1, 2. a) ¿Tiquʼn jaku kubʼ qximen qa kyaj t-xnaqʼtzaʼn Jesús tuʼn miʼn tajbʼen nim tiʼchaq quʼn aj tkubʼ qikʼsaʼn tkyimlen? b) ¿Alkyeqe tmod Jesús qo xnaqʼtzal tiʼj?

¿JAKU bʼant tuʼn ttzaj tqʼamaʼna aju in bʼant quʼn kykyaqil abʼqʼi toj Nabʼitz Tkyimlen Jesucristo? Qʼuqli qkʼuʼje tiʼj qa jaku tuʼnju mintiʼ in bʼant nim tiʼchaq quʼn toj ikʼsabʼil lu. Noqtzun tuʼnj, atlo jun jaku kubʼ t-xjelin jlu: «¿Tiquʼn mintiʼ in bʼant nim tiʼchaq toj ikʼsabʼil lu aju nim toklen?».

² Tej tanqʼin Jesús tzalu twitz Txʼotxʼ, tkyaqil maj xi t-xnaqʼtzaʼn axix tok tojxix tumel ex toj jun tten nya kwest tuʼn tel qnikʼ tiʼj (Mat. 7:28, 29). Chʼixmi axju bʼant tuʼn tej tkyaj t-xnaqʼtzaʼn tuʼn tkubʼ ikʼset tkyimlen tuʼnju mintiʼ ajbʼen nim tiʼchaq tuʼn, noqtzun tuʼnj, nim toklen qʼij lu. * Qo xnaqʼtzaʼn tiʼj ikʼsabʼil lu ex tiʼj junjun tiʼchaq tqʼama Jesús ex bʼant tuʼn. Kʼonil jlu qiʼj tuʼn tel qnikʼ tiʼj tej tkubʼ tin tibʼ, tej mintiʼ tzaj xobʼ ex tiʼj tkʼujlabʼil. Ax ikx kʼelel qnikʼ tiʼj tiʼ kbʼantel quʼn tuʼntzun qok ik tzeʼn te.

3. Aj tjaw quʼjin Mateo 26:26 a 28, ¿tiquʼn in xi qqʼamaʼn qa nya kwest tuʼn tkubʼ ikʼset Nabʼitz Tkyimlen Jesucristo, ex tiʼ in kubʼ techlaʼn pan ex vino?

³ Kyaj bʼant tiʼj Nabʼitz Tkyimlen Jesucristo tuʼn kyukʼil qeju 11 t-apóstol kukx e ok lepeʼ tiʼj. Toj ikʼsabʼil lu oʼkx ajbʼen pan mintiʼ tsamel tuʼn Jesús ex aju vin otoq kyaj tiʼj Xjan Qʼij (kjawil uʼjit Mateo 26:26-28). Xi tqʼamaʼn kye  t-xnaqʼtzbʼen qa aʼye kabʼe tiʼchaq lu kubʼ kyechlaʼn aju t-xmilal tzʼaqli ex aju tchkʼel chʼixtoq txi tqʼoʼn kyiʼj. Mintiʼlo e jaw labʼin t-apóstol tiʼj akʼaj Wabʼj nya kwest tuʼn tbʼant. ¿Tiquʼn?

4. ¿Tzeʼn in nonin qiʼj aju nabʼil xi tqʼoʼn Jesús te Marta tuʼn miʼn tajbʼen nim tiʼchaq quʼn aj tkubʼ qikʼsaʼn tkyimlen?

⁴ Bʼaʼn tuʼn ttzaj qnaʼn aju bʼant tuʼn Jesús toj toxin abʼqʼi tej t-xi tzyet tuʼn tpakbʼan. Pon visitaril Lázaro, Marta ex María. Akux attoq kyja ok ten qʼol xnaqʼtzbʼil kye. Attoq Marta kyukʼil, pero oʼkx ok tqʼoʼn twiʼ kyiʼj tiʼchaq tuʼntzun tbʼaj tbʼinchaʼn jun tbʼanel wabʼj te Jesús. Atzunte Jesús xi tkawin te tukʼil kʼujlabʼil tej t-xi tqʼamaʼn qa nya il tiʼj tuʼn tbʼant nim wabʼj (Luc. 10:40-42). Tejtzun tpon ambʼil tuʼn tkubʼ tikʼsaʼn Wabʼj te Qale tuʼnju chʼixtoq t-xi tqʼoʼn tchwinqlal te chojbʼil, axju bʼant tuʼn ik tzeʼn otoq tqʼama te Marta. Bʼaj tbʼinchaʼn jun ikʼsabʼil jatumel mintiʼ ajbʼen nim tiʼchaq tuʼn. ¿Tiʼ in tzaj t-xnaqʼtzaʼn jlu qe tiʼj Jesús?

5. Tuʼnju mintiʼ in najbʼen nim tiʼchaq toj Nabʼitz Tkyimlen Jesucristo, ¿tiʼ in tzaj t-xnaqʼtzaʼn jlu qe tiʼj ex tiʼ toklen jlu tukʼilju in tzaj tqʼamaʼn Filipenses 2:5 a 8?

⁵ Tuʼn tkyaqilju tqʼama Jesús ex aju bʼant tuʼn, kyaj tyekʼin qa kubʼ tin tibʼ. Tuʼntzunju mintiʼ in qo jaw labʼin tiʼj tej tkubʼ tyekʼin tmod lu toj qonikʼen tej naʼmxtoq tkyim (Mat. 11:29). Ojtzqiʼntoq tuʼn qa chʼixtoq tpon ambʼil tuʼn t-xi tqʼoʼn jun matij chojbʼil ex ok qeʼ tkʼuʼj tiʼj qa kjawiltoq anqʼin tuʼn Jehová tuʼntzun tok qʼoʼn toklen te aj Kawil toj kyaʼj. Ojtzqiʼntoq jlu tuʼn, pero mintiʼ kubʼ t-ximen tuʼn tok bʼaj kywitz txqantl tiʼj. Kyjuʼtzun, mintiʼ bʼant nim tiʼchaq tuʼn tuʼntzun ttzaj qnaʼn tkyimlen. Noq oʼkx xi tqʼamaʼn kye t-xnaqʼtzbʼen tuʼn tkubʼ kyikʼsaʼn tkyimlen jun maj toj abʼqʼi kyukʼil nya nim tiʼchaq ex toj tumel (Juan 13:15; 1 Cor. 11:23-25). Tuʼn jlu kubʼ tyekʼin qa mintiʼ jaw tnimsan tibʼ. In qo tzalaj tiʼj tmod Jesús lu, aju Qrey at toj kyaʼj (kjawil uʼjit Filipenses 2:5-8).

6. ¿Tzeʼn jaku tzʼel qkanoʼn tiʼj Jesús tej tkubʼ tin tibʼ aj qikʼ toj yajbʼil?

⁶ Jun tten tuʼn tel qkanoʼn tiʼj Jesús tej tkubʼ tin tibʼ, aju qa ma qo ximen kyiʼj txqantl ex nya oʼkx tuʼn qximen qiʼjx (Filip. 2:3, 4). Qo ximen tiʼjju bʼant tuʼn toj qonikʼen tej naʼmxtoq tkyim. Ojtzqiʼntoq tuʼn qa chʼixtoq tkubʼ bʼyoʼn, noqtzun tuʼnj, mas ximen tiʼjju bʼis tuʼn ttzaj kyiʼj t-xnaqʼtzbʼen. Tuʼntzunju, el tpaʼn ambʼil tuʼn tten kyukʼil  toj qonikʼen aju tuʼntzun t-xi tqʼoʼn xnaqʼtzbʼil kye, tuʼn t-xi tqʼoʼn kyipumal ex tuʼn t-xi tqʼuqbʼaʼn kykʼuʼj (Juan 14:25-31). Tuʼn jlu kyaj tyekʼin qa mas ximen kyiʼj txqantl ex nya oʼkx tiʼjx. Kyaj tqʼoʼn jun tbʼanel techel qwitz tuʼn tkubʼ qin qibʼ.

7. Tej tzmatoq in kyaj bʼant tiʼj Wabʼj te Qale tuʼn Jesús, ¿tzeʼn kubʼ tyekʼin qa mintiʼ tzaj xobʼ?

⁷ Tej tzmatoq in kyaj bʼant tiʼj Wabʼj te Qale tuʼn Jesús, kubʼ tyekʼin qa mintiʼ tzaj xobʼ. ¿Tzeʼn kubʼ tyekʼin jlu? Kubʼ tyekʼin tej tkubʼ t-ximen tuʼn tbʼant tajbʼil Jehová tuʼn maske kbʼeltoq tchʼixwi aj t-xi qʼamaʼn nya ax tok yol tiʼj ex kbʼeltoq bʼyoʼn (Mat. 26:65, 66; Luc. 22:41, 42). Ten tzʼaqli twitz Jehová toj tkyaqil tten ex jaw tnimsaʼn tbʼi, ax ikx kolin tiʼj toklen Ttat tuʼn tkawin ex noq tuʼnju kyim, jaku che anqʼin xjal te jumajx qa ma tzʼajtz tiʼj kyanmi. Ax ikx e bʼaj t-xnaqʼtzaʼn qe t-xnaqʼtzbʼen tuʼn tikʼx nya bʼaʼn kyuʼn aj kyok weʼ twitz.

8. a) ¿Tiʼ xi tqʼamaʼn Jesús kye t-apóstol kukx e ok lepeʼ tiʼj? b) ¿Tzeʼn kubʼ kyyekʼin t-xnaqʼtzbʼen Jesús qa el kykanoʼn tiʼj tej mintiʼ tzaj xobʼ?

⁸ Ax ikx kubʼ tyekʼin Jesús qa mintiʼ tzaj xobʼ tej mintiʼ tzaj bʼaj tkʼuʼj tiʼjx, sino atz bʼaj tkʼuʼj kyiʼj t-apóstol kukx e ok lepeʼ tiʼj ex ximen tiʼjju jakutoq tzʼonin kyiʼj. Tej otoqxi tqʼama te Judas tuʼn tikʼ bʼet, kyaj bʼant tiʼj jun ikʼsabʼil tuʼn kyukʼil t-xnaqʼtzbʼen skʼoʼn maj ex tuʼn jlu tzul kynaʼn qeju kʼiwlabʼil tzul tiʼn chojbʼil bʼant tuʼn ex qa ktel kyoklen tiʼj akʼaj yol (1 Cor. 10:16, 17). Tuʼn tonin Jesús kyiʼj t-xnaqʼtzbʼen tuʼn kukx kyajbʼen te ex tuʼn kyten tukʼil toj kyaʼj, xi tqʼamaʼn tiʼ tajtoq tuʼn tbʼant kyuʼn ex tiʼ tajtoq Jehová (Juan 15: 12-15). Ax ikx yolin kyiʼj nya bʼaʼn che okel weʼtoq twitz ex xi tqʼamaʼn kye tuʼn miʼn  kytzaj xobʼ ik tzeʼn te mintiʼ otoq tzaj xobʼ (Juan 16:1-4a, 33). Tej tikʼ mas abʼqʼi, kubʼ kyyekʼin t-xnaqʼtzbʼen qa kukx el kykanoʼn tmod tuʼnju mintiʼ e tzaj xobʼ ex kubʼ kyyekʼin qa jakutoq che kyim noq tuʼn kyonin kyiʼj kyukʼil (Heb. 10:33, 34).

9. ¿Tzeʼn jaku tzʼel qkanoʼn tiʼj Jesús tej mintiʼ tzaj xobʼ?

⁹ Ax ikx toj ambʼil jaʼlo, in nel qkanoʼn techel kyaj tqʼoʼn Jesús tej mintiʼ tzaj xobʼ. ¿Tzeʼn jaku bʼant jlu quʼn? Aj qonin kyiʼj erman in che el ikʼun noq tuʼnju nimen kyuʼn. At maj in che okx qʼoʼn junjun toj cárcel maske mintiʼ kyil. Toj ambʼil lu, kʼokel tilil quʼn tuʼn qonin kyiʼj ik tzeʼn aj qnaʼn Dios ex aj qkolin kyiʼj kywitz xjal at kyoklen toj jun kawbʼil ex qa kywitz jwes (Filip. 1:14; Heb. 13:19). Qa kukx ma tzʼok tilil quʼn tuʼn qpakbʼaʼn, atzun juntl tten tuʼn tkubʼ qyekʼin qa mintiʼ in qo tzaj xobʼ (Hech. 14:3). Ik tzeʼn bʼant tuʼn Jesús, ax ikx qe o kubʼ qximen tuʼn qpakbʼan tqanil tiʼj Tkawbʼil Dios maske jaku qo el ikʼun ex jakulo tzʼok bʼinchaʼn nya bʼaʼn qiʼj. Noqtzun tuʼnj, ¿tiʼ jaku bʼant quʼn qa kukx in qo tzaj xobʼ?

10. ¿Tiʼ kbʼantel quʼn kyoj seman naʼmxtoq tok Nabʼitz Tkyimlen Jesucristo, ex tiquʼn?

¹⁰ Juntl tiʼ kʼonil qiʼj tuʼn miʼn qtzaj xobʼ, aju qa ma qo ximen tiʼj qʼuqbʼil qkʼuʼj at tiʼj ambʼil tzul noq tuʼn chojbʼil bʼant tuʼn Jesús (Juan 3:16; Efes. 1:7). Aqeju seman naʼmxtoq tpon ambʼil tuʼn tok Nabʼitz Tkyimlen Jesucristo, atzun jun ambʼil bʼaʼn tuʼn t-xi qqʼoʼn chjonte tiʼj chojbʼil. Kyoj qe qʼij aju, bʼaʼn tuʼn qok lepeʼ kyiʼj taqikʼ Tyol Dios che jawil uʼjit ex qo ximen kyiʼj tiʼchaq bʼaj tej tkubʼ bʼyoʼn Jesús. Ajtzun tpon ambʼil tuʼn tok qchmon qibʼ toj Wabʼj te Qale te Jesús, mas kʼelel qnikʼ tiʼj tiʼ t-xilen pan ex vin, ex tiʼj chojbʼil. Kchʼiyil qʼuqbʼil qkʼuʼj ex ktel qipumal tuʼn kukx  qajbʼen te Jehová ajxi tul xitbʼil aj tel qnikʼ tiʼjju bʼant tuʼn Jehová ex Jesús qiʼj, ex tiʼjju tbʼanel in tzaj qe ex kyiʼj toj qja (Heb. 12:3).

11, 12. ¿Tiʼ ma tzʼel qnikʼ tiʼj?

¹¹ Ma tzʼel qnikʼ tiʼj qa nya oʼkx in tzaj tnaʼn aju Wabʼj te Qale te Jesús qe aju toklen chojbʼil, sino ax ikx in tzaj tyekʼin qa kubʼ tin tibʼ Jesús ex qa mintiʼ tzaj xobʼ. In xi qqʼoʼn chjonte te tuʼnju kukx in kubʼ tyekʼin qe mod lu toj ambʼil jaʼlo ex a in nok te Tnejel Pal toj kyaʼj tuʼntzun tkubʼsan qiʼj twitz Jehová (Heb. 7:24, 25). Tuʼn tkubʼ qyekʼin qa in xi qqʼoʼn chjonte tiʼj jlu, kukx kxel qbʼiʼn kawbʼil kyaj tqʼoʼn tiʼjju tuʼn tkubʼ qikʼsaʼn tkyimlen (Luc. 22:19, 20). In bʼant jlu quʼn kykyaqil abʼqʼi toj qʼij in kubʼ tzʼaq tukʼilju 14 te nisán, aju qʼij mas nim toklen toj abʼqʼi.

¹² Aj qximen tiʼj qa mintiʼ in bʼant nim tiʼchaq toj Wabʼj te Qale te Jesús, in nel qnikʼ tiʼj juntl tbʼanel tmod Jesús, aju onin tiʼj tuʼn tkyim tuʼn qpaj. Kubʼ tyekʼin tbʼanel mod lu tej tanqʼin tzalu twitz Txʼotxʼ. Qo xnaqʼtzan tiʼj alkye.

13. ¿Tzeʼn in tzaj tqʼamaʼn Juan 15:9 ex 1 Juan 4:8 a 10 aju tkʼujlabʼil Jehová ex Jesús at qiʼj, ex alqiʼj in nonin kʼujlabʼil lu?

¹³ Tuʼn tkyaqilju bʼant tuʼn Jesús, kyaj tyekʼin tkʼujlabʼil Jehová at qiʼj (kjawil uʼjit Juan 15:9 ex 1 Juan 4:8-10). Tuʼnju ten tkʼujlabʼil Jesús qiʼj, xi tqʼoʼn tchwinqlal tuʼn qklet. Qa skʼoʼn maj qoʼ moqa atz atoʼ kyxol txqantl ẍneʼl, in tzaj tiʼn tbʼanel qe tej tkubʼ tyekʼin Jehová ex Jesús kykʼujlabʼil qiʼj tuʼn chojbʼil (Juan 10:16; 1 Juan 2:2). Qo xnaqʼtzan tiʼj tzeʼn in kubʼ tyekʼin Jesús tkʼujlabʼil ex qa in ximen kyiʼj t-xnaqʼtzbʼen tojju ikʼsabʼil te Wabʼj te Qale.

14. ¿Alkye tten kubʼ tyekʼin Jesús tkʼujlabʼil kyiʼj t-xnaqʼtzbʼen?

¹⁴ Ik tzeʼn ma tzʼel qnikʼ tiʼj, mintiʼ xi tqʼamaʼn Jesús kye t-xnaqʼtzbʼen tuʼn tkubʼ kybʼinchaʼn nim tiʼchaq aj ttzaj kynaʼn tkyimlen. Kyoj nim abʼqʼi, o kubʼ kyikʼsaʼn t-xnaqʼtzbʼen Jesús aju tkyimlen toj junxichaq ambʼil, axpe ikx qa ateʼ toj cárcel (Apoc. 2:10). ¿Ope japun kyuʼn aju kawbʼil kyaj tqʼamaʼn Jesús? O japun kyuʼn.

15, 16. ¿Alkye tten o kubʼ kyikʼsaʼn junjun erman aju Wabʼj te Qale te Jesús kyoj ambʼil kwest?

¹⁵ O tzʼok tilil kyuʼn tmajen Jehová tuʼn ttzaj kynaʼn tkyimlen Jesús ex kukx in bʼant kyuʼn tuʼntzun tjapun kawbʼil kyaj tqʼamaʼn Jesús, at maj kyoj ambʼil kwest. Qo xnaqʼtzan tiʼjju bʼaj tiʼj ermano Harold King. Tuʼnju mintiʼtoq tumel tzeʼn tuʼn tok tbʼiʼn tqanil kyiʼj txqantl tej tten toj jun cárcel toj tnam China, bʼaj t-ximen tzeʼn tuʼn tkubʼ tikʼsaʼn Nabʼitz Tkyimlen Jesucristo. Toj ewaj bʼaj tbʼinchaʼn qe tiʼchaq in che ajbʼen toj ikʼsabʼil lu, ex ajbʼen qeju tiʼchaq attoq tukʼil. Ax ikx ok tilil tuʼn tuʼn tel tnikʼ tiʼj alkye qʼij tuʼn tkubʼ tikʼsaʼn. Tejtzun tpon ambʼil, tjunalxtoq in bʼitzin, in naʼn Dios ex in nextoq tqʼoʼn jun chikʼbʼabʼil.

¹⁶ Qo xnaqʼtzan tiʼj juntl techel. Tej tok Tkabʼ Nimaq Qʼoj twitz Tkyaqil Txʼotxʼ, kubʼ kyximen jun kʼloj ermana tuʼn tkubʼ kyikʼsaʼn Wabʼj te Qale te Jesús tej kyten toj jun campo te concentración maske jakutoq tzaj nim nya bʼaʼn kyiʼj. Noq tuʼnju mintiʼ in bʼant nim tiʼchaq toj ikʼsabʼil lu, bʼant tuʼn tkubʼ kyikʼsaʼn toj ewaj. Kyqʼama jlu: «Ok qchmon qibʼe tiʼj jun qʼuqbʼil ex kubʼ qqʼoʼne jun xbʼalun saq tibʼaj jatumel kubʼ qqʼoʼne qe tiʼchaq e ajbʼen quʼne. Jakutoq tzʼel nikʼbʼaj qiʼje tuʼn luz, tuʼntzunju kubʼ qximane tuʼn tajbʼen jun kandel  quʼne. [...] Tuʼn jlu ok mas qipune tuʼn tjapun twi qyole xi qtziyene te Jehová tuʼn qonine tiʼj tuʼn tok tbʼi te xjan». ¡Tbʼanelxix qʼuqbʼil kykʼuʼj ten! Aj tkubʼ qikʼsaʼn Nabʼitz Tkyimlen Jesucristo axpe ikx kyoj ambʼil kwest, tuʼn jlu in nel qnikʼ tiʼj tkʼujlabʼil Jesús at qiʼj.

17. ¿Tiʼ bʼaʼn tuʼn tkubʼ qxjelin?

¹⁷ Akux in pon ambʼil tuʼn tok Nabʼitz Tkyimlen Jesucristo, bʼaʼn tuʼn tkubʼ qxjelin jlu: «¿Alkye tten jaku kubʼ nyekʼine mas nkʼujlabʼile ik tzeʼn te Jesús? ¿In chin ximane mas tiʼjju at tajbʼen kye wermane ex nya tiʼjju at tajbʼen weye? ¿In chin ayone tuʼn tbʼant nim tiʼchaq kyuʼn erman moqa in nel nnikʼe tiʼj jniʼ jaku bʼant kyuʼn?». Kukx qkanoʼmil tiʼj Jesús ex qo ximen kyiʼj txqantl (1 Ped. 3:8).

18, 19. a) ¿Tiʼ jaku tzʼok qeʼ qkʼuʼj tiʼj? b) ¿Tiʼ in kubʼ t-ximana tuʼn tbʼant tuʼna?

¹⁸ Toj chʼintl ambʼil, ya nya il tiʼj tuʼn tkubʼ qikʼsaʼn tkyimlen Jesucristo. Aj «tul» Jesús toj ambʼil te nimxix yajbʼil, che xel tiʼn «qeju skʼoʼmaj» ateʼx tzalu twitz Txʼotxʼ atz toj kyaʼj. Aj tpon ambʼil lu, ya miʼn kubʼ ikʼset Nabʼitz Tkyimlen Jesucristo (1 Cor. 11:26; Mat. 24:31).

¹⁹ Jaku txi qqʼamaʼn qa kukx tzul qnaʼn Wabʼj te Qale te Jesús tukʼil kʼujlabʼil aj tpon ambʼil jatumel ya mlay kubʼ ikʼset. Tzul qnaʼn techel kyaj tqʼoʼn Jesús tuʼnju mintiʼ jaw tnimsan tibʼ, mintiʼ tzaj xobʼ ex kubʼ tyekʼin tkʼujlabʼil qiʼj aju mlay bʼant tuʼn juntl xjal. Aqeju o che ten toj ikʼsabʼil lu, che yolil tiʼj kyukʼil qeju che anqʼil toj ambʼil tzul ex kʼonil jlu kyiʼj. Noqtzun tuʼnj, tuʼn tonin Nabʼitz Tkyimlen Jesucristo qiʼj toj ambʼil jaʼlo, nim toklen tuʼn tel qkanoʼn tiʼj Jesús tej tkubʼ tin tibʼ, tej mintiʼ tzaj xobʼ ex tiʼj tkʼujlabʼil. Qa ma bʼant jlu quʼn, jaku tzʼok qeʼ qkʼuʼj tiʼj qa tzul tkʼiwlaʼn Jehová qoʼ (2 Ped. 1:10, 11).