TBʼI XNAQʼTZBʼIL TOK TIʼJ T-XKʼOMIL: ¿ALKYE OYAJ MAS TBʼANEL?
¿Alkye oyaj mas tbʼanel twitz tkyaqil?
«Tkyaqil oyaj bʼaʼn ex tkyaqil oyaj tbʼanilxix, atzun in kuʼtz tuj kyaʼj, atzun in tzaj tukʼil Dios aju bʼinchal kye spikʼun ateʼ twitz kyaʼj» (Santiago 1:17). In yolin taqikʼ Tyol Dios lu tiʼj t-xtalbʼil Jehová, aju Qtat at toj kyaʼj. At jun oyaj mas nim toklen kyxol qeju nim oyaj o tzaj tqʼoʼn Dios kye xjal. ¿Alkye? In tzaj kyqʼamaʼn tyol Jesús jlu toj Juan 3:16: «Tuʼnju nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl, tuʼntzun miʼn kynaj kykyaqil qeju ma che okslan wiʼje, noq oʼkx tuʼn tten kychwinqlal te jumajx».
Aju mas tbʼanel oyaj o tzaj tqʼoʼn Dios qe, a Tkʼwaʼl ex mintiʼ juntl oyaj mas nim toklen toj qanqʼibʼil. Noq tuʼn jlu, jaku qo tzaqpaj tiʼj il, aju tijel ex tiʼj kamik (Salmo 51:5; Juan 8:34). Maske in nok tilil quʼn tuʼn qtzaqpaj tiʼj jlu qjunalx, mlayx bʼant quʼn. Atzunte Dios o bʼant tkyaqil tuʼn tuʼn qtzaqpaj, noq tuʼn tkʼujlabʼil at qiʼj. Tej ttzaj tqʼoʼn Jehová oʼkxku jun Tkʼwaʼl te chojbʼil, tzaj tqʼoʼn ambʼil kye xjal bʼaʼn che niman te tuʼn tten kychwinqlal te jumajx. Qo ximen kyiʼj xjel lu, ¿tiʼ aju chojbʼil? ¿Tiquʼn at tajbʼen qe? Ex ¿tiʼ tbʼanel jaku tzaj tiʼn qe?
In najbʼen chojbʼil tuʼn tchjet jun tiʼ aju otoq txi naj ex qa tuʼn ttzaqpaj jun xjal. In tzaj tqʼamaʼn Xjan Uʼj qa tzʼaqli qe tnejel qman e kubʼ tbʼinchaʼn Dios, a Adán tukʼil Eva. Ex xi tqʼoʼn jun qʼuqbʼil kykʼuʼj tuʼn kyanqʼin te jumajx toj Tbʼanel Najbʼil twitz Txʼotxʼ junx kyukʼil kyyajil, moqa kyiyjil (Génesis 1:26-28). Bʼisbʼajilxix tuʼnju xi kynajsaʼn tkyaqil jlu tuʼnju mintiʼ e nimen te Jehová ex e ok te aj il. ¿Tiʼ nya bʼaʼn tzaj tuʼn jlu? In tzaj tqʼamaʼn Tyol Dios jlu: «Kyjaʼtzun, ik tzaʼn noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il» (Romanos 5:12). Twitzju tuʼn t-xi kyqʼoʼn jun tbʼanel kyanqʼibʼil kykʼwaʼl, kyaj kyqʼoʼn il kybʼaj ex tuʼn jlu in tzaj kamik.
Aj t-xi chjet jun tiʼ, in xi qʼet t-xel ik tzeʼnx tiʼchaq otoq txi naj. Kubʼ tbʼinchaʼn Adán il tej mintiʼ nimen te Dios, ex tuʼn jlu xi tnajsaʼn aju tchwinqlal tzʼaqli. Ik tzeʼn in tzaj tqʼamaʼn Tyol Dios, e ok qe tyajil Adán te majen tiʼj il ex kamik. Tuʼn qtzaqpaj, iltoq tiʼj tuʼn t-xi qʼet juntl chwinqlal tzʼaqli: aju te Jesús (Romanos 5:19; Efesios 1:7). Noqwit mintiʼ tzaj tqʼoʼn Dios chojbʼil lu, mintiʼwtlo jun qʼuqbʼil kykʼuʼj xjal tuʼn kytzalaj tiʼjju xi tnajsaʼn Adán tukʼil Eva: aju chwinqlal te jumajx toj jun tbʼanel najbʼil (Apocalipsis 21:3-5).
Aj tok qqʼoʼn qwitz tiʼj tkyaqil tbʼanel in tzaj tqʼoʼn chojbʼil —ik tzeʼn chwinqlal te jumajx— jaku txi qqʼamaʼn qa atzun «oyaj mas tbʼanel». Tuʼn tel qnikʼ tiʼj tiquʼn tbʼanelxix aju oyaj tzaj tqʼoʼn Dios qe, qo xnaqʼtzan tiʼj junjun yekʼbʼil, tuʼn tel qnikʼ qa in japun tkyaqilju tumel tuʼn oyaj lu aju o yolin tiʼj toj xnaqʼtzbʼil ma kyaj.
In tzaj tqʼoʼn aju qajbʼil. O qo kubʼ bʼinchaʼn tukʼilju qajbʼil tuʼn qanqʼin te jumajx (Eclesiastés 3:11). Noqtzun tuʼnj, mlayx bʼant jlu quʼn qjunalx, atzunte chojbʼil in bʼant jlu tuʼn. In tzaj tqʼamaʼn Tyol Dios jlu: «Aju chojbʼil qe in tzaj tqʼoʼn il, atzun tuʼn qkyim; atzunju oyaj in tzaj tqʼoʼn Dios qe, tuʼn tten qchwinqlal te jumajx tuʼn qmojbʼabʼl qibʼ tukʼil Jesucrist aju Qajaw» (Romanos 6:23).
In tzaj tqʼoʼn aju at tajbʼen qe. Mi jun xjal jakutoq bʼant tuʼn t-xi tqʼoʼn chojbʼil ik tzeʼn jlu. In tzaj tqʼamaʼn Tyol Dios qa nimxix twiʼ ex qa mlayx chjet quʼn (Salmo 49:8). Iltoq tiʼj tuʼn qtzaj tonin Dios tuʼntzun qtzaqpaj tiʼj il ex tiʼj kamik. Ex «noq tuʼn t-xtalbʼil Dios, tuʼnju ma qo kolpet tuʼn Jesucrist», o tzaj tqʼoʼn Dios aju at-xix tajbʼen qe (Romanos 3:23, 24).
Toj jun ambʼil mas bʼaʼn. In tzaj tqʼamaʼn Tyol Dios jlu: «O kyim Crist te qxel tej aj ilxtoq qoʼ» (Romanos 5:8). Tzaj tqʼoʼn Dios chojbʼil «tej aj ilxtoq qoʼ», a jlu in tzaj tyekʼin qa kʼujlaʼn qoʼ tuʼn Dios maske aj il xjal qoʼ. Kukx in tzaj nya bʼaʼn qiʼj tuʼn il jaʼlo, noqtzun tuʼnj, in qo tzalaj tiʼjju kbʼantel toj ambʼil tzul noq tuʼn chojbʼil.
Aju t-xtalbʼil Jehová ex aju tiquʼn tzaj tqʼoʼn oyaj. ¿Tiʼ onin tiʼj Dios tuʼn ttzaj tqʼoʼn chojbʼil? «Tuʼn jlu ma tzaj tyekʼun Dios tkʼujlalil qiʼj; tuʼnju tzaj t-samaʼn Dios oʼkxku jun Tkʼwaʼl, ul tzalu twitz txʼotxʼ tuʼntzun tten qchwinqlal noq tuʼn. Tuʼntzun jlu nneʼl qnikʼ tiʼj ju tkʼujlalil: Mya aqeqoʼ ma qo kʼujlante Dios, noq oʼkx ate Dios ma qo tkʼujla» (1 Juan 4:9, 10).
¿Tiʼ teya kbʼantel tuʼn tuʼn tkubʼ tyekʼina qa in xi tqʼoʼna chjonte tiʼj tbʼanel oyaj lu? Naʼntza aju tqʼama Jesús toj Juan 3:16, oʼkx «qeju ma che okslan wiʼje» ok che kletel. In tzaj tqʼamaʼn Tyol Dios qa «tuʼn qokslabʼl in qeʼxix qkʼuʼj tiʼj tuʼn qkʼmonte aju in qo ayon tiʼj» (Hebreos 11:1). Tuʼn tten qʼuqbʼil qkʼuʼj lu, il tiʼj tuʼn tten qojtzqibʼil axix tok. Tuʼntzunju, in xi qqʼamaʼne teya tuʼn tel tpaʼna ambʼil tuʼn tok tojtzqiʼna Dios, aju Qʼol «tbʼanel oyaj», ex tuʼn tel tnikʼa tiʼj tiʼ tuʼn tbʼant tuʼna tuʼntzun ttzalaja tiʼj chwinqlal te jumajx, aju tzul qʼoʼn noq tuʼn chojbʼil bʼant tuʼn Jesús.
Jaku kanet ojtzqibʼil lu tuʼna qa ma jyona tqanil toj Tyol Dios toj tembʼil te Internet www.pr418.com/mam. Aqoʼye testigos de Jehová ok qo tzalajele tuʼn qonine tiʼja. Qʼuqli qkʼuʼje tiʼj qa akux in nel tnikʼa tiʼj oyaj lu ex aj tel tnikʼa tiʼj tiʼ tbʼanel tzul tiʼn teya, kxel tqʼamaʼna qe yol lu: «Oʼkx te Dios tzoqpil weye noq tuʼn Jesucrist aju Qajaw. Chjonte Dios» (Romanos 7:25).