Noq kukx in xi tqʼoʼn ttnam Jehová qe uʼj tiʼj Tyol Dios kye xjal, tuʼntzunju in kubʼ kyximen junjun qa qʼoʼn ambʼil tuʼn tetz kyiʼn copia tiʼj ex tuʼn tjax kyqʼoʼn kyoj junjuntl tembʼil te Internet moqa kyoj redes sociales. Qa in bʼant jlu, mintiʼ in japun toklen aju in tzaj qʼamaʼn tiʼj Tqanil tiʼj alkye tumel tuʼn tajbʼen * qe qtembʼil te Internet ex tuʼn jlu o che tzaj nya bʼaʼn. Atz in tzaj qʼamaʼn qa mi jun xjal at toklen «tuʼn tjax tqʼoʼn tqanil at tilbʼilal twitz, qe uʼj, aju kybʼi junjun kʼaẍjel, qe bʼitz, qe tilbʼilal, qe video ex qe xnaqʼtzbʼil o che kubʼ qʼoʼn toj tembʼil te Internet lu (toj alkyexku tembʼil te Internet, qe tembʼil in che ajbʼen tuʼn t-xi samet tqanil moqa video kye txqantl ex qa kyoj redes sociales)». ¿Tiquʼn il tiʼj tqanil lu?

Tkyaqil tqanil tkubʼ toj qtembʼil te Internet xqʼuqin tuʼn derechos de autor. Aʼyeju o tzʼel kypan kyibʼ tiʼj axix tok ex junjuntl xjal in kubʼ kyqʼoʼn quʼj toj kytembʼil te Internet tuʼn tok kykeʼyin testigos de Jehová ex qe xjal. Pero jaku chʼexpaj qximbʼetz kyuʼn tiʼjju axix tok (Sal. 26:4; Prov. 22:5). Ateʼ xjal in najbʼen tqanil at toj quʼj kyuʼn ex aju logotipo jw.org tiʼj junjun tqanil, tiʼj kʼaẍjel ex kyiʼj aplicación kye yolbʼil ex tableta. Aj in nok xqʼuqit aju derecho de autor ex aju kybʼi junjun kʼaẍjel, jaku che ajbʼen jlu tuʼn ttnam Jehová tuʼn tkolin twitz ley, ex tuʼn miʼn tajbʼentl kyuʼn txqantl (Prov. 27:12). Qa ma txi tqʼoʼn ttnam Jehová ambʼil te jun testigo de Jehová ex qa te alkyexku xjal tuʼn tjax tqʼoʼn qe uʼj, qe audio, qe video, qe tilbʼilal toj juntl tembʼil te Internet ex qa tuʼn tajbʼen logotipo jw.org kyuʼn tiʼj kʼaẍjel, tuʼn jlu bʼalo mlay che onin qe tribunal tiʼj ttnam Jehová tuʼn tel tiʼn ambʼil kye xjal in najbʼen kyuʼn ex kyuʼn empresa.

 Qa nya toj jw.org ẍe kutz qʼiʼn qe uʼj, jaku tzaj nya bʼaʼn tuʼn. Oʼkx te «majen in bʼant taqʼun [...] ex at tnabʼl» o txi tqʼoʼn Jehová toklen tuʼn ttzaj tqʼoʼn xnaqʼtzbʼil qe (Mat. 24:45). Aju «majen» lu in kubʼ tqʼoʼn xnaqʼtzbʼil oʼkx kyoj tembʼil o tzaj qʼoʼn kyoklen, aʼyeju jw.org, tv.pr418.com ex wol.pr418.com. Ax ikx, oʼkx at oxe aplicación kye yolbʼil ex tableta, aʼyetzun jlu: JW Language^®, JW Library^® ex JW Library Sign Language^®. Jaku tzʼok qeʼ qkʼuʼj kyiʼj tembʼil te Internet lu ex kyiʼj aplicación, tuʼnju mintiʼ qe tqanil te kʼaẍjel kyoj ex nya tzʼilsaʼn taʼ tuʼnju tokx tjaqʼ tkawbʼil Satanás. Qa ma kutz qiʼn qe quʼj toj juntl tembʼil te Internet, mlay tzʼok qeʼ qkʼuʼj tiʼj qa mintiʼ o che bʼaj chʼixpuʼn ex tzʼilsaʼn (Sal. 18:26; 19:8).

Ax ikx, qa in jax tqʼoʼn jun xjal qe quʼj kyoj tembʼil te Internet ex jaku txi kyqʼoʼn txqantl kyyol tiʼj, jaku che ok ten qeju o che jaw meltzʼaj tiʼj ttnam Jehová ex qeju in che qʼojin qiʼj, qʼamalte tuʼn miʼn tok qeʼ qkʼuʼj tiʼj ttnam Jehová. Ateʼ junjun erman o che ok ten qʼojel kyukʼil txqantl kyoj tembʼil lu, ex tuʼn jlu o bʼaj kytzʼilsaʼn mas tbʼi Jehová. Mintiʼ o che kubʼ bʼinchaʼn tembʼil te Internet lu tuʼn t-xi qqʼoʼn xnaqʼtzbʼil kye xjal (2 Tim. 2:23-25; 1 Tim. 6:3-5). O tzʼel qnikʼe tij qa ateʼ junjun cuenta kyoj redes sociales ex tembʼil te Internet in najbʼen tbʼi ttnam Jehová kyuʼn, tbʼi Kʼloj Xjal Qʼil Twitz Aqʼuntl ex tbʼi teyele junjun kye. Mi jun erman at toklen toj Kʼloj Xjal Qʼil Twitz Aqʼuntl o kubʼ tbʼinchaʼn jun ttembʼil te Internet ex mintiʼ kycuenta kyoj redes sociales.

Aj t-xi qqʼamaʼn kye xjal tuʼn kyokx toj qtembʼil te Internet jw.org, in qo onin tuʼn t-xi pakbʼet «tqanil bʼaʼn» (Mat. 24:14). Aʼyeju onbʼil o che bʼaj bʼinchaʼn tuʼn qpakbʼan, kukx in che bʼaj bʼinchaʼn mas. Ex qajbʼil tuʼn tajbʼen tojxix tumel kyuʼn kykyaqilx. Tuʼntzunju, ik tzeʼn in tzaj tqʼamaʼn Tqanil tiʼj alkye tumel tuʼn tajbʼen qtembʼil te Internet, qʼon ambʼil tuʼn t-xi qsamaʼn toj jun correo ex qa tuʼn t-xi qsamaʼn jun enlace te jun xjal tuʼn tkutz tiʼn qe quʼj toj jw.org. Aj in xi qyekʼin qe qtembʼil te Internet o tzaj qʼoʼn kyoklen kye xjal tuʼn tel kynikʼ tiʼj axix tok, in xi kykʼamoʼn xnaqʼtzbʼil o bʼant tuʼn «majen in bʼant taqʼun [...] ex at tnabʼl», aju in tzaj qʼonte axix tok xnaqʼtzbʼil tiʼj Tyol Dios.