1, 2. ¿Tzeʼn in che onin qeju yol tkubʼ toj Hebreos 13:4 qiʼj?

QKYAQILX qaj tuʼn tjaw qnimsaʼn Jehová. At toklen Jehová tiʼj jlu ex in tzaj ttziyen qa kjawil tnimsaʼn qoʼ qa ma bʼant jlu quʼn (1 Sam. 2:30; Prov. 3:9; Apoc. 4:11). Ax ikx taj Jehová tuʼn kyok qnimen txqantl xjal, ik tzeʼn qeju at kyoklen toj jun kawbʼil (Rom. 12:10; 13:7). Noqtzun tuʼnj, at juntl tiʼ kʼokel qnimen moqa kʼokel qqʼoʼn mas toklen: aju mejebʼleʼn.

² Kubʼ ttzʼibʼin apóstol Pablo jlu: «Nimanxwit ju mejebʼleʼn kyuʼn kykyaqil, ex tuʼn miʼn tknet jun kyyaẍ, porke jun tzʼil jlu» (Heb. 13:4). Aqeju yol lu, nya noq jun yol xi tqʼamaʼn kye kykyaqil, sino in tzaj kyyekʼin qa xi tqʼamaʼn kye okslal qa il tiʼj tuʼn tok kyqʼoʼn toklen mejebʼleʼn. ¿Ikpe qximbʼetz at kyiʼj kykyaqil mejebʼleʼn ex mas tiʼjju qe qmejebʼleʼn?

3. ¿Alkye nabʼil nim toklen tqʼama Jesús tiʼj mejebʼleʼn? (Qʼonka twitza tiʼj tnejel tilbʼilal).

³ Qa ma tzʼok qqʼoʼn toklen mejebʼleʼn ex qa ma tzʼok qnimen, in qo ok lepeʼ tiʼj techel kyaj tqʼoʼn Jesús. Tej t-xi kyqanin fariseo te Jesús qa bʼaʼn tuʼn tkubʼ tnajsaʼn jun xjal tmejebʼleʼn, tzaj tnaʼn juntl maj qe yol tqʼama Jehová tiʼj tnejel mejebʼleʼn, chi: «Kyjaʼtzun kyjel  tqʼoʼn xinaq tman tukʼix ttxuʼ tuʼn tmojeʼ tukʼil t-xuʼjil. Kykabʼiltzun che okel te junx». Ex tqʼamatl jlu: «Aju ma tzʼok tmojbʼaʼn Dios, miʼn tzʼel tpaʼn xjal» (kjawil uʼjit Marcos 10:2-12; Gén. 2:24).

4. ¿Tiʼ t-ximbʼetz Jehová at tiʼj mejebʼleʼn?

⁴ Tuʼn jlu in xi qqʼamaʼn qa ojtzqiʼntoq tuʼn Jesús qa a Dios kubʼ bʼinchante tnejel mejebʼleʼn ex qa il tiʼj tuʼn tten te jumajx. Mintiʼ xi tqʼamaʼn Jehová te Adán ex Eva qa jaku kubʼ kynajsaʼn kymejebʼleʼn, sino kubʼ t-ximen tuʼn kyten junx te jumajx.

5. ¿Tiʼ nya bʼaʼn tzaj tiʼj mejebʼleʼn tuʼn kyimen?

⁵ Ojtzqiʼn quʼn qa tzaj nim chʼixpubʼil tuʼn il kubʼ tbʼinchaʼn Adán. Jun kyxol jlu tzaj kyimen ex tuʼn jlu tzaj nya bʼaʼn tiʼj mejebʼleʼn. Yolin apóstol Pablo tiʼj jlu tej tqʼama qa mintiʼ tuʼn kyok lepeʼ okslal tiʼj Ley tzaj qʼoʼn te Moisés. Tqʼama qa in kubʼ naj mejebʼleʼn tuʼn kamik ex aju otoq kyaj anqʼin, jaku kubʼ mojeʼ juntl maj (Rom. 7:1-3).

6. ¿Alkye tten in nel qnikʼ tiʼj toj Ley xi qʼoʼn te Moisés qa in nok tqʼoʼn Jehová toklen mejebʼleʼn?

⁶ In che kanet junjun tqanil quʼn tiʼj mejebʼleʼn tojju Ley xi tqʼoʼn Jehová kye aj Israel. Qo xnaqʼtzan tiʼj jun. In tzajtoq tqʼoʼn Ley ambʼil kye aj Israel tuʼn tten mas te jun kyxuʼjil ex ya in bʼanttoq jlu kyuʼn tej naʼmxtoq ttzaj qʼoʼn Ley kye. Aju bʼant tuʼn Jehová, xi tbʼinchaʼn tiʼj jlu tuʼntzun miʼn kyikʼ tibʼaj. Jun techel, qa in kubʼtoq mojeʼ jun aj Israel tukʼil jun xuʼj majen ex yajxitl in tzaj tiʼn juntl t-xuʼjil, iltoq tiʼj tuʼn kukx t-xi tqʼoʼn twa, t-xbʼalun ex aju toklen tnejel xuʼj tiʼj mejebʼleʼn. Tqʼamaʼn Dios tuʼn kukx tok tkwentin xjal t-xuʼjil (Éx. 21:9, 10). Nya ateʼtl okslal tjaqʼ Ley, pero toj jlu jaku tzʼel kynikʼ tiʼj qa in nok tqʼoʼn Jehová toklen mejebʼleʼn. A jlu in nonin qiʼj tuʼn tok qqʼoʼn toklen mejebʼleʼn ik tzeʼn in bʼant tuʼn Jehová.

7, 8. a) Ik tzeʼn in tzaj tqʼamaʼn Deuteronomio 24:1, ¿tiʼtoq in tzaj tqʼoʼn Ley ambʼil te? b) ¿Tiʼ t-ximbʼetz Jehová at tiʼjju tuʼn tkubʼ tnajsaʼn jun xjal tmejebʼleʼn?

⁷ ¿Tiʼ tzaj tqʼamaʼn Ley tiʼjju tuʼn tkubʼ najset mejebʼleʼn? Kukx ok tqʼoʼn Jehová toklen mejebʼleʼn, noqtzun tuʼnj, xi tqʼoʼn ambʼil kye aj Israel tuʼn tkubʼ kynajsaʼn kymejebʼleʼn (kjawil uʼjit Deuteronomio 24:1). Oʼkx jakutoq bʼant jlu kyuʼn qa ma kanet «jun tpaltil» kyxuʼjil. ¿Alkye tpaltil? Mintiʼtoq in tzaj tqʼamaʼn Ley, noqtzun tuʼnj jaku txi qʼamet qa jun tiʼ chʼixbʼajilxix ex nya noq alkyexku tpaltil (Deut. 23:14). Bʼisbʼajil tuʼnju toj ambʼil tej tten Jesús, xi kyjyoʼn aj Judiy noq alkyexku tpaltil kyukʼil tuʼntzun tkubʼ kynajsaʼn kymejebʼleʼn (Mat. 19:3). Atzun qe, nya qaj tuʼn qok ik tzeʼn kye.

⁸ Toj ambʼil tej tten Malaquías, naqʼli qe xinaq tuʼn kysbʼun tiʼj kyxuʼjil tuʼntzun tkubʼ kynajsaʼn kymejebʼleʼn, bʼalo bʼant jlu kyuʼn tuʼntzun kykubʼ mojeʼ tukʼil juntl mas txin ex mintiʼtoq in najbʼen te Jehová. Tqʼama Malaquías tiʼ t-ximbʼetz Jehová tiʼj jlu ex kubʼ ttzʼibʼin: «Ikʼun [tuʼn Jehová] aju xjal in kubʼ tpaʼn tibʼ tukʼil t-xuʼjil» (Mal. 2:14-16). At tmojbʼabʼil tibʼ jlu tukʼilju in tzaj tqʼamaʼn Tyol Dios tiʼj tnejel mejebʼleʼn, qa kbʼel mojeʼ chmilbʼaj «tukʼil t-xuʼjil, ex kykabʼil che okel te junx» (Gén. 2:24). Ax ikx kubʼ tyekʼin Jesús qa ax t-ximbʼetz at ik tzeʼn Ttat tej tqʼama jlu: «Aju ok tmojbʼaʼn Dios, miʼn tzʼel tpaʼn xjal» (Mat. 19:6).

9. ¿Tiʼ qximbʼetz ktel tiʼjju yol tqʼama Jesús toj Marcos 10:11 ex 12?

⁹ Jakulo kubʼ t-xjelin jun xjal jlu: «¿Atpe jun tiquʼn jaku kubʼ tnajsaʼn jun okslal tmejebʼleʼn ex tuʼn tkubʼ mojeʼ juntl maj?». Tqʼama Jesús tiʼ t-ximbʼetz tiʼj jlu tej tqʼama: «Qa at jun xjal ma kubʼ tpaʼn tibʼ tukʼil t-xuʼjil ex qa ma mojeʼ tukʼil juntl, in tbʼinchaʼn aj pajil, ex  in tbʼinchaʼn il twitz nej t-xuʼjil. Ex qa at jun xuʼj ma kubʼ tpaʼn tibʼ tukʼil tchmil, ex qa ma mojeʼ tukʼil juntl, ax ikx in tbʼinchaʼn aj pajil» (Mar. 10:11, 12; Luc. 16:18). Tuʼn jlu in nel qnikʼ tiʼj qa ok tqʼoʼn Jesús toklen mejebʼleʼn ex taj tuʼn tbʼant ax jlu kyuʼn txqantl. Qa ma kubʼ tnajsaʼn jun xjal tmejebʼleʼn noq tuʼn tkubʼ mojeʼ tukʼil juntl ex mintiʼ otoq kubʼ tbʼinchaʼn tukʼil il, tuʼn jlu in kubʼ tbʼinchaʼn aj pajil. Toj twitz Dios kykabʼil kukx ateʼ «junx» tuʼnju mintiʼ ma kubʼ najset mejebʼleʼn tuʼn tpaj il. Ax ikx tqʼama Jesús qa aju xjal in nel tpan tibʼ tiʼj jun xuʼjilbʼaj mintiʼ til, in xi tqʼoʼn ambʼil te tuʼn tkubʼ tzʼaq toj aj pajil. ¿Tiquʼn? Tuʼnju toj ambʼil aju, aj tkubʼ naj tmejebʼleʼn jun xuʼj, iltoq tiʼj tuʼn tkubʼ mojeʼ juntl maj tuʼntzun tten aju at tajbʼen te. Ex aju tkabʼin tmejebʼleʼn, in nok ik tzeʼn aj pajil.

10. ¿Tiquʼn jaku kubʼ tnajsaʼn jun okslal tmejebʼleʼn ex jaku kubʼ mojeʼ juntl maj?

¹⁰ Ax ikx tqʼama Jesús qa at jun tiquʼn jaku kubʼ naj mejebʼleʼn. Tqʼama jlu: «Qa at jun xjal ma kubʼ tpaʼn tibʼ tukʼil t-xuʼjil ex qa mintiʼ in tbʼinchaʼn xuʼj aj pajil, qatzun ma mojeʼ xinaq tukʼil juntl xuʼj, in tbʼinchaʼn xinaq aj pajil» (Mat. 19:9). Chʼixmi ax jlu otoq tqʼama toj tchikʼbʼabʼil twi jun witz (Mat. 5:31, 32). Kyoj kykabʼil ambʼil lu, yolin tiʼj «aj pajil», toj juntl yol, aj tyaẍin jun xjal. (Toj yol griego in najbʼen yol pornéia tiʼj jlu). In yolin jlu tiʼj nim il, ik tzeʼn aj pajil, qa jawni twitz jun xuʼj kyukʼil xinaq, qa in kubʼ ten jun xinaq tukʼil juntl xinaq ex qa tukʼil jun txkup. Qqʼonku jun techel, qa at jun chmilbʼaj ma yaẍin, at toklen t-xuʼjil tuʼn tkubʼ t-ximen qa kbʼel tnajsaʼn tmejebʼleʼn ex qa miʼn. Qa ma bʼant jlu tuʼn, ya ma kubʼ naj tmejebʼleʼn toj twitz Dios.

11. ¿Tiquʼn jaku kubʼ t-ximen jun okslal tuʼn miʼn tkubʼ tnajsaʼn tmejebʼleʼn maske in tzaj tqʼamaʼn Tyol Dios qa jaku bʼant tuʼn?

¹¹ Tej tqʼama Jesús qa jaku kubʼ tnajsaʼn xjal mintiʼ til tmejebʼleʼn, mintiʼ tqʼama qa il tiʼj tuʼn tbʼant jlu tuʼn. Jun techel, jaku kubʼ t-ximen jun xuʼj tuʼn miʼn tkubʼ tnajsaʼn tmejebʼleʼn maske otoq tbʼincha tchmil aj pajil. Bʼalo kukx kʼujlaʼn tuʼn ex taj tuʼn tkubʼ tnajsaʼn til tchmil, ex tuʼn tok tilil kyuʼn tuʼn kyten toj mujbʼabʼil. Jaku txi qqʼamaʼn qa tzul  junjun nya bʼaʼn tiʼjju in kubʼ tnajsaʼn tmejebʼleʼn qa mintiʼ ma kubʼ mojeʼ juntl maj. ¿Tiʼ kbʼantel tuʼn tuʼntzun tkanet aju at tajbʼen te ex aj tkubʼ tnaʼn tajbʼil tuʼn tkubʼ kuẍe tukʼil jun xjal? Ex qa ateʼ kykʼwaʼl, ¿kwestpe kxel xnaqʼtzet axix tok kye qa ma kubʼ kynajsaʼn kymejebʼleʼn? (1 Cor. 7:14). Tuʼn jlu in nel qnikʼ tiʼj qa kʼokel weʼ aju mintiʼ til twitz nya bʼaʼn qa ma kubʼ tnajsaʼn tmejebʼleʼn.

12, 13. a) ¿Tiʼ bʼaj tiʼj tmejebʼleʼn Oseas? b) ¿Tiquʼn xi tiʼn Oseas juntl maj Gómer tja? c) ¿Tiʼ xnaqʼtzbʼil in tzaj tqʼoʼn tkyaqil jlu qe tiʼj mejebʼleʼn?

¹² Ax ikx bʼaj jun tiʼ toj tanqʼibʼil Oseas aju in tzaj tyekʼin qe tiʼ t-ximbʼetz Jehová at tiʼj mejebʼleʼn. Xi tqʼamaʼn Jehová te tuʼn tkubʼ mojeʼ tukʼil jun xuʼj Gómer tbʼi. Aju xuʼj lu kʼokeltoq te «jawni twitz kyukʼil xinaq» ex che ultoq itzʼj tal kyukʼil qeju xinaq. Ul jun tkʼwaʼl Oseas tukʼil Gómer (Os. 1:2, 3). Yajxitl, ul jun tmeʼjel ex jun tkʼwaʼl ex bʼalo te juntl xinaq. Maske nim maj kubʼ tbʼinchaʼn Gómer aj pajil, kukx ten Oseas tukʼil. Tej tbʼet ambʼil, kyaj kolin Oseas tuʼn xuʼj lu ex ok te majen, noqtzun tuʼnj, tzaj tlaqʼoʼn Oseas juntl maj (Os. 3:1, 2). Ajbʼen techel lu tuʼn Jehová tuʼn tkubʼ techlaʼn kyil aj Israel tej kyok ten kʼulil kywitz txqantl Dios ex kubʼ tnajsaʼn kyil nim maj. ¿Tiʼ xnaqʼtzbʼil jaku tzʼel qiʼn tiʼj jlu?

¹³ Ik tzeʼn in nel qnikʼ tiʼj, qa at jun kyxol qeju mejebʼleʼn okslal ma yaẍin, kbʼel t-ximen aju mintiʼ til tiʼ kbʼantel tuʼn. Tqʼama Jesús qa at jun tiquʼn jaku kubʼ tnajsaʼn tmejebʼleʼn ex jaku mojeʼ juntl maj. Noqtzun tuʼnj, ax ikx jaku kubʼ tnajsaʼn til tukʼil. Mlay txi qʼamet qa nya bʼaʼn tuʼn tbʼant jlu tuʼn. In tzaj tqʼamaʼn Tyol Dios qa xi tiʼn Oseas Gómer juntl maj tja. Tej tpon ambʼil lu, ya mintiʼ kubʼ kuẍe Gómer tukʼil juntl xinaq. Mintiʼ kubʼ ten Oseas tukʼil Gómer toj jun ambʼil (Os. 3:3, tqanil, nwt-E). Tejtzun tikʼ chʼintl ambʼil, jaku txi qqʼamaʼn qa kubʼ ten Oseas juntl maj tukʼil. A jlu kubʼ techlaʼn tej kyxi kʼamoʼn aj Israel tuʼn Jehová ex tej tten tamiwbʼil juntl maj kyukʼil (Os. 1:11; 3:3-5). A jlu in tzaj t-xnaqʼtzaʼn qe qa taj aju mintiʼ til tuʼn kukx tten tmejebʼleʼn ex qa ma kubʼ kuẍe juntl maj tukʼil tchmil ex qa t-xuʼjil, in tzaj tyekʼin qa otoq kubʼ tnajsaʼn til tukʼil (1 Cor. 7:3, 5). Tuʼn jlu, ya mintiʼ jun tiquʼn jaku kubʼ tnajsaʼn tmejebʼleʼn. Ex aj tbʼaj jlu, kykabʼil kʼokel tilil kyuʼn tuʼn tten kyximbʼetz tiʼj mejebʼleʼn ik tzeʼn te Jehová.

14. Ik tzeʼn in tzaj tqʼamaʼn 1 Corintios 7:10 ex 11, ¿tiʼ jaku bʼaj toj junjun mejebʼleʼn?

¹⁴ Kykyaqilx okslal kʼokel tilil kyuʼn tuʼn tok kyqʼoʼn toklen mejebʼleʼn ik tzeʼn te Jehová ex Jesús. Noqtzun tuʼnj, ateʼ junjun mintiʼ in bʼant kyuʼn tuʼnju aj il qoʼ (Rom. 7:18-23). Tuʼntzunju, mintiʼ tuʼn qjaw labʼin tiʼj qa tzaj junjun nya bʼaʼn toj kymejebʼleʼn tnejel okslal. Kubʼ ttzʼibʼin Pablo qa mintiʼ tuʼn «kyaj tkolin xuʼj tchmil», noqtzun tuʼnj, at maj bʼaj jlu (kjawil uʼjit 1 Corintios 7:10, 11).

15, 16. a) Aj kytzaj nya bʼaʼn, ¿tiʼ il tiʼj tuʼn tok tilil kyuʼn mejebʼleʼn ex tiquʼn? b) ¿Axpe jlu jaku bʼaj qa mintiʼ in najbʼen chmilbʼaj ex qa xuʼjilbʼaj te Jehová?

¹⁵ Mintiʼ tqʼama Pablo tiquʼn el kypan kyibʼ junjun mejebʼleʼn. Mintiʼ el kypan kyibʼ tuʼn tpaj otoq tbʼincha jun kye yaẍbʼil, tuʼnju noqwit a jlu bʼaj, jaku t-xi tqʼamaʼn aju mintiʼ til tuʼn tkubʼ tnajsaʼn tmejebʼleʼn ex jaku kubʼ mojeʼ juntl maj. Pero aju tqʼama Pablo tiʼj jun xuʼj in nel tpan tibʼ tiʼj tchmil, il tiʼj tuʼn tten tjunalx ex qa tuʼn tbʼant tten juntl maj tukʼil tchmil. Kykabʼil junx ateʼ toj twitz Jehová. Tqʼama Pablo kye mejebʼleʼn qa ni jun kye otoq yaẍin, mas bʼaʼn tuʼn t-xi kybʼinchaʼn tiʼj alkyexku nya bʼaʼn otoq tzaj ex tuʼn tbʼant kyten juntl maj. Jakutoq txi kyqanin mejebʼleʼn onbʼil kye ansyan. Ex aj kyonin ansyan, mlaytoq che kolin oʼkx tiʼj jun kye, sino kxeltoq qʼoʼn kynabʼil tuʼn Tyol Dios.

¹⁶ Bʼalo mas tzaj nya bʼaʼn qa mintiʼtoq in najbʼen chmilbʼaj te Jehová. ¿Tuʼnpe jlu  jakutoq txi qʼamet qa tbʼanel tuʼn tel kypan kyibʼ aj kytzaj nya bʼaʼn? Ik tzeʼn ma qo xnaqʼtzan tiʼj, oʼkx jaku kubʼ najset jun mejebʼleʼn qa at jun kye ma tbʼincha aj pajil, noqtzun tuʼnj, mintiʼ in tzaj tqʼamaʼn tiquʼn jaku tzʼel kypan kyibʼ. Kubʼ ttzʼibʼin Pablo jlu: «Qa at jun xuʼj mya okslal tchmil ex taj xinaq tuʼn tten tukʼil, miʼn kyaj tkolin xuʼj tchmil» (1 Corintios 7:12, 13). Kukx in najbʼen nabʼil lu toj ambʼil jaʼlo.

17, 18. ¿Tiquʼn o kubʼ kyximen junjun chmilbʼaj ex qa xuʼjilbʼaj tuʼn miʼn tel kypan kyibʼ maske in che ok weʼ twitz nya bʼaʼn?

¹⁷ Ax ikx jaku txi qqʼamaʼn qa at maj at chmilbʼaj «mya okslal» nya «taj [...] tuʼn tten tukʼil» t-xuʼjil. Bʼalo ok tbʼinchaʼn nim nya bʼaʼn tiʼj t-xuʼjil, axpe ikx kubʼlo t-ximen xuʼjilbʼaj qa jakutoq tzaj yabʼil tiʼj ex qa jakutoq kyim tuʼn tpaj nya bʼaʼn ok bʼinchaʼn tiʼj. Ax ikx, bʼalo nyatoq taj chmilbʼaj tuʼn tkʼaʼchin tiʼj t-xuʼjil ex kyiʼj toj tja, moqa jakutoq tzaj nim nya bʼaʼn tiʼj tajbʼebʼil t-xuʼjil te Jehová. Kyoj ambʼil lu, ateʼ junjun ermana o kubʼ kyximen tuʼn tel kypan kyibʼ tiʼj kychmil ex noq tiʼxku o tzaj qʼamaʼn kye tuʼn kychmil. Atzun junjuntl ermana o kubʼ kyximen tuʼn miʼn kyel kypan kyibʼ tiʼj kychmil maske axju in bʼaj kyiʼj. Kukx in nikʼx kyuʼn ex o tzʼok tilil kyuʼn tuʼn kykyaj tiʼchaq toj tbʼanel. ¿Tiquʼn?

¹⁸ Aju chmilbʼaj moqa xuʼjilbʼaj in nel tpan tibʼ tiʼj tukʼil, mintiʼ in kubʼ naj tmejebʼleʼn ex kʼokel weʼ kywitz nya bʼaʼn ma qo yolin tiʼj. Ax ikx tqʼama apóstol Pablo juntl tiquʼn tuʼn kukx kyten junx. Kubʼ ttzʼibʼin jlu: «Aju chmilbʼaj mya okslal in tkʼmoʼn t-xtalbʼil Dios tuʼnju okslal t-xuʼjil; ex aju xuʼj mya okslal in tkʼmoʼn t-xtalbʼil Dios tuʼnju okslal tchmil. Noqwit mya ikju, ikwitlo kyten kykʼwaʼle ik tzaʼn kykʼwaʼl mya okslal, pero jaʼlo ateʼ tjaqʼ t-xtalbʼil Dios» (1 Cor. 7:14). Nim tmajen Jehová o kubʼ kyximen tuʼn miʼn tel kypan kyibʼ tiʼj kychmil moqa kyxuʼjil maske in che ok weʼ twitz nya bʼaʼn. Ateʼ junjun e jaw tzalaj tej tbʼant jlu kyuʼn mas tuʼnju o tzʼok kyukʼil te tmajen Jehová (kjawil uʼjit 1 Corintios 7:16; 1 Ped. 3:1, 2).

19. ¿Tiquʼn ateʼ tbʼanel mejebʼleʼn kyxol kʼloj okslal?

¹⁹ Yolin Jesús tiʼjju tuʼn tkubʼ najset mejebʼleʼn, ex ajbʼen Pablo tuʼn Jehová tuʼn tkubʼ ttzʼibʼin qe nabʼil tiʼjju jaku bʼant kyuʼn mejebʼleʼn qa in kubʼ kyximen tuʼn tel kypan kyibʼ. Kykabʼil kyajtoq tuʼn tok kyqʼoʼn tmajen Jehová toklen mejebʼleʼn. Kyxol kykyaqil kʼloj okslal ateʼ twitz tkyaqil Txʼotxʼ, ateʼ tbʼanel mejebʼleʼn. Bʼalo in nok qqʼoʼn qwitz kyiʼj junjun mejebʼleʼn in che tzalaj jatumel in nok qchmon qibʼ. Aqeju mejebʼleʼn lu mintiʼ in pon kykʼuʼj tiʼj juntl xjal ex in nok kyqʼoʼn kyoklen kyxolx. A jlu in tzaj tyekʼin qa jaku tzʼok nimet mejebʼleʼn ex qa jaku tzʼok qʼet toklen. Nim in qo jaw tzalaj tuʼnju ateʼ nim millón chmilbʼaj ex xuʼjilbʼaj in kubʼ kyyekʼin qa ax tok qeju tyol Jehová lu: «Kyjaʼtzun tten, kyjel tqʼoʼn xinaq tman ex ttxuʼ, ex kmojebʼil tukʼil t-xuʼjil ex che okel kykabʼil te junx» (Efes. 5:31, 33).