1. ¿Tiʼ kyaj tqʼamaʼn Isaías tiʼj Jesús ex tiquʼn in tzaj tqʼuqbʼaʼn jlu qkʼuʼj?

KYAJ tqʼamaʼn Isaías jlu tiʼj Jesús: «Mlay che ok xjal tuj xjel tuʼn noq tuʼnju ok tkeʼyinte alkye kyten xjal, ex mlay bʼant kyiʼj xjal noq tuʼnju in tbʼiʼn. Tuj tumelxix kxel tbʼinchaʼn kyiʼj qe xjal mintiʼ kyipun» (Is. 11:3, 4). In tzaj kyqʼuqbʼaʼn yol lu qkʼuʼj. ¿Tiquʼn? Tuʼnju in qo anqʼin kyxol xjal at ikʼbʼil toj kyanmi. Qkyaqilx qaj tuʼn tpon ambʼil tuʼn qok toj xjel tuʼn Jesús, tuʼnju a Jwes tzʼaqli ex mlayx tzʼok tqʼoʼn twitz tiʼj tzeʼn che keʼyin xjal.

2. ¿Alkye kawbʼil kyaj tqʼoʼn Jesús ex tiʼ qo xnaqʼtzal tiʼj toj xnaqʼtzbʼil lu?

² Tkyaqil qʼij in kubʼ qximen junjun tiʼchaq kyiʼj txqantl. Pero tuʼnju aj il qoʼ, mlay bʼant tuʼn tten qximbʼetz tzʼaqli kyiʼj txqantl ik tzeʼn te Jesús. In kubʼ qximen junjun tiʼ noq tuʼnju in nok qkeʼyin. Tuʼntzunju, tej tten Jesús tzalu twitz Txʼotxʼ kyaj tqʼoʼn kawbʼil lu qe: «Miʼn che yoline mya bʼaʼn tiʼj juntl noq tuʼnju nnoʼk kykeʼyine, pero che ximane tiʼj tkyaqil tuj tumelxix» (Juan 7:24). Ik tzeʼn in nel qnikʼ tiʼj, taj Jesús tuʼn tel qkanoʼn techel kyaj tqʼoʼn ex tuʼn miʼn qok ten naj yolil noq tuʼnju in nok qkeʼyin. Toj xnaqʼtzbʼil lu, kʼelel qnikʼ tiʼj oxe tiʼchaq at toklen tukʼilju in kubʼ qximen: aju kyyajil xjal moqa kytnam, aju pwaq ex aju kyabʼqʼi. Aj qyolin tiʼj junjun tiʼchaq,  kʼelel qnikʼ tiʼj tzeʼn jaku tzʼel qkanoʼn techel kyaj tqʼoʼn Jesús.

3, 4. a) ¿Tiquʼn chʼexpaj t-ximbʼetz apóstol Pedro attoq tnejel kyiʼj xjal nya aj Judiy? (Qʼonka twitza tiʼj tnejel tilbʼilal). b) ¿Alkye akʼaj tqanil xi tqʼamaʼn Jehová te Pedro?

³ Ximane tiʼj tkyaqilju kubʼ t-ximen apóstol Pedro tej t-xi qʼamaʼn te tuʼn t-xiʼ toj tnam Cesarea tuʼntzun tpon tja jun xjal nya aj Judiy, aju Cornelio tbʼi (Hech. 10:17-29). Ik tzeʼn qe txqantl aj Judiy, jaw chʼiysaʼn Pedro tuʼn tkubʼ t-ximen qa tzʼil qeju xjal nya aj Judiy. Pero bʼaj junjun tiʼchaq toj tanqʼibʼil ex tuʼn jlu chʼexpaj t-ximbʼetz. Jun techel, tzaj tyekʼin Dios jun witzikʼ te (Hech. 10:9-16). Toj witzikʼ lu, ok tqʼoʼn twitz tiʼj jun tiʼ ik tzeʼn jun xbʼalun nojni kyuʼn txkup tzʼil akux in bʼiʼn tiʼj jun tqʼajqʼajel wibʼaj in tzaj toj kyaʼj, ex xi tqʼamaʼn te tuʼn tkubʼ tbʼyoʼn qe txkup ex tuʼn t-xi twaʼn, pero mintiʼ bʼant tuʼn. Tej mintiʼ bʼant tuʼn, tzaj qʼamaʼn juntl maj te: «Aju txʼjoʼmaj tuʼn Dios, miʼn tzʼok tqʼoʼna te mya bʼaʼn». Tej tkubʼ bʼaj witzikʼ, mintiʼ el tnikʼ Pedro tiʼjju ok tbʼiʼn. Toj ambʼil aju, pon tsamaʼn Cornelio junjun xjal qʼol tqanil ex tuʼn tonbʼil xewbʼaj xjan xiʼ Pedro tja Cornelio.

⁴ Mintiʼ in che okx aj Judiy toj kyja xjal nya aj Judiy. Tuʼntzunju, noqwit xi tqʼoʼn Pedro ambʼil teju in nok tkeʼyin, mintiʼwtlo xiʼ tja Cornelio. Noqtzun tuʼnj, ¿tiquʼn bʼant jlu tuʼn? Bʼant jlu tuʼn noq tuʼnju tzaj yekʼin te tojju witzikʼ ex tuʼn tonbʼil xewbʼaj xjan. Tej tbʼaj tbʼiʼn Pedro aju tqʼama Cornelio, tzaj qʼaqʼin tkʼuʼj ex tqʼama jlu tuʼn tonbʼil Jehová: «Axix tok ma tzʼel nnikʼe tiʼj, mintiʼ in tkeʼyin Dios aju kyxilen xjal, noq oʼkx in tzalaj kyiʼj xjal at tchi Dios kye tuj tkyaqil nasyon, ex in kybʼinchaʼn aju tzʼaqlxix» (Hech. 10:34, 35). Aju akʼaj axix tok el tnikʼ Pedro tiʼj, kʼoniltoq kyiʼj txqantl okslal. ¿Toj alkye tten kʼonil kyiʼj?

5. a) ¿Tiʼ taj Jehová tuʼn tel qnikʼ tiʼj? b) Maske ojtzqiʼn quʼn qa mintiʼ in nok tkeʼyin Dios kyyajil xjal, ¿tiʼ jaku bʼaj qiʼj?

⁵ Ajbʼen Pedro tuʼn Jehová tuʼntzun tonin kyiʼj txqantl okslal tuʼn tel kynikʼ tiʼj qa mintiʼ in nok tqʼoʼn twitz tiʼj kyxilen xjal. Mintiʼ in nok tkeʼyin kytnam, kyyajil ex aju kyyol. Tbʼanel in che ela xjal toj twitz, aʼyeju bʼaʼn che bʼin te ex in kubʼ kybʼinchaʼn aju bʼaʼn (Gál. 3:26-28; Apoc. 7:9, 10). Qʼuqli qkʼuʼj tiʼj qa ax tok jlu ex mintiʼ in nok qqʼoʼn qwitz tiʼj kyyajil xjal. Pero qa atz o qo jaw chʼiy toj jun ja xjal ikʼun kywitz txqantl kyuʼn, bʼalo tuʼn jlu at chʼin ikʼbʼil tkuʼx toj qanmi. Qa ma tzaj qnaʼn, onin Pedro kyiʼj txqantl tuʼn tel kynikʼ tiʼj qa mintiʼ in nok tkeʼyin Dios kyxilen xjal, pero tej tikʼ chʼintl ambʼil kubʼ tyekʼin qa atxtoq chʼin ikʼbʼil toj tanmi (Gál. 2:11-14). Qa ikju, ¿tzeʼn jaku txi qbʼiʼn aju kawbʼil kyaj tqʼoʼn Jesús tuʼntzun miʼn qok ten yolil noq tuʼnju in nok qkeʼyin?

6. a) Qa atx chʼin ikʼbʼil toj qanmi, ¿tiʼ kʼonil qiʼj tuʼn tjatz qiʼn? b) ¿Tiʼ el nikʼbʼaj tiʼj tojju tqanil xi tsamaʼn jun erman?

⁶ Tuʼn tel qnikʼ tiʼj qa atx chʼin ikʼbʼil toj qanmi, bʼaʼn tuʼn tok qqʼoʼn toj malbʼil aju qmod tukʼilju in nel qnikʼ tiʼj toj Tyol Dios (Sal. 119:105). Ax ikx jaku txi qqanin te jun qamiw tuʼn ttzaj tqʼamaʼn qe qa o tzʼok tqʼoʼn twitz tiʼj qa atx chʼin ikʼbʼil toj qanmi (Gál. 2:11, 14). Bʼalo atx ikʼbʼil toj qanmi, noqtzun tuʼnj mintiʼ in nel qnikʼ tiʼj. Qo yolin tiʼjju bʼaj tiʼj jun ermano at toklen xi tsamaʼn jun tqanil toj ninja qʼil twitz aqʼuntl tiʼj jun mejebʼleʼn in najbʼen toj tkyaqil ambʼil. Atz tzajni chmilbʼaj kyxol jun tal kʼloj kyyajil xjal mintiʼtoq in nok qʼoʼn kyoklen kyuʼn  txqantl. Aju erman xi samante tqanil, mintiʼ el tnikʼ tiʼj qa atxtoq chʼin ikʼbʼil toj tanmi tiʼjju kʼloj kyyajil xjal aju. Ax tok, xi ttzʼibʼin nim tbʼanel tiʼchaq tiʼj chmilbʼaj, pero tej tkubʼ bʼaj tqanil tqʼama jlu: «Maske atz tzajni erman kyxol [kyyajil xjal lu], in nonin tmod ex tanqʼibʼil kyiʼj [kyyajil xjal lu] tuʼn tel kynikʼ tiʼj qa nya a t-xilen jlu qa tzʼil qe moqa nya nim kyoklen, ik tzeʼn qe txqantl xjal te tnam aju». ¿Ma tzʼel qnikʼ tiʼj? Noq alkyexku qoklen at toj ttnam Jehová, bʼaʼn tuʼn tok tilil quʼn tuʼn tel qnikʼ tiʼj tiʼ tkuʼx toj qanmi ex tuʼn ttzaj qkʼamoʼn onbʼil in tzaj kyqʼoʼn qeju in nel kynikʼ tiʼj qa atx chʼintl ikʼbʼil toj qanmi. ¿Tiʼ mas jaku bʼant quʼn?

7. ¿Tzeʼn jaku kubʼ qyekʼin qa at qkʼujlabʼil kyiʼj txqantl?

⁷ Qa at jun tbʼanel qanmi, ktel nim qkʼujlabʼil kyiʼj txqantl ex mlay che el qikʼen (2 Cor. 6:11-13). ¿Naqʼlipe qoʼ tuʼn qten oʼkx kyukʼil qeju in che yolin toj qyol, moqa junx qtnam kyukʼil? Qa ikju, bʼaʼn tuʼn tok tilil quʼn tuʼn qten kyukʼil junjuntl erman. ¿Jakupe txi qqʼoʼn txokbʼil kye tuʼn kyex pakbʼal qukʼil, tuʼn kypon waʼl jun tiʼ qja moqa tuʼn qten jun rat kyukʼil txqantl erman? (Hech. 16:14, 15). Qa ma bʼant jlu quʼn, ktel nim kʼujlabʼil toj qanmi ex mlay tentl ambʼil te ikʼbʼil. Ax ikx jaku ten nya bʼaʼn qximbʼetz kyiʼj txqantl noq kyuʼn junjun tiʼchaq nya nimxix kyoklen, ik tzeʼn pwaq.

8. Ik tzeʼn in tzaj tqʼamaʼn Levítico 19:15, ¿alkye juntl tiʼ jaku chʼexpaj qximbʼetz tuʼn kyiʼj txqantl?

⁸ At juntl tiʼ jaku chʼexpaj qximbʼetz tuʼn kyiʼj txqantl, aju pwaq. Tiʼj jlu in yolin Levítico 19:15 aj in tzaj tqʼamaʼn jlu: «Miʼn txi kybʼinchaʼne tiʼj xtis mya tuj tumel: Qa at til xjal, mya noq tuʼnju mebʼa xjal miʼn kubʼ t-sentens kyuʼne, ax ikx mya noq tuʼnju maʼ toklen xjal miʼn kubʼ t-sentens kyuʼne qa at til, noq oʼkx tuj tumel tuʼn kykawine kyibʼaj kykyaqil». Qa at moqa mintiʼ tpwaq jun xjal, ¿tiquʼn jaku ten qximbʼetz nya toj tumel tiʼj?

9. ¿Alkyeqe yol bʼisbʼajil kubʼ ttzʼibʼin Salomón ex tiʼ xnaqʼtzbʼil jaku tzʼel qiʼn tiʼj?

⁹ Tuʼn tonbʼil xewbʼaj xjan kubʼ ttzʼibʼin Salomón aju in bʼant kyuʼn xjal: «Aju xjal mebʼa nneʼl ikʼun kyuʼnx qe tamiw; atzunju xjal qʼinun nim tamiw at» (Prov. 14:20). In bʼant jlu kyuʼn tuʼnju aj il qe. ¿Tiʼ xnaqʼtzbʼil in tzaj tqʼoʼn jlu qe? Qa mintiʼ ma tzʼok qxqʼuqin qibʼ, oʼkx jaku qo jyon qamiwbʼil kyukʼil qeju erman at kypwaq ex jaku tzʼel qpan qibʼ kyiʼj qeju mintiʼxix kypwaq. ¿Tiquʼn jaku tzaj nya bʼaʼn qiʼj qa ma tzʼok qqʼoʼn kyoklen txqantl noq tuʼnju at nim tiʼchaq kye?

10. ¿Alkye nya bʼaʼn yolin Santiago tiʼj?

¹⁰ Qa ma qo ok ten yolin kyiʼj txqantl tuʼn tpaj pwaq, jaku ten pabʼil tuʼn jlu toj kʼloj okslal. Toj tnejel syent abʼqʼi tqʼama Santiago qa attoq pabʼil kyxol junjun kʼloj okslal tuʼn nya bʼaʼn lu (kjawil uʼjit Santiago 2:1-4). Miʼn txi qqʼoʼn ambʼil tuʼn tbʼaj jlu jatumel in nok qchmon qibʼ. ¿Tzeʼn jaku kubʼ tiʼj nya bʼaʼn ximbʼetz lu quʼn?

11. ¿Oʼkxpe jaku tzʼok jun xjal qʼinun ex qa jun prow te tamiw Jehová?

¹¹ Il tiʼj tuʼn kyok qkeʼyin qe erman ik tzeʼn in che ok tkeʼyin Jehová. Mintiʼ in nok tqʼoʼn mas toklen jun xjal tuʼnju at tpwaq ex mintiʼ in nel tiʼn toklen jun xjal tuʼnju mintiʼ tpwaq. Nya noq kyuʼn tiʼchaq at qe jaku ten jun tbʼanel qamiwbʼil tukʼil Dios. Ax tok, tqʼama Jesús qa kwest «tuʼn tokx jun xjal qʼinun tuj kawbʼil in tzaj tuj kyaʼj», pero mintiʼ tqʼama qa mlayx tzʼokx (Mat. 19:23). Ax ikx tqʼamatl jlu: «At tzalajbʼil kyeye aqeye mebʼa, porke kyeye aju tkawbʼil Dios»  (Luc. 6:20). Pero nya tuʼn jlu tqʼama qa kykyaqil prow xjal kʼokeltoq kybʼiʼn ex qa tzul kykʼamoʼn tbʼanel kʼiwlabʼil. ¿Tiquʼn? Tuʼnju ateʼ nim xjal mebʼa mintiʼ e ok te t-xnaqʼtzbʼen. A jlu in tzaj tyekʼin qe qa mlay txi qqʼamaʼn qa tamiw moqa nya tamiw jun xjal Jehová noq kyuʼn qe tiʼchaq at te.

12. ¿Tiʼ in tzaj tqʼamaʼn Tyol Dios kye qeju erman at kypwaq ex kye qeju mintiʼ kypwaq?

¹² Ateʼ nim erman te junxichaq lugar toj ttnam Jehová ex in nok kykʼujlaʼn aj kyajbʼen te tuʼn tkyaqil kykʼuʼj. Ateʼ junjun at kypwaq ex junjuntl mintiʼ. In tzaj tqʼamaʼn Tyol Dios kye qeju at kypwaq tuʼn miʼn tok qeʼ kykʼuʼj tiʼj kyqʼinumabʼil porke nya segur qe jlu; noq oʼkx tuʼn tqeʼ kykʼuʼj tiʼj Jehová (kjawil uʼjit 1 Timoteo 6:17-19). Ax ikx in tzaj tqʼamaʼn kye kykyaqil tmajen qa jaku tzaj nya bʼaʼn kyiʼj qa ma tzʼok kykʼujlaʼn qʼinumabʼil (1 Tim. 6:9, 10). Qa ma che ok qkeʼyin erman ik tzeʼn in che ok tkeʼyin Jehová, mlay txi qqʼoʼn ambʼil tuʼn qok ten yolil kyiʼj noq tuʼnju tiʼchaq at kye. Noqtzun tuʼnj, ¿bʼaʼnpe tuʼn qok ten yolil kyiʼj txqantl noq tuʼnju kyabʼqʼi? Qo xnaqʼtzan tiʼj.

13. Ik tzeʼn in tzaj tqʼamaʼn Tyol Dios, ¿tzeʼn qmod kbʼel qyekʼin kyukʼil qeju ma che tijen?

¹³ Nim maj in tzaj tqʼamaʼn Tyol Dios qe tuʼn kyok qnimen qeju at mas kyabʼqʼi qwitz. In tzaj tqʼamaʼn Levítico 19:32 jlu: «Che weʼktze kywitz tij xjal ex che nimane kye. Tenxwit nchiylale kyeye». Ax ikx in tzaj tqʼamaʼn Proverbios 16:31 qa «ok t-saqix twiʼ jun xjal, nnoʼk ik tzaʼn jun coron te nimbʼil te, ma tkambʼa jlu tuʼnju bʼaʼn tbʼinchbʼen». Ex xi tqʼamaʼn apóstol Pablo te Timoteo tuʼn miʼn t-xi tkawin qe tij xjal tukʼil nya bʼaʼn yol, sino tuʼn t-xi tqʼoʼn kynabʼil ik tzeʼn aj t-xi yolin te ttat (1 Tim. 5:1, 2). Ax tok, attoq toklen Timoteo kyibʼaj erman otoq che chʼiy, noqtzun tuʼnj, iltoq tiʼj tuʼn kyok tnimen ex tuʼn ttzaj qʼaqʼin tkʼuʼj kyiʼj.

14. ¿Toj alkye ambʼil jaku t-xi qkawin jun erman, aju mas ma tijen qwitz?

¹⁴ ¿Tiʼ jaku bʼaj qa at jun erman ma tijen ma kubʼ tbʼinchaʼn jun il twitz Jehová ex ojtzqiʼn jlu tuʼn? Mlay txi tbʼinchaʼn Jehová tiʼj jun xjal noq tuʼnju in nok tkeʼyin ex mlay tzʼok tqʼoʼn te tbʼanel noq tuʼnju otoq tijen. Qqʼoʼnk qwitz tiʼj nabʼil tkuʼx toj Ezequiel 9:5 ex 6. In tzaj tqʼamaʼn jlu: «Ex o nbʼiye tej t-xi tmaʼn Qman kye qeju qaqtl xinaq: [...] Kybʼyonkuye qe tij xjal, qe kuʼxun, qe qʼapoj, qe kʼwaʼl ex qe xuʼj, ex miʼn tzaj qʼaqʼan kykʼuʼje kyiʼj». Chʼixme ax nabʼil lu in kanet quʼn kyoj yol kubʼ ttzʼibʼin Isaías (Is. 65:20, TNM). A jlu in tzaj tyekʼin qe qa tnejel qo nimel te Jehová, aju «Tij Xjal» (Dan. 7:9, 10, 13, 14). Tuʼntzunju, mintiʼ tuʼn qtzaj xobʼ aj t-xi qkawin jun erman qa il tiʼj ex noq jteʼxku tabʼqʼi (Gál. 6:1).

15. ¿Tiʼ xnaqʼtzbʼil in nel qiʼn tiʼj apóstol Pablo tiʼjju qmod tuʼn tten kyukʼil kuʼxun?

¹⁵ ¿Tiʼ qmod kbʼel qyekʼin kyukʼil kuʼxun? Qo xnaqʼtzan tiʼj techel kyaj tqʼoʼn Timoteo. Xi tqʼamaʼn Pablo consej lu te: «Miʼn taqʼa ambʼil tuʼn tel ikʼuna kyuʼn okslal tuʼnju kuʼxuna; noq oʼkx tuʼn toka te jun yekʼbʼil kyxol okslal tuʼn tyola, ex tuʼnju in bʼeta tuj tumel, ex tuʼnju at tkʼujlalila, ex tuʼnju at tokslabʼla, ex tuʼnju saq tuj tanmiya» (1 Tim. 4:12). Tej tkubʼ ttzʼibʼin Pablo qe yol lu, otoqlo tzikʼ Timoteo tibʼaj 30 abʼqʼi. Pero otoq txi tqʼoʼn Pablo junjun oklenj te. Noq tiʼj alkyexku tiquʼn xi qʼoʼn consej lu te Timoteo, in tzaj t-xnaqʼtzaʼn qe qa mintiʼ tuʼn qok ten yolil kyiʼj erman tzma kuʼxun. Bʼaʼn tuʼn  ttzaj qnaʼn qa xi tzyet tuʼn tpakbʼan Jesús tej tzmatoq in nikʼ tibʼaj 30 abʼqʼi.

16, 17. a) ¿Tzeʼn in nel kynikʼ ansyan tiʼj qa jaku tzʼok jun erman te onil kye ansyan moqa te ansyan? b) Qa atz sok qqʼoʼn qwiʼ kyiʼj qkostumbr, tiʼj qximbʼetz ex nya tiʼjju in tzaj tqʼamaʼn Tyol Dios, ¿tiʼ jaku bʼaj?

¹⁶ Toj junjun tnam, nya naqʼli qe xjal tuʼn tok kyqʼoʼn kyoklen kuʼxun. Qa aj jlu in bʼaj jatumel in qo anqʼin, bʼalo mlay txi kyqʼamaʼn ansyan tuʼn tok jun kuʼxun te onil kye ansyan moqa te ansyan. Bʼaʼn tuʼn ttzaj kynaʼn ansyan qa mintiʼ in tzaj tqʼamaʼn Xjan Uʼj jteʼ tabʼqʼi jun erman tuʼn tten tuʼntzun tok qʼet jun toklen (1 Tim. 3:1-10, 12, 13; Tito 1:5-9). Qa ma kubʼ t-ximen jun ansyan jun tiʼ tzajni tiʼj kykostumbr xjal jatumel in nanqʼin, mintiʼ in xiʼ tbʼiʼn aju in tzaj tqʼamaʼn Tyol Dios. Mintiʼ tuʼn tkubʼ kyximen ansyan jun tiʼ kyiʼj kuʼxun tuʼn kyex kyximbʼetz moqa noq tuʼnju naqʼli qe xjal tiʼj, sino bʼaʼn tuʼn tten kyximbʼetz ik tzeʼn in tzaj t-xnaqʼtzaʼn Tyol Dios (2 Tim. 3:16, 17).

¹⁷ Qo xnaqʼtzan tiʼ jaku bʼaj qa ma ten kyximbʼetz ansyan kyiʼj kuʼxun ik tzeʼn kye xjal toj kytnam. Toj jun tnam, attoq jun onil kye ansyan qʼuqli kykʼuʼj erman tiʼj ex in bʼanttoq junjun aqʼuntl nim toklen tuʼn jatumel in nok tchmon tibʼ. El kynikʼ ansyan tiʼj qa in che japun kawbʼil tuʼn tuʼn tok te ansyan, pero mintiʼ xi kyqʼamaʼn tuʼn tok. Noq junjun ansyan otoq che tijen kyqʼama qa mlay tzʼok erman lu te ansyan tuʼnju tzma kuʼxun. Mintiʼ ok qʼoʼn toklen erman noq tuʼnju tzeʼn keʼyin. Noq jun techel jlu, pero in tzaj kyyekʼin tqanil qa ateʼ junjun ansyan ik kyximbʼetz kyoj junjun lugar twitz tkyaqil Txʼotxʼ. Tuʼntzunju, nim toklen tuʼn t-xi qbʼiʼn aju in tzaj tqʼamaʼn Tyol Dios ex nya tiʼj qex qximbʼetz, moqa tiʼj kykostumbr xjal. Qa ma bʼant jlu quʼn, in xi qbʼiʼn Jesús ex mlay qo ok ten yolil noq tuʼnju in nok qkeʼyin.

18, 19. ¿Tiʼ kbʼantel quʼn tuʼntzun kyok qkeʼyin txqantl ik tzeʼn in che ok tkeʼyin Jehová?

¹⁸ Maske aj il qoʼ, jaku kubʼ tiʼj ikʼbʼil quʼn ex jaku che ok qkeʼyin txqantl ik tzeʼn in che ok tkeʼyin Jehová (Hech. 10:34, 35). Tuʼn tbʼant jlu quʼn, il tiʼj tuʼn ttzaj qnaʼn toj tkyaqil ambʼil qe nabʼil ateʼ toj Tyol Dios. Qa ma qbʼincha ikju, kxel qbʼiʼn kawbʼil kyaj tqʼamaʼn Jesús tuʼn miʼn qok ten yolil kyiʼj txqantl noq tuʼnju in nok qkeʼyin (Juan 7:24).

¹⁹ Chʼixtl tpon ambʼil tuʼn kyok xjal toj xjel tuʼn Jesucristo, toj tumel kbʼantel jlu tuʼn ex mlay txi tqʼoʼn ambʼil tuʼn tkubʼ tbʼinchaʼn qe tiʼchaq noq tuʼnju kʼokel tkeʼyin moqa kʼokel tbʼiʼn (Is. 11:3, 4). Qʼuqli qkʼuʼj tiʼj qa tbʼanel kʼokel jlu.