• Jaw jyon tuʼn Dios. «Atzunju rey lu skʼoʼmaj wuʼne. [...] Jaku txi nqʼoʼne tkyaqil twitz txʼotxʼ teya» (Salmo 2:6, 8).

• Kbʼeltoq qeʼ toj tqʼuqbʼil David. «Ma itzʼj jun tal neʼ qxol, ma tzaj tqʼoʼn Dios jun kʼwaʼlbʼaj qe, [...] kbʼel qeʼ tuj tqʼuqbʼil David tuʼn tkawin te t-xel; ex kukx kchʼiyil tkawbʼil tuj tkyaqil twitz txʼotxʼ» (Isaías 9:6, 7).

• Tzultoq itzʼj toj tnam Belén. «Atzun teya tnam Belén, [...] tuja tzul itzʼj wuʼne jun kawil [...] kjawil nimsaʼn [...] tuj tkyaqil twitz txʼotxʼ» (Miqueas 5:2, 4).

• Oktoq kʼelel ikʼun ex kbʼeltoq bʼyoʼn. «Ik tzaʼn jun xjal mintiʼ qaj tuʼn tok qkeʼyin, ikʼun quʼn ex mintiʼ qaj tiʼj. [...] O kʼixbʼisanjtz tuʼn qlaj, tuʼnju mibʼan qo bʼin; nimxix kʼixkʼoj ikʼx tuʼn tuʼn tlaj qbʼinchbʼen mya bʼaʼn» (Isaías 53:3, 5).

• Kjawiltoq anqʼin ex kjawil nimsaʼn. «Mlay kyaj tqʼoʼna wanmiye tuj kynajbʼil kyimni ex mlay chin kyaj tqʼoʼna tuʼn ttzuwix nximlale, aqine nimal teya [...]; at nim achbʼil tukʼila te jumajx» (Salmo 16:10, 11).

Oʼkx tiʼj Jesús in japun bʼaj tkyaqil yol lu. Ax ikx xi tqʼamaʼn jun anjel jlu te María, aju ttxuʼ Jesús: «Kxel tqʼoʼn Qman Dios toklen tuʼn tok te rey ik tzaʼn te David [...]. Aju tkawbʼil mintiʼ bʼajsbʼil te» (Lucas 1:31-33).

Mintiʼ kawin Jesús tej tten twitz Txʼotxʼ. Noqtzun tuʼnj, tzmax toj kyaʼj kykawil kyibʼaj xjal twitz Txʼotxʼ. ¿Tiquʼn oʼkx Jesús jaku tzʼok te tbʼanel aj Kawil? Tuʼn t-xi qtzaqʼweʼn xjel lu, qo xnaqʼtzan tiʼjju bʼant tuʼn tej tten twitz Txʼotxʼ.

•   Ximen Jesús kyiʼj xjal ex onin kyiʼj. Onin kyiʼj xinaq, kyiʼj xuʼj, kyiʼj kuʼxun ex kyiʼj tij xjal. Mintiʼ ok tqʼoʼn Jesús twitz tiʼj kyyajil xjal nix tiʼjju tten kyanqʼibʼil (Mateo 9:36; Marcos 10:16). Tej t-xi tqʼamaʼn jun xjal at lepra tiʼj jlu te: «Qa taja, jaku chin bʼanixe tuʼna», tzaj qʼaqʼin tkʼuʼj Jesús tiʼj ex kubʼ tqʼanin (Marcos 1:40-42).

• Kyaj tyekʼin Jesús tzeʼn tuʼn ttzalaj Dios quʼn. Tqʼama jlu: «Mlayx bʼant tuʼn kyajbʼene te Dios ex te qʼinumabʼl». Ax ikx tqʼama tuʼn tok qbʼinchaʼn tbʼanel kyiʼj txqantl ik tzeʼn qaj tuʼn tok bʼinchaʼn qiʼj. Ex kyaj tyekʼin qa nya oʼkx in nok tqʼoʼn Dios twitz tiʼjju in bʼant quʼn, sino ax ikx kyiʼj qximbʼetz ex tiʼjju in kubʼ qnaʼn. Tuʼntzunju, il tiʼj tuʼn tok qxqʼuqin aju tkuʼx toj qanmi tuʼntzun ttzalaj Dios qiʼj (Mateo 5:28; 6:24; 7:12). Ax ikx tqʼama Jesús qa oʼkx jaku qo tzalaj qa ma tzʼel qnikʼ tiʼjju taj Dios tuʼn tbʼant quʼn ex qa ma kubʼ qbʼinchaʼn (Lucas 11:28).

• Kyaj tyekʼin Jesús tiʼ t-xilen tuʼn kyok qkʼujlaʼn txqantl. Pon tyol ex tbʼinchbʼen toj kyanmi xjal. In tzaj tqʼamaʼn Tyol Dios jlu: «Kykyaqiltzun xjal e labʼin tiʼj t-xnaqʼtzbʼil; porke aju xnaqʼtzbʼil xi tqʼoʼn kye at tipumal» (Mateo 7:28, 29). Jun techel, xi tqʼamaʼn tuʼn tbʼant jlu kyuʼn: «Kykʼujlame qe aj qʼoj kyiʼje». Ex naʼn Jesús Dios kyiʼj junjun xjal e onin tuʼn tkubʼ bʼyoʼn: «Tat, najsama kyil xjal lu, porke mintiʼ nneʼl kynikʼ tiʼj ju in kybʼinchaʼn» (Mateo 5:44; Lucas 23:34).

Oʼkx Jesús jaku bʼant tkawin kyibʼaj xjal. Jaku bʼant-xix tkawin, kʼujlaʼn qoʼ tuʼn ex taj tuʼn tonin qiʼj. Pero ¿jtoj txi tzyet tuʼn tkawin?