Toj jun domingo te qale, e xiʼ Kenneth ex Filomena aʼyeju in che anqʼin toj Curazao visitaril jun mejebʼleʼn in xnaqʼtzan tiʼj Tyol Dios kyukʼil.

«Tej qpone —in tzaj tqʼamaʼn Kenneth—, ok qkaʼyine qa jupuʼn ja ex mintiʼtoq kar at. Noqtzun tuʼnj, at jun tiquʼn xi nllamarine t-xuʼjil».

Tzaj ttzaqʼweʼn xuʼj ex tzaj tqʼamaʼn qa in naqʼunantoq tchmil. Pero tej tok tbʼiʼn xuʼj qa ateʼ Kenneth ex Filomena twitz tja, etz tjaqoʼn ja ex xi tqʼamaʼn kye tuʼn kyokx.

Jun rat el kynikʼ tiʼj qa otoq bʼaj oqʼ xuʼj. Tej tok tqʼoʼn Kenneth naʼj Dios tuʼn t-xi tzyet xnaqʼtzbʼil, jaw oqʼ xuʼj juntl maj. Toj tumel xi kyqanin Kenneth ex Filomena tiʼtoq in bʼaj tiʼj.

Xi tqʼamaʼn xuʼj kye qa otoq kubʼ t-ximen tuʼn tkubʼ tbʼyon tibʼ toj qale aju ex in kubʼtoq ttzʼibʼin jun uʼj tuʼn tkyaj tqʼoʼn te tchmil naʼmxtoq tkubʼ tbʼyon tibʼ, pero mintiʼ kubʼ tbʼinchaʼn jlu tuʼnju xi llamarin Kenneth tiʼj. Ax ikx xi tqʼamaʼn kye qa attoq depresión tiʼj. Tuʼntzunju jaw kyuʼjin junjun taqikʼ Tyol Dios te qʼuqbʼal tkʼuʼj. Aʼyeju yol lu e onin tiʼj tuʼn miʼn tkubʼ tbʼyon tibʼ.

In tzaj tqʼamaʼn Kenneth jlu: «Xi qqʼoʼne chjonte te Jehová tuʼnju tzaj tqʼoʼn ambʼil qeye tuʼn qonine tiʼj xuʼj lu aju in tzaj bʼajtoq tkʼuʼj, ax ikx tuʼnju kubʼ qximane tuʼn t-xi qllamarine, bʼalo ajbʼen jun anjel tuʼn moqa aju xewbʼaj xjan». *

¿Axpe tok onin Dios tiʼj Kenneth ex Filomena ik tzeʼn kubʼ kyximen, tukʼil jun anjel moqa tukʼil xewbʼaj xjan? ¿Moqa noq derepent pon yolin Kenneth tiʼj xuʼj toj ambʼil aju?

Mlay txi qqʼamaʼn qa axix tok, noqtzun tuʼnj, ojtzqiʼn quʼn qa in che ajbʼen anjel tuʼn Dios tuʼn tonin kyiʼj xjal kyaj tuʼn tel kynikʼ tiʼj Tyol. Jun techel, in tzaj tqʼamaʼn Xjan Uʼj qa ajbʼen jun anjel tuʼn Dios tuʼn t-xi tyekʼin tbʼe jun okslal Felipe tbʼi, tuʼntzun tpon tukʼil jun xjal nim toklen te Etiopía aju tajtoq tuʼn tel tnikʼ tiʼj Xjan Uʼj (Hechos 8:26-31).

Nim okslabʼil in xi kyxnaqʼtzaʼn qa ateʼqe xewbʼaj mintiʼ qʼanchaʼl qe. Ex kyxol jlu at junjun tbʼanel qe ex in kubʼ kybʼinchaʼn tajbʼil Dios ex qa in che xqʼuqin kyiʼj xjal. Nim xjal nya oʼkx qʼuqli kykʼuʼj tiʼj qa ateʼqe anjel, ax ikx nimen kyuʼn qa in che onin toj kyanqʼibʼil. Atzun junjuntl mintiʼ in nok qeʼ kykʼuʼj qa ateʼqe anjel.

¿Axpe tok qa ateʼqe anjel? ¿Jatumel tzajni qe? ¿Tiʼ in tzaj tqʼamaʼn Tyol Dios kyiʼj? ¿Jakupe che onin qiʼj? Qo xnaqʼtzan kyiʼj junjun yekʼbʼil.