In tzaj tyekʼin Xjan Uʼj, qa o che xqʼuqin anjel junjun maj kyiʼj tmajen Dios tuʼntzun tbʼant tajbʼil (Salmo 34:7). Qo xnaqʼtzan kyiʼj junjun techel:

• Tej kykubʼ tnajsaʼn Jehová qe nya bʼaʼn tnam te Sodoma ex Gomorra, e onin qe anjel tiʼj tbʼanel xjal Lot ex kyiʼj toj tja tuʼn kyetz toj tnam (Génesis 19:1, 15-26).

• Tej tkubʼ qʼoʼn kykastiw oxe qʼa aj hebreo tuʼn kykux qʼoʼn toj qʼaqʼ toj ojtxe tnam Babilonia, «tzaj t-samaʼn [Dios] t-anjel te klolte kye qe tmajen» (Daniel 3:19-28).

• Tej tten Daniel jun qonikʼen toj kyja león aʼyeju attoq waʼyij kyiʼj, mintiʼ ok kybʼinchaʼn jun nya bʼaʼn tiʼj. Tzaj tqʼamaʼn aj sanjel Daniel jlu: «Tzaj t-samaʼn Ndiose t-anjel, ex ma lamet kytzi bʼalun» tuʼn (Daniel 6:16, 22).

Tuʼn tbʼant aju ximen tuʼn Jehová, e ajbʼen junjun maj qe anjel tuʼn aʼyeju qʼol tqanil. E onin tiʼj aqʼuntl in bʼanttoq kyuʼn kʼloj okslal toj tnejel syent abʼqʼi. Qo xnaqʼtzan kyiʼj junjun techel:

• Jaqet tlamel cárcel tuʼn jun anjel, i etz ttzaqpiʼn qe apóstol ex xi tqʼamaʼn kye tuʼn kukx kypakbʼan toj tja Dios (Hechos 5:17-21).

• Xi tqʼamaʼn jun anjel te Felipe aju pakbʼal tuʼn t-xiʼ toj tzqij bʼe, aju in xiʼ toj Jerusalén tuʼn tpon toj Gaza, tuʼntzun tpakbʼan te jun xinaq te Etiopía aju otoq meltzʼaj kʼulul te Dios toj Jerusalén (Hechos 8:26-33).

• Tej tkubʼ t-ximen Dios tuʼn kyok xjal nya judiy te okslal, toj jun witzikʼ xi tyekʼin tibʼ jun anjel te jun nejenel te soldad te Roma aju Cornelio tbʼi ex xi tqʼamaʼn te tuʼn ttzaj ttxkoʼn apóstol Pedro tja (Hechos 10:3-5).

• Kubʼ tyekʼin tibʼ jun anjel twitz apóstol Pedro toj cárcel ex etz ttzaqpiʼn (Hechos 12:1-11).

Mintiʼ yekʼbʼil tiʼj qa in che ajbʼen anjel tuʼn Dios toj ambʼil jaʼlo tuʼn tbʼant milagr tuʼn tuʼn tonin kyiʼj xjal ik tzeʼn bʼant tuʼn toj ambʼil ojtxe. Noqtzun tuʼnj, tqʼama Jesús qa kbʼajel jlu toj ambʼil jaʼlo: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mateo 24:14). ¿Ojtzqiʼn tuʼna qa in che keʼyin anjel tiʼj aqʼuntl lu?

In tzaj tqʼamaʼn uʼj te Apocalipsis qa che oniltoq anjel kyiʼj xjal twitz tkyaqil Txʼotxʼ tuʼn tel kynikʼ tiʼj Jehová ex tiʼj t-ximbʼetz kyiʼj xjal. Kubʼ ttzʼibʼin apóstol Juan jlu: «O wile juntl anjel in lipan tuj tmijil twitz kyaʼj qʼiʼn tqanil kolbʼil tuʼn, aju kolbʼil te jumajx, tuʼn t-xi tpakbʼaʼn kye xjal najl twitz txʼotxʼ, kye kykyaqil nasyon, ex kye kykyaqil kyiyjil xjal, ex kye kykyaqil kʼloj xjal junxilchaq kyyol, ex kye kykyaqil tnam. Ex jaw tqʼajqʼajel twiʼ anjel kyuw, ex tma: —Che xobʼe twitz Dios, ex kyqʼonxe nimbʼil te, porque ma pon tqʼijlalil tuʼn tkubʼ kysentens xjal tuʼn; kyjaʼtzun, che kʼulune twitz ju bʼinchal kyaʼj, tukʼix txʼotxʼ, tukʼix mar ex kyukʼix qe twi aʼ» (Apocalipsis 14:6, 7). At nim yekʼbʼil toj ambʼil jaʼlo aju in tzaj tyekʼin qa in che onin anjel tiʼj pakbʼabʼil twitz tkyaqil Txʼotxʼ. Ax ikx, nimxix in che jaw tzalaj anjel aj tajtz tiʼj tanmi jun aj il ex aj tmeltzʼaj tukʼil Jehová (Lucas 15:10).

¿Tiʼ kbʼajel aj tpon bʼaj ambʼil te pakbʼabʼil? Che qʼojil qe anjel junx tukʼil Jesús aju aj Kawil kybʼaj kykyaqil aj kawil, «toj nintz tqˈijil Dios, a nimxix tipin» aju tok tbʼi Armagedón (Apocalipsis 16:14-16, Akʼaj Tuʼjil Tyol qMan; 19:14-16). Aʼyeju anjel nim kyipumal che onil tukʼil Jesús tuʼn tbʼant tajbʼil Dios aj ttzaj tiʼn kastiw kyiʼj qeju «mintiʼ in xi kyniman aju tqanil kolbʼil tuʼn Qajaw Jesucrist» (2 Tesalonicenses 1:7, 8).

Tuʼntzunju, jaku tzʼok qeʼ tkʼuʼja qa in che ximen anjel tiʼja ex in che ximenxix kyiʼj qeju kyaj tuʼn kyajbʼen te Dios. Ik tzeʼn ma tzʼel qnikʼ tiʼj, in che ajbʼen anjel tuʼn Jehová toj nimku maj tuʼn t-xi tqʼoʼn kyipumal qeju tmajen at twitz Txʼotxʼ ex tuʼn kyklet (Hebreos 1:14).

Teyele te junjun qe il tiʼj tuʼn tkubʼ t-ximen tiʼ kbʼantel tuʼn. ¿Kxelpe qbʼiʼn ex kxel qkʼamoʼn aʼyeju tbʼanel tqanil in xi pakbʼet twitz tkyaqil Txʼotxʼ? Che tzalajel testigos de Jehová tuʼn kyonin tiʼja tuʼntzun t-xi tkʼamoʼna aju onbʼil in tzaj kyqʼoʼn t-anjel Dios aʼyeju at nim kyipumal.