AT NIM kyximbʼetz xjal tiʼj chwinqlal ex tiʼj kyimen. Ateʼ junjun in kubʼ kyximen qa aj kykyim xjal kukx che anqʼil toj juntl tembʼil. At junjuntl in kubʼ kyximen qa che ul itzʼji juntl maj. Ex junjuntl in tzaj kyqʼamaʼn qa atz in pon bʼaj tkyaqil aj qkyim.

Bʼalo ax ikx teya at junxitl t-ximbʼetza tuʼnju tzeʼn xjaw chʼiya ex jatumel. Tuʼnju at junxichaq kyximbʼetz xjal tiʼjju tiʼ in bʼaj aj qkyim, noqtzun tuʼnj, ¿jakupe kanet tzaqʼwebʼil quʼn tiʼj xjel lu aju in che ximen xjal tiʼj?

Toj nimku ambʼil o tzaj kyxnaqʼtzaʼn nejenel kye okslabʼil qa kukx itzʼ kyanmi xjal aj kykyim. Chʼixme kykyaqil nimaq okslabʼil —cristianismo, hinduismo, judaísmo ex islam— in tzaj kyqʼamaʼn qa at jun tiʼ qʼiʼn quʼn kukx itzʼ aj qkyim ex in nanqʼin kyxol xewbʼaj. Atzun kye budistas in kubʼ kyximen qa aj tul itzʼji jun xjal nim maj, ya mintiʼtl in ten toj kʼixkʼoj ex in ten toj tzalajbʼil aju nirvana tbʼi.

Tkyaqil xnaqʼtzbʼil lu o tzʼonin tuʼn tkubʼ kyximen xjal qa aj qkyim in qoʼx anqʼil toj juntl plaj. Tuʼntzunju, toj kywitz nim xjal aju tuʼn qkyim jun tiʼ at toklen toj qanqʼibʼil ex at toklen tukʼil t-xim Dios. Noqtzun tuʼnj, ¿tiʼ in tzaj tqʼamaʼn Tyol Dios? In qo txokine tiʼja tuʼn tjaw tuʼjina juntl xnaqʼtzbʼil. Bʼalo jaku jaw labʼina tiʼjju tzaqʼwebʼil tzul tqʼoʼn.