1. ¿Tiʼ kubʼ tnaʼn David tiʼj Jehová ex tiʼ kubʼ tbʼinchaʼn tuʼnju kubʼ tnaʼn?

KUBʼ ttzʼibʼin aj kawil David jlu: «Bʼaʼn tuʼn tjaw qnimsaʼn tbʼi Qman porke maʼ toklen» (Sal. 145:3). Kʼujlaʼntoq Jehová tuʼn ex onin jlu tiʼj tuʼn tjaw tnimsan «kyxol qeju in kubʼ kybʼuyin kyibʼ» (Sal. 22:22; 40:5). Ax ikx qe kʼujlaʼn Jehová quʼn ex ax qximbʼetz at ik tzeʼn te David tej tqʼama jlu: «Nimanxwit tbʼiya te jumajx, aya Dios aju Tdios qtzan qxeʼchele Israel» (1 Crón. 29:10-13).

2. a) ¿Alkye jun tten tuʼn tjaw qnimsaʼn Jehová? b) ¿Tiʼ in bʼaj kyiʼj junjun erman ex tiʼ qo xnaqʼtzal tiʼj?

² Jun tten tuʼn tjaw qnimsaʼn Jehová toj ambʼil jaʼlo aju qa ma txi qqʼoʼn qyol kyoj chmabʼil. Noqtzun tuʼnj, kwest in nela jlu kye junjun erman. Kyaj tuʼn tbʼant kyuʼn, pero mintiʼ in kubʼ kybʼinchaʼn. ¿Tiʼ jaku bʼant kyuʼn tuʼntzun miʼn kytzaj xobʼ? ¿Ex alkye junjun nabʼil jaku tzʼonin qiʼj tuʼn t-xi qqʼoʼn tbʼanel qyol? Naʼmxtoq t-xi qqʼoʼn tzaqʼwebʼil kyiʼj xjel lu, qo xnaqʼtzan tiʼj kyaje tiquʼn nim toklen tuʼn t-xi qqʼoʼn qyol kyoj chmabʼil.

3-5. a) Ik tzeʼn in tzaj tqʼamaʼn Hebreos 13:15, ¿tiquʼn in xi qqʼoʼn qyol kyoj chmabʼil? b) ¿Tiquʼn ojtzqiʼn quʼn qa mintiʼ in tzaj tqanin Jehová tuʼn t-xi qqʼoʼn ax oyaj te ik tzeʼn kye txqantl?

³ O tzaj tqʼoʼn Jehová qoklen tuʼn tjaw qnimsaʼn (Sal. 119:108). Aj t-xi qqʼoʼn qyol kyoj chmabʼil, ik tten «ik tzaʼn jun oyaj» ex mintiʼ juntl jaku txi qʼonte te qxel (kjawil uʼjit Hebreos 13:15). ¿In tzajpe tqanin Jehová kye kykyaqil  tmajen qa ax tbʼanel oyaj kxel kyqʼoʼn te? Mintiʼ.

⁴ Ojtzqiʼn tuʼn Jehová tiʼ jaku bʼant tuʼn teyele junjun qe ex in nok tqʼoʼn toklen tkyaqil oyaj jaku txi qqʼoʼn te. Qo ximen kyiʼj oyaj xi tkʼamoʼn kye aj Israel. Aʼyeju attoq tumel kyukʼil xi kyqʼoʼn jun ẍneʼl te chojbʼil. Atzun qeju mebʼa jakutoq txi kyqʼoʼn «kabʼe ẍpoʼq ex qa kabʼe tal paloma». Ex qatzun mlay bʼant tuʼn t-xi kyqʼoʼn kabʼe tal chyuʼj, xi tkʼamoʼn Jehová «kabʼe libr arin tbʼanilxix» (Lev. 5:7, 11). Maske nyaxix nim twiʼ arin, ok tqʼoʼn Jehová toklen chojbʼil lu, pero iltoq tiʼj tuʼn t-xi kyqʼoʼn aju mas tbʼanel.

⁵ Ax t-ximbʼetz Jehová at toj ambʼil jaʼlo. Aj t-xi qqʼoʼn qyol kyoj chmabʼil, in ten tbʼanel t-ximbʼetz qiʼj ex mintiʼ in nayon tuʼn tbʼant-xix qyolin ik tzeʼn te Apolos ex tuʼn tqeʼxix qkʼuʼj tiʼjju in xi qqʼamaʼn ik tzeʼn te Pablo (Hech. 18:24; 26:28). Oʼkx in tzaj tqanin Jehová tuʼn tkubʼ qbʼinchaʼn aju jaku bʼant quʼn. Qnaʼntz aju mebʼa xuʼj, tzaj kʼiwlaʼn tuʼn Jehová tuʼnju xi tqʼoʼn tkyaqilju attoq te (Luc. 21:1-4).

6. a) Ik tzeʼn in tzaj tqʼamaʼn Hebreos 10:24 ex 25, ¿alkye tten jaku che onin kyyol erman in xi kyqʼoʼn kyoj chmabʼil qiʼj? b) ¿Tzeʼn jaku kubʼ tyekʼina qa in nok tqʼoʼna toklen kyyol erman in xi kyqʼoʼn?

⁶ Kyukʼil qyol in bʼaj qqʼuqbʼan qkʼuʼj qxolx (kjawil uʼjit Hebreos 10:24, 25). Qkyaqilx qgan tuʼn qbʼin tiʼj kyyol teyele junjun kyoj chmabʼil. Jun techel, qgan tuʼn qbʼin kyiʼj tal kʼwaʼl tuʼnju nya kwest kyyol ex toj kyanmi in jatz. Ax ikx in qo tzalaj aj ttzaj tchikʼbʼaʼn jun erman jun akʼaj axix tok otoq tzeʼl tnikʼ tiʼj. Ex in qo jaw labʼin kyiʼj qeju in ten kyipumal tuʼn ttzaj kyqʼoʼn jun kyyol maske at t-xobʼil kyiʼj moqa tzma in bʼant kyyolin toj qyol (1 Tes. 2:2). ¿Tzeʼn jaku kubʼ qyekʼin qa in nok qqʼoʼn toklen aju in bʼant kyuʼn? Jun tten, bʼaʼn tuʼn t-xi qqʼoʼn chjonte kye aj tbʼaj chmabʼil ex tuʼn t-xi qqʼamaʼn qa ma tzʼonin kyyol qiʼj. Juntl tten, aju tuʼn t-xi qqʼoʼn jun qe qyol. Iktzun tten nya oʼkx tzul qkʼamoʼn qʼuqbʼil qkʼuʼj, sino ax ikx kxel qqʼoʼn qʼuqbʼil kykʼuʼj txqantl (Rom. 1:11, 12).

7. ¿Alkye tten kʼonil qiʼj aj t-xi qqʼoʼn qyol kyoj chmabʼil?

⁷ In nonin qiʼj aj t-xi qqʼoʼn qyol (Is. 48:17). ¿Alkye tten in nonin qiʼj? Tnejel,  qa ma kubʼ qximen tuʼn tjaw qiʼn qqʼabʼ, kbʼajel qbʼinchaʼnxix qten kyiʼj chmabʼil, mas kʼelel qnikʼ tiʼj Tyol Dios ex kbʼel qbʼinchaʼn aju kʼelel qnikʼ tiʼj. Tkabʼin, maslo qo tzalajel kyiʼj chmabʼil tuʼnju ktel qoklen kyoj. Ex toxin, tuʼnju in nok tilil quʼn tuʼn t-xi qqʼamaʼn qyol, in nonin jlu qiʼj tuʼn kykyaj nabʼil toj qwiʼ.

8, 9. a) Ik tzeʼn in tzaj qʼamaʼn toj Malaquías 3:16, ¿tiʼ t-ximbʼetz Jehová at qiʼj aj tok tilil quʼn tuʼn t-xi qqʼoʼn qyol kyoj chmabʼil? b) ¿Tiʼ jaku kubʼ kynaʼn junjun erman?

⁸ In tzalaj Jehová qiʼj aj qyolin tiʼjju nimen quʼn. Jaku tzʼok qeʼ qkʼuʼj tiʼj qa in qo tzaj tbʼiʼn Jehová ex in nok tqʼoʼn toklen aj tok tilil quʼn tuʼn t-xi qqʼoʼn jun qyol kyoj chmabʼil (kjawil uʼjit Malaquías 3:16). Ax ikx, in tzaj tyekʼin tkʼujlabʼil qiʼj aj qtzaj tkʼiwlaʼn (Mal. 3:10).

⁹ In nel qnikʼ tiʼj qa at nim tiquʼn tuʼn t-xi qqʼoʼn qyol kyoj chmabʼil. Maske ikju, atlo junjun in che tzaj xobʼ tuʼn tjaw kyiʼn kyqʼabʼ. Qa a jlu in bʼaj tiʼja, miʼn bʼaj tkʼuʼja. Qo xnaqʼtzal kyiʼj junjun nabʼil ex techel toj Tyol Dios, ex tiʼj junjun tumel jaku che onin qiʼj tuʼn t-xi qqʼoʼn qyol kyoj chmabʼil.

10. a) ¿Tiʼ in kubʼ tnaʼn nim qe? b) ¿Tiquʼn at maj toj tumel aj qtzaj xobʼ aj t-xi qqʼoʼn jun qyol?

¹⁰ ¿In tzajpe salin tiʼja tuʼn tjaw tiʼna tqʼabʼa kyoj chmabʼil? Qa ikju, miʼn kubʼ t-ximana qa oʼkx tiʼja in bʼaj jlu. Qkyaqilx in qo tzaj xobʼ aj t-xi qqʼoʼn jun qyol. Pero qa tuʼn jlu mintiʼ in xi tqʼoʼna tyola, il tiʼj tuʼn te tnikʼa tiʼj tiquʼn in tzaj xobʼa. ¿In bʼajpe jlu tuʼnju in kubʼ t-ximana qa jaku tzʼel naj tyola toj twiʼya moqa tuʼnju jaku txi tqʼamaʼna jun tiʼ nya toj tumel? ¿In tzajpe bʼaj tkʼuʼja tuʼnju mlay txi tqʼoʼna jun tbʼanel tyola ik tzeʼn kye txqantl? Qa ikju, jaku tzaj kyyekʼin jlu qa mintiʼ in jaw tnimsan tibʼa ex qa in nok tqʼoʼna kyoklen txqantl. Tgan Jehová qe xjal mintiʼ in jaw kynimsan kyibʼ (Sal. 138:6; Filip. 2:3). Noqtzun tuʼnj, ax ikx taj Jehová tuʼn tjaw tnimsaʼna ex tuʼn  t-xi tqʼuqbʼaʼna kykʼuʼj erman kyoj chmabʼil (1 Tes. 5:11). Kʼujlaʼna tuʼn Jehová ex tzul tqʼoʼn tipumala tuʼn tbʼant jlu tuʼna.

11. ¿Alkyeqe nabʼil toj Tyol Dios jaku che onin qiʼj?

¹¹ Qo xnaqʼtzan kyiʼj junjun nabʼil toj Tyol Dios. In tzaj tqʼamaʼn Xjan Uʼj qe qa qkyaqilx in qo el txalpaj aj qyolin (Sant. 3:2). Mintiʼ in nayon Jehová tuʼn qok te tzʼaqli, ax ikx qe erman mintiʼ in che ayon tiʼj jlu (Sal. 103:12-14). In che ok erman ik tzeʼn qe toj qja ex kʼujlaʼn qoʼ kyuʼn (Mar. 10:29, 30; Juan 13:35). In nel kynikʼ qiʼj qa at maj in qo el txalpaj aj t-xi qqʼoʼn jun qyol.

12, 13. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Nehemías ex Jonás?

¹² Qo xnaqʼtzan kyiʼj junjun techel jaku che onin qiʼj tuʼntzun miʼn qtzaj xobʼ. Qbʼinx aju bʼaj tiʼj Nehemías, aju ajbʼen toj tja jun aj kawil nim toklen. Tzaj nimxix tbʼis tej tok tbʼiʼn qa otoq bʼaj xiten tlamel ex tmuro tnam Jerusalén (Neh. 1:1-4). Jaku qo ximen tiʼjju xobʼajil tzaj tiʼj tej t-xi tqanin aj kawil te tiquʼn in bʼisintoq. Naʼmxtoq t-xi ttzaqʼweʼn Nehemías, jun rat bʼant jun naʼj Dios tuʼn. Noq tuʼn jlu, onin aj kawil tiʼj ttnam Dios (Neh. 2:1-8). Aju techel kyaj tqʼoʼn Nehemías in tzaj tyekʼin qe qa nim toklen tuʼn qnaʼn Dios naʼmx t-xi qqʼoʼn jun qyol. Ax ikx qo ximen tiʼj Jonás. Tej t-xi tqʼamaʼn Jehová te tuʼn t-xiʼ yolil kyukʼil xjal najli toj tnam Nínive, tzaj nimxix t-xobʼil ex xi tiʼn junxitl bʼe (Jon. 1:1-3). Pero tuʼnju onin Dios tiʼj, xi tbʼinchaʼn aju tzaj qanin te ex nimxix onin qe tyol kyiʼj xjal te tnam Nínive (Jon. 3:5-10). Aju bʼaj tiʼj Jonás in tzaj tyekʼin qe qa jaku tzʼonin Jehová qiʼj tuʼn qajbʼen te maske nimxix in qo tzaj xobʼ. Ex mlay tzaj nim qxobʼil kywitz erman ik tzeʼn kywitz xjal te Nínive.

¹³ ¿Alkyeqe nabʼil jaku che onin qiʼj tuʼn t-xi qqʼoʼn tbʼanel qyol tuʼn qonin kyiʼj erman? Qo xnaqʼtzan kyiʼj junjun.

14. a) ¿Tiquʼn il tiʼj tuʼn tbʼajxix qbʼinchaʼn qten kyiʼj chmabʼil? b) ¿Alkye qʼij jaku kubʼ qbʼinchaʼn qten?

¹⁴ Qbʼincham qten kyiʼj kykyaqil chmabʼil. Nya kwest tuʼn t-xi qqʼoʼn qyol qa ma tzeʼl qpaʼn ambʼil tuʼn tbʼaj qbʼinchaʼn qten kyiʼj chmabʼil (Prov. 21:5). Ax tok, teyele junjun qe in bʼant junxichaq tiʼchaq tuʼn. Jun ermana mintiʼ tchmil, Eloise tbʼi, aju qʼiʼn mas te 80 abʼqʼi tuʼn, in xnaqʼtzan tiʼj uʼj Aju Xqʼuqil aj t-xi tzyet seman. In tzaj tqʼamaʼn jlu: «Nim in chin tzalaje kyiʼj chmabʼil qa in bʼaj nbʼinchaʼne ntene naʼmxtoq tpon qiʼj tuʼn kyok». Atzunte Joy, jun ermana in naqʼunan toj tkyaqil ambʼil, in tzaj tqʼamaʼn qa in kubʼ t-xnaqʼtzaʼn uʼj Aju Xqʼuqil jun qʼij naʼmxtoq tok chmabʼil tuʼntzun ttzaj tnaʼn xnaqʼtzbʼil. Ex jun ansyan Ike tbʼi, aju at nim taqʼun ex in najbʼen te precursor in tzaj tqʼamaʼn jlu: «O tzʼel nnikʼe tiʼj qa mas bʼaʼn tuʼn nxnaqʼtzane jun rat  junjun qʼij twitzju tuʼn tkubʼ nxnaqʼtzaʼne tkyaqil toj junx qʼij».

15. ¿Alkye tten jaku bʼaj qbʼinchaʼn qten kyiʼj chmabʼil?

¹⁵ ¿Alkye tten jaku bʼaj qbʼinchaʼn qten kyiʼj chmabʼil? Tnejel bʼaʼn tuʼn t-xi qqanin te Jehová tuʼn tonin xewbʼaj xjan qiʼj (Luc. 11:13; 1 Juan 5:14). Yajxitl, jaku tzʼel qpaʼn junjun minut tuʼn qximen tiʼj alqiʼj kyolil xnaqʼtzbʼil, tiʼj tbʼi, kyiʼj subtítulo, kyiʼj tilbʼilal ex kyiʼj recuadro. Aj tbʼant jlu quʼn, bʼaʼn tuʼn t-xi tzyet qxnaqʼtzan tiʼj teyele junjun taqikʼ ex bʼaʼn tuʼn tjaw quʼjin kykyaqil texto qa jaku bʼant. Qo ximen tiʼjju xnaqʼtzbʼil ex mas kyiʼj nabʼil qaj tuʼn qyolin tiʼj. Qa ma bʼaj qbʼinchaʼnxix qten, mas kʼonil qiʼj ex mas nya kwest tuʼn t-xi qqʼoʼn qyol kyoj chmabʼil (2 Cor. 9:6).

16. ¿Alkyeqe onbʼil jaku che ajbʼen tuʼna, ex tzeʼn in che ajbʼen tuʼna?

¹⁶ Bʼaʼn tuʼn kyajbʼen qe onbʼil quʼn. O tzaj tqʼoʼn ttnam Jehová nim onbʼil toj kʼuxbʼil tuʼntzun tonin qiʼj tuʼn tbʼaj qbʼinchaʼn qten. Aju aplicación JW Library^® in tzaj tqʼoʼn ambʼil tuʼn tkutz qiʼn qe quʼj toj qcelular moqa toj qtableta tuʼntzun tkubʼ qxnaqʼtzaʼn. Iktzun tten jaku jaw quʼjin moqa jaku tzʼok qbʼiʼn toj alkyexku ambʼil ex jaxku tumel. Ateʼ junjun in najbʼen aplicación lu kyuʼn tuʼn kyxnaqʼtzan aj kyajlan jun rat toj aqʼuntl ex qa toj tja xnaqʼtzbʼil moqa aj kyxiʼ toj jun kybʼe. Ax ikx mas nya kwest tuʼn tel qnikʼ kyiʼj junjun xnaqʼtzbʼil nim kyoklen qa ma tzʼajbʼen KʼUBʼIL UʼJ TOJ INTERNET Watchtower^™ quʼn moqa aju qtembʼil jw.org.

17. a) ¿Tiquʼn tbʼanel qa ma bʼaj qbʼinchaʼn nim qyol? b) Tuʼnju ma tzʼok tkeʼyina video Tzʼoka te tamiw Jehová: Bʼinchankuxix qe tyola, ¿tiʼ ma tzʼel tnikʼa tiʼj?

¹⁷ Qa jaku bʼant, qbʼincham nim qyol toj junjun xnaqʼtzbʼil. ¿Tiquʼn? Tuʼnju nya tkyaqil maj tzul qʼoʼn ambʼil qe tuʼn qyolin aj tjaw qiʼn qqʼabʼ. Bʼalo junx jaku jaw tiʼna tqʼabʼa kyukʼil txqantl ex jaku txi tqʼoʼn erman qʼil twitz xnaqʼtzbʼil ambʼil te juntl erman tuʼn tyolin. Ax ikx, atlo maj mlay tzaj tqʼoʼn erman ambʼil tuʼn kyyolin kykyaqilx tuʼntzun miʼn tikʼ tibʼaj ambʼil bʼantni tiʼj tuʼn tex tqʼoʼn xnaqʼtzbʼil. Tuʼntzunju, miʼn tzaj qbʼis ex miʼn ttzaj bʼaj qkʼuʼj qa mintiʼ ma tzaj qʼoʼn ambʼil tuʼn t-xi qqʼoʼn qyol kyoj qeju tnejel taqikʼ. Aj tbʼaj qbʼinchaʼn nim qyol jaku tzaj qʼoʼn ambʼil qe tuʼn t-xi qqʼoʼn jun. Juntl tiʼ jaku bʼant quʼn aju tuʼn tjaw quʼjin jun taqikʼ Tyol Dios. Ex bʼaʼn tuʼn tok tilil quʼn tuʼn miʼn tjaw quʼjin toj uʼj aj t-xi qqʼamaʼn jun qyol. *

18. ¿Tiquʼn tbʼanel tuʼn t-xi qqʼoʼn qe yol chʼin kyqan?

 ¹⁸ Bʼaʼn tuʼn t-xi qqʼoʼn qyol chʼin kyqan. Chʼixme tkyaqil maj mas in che onin qe yol chʼin kyqan ex nya kwest. Tuʼntzunju tzʼok tilil quʼn tuʼn t-xi qqʼoʼn qyol te 30 segundos (Prov. 10:19; 15:23). Tbʼanel tuʼn tkubʼ kyqʼoʼn qeju ma tzʼel ambʼil in che ajbʼen te Jehová jun tbʼanel techel tiʼj jlu. Qa ma txi kyqʼoʼn jun kyyol maʼ tqan toj nim ambʼil, jaku tzaj bʼaj kykʼuʼj txqantl ex mlay jaw kyiʼn kyqʼabʼ tuʼnju kbʼel kyximen qa mlay bʼant txi kyqʼoʼn jun kyyol ik tzeʼn kye. Ex qa ma txi qqʼoʼn jun qyol chʼin tqan, kxel qqʼoʼn ambʼil tuʼn kyyolin txqantl. Qa ma tzaj qʼoʼn ambʼil tuʼn qyolin tnejel, bʼaʼn tuʼn t-xi qqʼoʼn qyol klarxix wen ex toj tumel, ex mintiʼ tuʼn qyolin tiʼj tkyaqil tqanil nim toklen tkubʼ toj taqikʼ. Qa otoq txi qʼamet xnaqʼtzbʼil nim toklen, jaku yolina kyiʼj junjuntl tqanil (qʼonka twitza tiʼj recuadro « Aj t-xi nqʼoʼne jun nyole ¿tiʼ jaku txi nqʼamaʼne?»).

19. ¿Tzeʼn jaku tzʼonin erman qʼil twitz xnaqʼtzbʼil qiʼj ex tiʼ kbʼantel quʼn?

¹⁹ Bʼaʼn tuʼn t-xi qqʼamaʼn te erman qʼil twitz xnaqʼtzbʼil qa qaj tuʼn t-xi qqʼoʼn jun qyol toj jun taqikʼ. Qa ma kubʼ qximen tuʼn tbʼant jlu quʼn, bʼaʼn tuʼn qyolin tukʼil erman naʼmx t-xi tzyet chmabʼil. At tpon toj taqikʼ jatumel qaj tuʼn t-xi qqʼoʼn qyol, jun rat naj kjawil qiʼn qqʼabʼ ex kjawil qiʼn najchaq tuʼntzun tok tkeʼyin erman.

20. ¿Tiquʼn chʼixme ik kyten chmabʼil ik tzeʼn jun wabʼj kyukʼil qamiw?

²⁰ Ik kyten chmabʼil ik tzeʼn jun qwa kyukʼil qamiw. Qa ma qo tzaj txkoʼn wal kyuʼn junjun erman ex in tzaj kyqʼamaʼn qe qa jaku txi qiʼn jun tiʼ, ¿tiʼ kbʼantel quʼn? Jakulo qo tzaj xobʼ tnejel, pero kʼokel tilil quʼn tuʼn t-xi qiʼn jun tiʼ tbʼanel in nel kye kykyaqil. Kyoj chmabʼil, a Jehová in tzaj qʼonte txokbʼil qiʼj ex in bʼaj tbʼinchaʼn jun mes kyukʼil tbʼanel tiʼchaq (Sal. 23:5; Mat. 24:45). Tgan tuʼn qonin tukʼil jun qyol, aju mas tbʼanel jaku bʼant quʼn. Tuʼntzunju, tzʼok tilil quʼn tuʼn tbʼaj qbʼinchaʼnxix qten ex qqʼonx qyol kyoj chmabʼil. Iktzun tten nya oʼkx qo waʼl tiʼj tmes Jehová, sino ax ikx qo onil tuʼn tbʼant axju kyuʼn txqantl.