Tqʼama jlu: «Che qʼojlel qe nasyon kyiʼj mastl nasyon, ex che qʼojlel qe tnam kyiʼj mastl tnam. Ex ktzajel kyaqnajnabʼ kyuwxix ex weʼyaj ex txʼuʼj yabʼil noq jachaq» (Lucas 21:10, 11). Ik tzeʼn jun xjal in nel nikʼbʼaj tiʼj noq tuʼn twi tqʼabʼ, ax ikx qe kʼelel qnikʼ tiʼj qa chʼix t-xi tzyet tkawin Tkawbʼil Dios aj tjapun twi tkyaqilju kyaj tqʼamaʼn Jesús toj ax ambʼil. ¿In che okpe qkeʼyin techel lu toj ax ambʼil ex in che ikʼpe twitz tkyaqil Txʼotxʼ? Qo xnaqʼtzan kyiʼj junjun techel.

1. NIMAQ QʼOJ

Aju nimaq qʼoj o tzaj tiʼn nim nya bʼaʼn kyiʼj xjal aju ikʼ toj abʼqʼi 1914. In tzaj kyqʼamaʼn xjal in che xnaqʼtzan tiʼjju o bʼaj qa toj abʼqʼi 1914 chʼexpaj kyanqʼibʼil xjal tuʼnju toj abʼqʼi lu ok tnejel nimaq qʼoj. Mas e ajbʼen qe kar te qʼojbʼil, qe avión iqʼin bomba kyuʼn, ametralladoras, gases tóxicos ex junjuntl tiʼchaq toj qʼoj lu. Yajxitl, toj Tkabʼ Nimaq Qʼoj twitz Tkyaqil Txʼotxʼ ajbʼen tnejel maj qe bombas atómicas. Atxix toj abʼqʼi 1914, o tzʼok kykeʼyin xjal nim qʼoj twitz tkyaqil Txʼotxʼ jatumel o che kyim nim millón xjal.

2. KYAQNAJNABʼ

In tzaj tqʼamaʼn enciclopedia Britannica Academic, qa in che ikʼ junlo 100 kyaqnajnabʼ junjun abʼqʼi, aʼyeju jaku tzaj nim nya bʼaʼn kyuʼn. Ax ikx, in tzaj tqʼamaʼn Servicio Geológico te Estados Unidos jlu: «Kyoj tqanil ateʼ atxix toj abʼqʼi 1900, in kubʼ ximet qa jaku tzikʼ junlo 16 kyaqnajnabʼ, aʼyeju jaku tzaj kyiʼn nim xitbʼil». Bʼalo jaku tzaj kyqʼamaʼn junjun qa mintiʼ in tzaj mas terremoto, sino mas in nel nikʼbʼaj kyiʼj aj in che tzaj. Noqtzun tuʼnj, bʼajx tzaj nim kʼixkʼoj ex kamik kyuʼn kyaqnajnabʼ ik tzeʼn jaʼlo.

 3. MINTIʼXIX WABʼJ

Mintiʼ wabʼj twitz tkyaqil Txʼotxʼ tuʼn kypaj nimaq qʼoj, tuʼnju mintiʼxix pwaq, nya toj tumel in najbʼen pwaq kyuʼn aj kawil, nya toj tumel in che ajbʼen tiʼchaq tiʼj awal ex tiʼj alumaj kyuʼn xjal ex tuʼnju mintiʼ in kubʼ kyximen tiʼ tuʼn tbʼant kyuʼn aj ttzaj qʼijl moqa aj ttzaj jbʼal. In tzaj tqʼamaʼn Programa Mundial de Alimentos jlu: «Twitz tkyaqil Txʼotxʼ, in nikʼx weʼyaj tuʼn 821 millón xjal, ex kyxol lu ateʼ 124 millón chʼix kykyim» (2018 Year in Review). Aj tikʼ junjun abʼqʼi in che kyim mas te 3 millón kʼwal. Kyxol kʼwal e kyim toj 2011, chʼixme mij e kyim tuʼn weʼyaj.

4. QE YABʼIL

In tzaj tqʼamaʼn jun tqanil etz tuʼn Organización Mundial de la Salud jlu: «Mas nim txʼuʼj yabʼil o che ten kyoj qeju mankbʼil 20 abʼqʼi o che ikʼ. O che ten ojtxe yabʼil juntl maj ik tzeʼn cólera, peste ex aju fiebre amarilla. Ax ikx o che ten akʼaj yabʼil ik tzeʼn síndrome respiratorio agudo grave, gripe pandémica, síndrome respiratorio te Oriente Medio, ébola ex zika». Nya oʼkxju, ax ikx kʼitzqeku tzaj pandemia te COVID-19. Maske o tzʼel kynikʼ aj qʼanil ex científico kyiʼj yabʼil, naʼmx tkanet qʼanbʼil kyuʼn kyiʼj kykyaqil yabʼil.

5. KXEL PAKBʼET TYOL DIOS TWITZ TKYAQIL TXʼOTXʼ

Yolin Jesús tiʼj juntl techel tej tqʼama jlu: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mateo 24:14). Maske at nim nya bʼaʼn twitz Txʼotxʼ, at mas te 8 millón xjal in che pakbʼan tiʼj tbʼanel tqanil tiʼj Tkawbʼil Dios kyoj 240 nimaq tnam ex tembʼil te pakbʼabʼil, ex toj mas te mil yol. Naʼmx tok qkeʼyin jlu jun maj.

Tkyaqil techel yolin Jesús tiʼj in japun kywi toj ambʼil jaʼlo. ¿Tiquʼn nim toklen te qe? Bʼaʼn tuʼn ttzaj qnaʼn aju tqʼama Jesús: «Ok kylonteye ok tjapun tkyaqil jlu, tzʼelx kynikʼe tiʼj in laqʼex ttzaj tkawbʼil Dios» (Lucas 21:31).

Aju techel yolin Jesús tiʼj ex aju tajlal ambʼil in yolin Tyol Dios tiʼj, in tzaj kyyekʼin qa xi tzyet tkawin Tkawbʼil Dios toj kyaʼj toj abʼqʼi 1914. a Toj ambʼil aju ok tqʼoʼn Dios toklen Jesús, aju Tkʼwal, te aj Kawil (Salmo 2:2, 4, 6-9). Toj chʼintl ambʼil kkawil Tkawbʼil Dios tibʼaj Txʼotxʼ, kʼelel tiʼn kykawbʼil xjal ex kʼokel Txʼotxʼ te jun tbʼanel najbʼil tuʼn jatumel che najal xjal te jumajx.

Toj chʼintl ambʼil kjapunel kywi yol in che kanet quʼn toj naʼj Dios kyaj tyekʼin Jesús qe: «E ttzaj ju tkawbʼila. Bʼant-xwit ju tajbʼila twitz txʼotxʼ ik tzaʼn in bʼant tuj kyaʼj» (Mateo 6:10). Noqtzun tuʼnj, ¿tiʼ in bʼant tuʼn Tkawbʼil Dios atxix tej ttzaj tzyet toj abʼqʼi 1914? ¿Ex tiʼ kbʼantel tuʼn aj tkawin kyibʼaj kykyaqil xjal?