Toj txʼolbʼabʼil tiʼj tbʼinchbʼen Dios aju tkuʼx toj uʼj te Génesis toj Tyol Dios, in tzaj tyekʼin qa xi tqʼamaʼn Dios jlu te tnejel xjal Adán: «Bʼaʼn t-xi tloʼna twitz tkyaqil tzeʼ at tuj tqan awal; atzunju twitz tzeʼ tuʼn tel nikʼbʼaj tiʼj bʼaʼn ex tiʼj mya bʼaʼn, miʼn txi tloʼna; qatzun ma txi tloʼna, ax tok kymela» (Génesis 2:16, 17). Aju kawbʼil lu in tzaj tyekʼin qa noqwit xi tbʼiʼn Adán Dios mintiʼwtlo kyim; kukxwitlo anqʼin toj tbʼanel najbʼil te Edén.

Bʼisbʼajilxix, twitzju tuʼn tbʼiʼn te Dios ex tuʼn tanqʼin te jumajx, kubʼ t-ximen tuʼn miʼn tnimen ex xi tloʼn twitz tzeʼ aju otoq tzaj qʼamaʼn te tuʼn miʼn t-xi tloʼn, aju xi tqʼoʼn Eva te aju t-xuʼjil (Génesis 3:1-6). Kukx in tzaj nya bʼaʼn qiʼj tuʼnju mintiʼ nimen te Dios. Tzaj tchikʼbʼaʼn apóstol Pablo kyjalu: «Noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il» (Romanos 5:12). Aju xinaq in tzaj qʼamaʼn tzalu in yolin tiʼj Adán. Noqtzun tuʼnj, ¿alkye il kubʼ tbʼinchaʼn, ex tiquʼn kyim?

Jun il aju bʼant tuʼn Adán: tuʼnju ojtzqiʼntoq tley Dios tuʼn ex mintiʼ xi tbʼiʼn (1 Juan 3:4). Ex ik tzeʼn xi tqʼamaʼn Dios te, aju tkastiw tuʼn tkubʼ aju tuʼn tkyim. Noqwit xi tbʼiʼn Adán tkawbʼil Dios, mintiʼwtlo kubʼ tbʼinchaʼn il ex mintiʼwtlo kyim. Ax ikx qe tkʼwaʼl mintiʼwtlo e kyim. Mintiʼ kubʼ tbʼinchaʼn Dios xjal tuʼn tkyim, sino tuʼn tanqʼin te jumajx.

 Mi jun jaku kubʼ ewinte jlu, ik tzeʼn in tzaj tqʼamaʼn Tyol Dios, «ilxix tiʼj tuʼn kykyim kykyaqil xjal». Noqtzun tuʼnj, ¿atpe jun tiʼ qʼiʼn quʼn aju kukx itzʼ aj qkyim? Nim xjal jakulo tzaj kytzaqʼweʼn qa at, qa at jun tiʼ qʼiʼn quʼn aju mintiʼ in kyim. Noqwit ax tok jlu, jaku txi qʼamet qa nya ax tok aju tqʼama Dios te Adán, tuʼnju qa kukx itzʼ jun piẍ qxmilal toj juntl lugar, mlay txi qʼamet qa in nok kyimen te kastiw tuʼn tpaj il. In tzaj tqʼamaʼn Tyol Dios jlu: «Mlay bʼant tuʼn tnikʼan Dios yol» (Hebreos 6:18). A Satanás ok te nikʼal yol tej t-xi tqʼamaʼn jlu te Eva: «Mlay che kyime» (Génesis 3:4).

Qa nya ax tok aju xnaqʼtzbʼil tiʼj qa at jun tiʼ qʼiʼn quʼn aju mintiʼ in kyim, ¿tiʼtzun in bʼaj aj qkyim?

In tzaj tqʼamaʼn txʼolbʼabʼil tiʼj tbʼinchbʼen Dios jlu toj Génesis: «Kubʼtzun tbʼinchaʼn Qman Dios xinaq tiʼj tquqil txʼotxʼ, ex okx t-xupin Dios t-xew tuj ttxaʼn tuʼn tqʼonte tchwinqlal. Iktzun tten ok xjal te itzʼ» (Génesis 2:7). Aju txol yol «ok xjal te itzʼ» atzun in kubʼ qʼet tiʼj yol toj hebreo néfesch * ex a t-xilen «jun bʼinchbʼen in jatz t-xew».

In tzaj tyekʼin Tyol Dios qa mintiʼ kubʼ bʼinchaʼn xjal tukʼil jun tiʼ qʼiʼn tuʼn aju mintiʼ in kyim, sino e «ok xjal te itzʼ». Tuʼntzunju, maske ma kux tjyoʼna nim maj, mlay kanet txol yol lu tuʼna toj Tyol Dios «mintiʼ in kyim qanmi», moqa ik tzeʼn toj kastiy «alma inmortal».

Mintiʼ in tzaj tqʼamaʼn Tyol Dios qa at jun tiʼ qʼiʼn kyuʼn xjal aju mintiʼ in kyim, ¿tiquʼn junxitl in tzaj kyxnaqʼtzaʼn nim okslabʼil? Tuʼn tkanet tzaqʼwebʼil quʼn, qo meltzʼaj toj ambʼil tej kyten xjal te Egipto.

Jun xjal in xnaqʼtzan tiʼj aju ikʼ ojtxe te tnam  Grecia Heródoto tbʼi, aju anqʼin kyoj abʼqʼi 500 tjaqʼxi ambʼil iqʼin quʼn jaʼlo, tzaj tqʼamaʼn qa aʼyeqe aj Egipto «e qʼamante tnejel qa mintiʼ in kyim kyanmi xjal». Ax ikx qe xjal te tnam Babilonia xi kynimen aju xnaqʼtzbʼil qa mintiʼ in kyim kyanmi xjal. Tej tkubʼ tiʼj Oriente Medio tuʼn Alejandro Magno (332 t.a.j.), otoq txi xnaqʼtzaʼn xnaqʼtzbʼil lu kyuʼn aj nabʼil te Grecia ex toj chʼin ambʼil xi sputj toj tkyaqil tnam.

Toj tnejel syent abʼqʼi toj ambʼil jaʼlo, kabʼe kʼloj okslabʼil nim kyoklen kye aj Judiy, aʼyeju fariseo ex esenios, in xitoq kyxnaqʼtzaʼn qa in kyaj anqʼin tanmi jun xjal aj tkyim t-xmilal. In tzaj tchikʼbʼaʼn uʼj The Jewish Encyclopedia jlu: «Aju xnaqʼtzbʼil qa mintiʼ in kyim qanmi pon kyukʼil aj Judiy tej tok kybʼiʼn kyxim xjal te Grecia ex mas tukʼilju t-xnaqʼtzbʼil Platón». Ax ikx te Josefo aju in xnaqʼtzan tiʼj aju ikʼ ojtxe, aju anqʼin toj tnejel syent abʼqʼi, tqʼama qa nya toj Tyol Dios in jatz xnaqʼtzbʼil lu, sino «kyximbʼetz xjal te Grecia», ex ok tqʼoʼn jlu te jun kʼloj xnaqʼtzbʼil nya ax tok in che yolin xjal tiʼj ex te jun kʼloj txʼolbʼabʼil.

Akux in xi sputj kyxnaqʼtzbʼil xjal te Grecia, aʼyeju xjal in kyqʼamaʼn qa okslal qe xi kykʼamoʼn xnaqʼtzbʼil lu aju nya ax tok. Tzaj tqʼamaʼn xjal in xnaqʼtzan tiʼj aju ikʼ ojtxe Jona Lendering jlu: «Aju xnaqʼtzbʼil bʼant tuʼn Platón tiʼj qa aju qanmi otoq ten nej toj jun tbʼanel lugar ex qa in nanqʼin jaʼlo twitz jun txʼotxʼ nya bʼaʼn, onin tuʼn tok tmojbʼaʼn tibʼ t-xnaqʼtzbʼil Platón tukʼil okslabʼil». Iktzun tten aju okslabʼil nya ax tok xi tkʼamoʼn aju xnaqʼtzbʼil qa mintiʼ in kyim qanmi, aju o tzʼok tqʼoʼn te jun t-xnaqʼtzbʼil nim toklen.

Toj tnejel syent abʼqʼi, xi tqʼoʼn apóstol Pablo kawbʼil lu: «Pero klarxix in tmaʼn Xewbʼaj Xjan, tuj mankbʼil tqʼijlalil at junjun xjal kyjel kykolin kyokslabʼl, kxel kybʼiʼn kyyol qe xjal sbʼul at juʼẍ tuj kyanmi ex kxel kybʼiʼn kyxnaqʼtzbʼil» (1 Timoteo 4:1). ¡Ax tok aju tyol tzaj tqʼamaʼn! Aju xnaqʼtzbʼil tiʼj qa mintiʼ in kyim qanmi aj qkyim, atzun jun yekʼbʼil tiʼj qa kyxnaqʼtzbʼil juʼẍ. Mintiʼ in tzaj qʼamaʼn jlu toj Tyol Dios, sino kyxnaqʼtzbʼil okslabʼil nya ax tok ex kyxnaqʼtzbʼil xjal.

In qo tzalaj tuʼnju tzaj tqʼamaʼn Jesús jlu: «Kʼelel kynikʼe tiʼj ju yol axix tok, ex che tzoqpetele tuʼnju yol axix tok» (Juan 8:32). Aju ojtzqibʼil axix tok tkuʼx toj Tyol Dios, in nonin qiʼj tuʼn qtzaqpaj kyiʼj xnaqʼtzbʼil ex bʼinchbʼen nya bʼaʼn in nela toj twitz Dios ex aju in bʼant kyuʼn nim okslabʼil. Ax ikx, in qo klet tiʼj kybʼinchbʼen xjal ex tiʼj kyxnaqʼtzbʼil nya ax tok aju at toklen tukʼil kyimen (qʼonka twitza tiʼj recuadro « ¿Jatumel ateʼqe kyimni?»).

Kʼujlaʼn qoʼ tuʼn Bʼinchal qe. Nyatoq taj tuʼn qanqʼin oʼkx 70 moqa 80 abʼqʼi twitz Txʼotxʼ ex yajxitl tuʼn qxiʼ anqʼil toj kyaʼj moqa tuʼn qanqʼin te jumajx jatumel ateʼqe xewbʼaj. Aju te t-ximbʼetz tnejel aju tuʼn kyanqʼin xjal bʼaʼn che bʼin te te jumajx twitz Txʼotxʼ, ex aju t-ximbʼetz naʼmx tchʼexpaj; ok kjapunel tuʼn (Malaquías 3:6). In tzaj qʼuqbʼaʼn qkʼuʼj kyuʼn yol e kubʼ ttzʼibʼin aj kawil David tuʼn tonbʼil xewbʼaj xjan: «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:29).