¿Ope jaw tuʼjina qe uʼj Aju Xqʼuqil kʼitzqeku o che etz? Jaku tzʼel tnikʼa tiʼj qa ma che tzaqʼwet xjel lu tuʼna:

¿Tiquʼn il tiʼj tuʼn kyximen mambʼaj in cheʼx anqʼil toj juntl tnam tiʼj alkye yol in che yolin kykʼwaʼl tiʼj, tuʼntzun kyonin kyiʼj tuʼn kyajbʼen te Jehová?

Jaku bʼant kyyolin kʼwaʼl tiʼj kyyol xjal jatumel otoq che pon aj kyxiʼ toj tja xnaqʼtzbʼil moqa aj kyyolin kyukʼil txqantl. Tbʼanel qa ma bʼant kyyolin toj juntl yol. A wibʼaj toj ja kbʼel ximente qa kʼokel kychmon kyibʼ toj yol in che yolin xjal tiʼj ex qa tojx kye kyyol. Bʼaʼn tuʼn kyximen tiʼj toj alkye yol mas in nel kynikʼ kʼwaʼl tiʼj Xjan Uʼj ex alkye jaku tzʼonin kyiʼj tuʼn tchʼiy kyamiwbʼil tukʼil Jehová. Aʼye mambʼaj okslal il tiʼj tuʼn tok tilil kyuʼn tuʼn kyxqʼuqin tnejel kyiʼj kykʼwaʼl ex nya tiʼjju kye kyajbʼil (w17.05, t-xaq 10 a 13).

Xi tqʼanin Jesús jlu te Pedro: «¿Maspe kʼujlaʼn qine tuʼna ik tzaʼn kye jlu?». ¿Alqiʼjtoq in yolin «ik tzaʼn kye jlu»? (Juan 21:15)

Bʼalo in yolintoq Jesús kyiʼj pescad attoq atz ex qa tiʼj kʼaẍjel tiʼj pescad. Tej otoqxi kyim Jesús, ok ten Pedro aqʼunal juntl maj tuʼn tkʼayin pescad. Il tiʼj tuʼn tel kynikʼ okslal tiʼj alkye toklen aqʼuntl in nok kyqʼoʼn (w17.05, t-xaq 21 a 23).

¿Tiquʼn xi tqʼamaʼn Abrahán te Sara tuʼn t-xi tqʼamaʼn qa kyerman kyibʼ? (Gén. 12:10-13)

Ax tok, kyitzʼintoq kyibʼ tuʼnju junx kytat. Noqwit xi tqʼamaʼn Sara qa tchmil, bʼalo jakutoq kubʼ bʼyoʼn Abrahán ex mintiʼwtlo e ten kyyajil ik tzeʼn otoq tzaj ttziyen Dios kye (wp17.3, t-xaq 14 ex 15).

¿Alkye junjun tumel ajbʼen tuʼn Elias Hutter tuʼn tonin kyiʼj xjal tuʼn tel kynikʼ tiʼj yol hebreo?

Tajtoq tuʼn tel naj kynikʼ xjal in che xnaqʼtzan tukʼil tiʼj kylokʼ yol toj yol hebreo tkuʼx toj Tyol Dios ex tuʼn tel kynikʼ tiʼj qa junxitl qeju in che ok tzʼaqsante junjuntl yol. Tuʼn tbʼant jlu, etz t-imprimirin qe tlokʼ yol tok qʼeq kyiʼj atzun qeju tzʼaqsal yol, mintiʼ ok tqʼoʼn qʼeq kyiʼj tuʼntzun ttzaj tyekʼin qa junxitl qe. In najbʼen tumel lu toj Traducción del Nuevo Mundo de las Santas Escrituras (con referencias) kyoj tqanil t-xe t-xaq uʼj (wp17.4, t-xaq 11 ex 12).

¿Tiʼ il tiʼj tuʼn t-ximen okslal tiʼj qa in kubʼ t-ximen tuʼn tten jun t-arma tuʼn tok t-xqʼuqin tibʼ kyiʼj nya bʼaʼn xjal?

Xjan kychwinqlal xjal toj twitz Jehová. Mintiʼ xi tqʼamaʼn Jesús kye t-xnaqʼtzbʼen tuʼn ttzaj kyiʼn jun espada tuʼn tajbʼen kyuʼn tuʼn tok kyxqʼuqin kyibʼ (Luc. 22:36, 38). In nok kyqʼoʼn tmajen Jehová «kyspad tuʼn kyok te kypunt». Mas nim toklen qchwinqlal kywitz qe tiʼchaq. Il tiʼj tuʼn tok qqʼoʼn toklen aju in kubʼ kyximen txqantl ex tuʼn tok tilil quʼn tuʼn tkubʼ qqʼoʼn jun tbʼanel techel (2 Cor. 4:2) (w17.07, t-xaq 31 ex 32).

¿Tiquʼn junxitl qeju txʼolbʼabʼil ateʼkux toj uʼj te Mateo ex Lucas kyiʼj tnejel abʼqʼi tiʼj tanqʼibʼil Jesús?

Atz in yolin Mateo kyiʼj tiʼchaq at toklen tukʼil José. Jun techel, in tzaj tqʼamaʼn tiʼ kubʼ tnaʼn José tej tok tbʼiʼn qa otoq tzʼok ten tal María, ex tej ttzaj tqʼamaʼn jun anjel te tuʼn t-xiʼ oq toj Egipto ex yajxitl tuʼn tajtz meltzʼaj. Atzunte Lucas mas in yolin tiʼj María. In tzaj tqʼamaʼn tiʼ bʼaj tej t-xiʼ keʼyilte Elisabet ex tiʼ kubʼ tnaʼn tej tkyaj ten Jesús toj tja Dios (w17.08, t-xaq 32).

¿Alkye junjun tiʼchaq o tzʼel qʼinte ambʼil tuʼn miʼn ttentl Tyol Dios?

Aj tbʼet ambʼil, in chʼexpaj t-xilen junjun yol toj Tyol Dios. Ex in che onin aj kawil tiʼj jlu aj ttzaj kyqʼmaʼn alkye yol mas in che yolin xjal tiʼj aj kykawin. O tzʼok tilil kyuʼn xjal tuʼn miʼn tkubʼ qʼet Tyol Dios toj yol mas in che yolin xjal tiʼj (w17.09, t-xaq 19 a 21).

¿Atpe jun anjel in xqʼuqin qiʼj?

Mintiʼ. Ax tok tqʼama Jesús qa in che keʼyin ky-anjel t-xnaqʼtzbʼen toj twitz Dios (Mat. 18:10, XT). Noqtzun tuʼnj, nya a t-xilen jlu qa teyele te junjun xjal at jun t-anjel in xqʼuqin tiʼj. Sino tqʼama Jesús tzalu qa in che ximen anjel kyiʼj kykyaqil okslal (wp17.5, t-xaq 5).

¿Alkye in kubʼ yekʼinte mas tbʼanel kʼujlabʼil?

Qa atz tzajni kyiʼj tbʼanel nabʼil, aju kʼujlabʼil agápe atzun mas nim toklenju. Aju kʼujlabʼil lu nya oʼkx in yolin tiʼjju in kubʼ qnaʼn, sino ax ikx in kubʼ qyekʼin tukʼil qbʼinchbʼen aj qonin kyiʼj txqantl ex mintiʼ in qo yon tuʼn ttzaj qʼoʼn t-xel (w17.10, t-xaq 7).