʼotxʼ. Noqtzun tuʼnj, in tzaj tqʼamaʼn Tyol Dios jlu toj Salmo 37:29: «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx». Kwest tuʼn tok Txʼotxʼ te jun tbʼanel najbʼil tuʼnju in qo anqʼin toj ambʼil te nya bʼaʼn, ¿at jun qʼuqbʼil qkʼuʼj qa kjapunel twi yol lu?

Tuʼnju a Jehová kubʼ bʼinchante aju tnejel Tbʼanel Najbʼil, o tzaj ttziyen qa kbʼantel juntl maj tuʼn. ¿Alkye tten? Naʼntza qa kyaj t-xnaqʼtzaʼn Jesús tuʼn qnaʼn Dios kyjalu: «E ttzaj ju tkawbʼila. Bʼant-xwit ju tajbʼila twitz txʼotxʼ ik tzaʼn in bʼant tuj kyaʼj» (Mateo 6:10). A jlu jun Kawbʼil aju kkawil tibʼaj tkyaqil ex a Jesús at toklen tiʼj, ex kkawil te kyxel qeju xjal in che kawin (Daniel 2:44). Ax ikx, tuʼn Kawbʼil lu kbʼantel aju tajbʼil Dios tiʼj Tbʼanel Najbʼil tzalu twitz Txʼotxʼ.

Ma tzʼel nim ambʼil, tuʼn tonbʼil xewbʼaj xjan kubʼ ttzʼibʼin aj sanjel Isaías tzeʼn anqʼibʼil ktel toj Tbʼanel Najbʼil aju o tzaj ttziyen Dios, jatumel kbʼel naj te jumajx tkyaqilju in tzaj tiʼn kʼixkʼoj qiʼj jaʼlo (Isaías 11:6-9; 35:5-7; 65:21-23). Jaku jaw tuʼjina qe taqikʼ Tyol Dios lu toj Xjan Uʼj at tukʼila; noq chʼin ambʼil kxel tiʼn. Kqebʼil tkʼuʼja aj tel tnikʼa tiʼjju kbʼantel tuʼn Dios kyiʼj xjal in xi kybʼiʼn qe tkawbʼil. Aʼyeju che anqʼil che tzalajel tiʼj jun tbʼanel najbʼil ex tiʼj t-xtalbʼil Dios, aʼyeju kabʼe tiʼchaq xi tnajsaʼn Adán (Apocalipsis 21:3).

¿Tiquʼn jaku tzʼok qeʼ qkʼuʼj qa kjapunel twiʼ yol tuʼn tok Txʼotxʼ te jun tbʼanel najbʼil? Tuʼnju in tzaj tqʼamaʼn Tyol Dios jlu qe: «Te te Qman aju kyaʼj, atzunju txʼotxʼ xi qʼoʼn kye xjal tuʼn Qman». Ax ikx, a Dios o tzaj tziyente yol lu ex «mibʼan te [...] nikʼan yol» (Salmo 115:16; Tito 1:2). Ax tok, in tzaj ttziyen Tyol Dios jun tbʼanelxix ambʼil tzul: chwinqlal te jumajx toj Tbʼanel Najbʼil.