Kwest tuʼn tel qnikʼ tiʼj alkye oyaj kxel qqʼoʼn te jun xjal. Aju mas nim toklen aju alqe kxel qqʼoʼn oyaj: bʼalo nim toklen jun oyaj te jun xjal atzunte juntl nya nim toklen.

Jun techel, jakulo tzaj tqʼamaʼn jun kuʼxun qa aju oyaj mas tbʼanel aju kʼuxbʼil tzma in netz. Atzun jun xjal ma tijen, bʼalo tbʼanel jaku tzʼela toj twitz qa ma tzaj qʼoʼn jun oyaj te aju nim toklen kye toj tja ex qa jun tiʼchaq otoqxi tzʼajbʼen kyuʼn toj tja. Toj junjun tnam mas bʼaʼn in nela kye kuʼxun ex kye tij xjal qa ma txi qʼoʼn pwaq kye tuʼntzun ttzaj kylaqʼon aju kyajbʼil.

Maske ikju, in nok tilil kyuʼn nimku tuʼn t-xi kyqʼoʼn jun tbʼanel oyaj te xjal nim toklen kye. At maj kwest tuʼn tbʼant quʼn, noqtzun tuʼnj, qa ma txi qbʼinchaʼn ik tzeʼn junjun tten, kʼelel qnikʼ tiʼj alkye oyaj tuʼn t-xi qqʼoʼn. Qo xnaqʼtzal tiʼj kyaje tumel aju kʼonil qiʼj tuʼn ttzalaj aju xjal kxel kʼamonte oyaj.

Aju oyaj taj xjal. Tqʼama jun xjal te Belfast (Irlanda del Norte), tej qʼiʼntoq bʼalo 10 ex qa 11 abʼqʼi tuʼn, tzaj qʼoʼn jun tbiciclet te ojqelbʼil ex tqʼama qa atzun oyaj mas tbʼanel o tzaj qʼoʼn te toj tanqʼibʼil, ik tzeʼn tqʼama, «wajtoqe jun biciclet». A jlu in tzaj tyekʼin qa tuʼn ttzalaj jun xjal tiʼj jun oyaj, at toklen jlu tukʼil tajbʼil xjal. Ximana tiʼj xjal taja tuʼn t-xi tqʼoʼna jun oyaj te. Qʼonka tilil tuʼn tel tnikʼa alkyeqe tiʼchaq in nok tqʼoʼn kyoklen, qa taj xjal jun tiʼchaq ax ikx in nok tqʼoʼn toklen. Jun techel, in nok kyqʼoʼn abuelo toklen ambʼil in che ten kyukʼil toj kyja. Bʼalo kyaj tuʼn kukx kyyolin kyukʼil kykʼwaʼl ex qa kyukʼil kychman. Qa junx in cheʼx toj vacaciones kyukʼil toj kyja, in nok kyqʼoʼn toklen jlu twitz alkyexku juntl tiʼ.

Tuʼn tel qnikʼ tiʼ taj jun xjal, il tiʼj tuʼn tok qqʼoʼn qwiʼ tiʼj. In tzaj tqʼamaʼn Tyol Dios jlu: «Kykyaqile bʼaʼn tuʼn t-xi kybʼiʼn naje ju yol, pero mya jurat naj tuʼn kyyoline» (Santiago 1:19). Bʼaʼn tuʼn tok qqʼoʼn qwiʼ tiʼj alkye kygan qamiw ex qe toj qja aj kyyolin kyukʼil. Iktzun tten jaku txi qqʼoʼn jun oyaj kye aju jaku che tzalaj tiʼj.

 Aju at tajbʼen te xjal. Qa ma txi qqʼoʼn jun oyaj aju at tajbʼen te xjal, in nok tqʼoʼn toklen maske nya nim twiʼ. ¿Tzeʼn jaku tzʼel qnikʼ tiʼj alkye atx taj te xjal?

Bʼalo mas bʼaʼn tuʼn t-xi qqanin te xjal alkye at tajbʼen te. Noqtzun tuʼnj, in kubʼ kyximen nim xjal qa tuʼn jlu jaku naj tzalajbʼil kye aj t-xi kyqʼoʼn oyaj te juntl; tuʼnju kyajbʼil tuʼn miʼn tok tbʼiʼn xjal kxel kʼamonte oyaj. Ax ikx ateʼ junjun mintiʼ in che xobʼ tuʼn kyyolin tiʼjju kygan ex tiʼjju nya kygan, noqtzun tuʼnj, ateʼ junjuntl mintiʼ in tzaj kyqʼamaʼn tiʼ atx taj kye.

Tuʼntzunju, keʼyinka ex ximana tiʼj tzeʼn tanqʼibʼil xjal. ¿Tzma kuʼxun, ma tijen, naʼmx tmojeʼ, o kubʼ mojeʼ, o tzʼel tpan tibʼ ex qa o kyim tukʼil? ¿In naqʼunan ex qa o jubilarin? Yajxitl, ximana tiʼj alkye oyaj jaku txi tqʼoʼna te xjal lu.

Tuʼn tel tnikʼa tiʼj tiʼ tajbʼil xjal taja tuʼn t-xi tqʼoʼna oyaj te, yolina kyukʼil junjuntl aʼyeju o ten ax kyanqʼibʼil ik tzeʼn te. Bʼalo jaku tzaj kyqʼamaʼn junjun tiʼ teya aju at tajbʼen te xjal ex aju nya ojtzqiʼn kyuʼn junjuntl. Tukʼil tqanil lu, ok kxel tqʼoʼna jun oyaj aju at-xix tajbʼen te xjal ex kbʼantel tuʼna aju mlay bʼant kyuʼn txqantl.

Toj alkye ambʼil. In tzaj tqʼamaʼn Tyol Dios jlu: «Mas at tzalajbʼil te [xjal] qa ma tzaqʼwet tuʼn ok tajbʼen» (Proverbios 15:23). A jlu in tzaj tyekʼin qa il tiʼj tuʼn tjaw qjyoʼn alkye ambʼil tuʼn t-xi qqʼamaʼn jun tiʼ te jun xjal tuʼntzun tkubʼ tnaʼn bʼaʼn. Ax ikx qo ximel tiʼjju kbʼantel quʼn: qa ma txi qqʼoʼn jun oyaj toj jun ambʼil mas bʼaʼn, tuʼn jlu jaku tzalaj aju kxel kʼamonte.

Jaku bʼant jlu quʼn, aj tkubʼ mojeʼ jun qamiw, qa chʼixtl tgraduarin jun kuʼxun, moqa chʼixtl tul jun neʼ, moqa neʼẍ... Noq junjun techel jlu tiʼj alkye ambʼil jaku txi qqʼoʼn jun oyaj. At junjun in kuʼx kytzʼibʼan toj jun uʼj kykyaqil qe ninqʼij che ikʼel toj jun abʼqʼi. Tuʼn jlu jaku bʼaj kyximen alkye oyaj kxel kyqʼoʼn ex toj alkye ambʼil. *

Nya oʼkx kyoj ambʼil nim kyoklen jaku txi qqʼoʼn jun oyaj, sino toj alkyexku ambʼil. Noqtzun tuʼnj, ax ikx kʼokel qxqʼuqin qibʼ. Jun techel, qa ma txi tqʼoʼn jun xinaq, moqa ichan, jun oyaj te jun xuʼj ex mintiʼ in ximen tiʼj jun tiʼ, jakulo kubʼ t-ximen xuʼj qa tajbʼil xinaq tuʼn tok tojtzqiʼn. Ex qa mintiʼ in ximen xinaq tiʼj jlu, jakulo junxitl tzʼok toj kywiʼ ex jaku tzaj nya bʼaʼn tuʼn. A jlu at toklen tukʼil juntl tiʼ nim toklen tuʼn qximen tiʼj: aju tiquʼn in xi tqʼoʼn xjal jun oyaj.

Aju tiquʼn in xi tqʼoʼn xjal jun oyaj. Ik tzeʼn saj tyekʼin techel, bʼaʼn tuʼn qximen tiʼj qa junxitl kʼokel toj twiʼ xjal aj t-xi qqʼoʼn jun oyaj te. Ax ikx qe il tiʼj tuʼn qximen tiquʼn kxel qqʼoʼn jun oyaj. Nimku qe tbʼanel qximbʼetz aj t-xi qqʼoʼn jun oyaj, atzun kye nim xjal in xi kyqʼoʼn oyaj tuʼnju in che ok obligarin. Atzun junjuntl in xi kyqʼoʼn oyaj tuʼntzun ttzaj qʼoʼn t-xel kye ex qa noq tuʼn tok qʼoʼn jun kyoklen.

¿Tiʼ kbʼantel quʼn tuʼn tel qnikʼ tiʼj qa mintiʼ in qo ximen tiʼj jun tiʼ aj t-xi qqʼoʼn jun oyaj? In tzaj tqʼamaʼn Tyol Dios jlu: «Tkyaqilju ok kybʼinchaʼye, bʼant-xwit kyuʼne tuʼn kykʼujlalile» (1 Corintios 16:14). Qa in xi qqʼoʼn jun oyaj tukʼil kʼujlabʼil ex in qo ximen kyiʼj txqantl, tuʼn jlu ktzalajel aju kxel kʼamonte. Ex kbʼel tnaʼna nim tzalajbʼil aj tel tnikʼa qa tbʼanel tuʼnju in xi qqʼoʼn tiʼchaq kye txqantl. Aj t-xi qqʼoʼn oyaj tukʼil kʼujlabʼil, ax ikx in jaw tzalaj Dios quʼn. Xi tqʼamaʼn apóstol Pablo tbʼanel yol kye okslal te Corinto tuʼnju xi kyqʼoʼn tiʼchaq tukʼil tzalajbʼil ex kyxtalbʼil kye kyerman toj Judea tej kyok weʼ twitz nya bʼaʼn. Tqʼama jlu toj uʼj kubʼ ttzʼibʼin: «Porque aju xjal in xi tqʼoʼn oyaj tukʼil tzalajbʼil, in tzalaj Dios tiʼj» (2 Corintios 9:7).

Qa ma ximana kyiʼj tumel ma qo xnaqʼtzan kyiʼj, kxel tqʼoʼna oyaj kye junjun xjal aju che tzalajel tiʼj. Ximen Dios kyiʼj tumel lu ex kyiʼj junjuntl tej ttzaj tqʼoʼn aju tbʼanel oyaj kye xjal. Toj juntl xnaqʼtzbʼil qo yolil tiʼj tiquʼn tzaj tqʼoʼn Dios oyaj lu.