In tzaj tqʼamaʼn Xjan Uʼj qa mintiʼ nimen jun anjel te Dios, aju ok qʼoʼn tbʼi te Tajaw il moqa Satanás. Xi tqʼamaʼn anjel lu kye xjal qa mintiʼ toklen Dios tuʼn tkawin kyibʼaj ex qa mas jakutoq che tzalaj kyjunalx. Bʼisbʼajilxix tuʼnju e ok lepeʼ Adán ex Eva tiʼj Tajaw il, ex el kypan kyibʼ tiʼj Dios (Génesis 3:1-6; Apocalipsis 12:9).

Tzaj nim nya bʼaʼn tiʼj Adán ex Eva tuʼnju mintiʼ okx kyqʼon kyibʼ tjaqʼ tkawbʼil Jehová. El qʼiʼn ambʼil kye tuʼn kyanqʼin toj Tbʼanel Najbʼil ex xi kynajsaʼn kychwinqlal te jumajx (Génesis 3:17-19). Ax ikx, tzaj nim nya bʼaʼn kyiʼj kykʼwal tuʼnju bʼant kyuʼn. In tzaj tqʼamaʼn Tyol Dios qa tuʼnju kubʼ tbʼinchaʼn Adán il, «okx il kyxol kykyaqil xjal, ex tuʼnju il tzaj kamik» (Romanos 5:12). Ax ikx o tzaj juntl nya bʼaʼn tuʼn il: «Aju tipumal xjal at tuʼn tbʼinchante mya bʼaʼn tiʼj juntl» (Eclesiastés 8:9). Toj juntl yol, aj kykawin xjal kyibʼaj txqantl, in tzaj nim nya bʼaʼn jaxku tumel.

Ma tzikʼ junlo kyaje mil abʼqʼi tej tanqʼin tnejel aj kawil in yolin Tyol Dios tiʼj, aju Nemrod tbʼi. Mintiʼ nimen aj kawil lu te Dios. Ex atxix toj ambʼil aju ateʼ nim aj kawil in nok kybʼinchaʼn nya bʼaʼn kyiʼj xjal. Tuʼntzunju, ma tzikʼ junlo oxe mil abʼqʼi tkubʼlen ttzʼibʼin aj kawil Salomón jlu: «O wile qe xjal lu in che oqʼ tuʼnju in che yajlanjtz ex mi aʼl jun bʼaʼn tqʼuqbʼante kykʼuʼj; in che bʼaj kʼixbʼisaʼn kyuʼn qe yajlal kye» (Eclesiastés 4:1).

Naʼmx tchʼexpaj kykawbʼil xjal toj ambʼil jaʼlo. In tzaj tqʼamaʼn jun tqanil etz tuʼn Naciones Unidas toj abʼqʼi 2009, qa ateʼ mas xjal in kubʼ kyximen «qa aʼye aj kawil at kypaj kyiʼj nya bʼaʼn in che tzaj».

Kyaj xjal tuʼn tten jun aj kawil mas tbʼanel. Ex atzun jlu o tzaj ttziyen Dios qe.

O kubʼ t-ximen Dios tuʼn tel tiʼn kykawbʼil xjal, ex oʼkx te Tkawbʼil «ktel te jumajx» (Daniel 2:44). Ex atzun Kawbʼil lu in xi kyqanin nim xjal toj kynaʼj Dios (Mateo 6:9, 10). Pero nya a Dios kkawil toj Kawbʼil lu, sino o jaw tjyoʼn jun anjel ul twitz Txʼotxʼ ex ok te xjal. ¿Alkyetzun o jaw tskʼoʼn Dios?