Mintiʼ in tzaj tqʼamaʼn Tyol Dios qa at jun anjel in xqʼuqin qiʼj. Ax tok tqʼama Jesús jlu: «Lalun che elkyikʼoʼneʼ tal bʼoʼs okslal lu [aʼyeju t-xnaqʼtzbʼen Jesús]. Quʼn kxeʼl nmaʼn kyeyeʼ qa ayeʼjuʼ kyanjl ateʼ toj kyaʼj ncheʼ kaʼyink tiʼjuʼ twitz Qman Dyos tkyaqil qʼij» (Mateo 18:10, XT). Noqtzun tuʼnj, nya a t-xilen jlu qa teyele te junjun xjal at jun t-anjel in xqʼuqin tiʼj. Sino tqʼama Jesús tzalu qa in che ximen anjel kyiʼj kykyaqil okslal. Tuʼntzunju, aʼyeju axix tok okslal mintiʼ in kubʼ kyqʼoʼn kychwinqlal toj malbʼil tuʼn tbʼaj jun tiʼ kyiʼj ex tuʼn tkubʼ kyximen qa jaku che klet kyuʼn anjel.

¿Ape t-xilen jlu qa mintiʼ in che onin anjel qiʼj? Nya (Salmo 91:11). At junjun qʼuqli kykʼuʼj tiʼj qa o che klet tuʼn Dios aj kyajbʼen anjel tuʼn ex o txi tyekʼin kybʼe, ik tzeʼn te Kenneth aju ma qo yolin tiʼj toj tnejel xnaqʼtzbʼil. Mlay txi qqʼamaʼn qa mintiʼ bʼaj jlu tiʼj Kenneth, tuʼnju bʼalo ax tok bʼaj tiʼj. Toj nimku maj, in kubʼ kynaʼn testigos de Jehová qa in che onin anjel kyiʼj aj kypakbʼan. Tuʼnju nya qʼanchaʼl qe anjel, mlay tzʼel qnikʼ tiʼj tzeʼn ex toj alkye ambʼil in che ajbʼen anjel tuʼn Dios tuʼn tonin kyiʼj xjal toj junxichaq tten. Ex bʼaʼn qa ma txi qqʼoʼn chjonte te Dios aj tel qnikʼ tiʼj qa in tzaj tqʼoʼn onbʼil qe (Colosenses 3:15; Santiago 1:17, 18).