1. ¿Alkye tten xi tqʼoʼn Jehová qʼuqbʼil kykʼuʼj xjal tej ttzaj nya bʼaʼn toj Edén?

ATXIX tej kykubʼ tzʼaq xjal toj il, o kubʼ tyekʼin Jehová qa a aju Dios in tzaj qʼonte qʼuqbʼil kykʼuʼj txqantl. Tej ttzaj nya bʼaʼn toj Edén, tqʼama jun yol tuʼn tjapun twiʼ, ex ajtoq tel nikʼbʼaj tiʼj, kxel tqoʼn qʼuqbʼil kykʼuʼj tyajil Adán. In kanet yol lu toj Génesis 3:15 ex in tzaj ttziyen qa aj tbʼet ambʼil, kbʼel t-xitin Satanás ex tkyaqilju nya bʼaʼn in bʼant tuʼn (1 Juan 3:8; Apoc. 12:9).

2. ¿Alkye tten xi tqʼuqbʼaʼn Jehová tkʼuʼj Noé?

² Anqʼin Noé kyxol xjal mintiʼ in che kʼulin te Jehová ex oʼkx te kyukʼil qe toj tja in che ajbʼentoq te. Tej tok tkeʼyin qa attoq bʼiybʼil ex in noktoq bʼinchaʼn nya bʼaʼn kyiʼj xjal tuʼn yaẍbʼil, jakutoq tzaj bʼaj tkʼuʼj Noé tuʼn jlu (Gén. 6:4, 5, 11;  Jud. 6). Noqtzun tuʼnj, xi tqʼoʼn Jehová tipumal Noé tuʼn kukx tajbʼen te (Gén. 6:9). Xi tqʼamaʼn Jehová te Noé qa kbʼeltoq tnajsaʼn qe xjal nya bʼaʼn ex xi tqʼamaʼn tiʼ tuʼn tbʼant tuʼn tuʼntzun tklet kyukʼil toj tja (Gén. 6:13-18). Qʼuqli qkʼuʼj tiʼj qa onin jlu tiʼj Noé.

3. ¿Alkye tten xi tqʼuqbʼaʼn Jehová tkʼuʼj Josué? (Qʼonka twitza tiʼj tnejel tilbʼilal).

³ Tej tikʼ junjuntl abʼqʼi, tzaj tkʼamoʼn Josué aqʼuntl tuʼn kyokx tiʼn qe aj Israel toj Txʼotxʼ Tziyen maj kye. Tuʼn tbʼant jlu tuʼn, iltoq tiʼj tuʼn tkubʼ kyiʼj aj qʼoj nim kyipumal in che anqʼin toj txʼotxʼ aju. El tnikʼ Jehová tiʼj qa tzaj bʼaj tkʼuʼj Josué. Tuʼntzunju, xi tsamaʼn Moisés tuʼntzun tchewix tkʼuʼj. Xi tqʼamaʼn jlu te: «Qʼmanxa te Josué alkye tuʼn tbʼant tuʼn, kyuwsanxa tkʼuʼj ex qʼonxa tipun, porke ate Josué kbʼel nej kywitz qe xjal, ex tuʼn ktzyetel txʼotxʼ aju kxel tkeʼyina, tuʼn tok te kyetzbʼil» (Deut. 3:28). Ex ax Jehová xi qʼuqbʼante tkʼuʼj Josué kyukʼil qe yol lu: «Aqine in chin qʼmante teya tuʼn tten tipuna ex kyuwx tkʼuʼja. Miʼn xobʼa ex miʼn bʼaj tkʼuʼja, porke aqine Tmana aju Tdiosa chin tele tukʼila noq jatumchaq kxeʼla» (Jos. 1:1, 9).

4, 5. a) ¿Alkye qʼuqbʼil kykʼuʼj tmajen Jehová xi tqʼoʼn toj ambʼil ojtxe? b) ¿Alkye tten xi tqʼoʼn Jehová qʼuqbʼil tkʼuʼj Tkʼwaʼl?

⁴ Nya oʼkx xi tqʼuqbʼaʼn Jehová kykʼuʼj junjun tmajen, ax ikx xi tqʼoʼn qʼuqbʼil kykʼuʼj kykyaqilx. Jun techel, tuʼnju ojtzqintoq tuʼn qa kyajtoq aj Judiy qʼuqbʼil kykʼuʼj aj kypon qʼiʼn toj Babilonia, xi ttziyen jlu kye: «Miʼn che xobʼe porke lu qine atine kyukʼile, miʼn bʼaj kykʼuʼje, aqine Kydiose. Kxel nqʼoʼne kyipumale ex chin onile kyiʼje, tzyuʼn qeye wuʼne tuʼn nbʼanqʼabʼe tuʼnju tzʼaqlxix qine» (Is. 41:10). Ax qʼuqbʼil kykʼuʼj qeju tnejel okslal ten, ex ax qʼuqbʼil qkʼuʼj at toj ambʼil jaʼlo (kjawil uʼjit 2 Corintios 1:3, 4).

⁵ Ax ikx xi tqʼoʼn Jehová qʼuqbʼil tkʼuʼj Tkʼwaʼl. Tej tjaw aʼ twiʼ, ok tbʼiʼn jun tqʼajqʼajel wibʼaj tzajni toj kyaʼj: «Atzun Nkʼwaʼle jlu kʼujlaʼnxix wuʼne, in chin tzalaje tiʼj» (Mat. 3:17). Qʼuqli qkʼuʼj tiʼj qa e onin yol lu tiʼj Jesús toj tpakbʼabʼil.

6. ¿Alkye tten in nonin txʼolbʼabʼil kyiʼj talento qiʼj?

⁶ El tkanoʼn Jesús tiʼj Ttat. Qo xnaqʼtzan tiʼj jun techel. Tojju txʼolbʼabʼil kyiʼj talento, xi tqʼuqbʼaʼn kykʼuʼj t-xnaqʼtzbʼen tuʼn kukx kyajbʼen te Jehová. Toj txʼolbʼabʼil lu, ok tqʼoʼn patrón kyoklen majen kukx e aqʼunan tukʼil tej tqʼama jlu: «Aya majen bʼaʼn ex ma japunxix tuʼna; chʼin xi nqʼoʼne teya, ex ma tzʼaqʼnanxixa tiʼj; jaʼlo nimxix kxel nqʼoʼne teya tuʼntzun ttzalaja junx wukʼile» (Mat. 25:21, 23).

7. a) ¿Tzeʼn onin Jesús kyiʼj t-apóstol? b) ¿Alkye tten xi tqʼuqbʼaʼn Jesús tkʼuʼj Pedro?

⁷ Kukx onin Jesús kyiʼj t-apóstol, axpe ikx tej kyel txalpaj. Jun techel, kukxtoq in che ok ten yolil tiʼj alkye jun kye mas nim toklen. Noqtzun tuʼnj, xi tnaʼn Jesús kye tukʼil pasens qa iltoq tiʼj tuʼn tkubʼ kyin kyibʼ ex tuʼn kyajbʼen te majen kyxolx ex nya ik tzeʼn jun patrón (Luc. 22:24-26). Atzunte Pedro, nim maj tzaj tbʼis Jesús tuʼn (Mat. 16:21-23; 26:31-35, 75). Pero mintiʼ el ikʼun Pedro tuʼn Jesús, sino xi tqʼuqbʼaʼn tkʼuʼj, axpe ikx xi tqʼamaʼn te tuʼn t-xi tqʼuqbʼaʼn kykʼuʼj erman (Juan 21:16).

8. ¿Tiʼ xi tqʼamaʼn Ezequías kye nejenel kye soldad ex kye kykyaqil xjal tuʼntzun t-xi tqʼuqbʼaʼn kykʼuʼj?

⁸ Tej naʼmxtoq tul Jesús tzalu twitz Txʼotxʼ ex tuʼn tkubʼ tqʼoʼn techel tzʼaqlixix kywitz txqantl, ya otoq tzʼel kynikʼ tmajen Dios tiʼj qa nim toklen tuʼn t-xi qʼuqbʼet kykʼuʼj txqantl. Qbʼinx aju bʼant tuʼn aj kawil Ezequías. Tej kyok ten aj Asiria xobʼsal kye aj Judiy, ok tchmoʼn Ezequías qe nejenel kyxol soldad ex kykyaqil xjal, ex xi tqʼuqbʼaʼn kykʼuʼj (kjawil uʼjit 2 Crónicas 32:6-8).

9. ¿Tiʼ xnaqʼtzbʼil in nel qiʼn tiʼj Job tiʼjju tuʼn t-xi qʼuqbʼet kykʼuʼj txqantl?

⁹ Atzun jaʼlo qo yolin tiʼjju ikʼ tiʼj Job. Nimxix in bʼisintoq, pero mintiʼ ‹ok qʼuqbʼaʼn tkʼuʼj› kyuʼn xjal e pon tukʼil, sino oʼkx e ok ten qʼamal yol te «kʼixbʼisabʼl» te. Maske ikju, ax Job xi xnaqʼtzante kye tuʼn t-xi kyqʼuqbʼaʼn kykʼuʼj txqantl. Xi tqʼamaʼn kye qa noqwit aʼye in tzaj nya bʼaʼn kyiʼj, xiwtlo tqʼuqbʼaʼn kykʼuʼj tuʼntzun tkubʼ kynaʼn bʼaʼn (Job 16:1-5). Tej tbʼaj tkyaqil jlu, a Elihú ex Jehová xi qʼuqbʼante tkʼuʼj Job (Job 33:24, 25; 36:1, 11; 42:7, 10).

10, 11. a) ¿Tiquʼn iltoq tiʼj tuʼn t-xi qʼuqbʼet tkʼuʼj tmeʼjel Jefté? b) ¿Alkye junjuntl erman bʼaʼn tuʼn t-xi qʼuqbʼet kykʼuʼj?

¹⁰ Ax ikx te tmeʼjel Jefté, tajtoq tuʼn t-xi qʼuqbʼet tkʼuʼj. Xi jwes lu qʼojil kyiʼj aj Amón. Qa matoq tzʼonin Jehová tiʼj tuʼn tkambʼan kyiʼj aj qʼoj, xi ttziyen te qa kxeltoq tqʼoʼn tnejel xjal kʼeletz kʼamolte aj tmeltzʼaj toj qʼoj, tuʼntzun tajbʼen toj ja xbʼalun toj tkyaqil tanqʼibʼil. Tej tmeltzʼaj Jefté, tnejel etz tmeʼjel kʼamolte tuʼntzun ttzalaj junx tukʼil. Kubʼ tnaʼn Jefté nim bʼis tuʼnju ya mintiʼtoq mas tkʼwaʼl. Noqtzun tuʼnj, japun twi tyol ex xi t-samaʼn tmeʼjel toj tnam Siló tuʼntzun tajbʼen toj ja xbʼalun toj tkyaqil tanqʼibʼil (Juec. 11:30-35).

¹¹ Kwest ela jlu toj twitz Jefté, pero mas kwest ela toj twitz tmeʼjel. Maske ikju, kubʼ t-ximen tuʼn tkubʼ tbʼinchaʼn ik tzeʼn otoq bʼaj t-ximen ttat (Juec. 11:36, 37). A t-xilen jlu qa mlaytoq kubʼ mojeʼ nix tuʼn tul tal, ex tuʼnju ya mintiʼ mas tkʼwaʼl Jefté, mintiʼ juntl jakutoq kyaj qʼinte t-apellid qe toj tja nix aju kytxʼotxʼ. Ax tok, tajtoq qʼuqbʼil tkʼuʼj ex onbʼil. In tzaj tqʼamaʼn Tyol Dios jlu: «Kyjaʼtzun kyaj ten jun kostumr kyxol aj Israel: Kyaje qʼij in cheʼx qe txin oqʼel tiʼj tmeʼjel Jefté tkyaqil abʼqʼi» (Juec. 11:39, 40). Toj ambʼil jaʼlo, aqeju erman naʼmx kykubʼ mojeʼ ex tok kywiʼ tiʼj aqʼuntl «te Qajaw», ax ikx kye bʼaʼn tuʼn t-xi qʼuqbʼet kykʼuʼj ex tuʼn t-xi qʼamet kye qa tbʼanel kyaqʼun in bʼant (1 Cor. 7:32-35).

12, 13. ¿Alkye tten xi tqʼuqbʼaʼn Pedro kykʼuʼj erman?

¹² Tojju qʼonikʼen tej naʼmxtoq tkyim Jesús, xi tqʼamaʼn jlu te apóstol Pedro: «Simón, Simón, lu ma che qaninjtze tuʼn Satanás tuʼn kyoke tuj sarand ik tzaʼn triw; pero ma chin kubʼsane twitz Dios tiʼja tuʼn miʼn tkubʼ numja tuj tokslabʼla; oktzun tjaw twabʼan tibʼa juntl maj, kyuwsama qe termaniya» (Luc. 22:31, 32).

¹³ Ok Pedro te jun tbʼanel onil kye okslal toj tnejel syent abʼqʼi (Gál. 2:9). Tej mintiʼ tzaj xobʼ toj ninqʼij te Pentecostés ex kyoj junjuntl ambʼil, onin kyiʼj txqantl okslal tuʼn tten qʼuqbʼil kykʼuʼj. Tej chʼixtoq tkubʼ bʼaj tanqʼibʼil ex tajbʼebʼil te Jehová, xi ttzʼibʼin jlu  kye: «Ma txi ntzʼibʼane tuʼn t-xi nqʼoʼne kynabʼle ex tuʼn t-xi nchikʼbʼane kyeye qa atzun t-xtalbʼil Dios jlu axix tok. Ax che tenkje tuj t-xtalbʼil» (1 Ped. 5:12). O txi qʼuqbʼaʼn kykʼuʼj okslal kyoj nim syent abʼqʼi kyuʼn uʼj kubʼ ttzʼibʼin Pedro. Ex kukx qaj tuʼn ttzaj qʼuqbʼaʼn qkʼuʼj toj ambʼil jaʼlo akux in japun kywiʼ ttziybʼil Jehová (2 Ped. 3:13).

14, 15. ¿Tiquʼn o tzʼok qʼuqbʼaʼn kykʼuʼj okslal kyuʼn uʼj kubʼ ttzʼibʼin apóstol Juan toj nim syent abʼqʼi?

¹⁴ Ax ikx ok apóstol Juan te tbʼanel onil kyiʼj okslal toj tnejel syent abʼqʼi. Aju tbʼanel txʼolbʼabʼil kubʼ ttzʼibʼin tiʼj tpakbʼabʼil Jesús, o tzʼonin kyiʼj okslal toj nim syent abʼqʼi ex kukx in tzaj tqʼuqbʼaʼn qkʼuʼj toj ambʼil jaʼlo. Jun techel, tej tkubʼ ttzʼibʼin uʼj tiʼj tanqʼibʼil Jesús, oʼkx toj uʼj lu in tzaj tqʼamaʼn qa tuʼnju kʼujlabʼil in ten kyxol okslal, in nel nikʼbʼaj kyiʼj qa ax toj t-xnaqʼtzbʼen Jesús qe (kjawil uʼjit Juan 13:34, 35).

¹⁵ Atzun kyoj juntl oxe uʼj kubʼ ttzʼibʼin, in che kanet tbʼanel xnaqʼtzbʼil quʼn kyoj. Jun techel, aj in kubʼ qnaʼn bʼis kyuʼn qe tiʼchaq in qo el txalpaj tiʼj, in tzaj qʼuqbʼaʼn qkʼuʼj aj tjaw quʼjin qa tuʼn «tchkʼel Jesucrist aju Tkʼwaʼl Dios nneʼl ttxʼjoʼn tkyaqilju qil» (1 Juan 1:7). Ex qatzun kukx in tzaj tqʼamaʼn qximbʼetz qa kukx at qil, in kubʼ qnaʼn bʼaʼn aj tjaw quʼjin qa «ate Dios maʼ toklen twitz ju qanmi» (1 Juan 3:20). Ax ikx, oʼkx Juan kubʼ tzʼibʼinte qa ate «Dios at tkʼujlalil» (1 Juan 4:8, 16). Ex toj tkabʼin ex toxin uʼj kubʼ ttzʼibʼin, xi tqʼamaʼn tbʼanel yol kye qeju okslal kukx in che ok «lpeʼ tiʼj ju yol axix tok» (2 Juan 4; 3 Juan 3, 4).

16, 17. ¿Alkye tten xi tqʼuqbʼaʼn Pablo kykʼuʼj qeju tnejel okslal?

¹⁶ Bʼalo mas xi qʼuqbʼaʼn kykʼuʼj okslal  tuʼn apóstol Pablo. Tej tzaj tzyet axix tok okslabʼil, bʼalo chʼixme kykyaqil apóstol e kyaj ten atz Jerusalén, jatumel attoq kʼloj xjal qʼil twitz aqʼuntl (Hech. 8:14; 15:2). E yolin okslal te Judea tiʼj Cristo kyukʼil qe xjal lu, maske otoq che ten toj kyokslabʼil aj Judiy, pero nimen kyuʼn qa oʼkx jun Dios at. Atzunte xewbʼaj xjan onin tiʼj Pablo tuʼn t-xi pakbʼal kye xjal tzajniqe kyiʼj kyyajil xjal te tnam Grecia ex Roma, aqeju in che kʼulintoq kywitz nim dios (Gál. 2:7-9; 1 Tim. 2:7).

¹⁷ Bʼaj tbʼetin Pablo matij tnam, aju Turquía tbʼi toj ambʼil jaʼlo. Ax ikx bʼaj tbʼetin tnam Italia ex Grecia ex e ten kʼloj okslal tuʼn, aqeju nya aj Judiy. Kyajtoq akʼaj okslal lu qʼuqbʼil kykʼuʼj tuʼnju in che eltoq ikʼun kyuʼn kyex kyxjalil (1 Tes. 2:14). Tojju uʼj xi ttzʼibʼin te kʼloj okslal tzmatoq in xi tzyet toj tnam Tesalónica toj abʼqʼi 50, tqʼama jlu kye erman: «Kukx in xi qqʼoʼne chjonte te Dios kyiʼje kykyaqile, in che tzaj qnaʼne tuj qnaʼj Diose. Kukx in che tzaj qnaʼne twitz Qman Dios, in che tzaj qnaʼne tzaʼn tten in che aqʼnane tuʼnju at kyokslabʼle ex tuʼnju at kykʼujlalile, ex at kypasense tuʼn tikʼx kyuʼne» (1 Tes. 1:2, 3). Nya oʼkxju, ax ikx xi tqʼoʼn kawbʼil lu kye: «Kyqʼom kynabʼle kyxolxe ex kykyuwsam kynabʼle kyxolxe» (1 Tes. 5:11).

18. ¿Alkye tten xi qʼuqbʼaʼn tkʼuʼj Felipe tuʼn kʼloj xjal qʼil twitz aqʼuntl?

¹⁸ Ajbʼen kʼloj xjal qʼil twitz aqʼuntl tuʼn Jehová tuʼntzun t-xi qʼuqbʼet kykʼuʼj okslal toj tnejel syent abʼqʼi, kyxol jlu ateʼ qeju in che kubʼ nej kyxol okslal. Tej tyolin Felipe tiʼj Jesús kye xjal te Samaria, xi kyqʼoʼn kʼloj xjal qʼil twitz aqʼuntl tkyaqil onbʼil te tej t-xi kysamaʼn kabʼe erman ateʼ kyxol. A Pedro ex Juan i ex samaʼn tuʼntzun t-xi kyqʼanin te Jehová tuʼn ttzaj tqʼoʼn xewbʼaj xjan kye akʼaj okslal (Hech. 8:5, 14-17). Nimlo onin jlu tiʼj Felipe ex kyiʼj qeju e ok te okslal.

19. ¿Alkye tten e onin uʼj xi ttzʼibʼin kʼloj xjal qʼil twitz aqʼuntl kyiʼj tnejel okslal?

¹⁹ Tej tikʼ mas ambʼil, xi qanin te kʼloj xjal qʼil twitz aqʼuntl qa iltoq tiʼj tuʼn kybʼaj circuncidarit qe okslal nya aj Judiy ik tzeʼn in tzaj tqʼamaʼntoq Tley Moisés (Hech. 15:1, 2). Xi kyqanin kʼloj xjal qʼil twitz aqʼuntl xewbʼaj xjan te Jehová, e ok ten ximel tiʼjju in tzaj tqʼamaʼn Xjan Uʼj ex kubʼ kyximen qa ya nya il tiʼj tuʼn kybʼaj circuncidarit. Tuʼn tok kybʼiʼn erman aju otoq kubʼ kyximen, kubʼ kytzʼibʼin uʼj ex xi kysamaʼn qe erman tuʼn t-xi kyiʼn qe uʼj tuʼntzun kypon kyxol kʼloj okslal. Tej tjaw kyuʼjin okslal, «e jaw tzalajxix tuʼnju qʼuqbʼabʼl kykʼuʼj» (Hech. 15:27-32).

20. a) ¿Alkye tten in tzaj tqʼuqbʼaʼn Kʼloj Xjal Qʼil Twitz Aqʼuntl kykʼuʼj kykyaqil erman twitz tkyaqil Txʼotxʼ? b) ¿Tiʼ qo xnaqʼtzal tiʼj toj juntl xnaqʼtzbʼil?

²⁰ Toj ambʼil jaʼlo, in xi tqʼuqbʼaʼn Kʼloj Xjal Qʼil Twitz Aqʼuntl kye Testigos de Jehová kykʼuʼj qeju in che ajbʼen toj Betel, qeju in che ajbʼen toj tkyaqil ambʼil te Jehová ex qeju erman ateʼ twitz tkyaqil Txʼotxʼ. Ik tzeʼn toj tnejel syent abʼqʼi, qkyaqilx in qo jaw tzalaj aj ttzaj kyqʼuqbʼaʼn qkʼuʼj. Ex toj 2015 etz uʼj Jehová desea que vuelva tuʼn Kʼloj Xjal Qʼil Twitz Aqʼuntl tuʼntzun tonin kyiʼj kykyaqil xjal tuʼn kymeltzʼaj toj axix tok. Pero, ¿oʼkxpe qeju erman qʼil twitz aqʼuntl il tiʼj tuʼn tel kykanoʼn tiʼj Jehová ex tuʼn t-xi kyqʼuqbʼaʼn kykʼuʼj txqantl? Qo xnaqʼtzal tiʼj jlu toj juntl xnaqʼtzbʼil.