Ik tzeʼn te Dios jun xewbʼaj mintiʼ qʼanchaʼl, ax ikx qe anjel xewbʼaj qe ex nya qʼanchaʼl qe, toj juntl yol, mintiʼ «kychibʼjal ex kybʼaqil». Ax ikx, aʼyeju anjel tzʼaqli atz in che anqʼin toj kyaʼj ex in che okx twitz Dios (Lucas 24:39; Mateo 18:10; Juan 4:24).

Toj junjun maj o che ok qe anjel ik tzeʼn xjal noq tuʼn tbʼant aju tajbʼil Dios kyuʼn twitz Txʼotxʼ, ex aj tbʼant aqʼuntl kyuʼn, in che ok juntl maj te xewbʼaj (Jueces 6:11-23; 13:15-20).

Aj kyok anjel te xjal, in che ok ik tzeʼn xinaq, moqa ichan. Ax ikx aj tyolin Tyol Dios kyiʼj in che ok tqʼoʼn ik tzeʼn xinaq, noqtzun tuʼnj, nya xinaq qe ex nya xuʼj qe. Mintiʼ in che kubʼ mojeʼ ex mintiʼ in tzaj kykʼwaʼl. Ax ikx mintiʼ o che anqʼin anjel tnejel tzalu twitz Txʼotxʼ, ik tzeʼn qe neʼẍ, moqa neʼ, qe kʼwaʼl ex qa tij xjal. A Jehová kubʼ bʼinchaʼn kye, tuʼntzunju in tzaj tqʼamaʼn Xjan Uʼj qa «tkyʼajal Dios» qe (Génesis 6:2; Salmo 148:2, 5).

In yolin Tyol Dios tiʼj «kyyol xjal ex [...] kyyol anjel», a jlu in tzaj tyekʼin qa ax ikx kye anjel in bʼant kyyolin ex at kyex kyyol. O che ajbʼen anjel tuʼn Dios tuʼn kyyolin kyukʼil xjal, noqtzun tuʼnj, mintiʼ in tzaj tqʼoʼn ambʼil qe tuʼn qkʼulun kywitz nix tuʼn qnaʼn Dios kye (1 Corintios 13:1; Apocalipsis 22:8, 9).

At nim mil kybʼaj anjel, bʼalo nim mil millón (Daniel 7:10; Apocalipsis 5:11). *

At nim kyipumal anjel ex at mas kynabʼil qwitz. Ax ikx, mas in che ojqelan kywitz qeju tiʼchaq ateʼ twitz Txʼotxʼ ex twitz kyaʼj (Salmo 103:20; Daniel 9:20-23).

Maske at mas kynabʼil ex kyipumal anjel qwitz, at junjun tiʼ mintiʼ in bʼant kyuʼn ex mintiʼ ojtzqiʼn junjun tiʼchaq kyuʼn (Mateo 24:36; 1 Pedro 1:12).

E kubʼ bʼinchaʼn anjel tuʼn tkubʼ kyyekʼin kymod ik tzeʼn te Dios ex tuʼn tkubʼ kyximen tiʼ kbʼantel kyuʼn. Ik tzeʼn kye xjal, jaku kubʼ kybʼinchaʼn anjel aju bʼaʼn moqa aju nya bʼaʼn. Bʼisbʼajilxix tuʼnju ateʼ junjun anjel e ok meltzʼaj tiʼj Dios (Judas 6).