Toj ambʼil jaʼlo, in laqʼeʼ ttzaj jun «huracán». Ok tqʼoʼn Jesús tbʼi te «kʼixbʼisabʼl maʼxix» (Mateo 24:21). Maske mlay qo tzaqpaj tiʼj kʼixbʼisabʼil tzul, jaku txi qjyoʼn jun lugar tuʼn qklet. ¿Tiʼ il tiʼj tuʼn tbʼant quʼn?

Toj tchikʼbʼabʼil Jesús twiʼ jun witz, tqʼama qe tqanil lu: «Kynimanxe tnejelxix aju tkawbʼil Dios ex tuʼn kybʼinchanteye aju tzʼaqlxix twitz» (Mateo 6:33). ¿Tiʼ kyxilen qe yol lu?

«Kynimanxe tnejelxix aju tkawbʼil Dios». A t-xilen jlu qa mas kʼokel qqʼoʼn toklen Tkawbʼil Dios kywitz txqantl tiʼchaq (Mateo 6:25, 32, 33). ¿Tiquʼn bʼaʼn tuʼn tten qximbʼetz ikju? Tuʼnju mlay bʼant tuʼn tel qiʼn nya bʼaʼn at twitz Txʼotxʼ. Oʼkx Dios jaku tzʼel qʼinte.

«Ex tuʼn kybʼinchanteye aju tzʼaqlxix». A t-xilen jlu qa il tiʼj tuʼn tok tilil quʼn tuʼn t-xi qbʼiʼn qe kawbʼil ex nabʼil in tzaj tqʼoʼn Dios qe. ¿Tiquʼn? Tuʼnju tzul nya bʼaʼn qiʼj qa aqoʼ ma qo kubʼ ximente tiʼ kbʼantel quʼn (Proverbios 16:25). Atzun qa ma chex qbʼiʼn nabʼil in tzaj tqʼoʼn Dios qe, jaku tzalaj quʼn ex tkyaqilju kbʼantel quʼn kʼelel bʼaʼn (Isaías 48:17, 18).

¿Tiquʼn tqʼama Jesús jlu: «Kynimanxe tnejelxix aju tkawbʼil Dios ex tuʼn kybʼinchanteye aju tzʼaqlxix twitz»? Tuʼnju tqʼama qa jaku txi kyqʼoʼn junjun xjal kywiʼ kyiʼj tiʼchaq ex jaku kubʼ kyximen qa jaku ten tbʼanel kyanqʼibʼil  qa ma kambʼet nim pwaq kyuʼn. Atzun junjuntl kbʼajel kykʼuʼj kyiʼj tiʼchaq te junjun qʼij ex mlay tentl ambʼil kyiʼj tuʼn kyjyon tiʼj Tkawbʼil Dios (Mateo 6:19-21, 25-32).

Noqtzun tuʼnj, xi ttziyen Jesús kye qeju in che jyon tiʼj Tkawbʼil Dios qa ktel tkyaqilju at tajbʼen kye ex qa tzul qʼoʼn mas kʼiwlabʼil kye toj ambʼil tzul (Mateo 6:33).

Maske kubʼ kyqʼoʼn t-xnaqʼtzbʼen Jesús Tkawbʼil Dios tnejel toj kyanqʼibʼil ex aju tzʼaqli, mintiʼ ok kykeʼyin tzeʼn kʼelel qʼiʼn nya bʼaʼn in tzaj kyiʼj xjal. Noqtzun tuʼnj, kanet jun kolbʼil kyuʼn. ¿Alkye tten kanet kyuʼn?

Tuʼnju xi kybʼiʼn t-xnaqʼtzbʼen Jesús qe tkawbʼil Dios, mintiʼ tzaj junjun nya bʼaʼn kyiʼj aju tzaj kyiʼj xjal mintiʼ e nimen te Jehová. Ex tuʼnju ok qeʼxix kykʼuʼj qa tzul Tkawbʼil Dios, bʼant tuʼn kyex kywitz nya bʼaʼn e ok weʼ twitz. Ex xi tqʼoʼn Dios nimxix kyipumal tuʼn kukx tikʼx kyuʼn (2 Corintios 4:7-9).

Xi kybʼiʼn okslal te tnejel syent abʼqʼi aju xi tqʼamaʼn Jesús kye: tuʼn kyjyon tnejel tiʼj Tkawbʼil Dios. Xi kypakbʼaʼn tbʼanel tqanil tiʼj Tkawbʼil Dios jatumel in che anqʼintoq (Colosenses 1:23). ¿Ateʼqe xjal in bʼant aqʼuntl lu kyuʼn toj ambʼil jaʼlo?

¡Ateʼqe! Ojtzqiʼn kyuʼn testigos de Jehová qa chʼix tel tiʼn Tkawbʼil Dios tkyaqil nya bʼaʼn. Tuʼntzunju, in nok tilil kyuʼn tuʼn tjapun kywi yol tqʼama Jesús: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mateo 24:14).

¿Tiʼ teya kbʼantel tuʼn aj kyok tbʼiʼna tbʼanel tqanil lu? Bʼaʼn tuʼn tel tkanoʼna kyiʼj xjal e anqʼin toj tnejel syent abʼqʼi toj tnam Berea atz Macedonia. Tej tok kybʼiʼn tbʼanel tqanil tiʼj Tkawbʼil Dios xi tpakbʼaʼn apóstol Pablo kye, tuʼn tkyaqil kykʼuʼj xi kybʼiʼn ex kux kykeʼyin toj «Tuʼjil tyol Dios [...] tuʼn tel kynikʼ tiʼj qa ax tok» aju xi qʼamaʼn kye ex kubʼ kybʼinchaʼn aju el kynikʼ tiʼj (Hechos 17:11, 12).

Ax jlu jaku bʼant tuʼna. Qa ma jyona tnejel tiʼj Tkawbʼil Dios ex aju tzʼaqli, kkanetel kolbʼil tuʼna jaʼlo ex jaku tena toj txubʼtxaj ex mujbʼabʼil toj ambʼil tzul.