TOJ miércoles te prim 24 te enero te 2018, ex qʼoʼn jun tqanil nim toklen toj Betel te Estados Unidos ex Canadá: otoq txi qʼoʼn toklen ermano Kenneth Cook, aju kʼwalbʼaj, tuʼn tten toj Kʼloj Xjal Qʼil Twitz Aqʼuntl kye Testigos de Jehová.

Ul itzʼj ermano Kenneth atz Pensilvania, Estados Unidos ex atz jaw chʼiy. Ok tojtzqiʼn axix tok noq tuʼn jun tukʼil toj tja xnaqʼtzbʼil tej chʼixtoq tgraduarin ex jaw aʼ twiʼ, moqa bʼyan toj 7 te junio te 1980. Xi tzyet tuʼn tajbʼen te precursor regular toj 1 te septiembre te 1982. Tej tikʼ kabʼe abʼqʼi, tzaj qʼoʼn txokbʼil tiʼj tuʼn t-xiʼ ajbʼel toj Betel. Xi tzyet tuʼn taqʼunan atz Wallkill (Nueva York) toj 12 te octubre te 1984.

Kyoj qeju 25 abʼqʼi e ikʼ, tzaj qʼoʼn junxichaq toklen ermano Kenneth ik tzeʼn toj imprenta ex toj Oficina te Betel. Toj 1996 kubʼ mojeʼ tukʼil jun ermana Jamie tbʼi, ex xi tzyet tuʼn tajbʼen t-xuʼjil junx tukʼil toj Wallkill. Toj diciembre te 2009, xiʼ anqʼil toj Ja te Xnaqʼtzbʼil te Watchtower aju at Patterson, atztzun xi qʼoʼn toklen ermano Kenneth toj Kʼloj xjal in nok keʼyinte uʼj in xi samaʼn te Kʼloj tzʼibʼil. Toj abril te 2016, tej kymeltzʼaj ermano Kenneth toj chʼin ambʼil atz Wallkill, i ex samaʼn Brooklyn. Ex tej tikʼ jweʼ xjaw, i ex samaʼn toj kytxuylal ninja qʼil twitz aqʼuntl, aju at Warwick. Toj enero te 2017, tzaj tqʼoʼn Kʼloj Xjal Qʼil Twitz Aqʼuntl toklen ermano Kenneth tuʼn tonin tiʼj Kʼloj xjal in nok kyq’o’n kywitz ti’jju in kub’ tz’ib’in.