Atzun jlu tzaj tqʼamaʼn jun tal txin te 13 abʼqʼi tej ttzaj qʼoʼn jun tal txʼyan te. In tzaj tqʼamaʼn jun xuʼj in kambʼan tiʼj kʼaẍjel qa chʼexpaj tanqʼibʼil tej ttzaj tqʼoʼn ttat jun tcomputadora. Ex in kubʼ t-ximen jun xjal aju tzma in nikʼ chʼin ambʼil tkubʼlen mojeʼ qa aju oyaj mas tbʼanel o tzaj tkʼamoʼn, aju tarjeta kubʼ tbʼinchaʼn t-xuʼjil tej tel jun abʼqʼi kykubʼlen mojeʼ.

Tkyaqil abʼqʼi, nim xjal in nel kypaʼn ambʼil ex in che ximen tiʼj alkye oyaj mas tbʼanel kxel kyqʼoʼn te jun kyamiw ex qa te jun toj kyja toj jun ambʼil nim toklen. Ex chʼixme kykyaqil xjal kyajbʼil tuʼn tkubʼ kynaʼn ik tzeʼn qeju ma qo yolin kyiʼj jawni. ¿Taj teya tuʼn t-xi tqʼoʼna ex qa tuʼn ttzaj tkʼamoʼna jun oyaj ik tzeʼn jlu?

Bʼalo tbʼanel aju ximbʼetz lu, nya oʼkx tuʼn ttzalaj aju kxel kʼamonte oyaj, ax ikx il tiʼj tuʼn qximen tiʼj tiʼ in kubʼ tnaʼn aju in xi qʼonte. In tzaj tqʼamaʼn Tyol Dios jlu: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hechos 20:35). Ax tok, in tzaj tqʼoʼn nim tzalajbʼil qe qa ma tzaj tqʼoʼn xjal nim chjonte tiʼj oyaj xi qqʼoʼn te.

¿Tiʼ jaku bʼant quʼn tuʼntzun qtzalaj tiʼj oyaj kxel qqʼoʼn ex tuʼn ttzalaj aju kxel kʼamonte? Qa mlay txi qqʼoʼn jun tbʼanel oyaj, ¿tzeʼn jaku txi qqʼoʼn jun oyaj aju kʼokel tqʼoʼn xjal toklen?