1, 2. ¿Alkye ikʼsabʼil kʼokel tchmoʼn nimxix xjal toj abʼqʼi 2018, ex tiquʼn nim toklen ikʼsabʼil lu? (Qʼonka twitza tiʼj tnejel tilbʼilal).

TOJ 31 TE MARZO TE 2018, akux in kux bʼaj Qʼij, nim millón tmajen Dios ex qe xjal kyaj tuʼn tel kynikʼ tiʼj Xjan Uʼj kʼokel kychmon kyibʼ tuʼn tkubʼ kyikʼsaʼn Wabʼj te Qale te Jesús. Noq tuʼnju Nabʼitz Tkyimlen Jesucristo, aju in kubʼ ikʼset jun maj toj abʼqʼi, nimxix xjal in nok kychmon kyibʼ, mas nim twitz alkyexku juntl ikʼsabʼil twitz tkyaqil Txʼotxʼ.

² Nimxix che tzalajel Jehová ex Jesús aj tok kykeʼyin nim xjal kʼokel kychmon kyibʼ toj ikʼsabʼil lu nim toklen akux in kux bʼaj qʼij twitz tkyaqil Txʼotxʼ. Kyaj tqʼamaʼn Tyol Dios tuʼn tten «nimxix kyajlal xjal» aju mlay bʼant tajlet tuʼn jun xjal ex tzajni qeʼ «kyuj kykyaqil nasyon ex kykyaqil kyiyjil xjal, ex kykyaqil tnam, ex kykyaqil kʼloj xjal junxilchaq kyyol» ex oktoq kyqʼama jlu: «Aju kolbʼil qe tuʼn Qdios aju qʼuql tuj tqʼuqbʼil jatum in kawin, ex tuʼnju Tal Ẍneʼl» (Apoc. 7:9, 10). Tbʼanelxix tuʼnju nimxix xjal in jaw kynimsaʼn Jehová ex Jesús junjun abʼqʼi toj Nabʼitz Tkyimlen Jesucristo.

3. ¿Alkyeqe xjel che xeʼl qtzaqʼweʼn toj xnaqʼtzbʼil lu?

 ³ Toj xnaqʼtzbʼil lu, kxel qtzaqʼweʼn kyaje xjel. Tnejel, ¿tzeʼn jaku kubʼ qbʼinchaʼn qten toj Nabʼitz Tkyimlen Jesucristo ex tuʼn tonin qiʼj? Tkabʼ, ¿tiquʼn in nonin Nabʼitz Tkyimlen Jesucristo tuʼn kyten tmajen Dios toj mujbʼabʼil? Toxin, ¿tzeʼn jaku qo onin tuʼn kukx tten mujbʼabʼil lu? Ex tkyajin, ¿kpolpe qʼij tuʼn tkubʼ qikʼsaʼn mankbʼil maj Nabʼitz Tkyimlen Jesucristo? Qa ikju, ¿jtoj?

4. ¿Tiquʼn nim toklen tuʼn tok tilil quʼn tuʼn qxiʼ toj Nabʼitz Tkyimlen Jesucristo?

⁴ ¿Tiquʼn nim toklen tuʼn qxiʼ toj Nabʼitz Tkyimlen Jesucristo? Bʼaʼn tuʼn ttzaj qnaʼn qa aju tuʼn tok qchmon qibʼ at toklen tukʼil qkʼulbʼil te Dios. Qʼuqli qkʼuʼj tiʼj qa in nok tqʼoʼn Jehová ex Jesús twitz kyiʼj qeju in nok tilil kyuʼn tuʼn kyten toj chmabʼil mas nim toklen toj abʼqʼi. Qajbʼil tuʼn tok kykeʼyin qa qo tel toj chmabʼil lu. Oʼkx mlay bʼant tuʼn qpon qa o qo kʼixbʼi moqa tuʼn juntl tiʼ nim toklen. Aj tkubʼ qyekʼin tukʼil qbʼinchbʼen qa nim kyoklen chmabʼil toj qwitz, in xi qqʼoʼn juntl tiquʼn te Jehová tuʼn miʼn tjatz tiʼn qbʼi toj «libro jatum in che tzaj naʼn qe xjal». Aju uʼj lu —ax ikx in nok qʼoʼn tbʼi te «tuʼjil chwinqlal»— atz tkuʼx kybʼi qeju xjal taj Jehová tuʼn t-xi tqʼoʼn kychwinqlal te jumajx (Mal. 3:16; Apoc. 20:15).

5. Kyoj qeju qʼij naʼmxtoq tkubʼ ikʼset Nabʼitz Tkyimlen Jesucristo, ¿tzeʼn jaku tzʼel qnikʼ tiʼj qa waʼl atoʼ toj qokslabʼil?

⁵ Kyoj qeju qʼij naʼmxtoq tok Nabʼitz Tkyimlen Jesucristo, bʼaʼn tuʼn tel qpaʼn ambʼil tuʼn qnaʼn Dios ex tuʼn qximen tiʼj qamiwbʼil tukʼil Jehová (kjawil uʼjit 2 Corintios 13:5). ¿Tzeʼn jaku bʼant quʼn? Tqʼama Pablo qa il tiʼj tuʼn qximen tiʼj qa waʼl atoʼ toj qokslabʼil. Tuʼn tbʼant jlu quʼn, qxjelinku jlu: «¿Axpe tok in nok qeʼ nkʼuʼje tiʼj qa atine toj okslabʼil in najbʼen tuʼn Jehová tuʼn tbʼant tajbʼil? ¿In nokpe tilil wuʼne tuʼn npakbʼane ex tuʼn t-xi nyekʼine tbʼanel tqanil tiʼj Tkawbʼil Dios? ¿In kubʼpe nyekʼine tukʼil nbʼinchbʼene qa axix tok in qo anqʼin toj makbʼil tqʼijlalil ex qa chʼix tkubʼ najsaʼn tkawbʼil Satanás? ¿Kukxpe in nok qeʼ nkʼuʼje tiʼj Jehová ex tiʼj Jesús ik tzeʼn tej t-xi nqʼamaʼne tuʼn wajbʼene kye?» (Mat. 24:14; 2 Tim. 3:1; Heb. 3:14). Aj qximen tiʼj tzaqʼwebʼil kyiʼj xjel lu, kʼonil qiʼj tuʼn tok qqʼoʼn qwitz qiʼjx.

6. a) ¿Alkye oʼkx jun tumel tuʼn ttzaj qkʼamoʼn qchwinqlal te jumajx? b) ¿Tzeʼn in kubʼ tbʼinchaʼn jun ansyan tten toj Nabʼitz Tkyimlen Jesucristo tkyaqil abʼqʼi? c) ¿Tzeʼn jaku tzʼel qkanoʼn techel tiʼj erman lu?

⁶ Jun tumel tuʼn tkubʼ qbʼinchaʼn qten toj Nabʼitz Tkyimlen Jesucristo, aju tuʼn tkubʼ quʼjin ex tuʼn qximen kyiʼj xnaqʼtzbʼil in che yolin tiʼj tiquʼn nim toklen ikʼsabʼil lu (kjawil uʼjit Juan 3:16; 17:3). Oʼkx qa ma tzʼok qojtzqiʼn Jehová ex qa ma ten qʼuqbʼil qkʼuʼj tiʼj Jesús ktel qchwinqlal te jumajx. Juntl tumel, aj qxnaqʼtzan qjunalx, bʼaʼn tuʼn qjyoʼn kyiʼj xnaqʼtzbʼil jaku che onin qiʼj tuʼn qok laqʼeʼ mas kytxlaj. Qqʼonk qwitz tiʼjju in bʼant tuʼn jun ansyan ma tzikʼ nim ambʼil in najbʼen te Jehová. Toj nimku abʼqʼi o chex tkʼuʼn xnaqʼtzbʼil tiʼj uʼj Aju Xqʼuqil, aʼyeju in che yolin tiʼj Nabʼitz Tkyimlen Jesucristo. Ax ikx tiʼj tkʼujlabʼil Jehová ex Jesús o kubʼ kyyekʼin qiʼj. Toj junjun abʼqʼi, kyoj junjun seman naʼmxtoq tok ikʼsabʼil lu, in che kubʼ tuʼjin juntl maj qe xnaqʼtzbʼil ex in ximen tiʼj tiquʼn nim toklen ikʼsabʼil lu. At maj in xi tkʼuʼn juntl moqa kabʼe xnaqʼtzbʼil. O tzʼel tnikʼ tiʼj qa tuʼnju o naqʼet tuʼn t-xnaqʼtzan kyiʼj xnaqʼtzbʼil lu, tuʼn tuʼjin kyiʼj taqikʼ Tyol Dios at toklen tukʼil Nabʼitz Tkyimlen Jesucristo ex aj t-ximen tiʼjju in jaw tuʼjin, in nonin tij tuʼn tok tojtzqiʼn junjun akʼaj tiʼchaq tkyaqil abʼqʼi. Pero aju mas nim  toklen, in kubʼ t-ximen qa mas nqaku taʼ ttxlaj Jehová ex Jesús. Qa ma bʼant jlu quʼn, ax ikx kʼonil qiʼj tuʼn tok qkʼujlaʼn mas Jehová ex Jesús ex tuʼn tok qqʼoʼn kyoklen, iktzun tten kʼonil mas Nabʼitz Tkyimlen Jesucristo qiʼj.

7. a) ¿Tiʼ xi tqanin Jesús toj tnaʼj Dios tej tkubʼ ikʼset tnejel Wabʼj te Qale? b) ¿Tzeʼn ojtzqiʼn quʼn qa o tzaj ttzaqʼweʼn Jehová tnaʼj Dios Jesús?

⁷ Toj qʼonikʼen tej tkubʼ ikʼset tnejel Wabʼj te Qale, xi tqanin Jesús toj tnaʼj Dios tuʼntzun tten mujbʼabʼil kyxolx t-xnaqʼtzbʼen ik tzeʼn mujbʼabʼil at kyxol Jesús tukʼil Ttat (kjawil uʼjit Juan 17:20, 21). Qʼuqli qkʼuʼj tiʼj qa o tzaj ttzaqʼweʼn Jehová tnaʼj Dios Tkʼwaʼl. Aju chmabʼil te Nabʼitz Tkyimlen Jesucristo, in tzajxix tyekʼin qa at mujbʼabʼil kyxol testigos de Jehová. Toj qʼij aju, nim millón xjal te nimku tnam ex kyyajil in nok kychmon kyibʼ twitz tkyaqil Txʼotxʼ ex in kubʼ kyyekʼin qa qʼuqli kykʼuʼj tiʼj qa tzaj tsamaʼn Jehová Tkʼwaʼl. Kyoj junjun lugar, nya bʼaʼn in nela toj kywitz txqantl tuʼn tok kychmon kyibʼ xjal te junxichaq kyyajil tuʼn kykʼulun, ex kyoj junjuntl mintiʼ in bʼant jlu. Noqtzun tuʼnj, tbʼanelxix in nela mujbʼabʼil lu toj twitz Jehová ex Jesús.

8. ¿Tiʼ tqanil xi tqʼoʼn Jehová te Ezequiel?

⁸ Aqoʼ tmajen Jehová, mintiʼ in qo jaw labʼin tiʼjju mujbʼabʼil at qxol. Kyaj tqʼamaʼn Jehová aju mujbʼabʼil lu toj jun tqanil xi tqʼoʼn te Ezequiel. In tzaj tqʼamaʼntoq tqanil qa kabʼe tzeʼ —aju tzeʼ te «Judá» ex aju tzeʼ te «José»— kʼokeltoq kymojbʼan kyibʼ ex kʼokeltoq te junx tzeʼ (kjawil uʼjit Ezequiel 37:15-17). Toj xnaqʼtzbʼil «Kyxjel qeju in che uʼjin», tzaj tchikʼbʼaʼn uʼj Aju Xqʼuqil te julio te 2016 jlu: «Ajbʼen Ezequiel tuʼn Jehová, aju t-sanjel tuʼntzun tkyaj tqʼamaʼn qa ok che meltzʼajeltoq qe tmajen juntl maj tojju Txʼotxʼ tzaj Tziyen ex tuʼn kyok juntl maj te jun tnam at mujbʼabʼil kyxol. Ax ikx kyaj tqʼamaʼn Ezequiel qa kyoj mankbʼil, moqa bʼajsbʼil tqʼijlalil, junx che tel tmajen Dios toj mujbʼabʼil».

9. ¿Tzeʼn in nok qkeʼyin tkyaqil abʼqʼi toj Nabʼitz Tkyimlen Jesucristo qa in japun yol kyaj tqʼamaʼn Ezequiel?

⁹ Atxix toj abʼqʼi 1919, tnejel bʼaj tnukʼun Jehová juntl maj qe skʼoʼn maj ex chebʼe chebʼe e ok tchmoʼn juntl maj, aʼyeju ik kyten ik tzeʼn tzeʼ te «Judá». Yajxitl, xi tzyet tuʼn tok kychmon kyibʼ mas xjal kyukʼil skʼoʼn maj, aʼyeju at qʼuqbʼil kykʼuʼj tuʼn kyanqʼin te jumajx twitz Txʼotxʼ. Ik kyten jlu ik tzeʼn tzeʼ te «José». Tzaj ttziyen Jehová qa oktoq che okel tmojbʼaʼn kabʼe tzeʼ lu ex che okeltoq «te junx» toj tqʼobʼ (Ezeq. 37:19). Bʼant tuʼn Jehová tuʼn kyok skʼoʼn maj ex qe txqantl ẍneʼl te «jun peʼnx» (Juan 10:16; Zac. 8:23). Toj qqʼijlalil jaʼlo, junx in che ajbʼen qeju kabʼe kʼloj lu tjaqʼ oʼkxku jun aj Kawil, Jesucristo, aju ok tqʼoʼn Dios tbʼi te «nmajene David» toj yol kyaj tqʼamaʼn Ezequiel (Ezeq. 37:24, 25). In nok qkeʼyin aju mujbʼabʼil kyaj tqʼamaʼn Ezequiel aj tok kychmon kyibʼ skʼoʼn maj kyukʼil txqantl ẍneʼl aj tkubʼ ikʼset Nabʼitz Tkyimlen Jesucristo tkyaqil abʼqʼi. Noqtzun tuʼnj, ¿tiʼ jaku bʼant tuʼn teyele junjun qe tuʼn tok t-xqʼuqin ex tuʼn tonin tiʼj mujbʼabʼil lu?

10. ¿Tzeʼn jaku qo onin tiʼj mujbʼabʼil at toj ttnam Dios?

¹⁰ Jun tumel tuʼn qonin tiʼj mujbʼabʼil at toj ttnam Dios, aju tuʼn tkubʼ qin qibʼ. Tej tten Jesús tzalu twitz Txʼotxʼ, xi tqʼamaʼn kye t-xnaqʼtzbʼen qa iltoq tiʼj tuʼn tkubʼ kyin kyibʼ (Mat. 23:12). Aʼyeju xjal mintiʼ in che ajbʼen te Jehová kukx in kubʼ kyximen qa mas nim kyoklen kywitz txqantl. Pero qa in kubʼ qin qibʼ, kʼonil qiʼj tuʼn tok qqʼoʼn kyoklen qeju nejenel toj kʼloj okslal. Qa qajbʼil tuʼn tten kʼloj  okslal junx, nim toklen tuʼn qnimen kye qeju nejenel. Pero aju mas nim toklen, tbʼanel in nela toj twitz Jehová tuʼnju in kubʼ qin qibʼ, tuʼnju «at tqʼoj Dios kyiʼj qeju in jaw kyniman kyibʼ, atzun qeju mans in tzaj tqʼoʼn t-xtalbʼil kye» (1 Ped. 5:5).

11. Qa ma qo ximen tiʼj tiʼ in kubʼ techlaʼn pan ex vin toj Nabʼitz Tkyimlen Jesucristo, ¿tzeʼn in nonin jlu qiʼj tuʼn qonin tiʼj mujbʼabʼil at qxol?

¹¹ Aju tkabʼin tten tzeʼn jaku qo onin tiʼj mujbʼabʼil at qxol, aju tuʼn qximenxix tiʼj tiʼ in kubʼ techlaʼn pan ex vin te Nabʼitz Tkyimlen Jesucristo. Il tiʼj tuʼn tbʼant jlu quʼn naʼmxtoq tok ikʼsabʼil lu ex mas tojju qonikʼen aj tkubʼ ikʼset (1 Cor. 11:23-25). Aju pan mintiʼ tsamel in kubʼ techlaʼn t-xmilal Jesús tzʼaqli aju xi tqʼoʼn te jun chojbʼil, ex aju vin in kubʼ techlaʼn tchkʼel Jesús xi tqʼoʼn. Noqtzun tuʼnj, nya oʼkx tuʼn tel qnikʼ tiʼj tiʼ t-xilen pan ex vin. Bʼaʼn tuʼn ttzaj qnaʼn qa kubʼ tyekʼin chojbʼil bʼant tuʼn Jesús kabʼe matij yekʼbʼil tiʼj kʼujlabʼil: aju tkʼujlabʼil Jehová kubʼ tyekʼin tej t-xi tqʼoʼn Tkʼwaʼl tuʼn qklet ex aju tkʼujlabʼil Jesús kubʼ tyekʼin tej t-xi tqʼon tibʼ tuʼn tkyim tuʼn qpaj. Aj qximen tiʼj kykʼujlabʼil at qiʼj kʼonil tuʼn kyok qkʼujlaʼn. Ex aju qkʼujlabʼil at tiʼj Jehová ex kykʼujlabʼil qerman at tiʼj, ik tten ik tzeʼn jun las aju in qo ok tmojbʼaʼn ex in nonin tuʼn tten mujbʼabʼil qxol.

12. Toj techel tiʼj aj kawil ex qe tmajen, ¿tzeʼn tzaj tyekʼin Jesús qa taj Jehová tuʼn tkubʼ qnajsaʼn kyil qerman?

¹² Jun toxin tumel tuʼn qonin tiʼj mujbʼabʼil at qxol, aju tuʼn tkubʼ qnajsaʼn kyil txqantl tuʼn tkyaqil qkʼuʼj. Aj tkubʼ qnajsaʼn kyil qeju in nok kybʼinchaʼn nya bʼaʼn qiʼj, in kubʼ qyekʼin qa in xi qqʼoʼn chjonte te Jehová tuʼnju jaku kubʼ tnajsaʼn qil noq tuʼn chojbʼil bʼant tuʼn Jesús. Qo ximen tiʼj techel yolin Jesús tiʼj aju tkuʼx toj Mateo 18:23-34. Qxjelinku jlu: «¿In nonin techel lu wiʼje tuʼn tkubʼ nbʼinchaʼne aju tzaj t-xnaqʼtzaʼn Jesús? ¿Atpe npasense ex in nelpe nnikʼe tiʼjju in kubʼ kynaʼn erman? ¿In kubʼpe nnajsaʼne kyil qeju in nok kybʼinchaʼn nya bʼaʼn wiʼje?». Ax tok, ateʼ junjun il mas matij kywitz junjuntl. Ex tuʼnju aj il qoʼ, kwest in nela toj qwitz tuʼn tkubʼ qnajsaʼn junjun il. Pero in tzaj tyekʼin techel yolin Jesús tiʼj tiʼ taj Jehová tuʼn tbʼant quʼn (kjawil uʼjit Mateo 18:35). Tzaj tyekʼin Jesús qa mlay kubʼ tnajsaʼn Jehová qil qa mintiʼ ma kubʼ qnajsaʼn kyil qerman ex in najtz tiʼj kyanmi. Bʼaʼn tuʼn qximenxix tiʼj jlu.  Aj t-xi qnimen Jesús ex aj tkubʼ qnajsaʼn kyil txqantl, in nok qxqʼuqin tbʼanelxix mujbʼabʼil at qxol ex in qo onin tiʼj.

13. Aj qten toj txubʼtxaj kyukʼil qerman, ¿tzeʼn tten in qo onin tiʼj mujbʼabʼil at qxol?

¹³ Aj tkubʼ qnajsaʼn kyil qerman, in qo ten toj txubʼtxaj kyukʼil. Bʼaʼn tuʼn ttzaj qnaʼn qa tqʼama apóstol Pablo tuʼn tok tilil quʼn tuʼn tkyaqil qkʼuʼj tuʼn kukx tten mujbʼabʼil qxol «aju in tqʼoʼn Xewbʼaj Xjan», tuʼnju qtzuylaj qibʼ tuʼnju mujbʼabʼil at qxol (Efes. 4:3). Toj ambʼil lu te Nabʼitz Tkyimlen Jesucristo ex mas toj qonikʼen aj tkubʼ qikʼsaʼn, bʼaʼn tuʼn qximenxix tiʼj alkye qmod in kubʼ qyekʼin kyukʼil txqantl. Qxjelinku jlu: «¿In kubʼpe nyekʼine tukʼil nbʼinchbʼene qa in xi nkʼuʼne qʼoj? ¿In nokpe kykeʼyin txqantl qa in nok tilil wuʼne tuʼn tten txubʼtxaj ex mujbʼabʼil qxol?». Bʼaʼn tuʼn qximen kyiʼj xjel lu aʼyeju nim kyoklen.

14. ¿Tzeʼn tten jaku kubʼ qyekʼin qa in nikʼx quʼn qxolx tukʼil kʼujlabʼil?

¹⁴ Aju tkyajen tten tzeʼn tuʼn qonin tiʼj mujbʼabʼil at qxol, aju tuʼn tkubʼ qyekʼin qkʼujlabʼil kyiʼj txqantl ik tzeʼn in bʼant tuʼn Jehová, aju Dios te kʼujlabʼil (1 Juan 4:8). Miʼn txi qqʼamaʼn qe tiʼchaq ik tzeʼn jlu: «Il tiʼj tuʼn tikʼx wuʼne tuʼnju erman qe, noqtzun tuʼnj, mintiʼ in kubʼ nchkʼele kyukʼil». Qa ma ten qximbʼetz ik tzeʼn jlu, mintiʼ in xi qbʼiʼn nabʼil xi tqʼoʼn apóstol Pablo kye okslal aju in tqʼamaʼn: «Tzikʼxku kyuʼne kyxolxe, ex kykʼujlam kyibʼe» (Efes. 4:2). Qqʼonk qwitz tiʼj qa nya oʼkx tqʼama tuʼn tikʼx quʼn qxolx, sino il tiʼj tuʼn tbʼant quʼn tukʼil kʼujlabʼil. In nel qnikʼ tiʼj qa junxitl qe kabʼe tiʼchaq lu. O che tzaj tiʼn Jehová xjal te junxichaq kyyajil toj kʼloj okslal (Juan 6:44). In nok tkeʼyin nim tiquʼn tuʼn kyok tkʼujlaʼn. Tuʼntzunju, ¿atpe jun tiquʼn jaku t-xi qqʼamaʼn qa mintiʼ tuʼn tok qkʼujlaʼn jun erman? Il tiʼj tuʼn tkubʼ qyekʼin qkʼujlabʼil kyiʼj kykyaqil tuʼnju in tzaj tqʼamaʼn Jehová qe (1 Juan 4:20, 21).

15. ¿Tiquʼn ojtzqiʼn quʼn qa kbʼel ikʼset mankbʼil maj Nabʼitz Tkyimlen Jesucristo?

¹⁵ Kpol ambʼil tuʼn tkubʼ qikʼsaʼn mankbʼil maj Nabʼitz Tkyimlen Jesucristo. ¿Tiquʼn ojtzqiʼn quʼn? Tuʼnju xi tqʼamaʼn Pablo kye okslal skʼoʼn maj qa, tkyaqil abʼqʼi aj tkubʼ kyikʼsaʼn tkyimlen Jesús kukx in che pakbʼan tiʼj, ‹maxi kxel kykolin okxi tul› (1 Cor. 11:26). Tiʼj yol kyaj tqʼamaʼn Jesús tiʼj bʼajsbʼil tqʼijlalil, ax ikx yolin tiʼj aj tul. Tqʼama jlu tiʼj nimxix yajbʼil nqaku taʼ: «Entons ktzajel yekʼun jun techal tuj kyaʼj tuʼn wule, aqine skʼoʼmaj qine tuʼn Dios tuʼn ntene kyukʼil xjal, oktzun che jawil oqʼ kykyaqil xjal tuj junjun tnam twitz txʼotxʼ, ex ok kyilaʼ ok ntzaje tibʼaj muj twitz kyaʼj tukʼil wipumale nim ex in qoptzʼaj wiʼje tuʼn nspikʼumale. Che tzajel nsamaʼne qe n-anjele, kʼokel qʼajtzaʼn chun kyuw, ex qeju skʼoʼmaj wuʼne che okel chmoʼn kyuʼn anjel, che tzajel chmoʼn tuj tkyaqil twitz txʼotxʼ ex max ttxaʼnpun txʼotxʼ» (Mat. 24:29-31). Kʼokel tchmoʼn Jesús «qeju skʼoʼmaj» aj t-xi tiʼn qeju kukx ateʼ twitz Txʼotxʼ toj kyaʼj. A jlu kbʼajel aj tikʼ chʼin ambʼil tiʼj nimxix yajbʼil, pero naʼmxtoq txi tzyet Armagedón. Toj qʼoj aju, kbʼel kyiʼj qe aj kawil te twitz Txʼotxʼ tuʼn Jesús ex kyuʼn qeju 144,000 (Apoc. 17:12-14). Aju Nabʼitz Tkyimlen Jesucristo kbʼel ikʼset naʼmxtoq tul Jesús qʼil kye skʼoʼn maj tuʼn kyxiʼ toj kyaj, atzun jlu aju mankbʼil maj kbʼel ikʼset.

16. ¿Tiquʼn taj teya tuʼn ttena toj Nabʼitz Tkyimlen Jesucristo toj abʼqʼi lu?

¹⁶ Qqʼonk tilil tuʼn qten toj Nabʼitz Tkyimlen Jesucristo toj 31 te marzo te 2018. Ex qqaninx te Jehová tuʼn tonin qiʼj tuʼn kukx qonin tiʼj mujbʼabʼil at kyxol tmajen (kjawil uʼjit Salmo 133:1). Miʼn tzʼel naj tiʼj qkʼuʼj qa kpol qʼij tuʼn qten mankbʼil maj toj Nabʼitz Tkyimlen Jesucristo. Akux in pon ambʼil lu, qyekʼinx qa nim toklen toj qwitz aju tbʼanelxix mujbʼabʼil in qo tzalaj tiʼj toj Nabʼitz Tkyimlen Jesucristo.