1-3. a) ¿Tiʼ kʼonil qiʼj tuʼn kukx qajbʼen te Jehová kyoj bʼajsbʼil tqʼijlalil? b) ¿Tiʼ qo xnaqʼtzal tiʼj toj xnaqʼtzbʼil lu?

ATOʼ toj jun ambʼil jatumel chʼix tul xitbʼil tiʼj tkyaqil nya bʼaʼn. Aqeju xjal nya bʼaʼn kukx in «che chʼiy ik tzaʼn kʼul» (Sal. 92:7). Tuʼntzunju, mintiʼ in qo jaw labʼin tiʼj qa mas in nel kyiʼn xjal toklen qe tkawbʼil Dios. Qa ikju, ¿alkye tten jaku qo ok te «kʼwal tiʼjuʼ myabʼaʼn», ex ax ikx tuʼn qok te «tij ichan tukʼiʼl» qximbʼetz? (1 Cor. 14:20, XT).

² In kanet tzaqʼwebʼil tiʼj xjel lu toj taqikʼ Tyol Dios jatumel ma jatz xnaqʼtzbʼil, aju in tzaj tqʼamaʼn jun piẍ kyjalu, «qe xjal in che niman te Qman, nneʼl kynikʼ tiʼj tkyaqil», toj juntl yol, tkyaqilju at tajbʼen tuʼn ttzalaj Jehová kyuʼn (Prov. 28:5). Chʼixmi ax ximbʼetz lu kkanetel tuʼna toj Proverbios 2:7, 9. In tzaj tqʼamaʼn qa «in onin Qman kyiʼj xjal in che anqʼin tuj tumelxix» tuʼntzun tten kynabʼil, ex aju in tzaj tuʼn jlu, in nel kynikʼ «tiʼj aju tjiqumal tiʼj ex aju tzʼaqlxix, ex tiʼj tkyaqil aju bʼaʼn tuʼn tbʼant».

³ El kynikʼ Noé, Daniel ex Job tiʼj tojtzqibʼil Jehová (Ezeq. 14:14). Ax jlu jaku txi qʼamet kyiʼj tmajen Jehová toj ambʼil jaʼlo. Yajtzun teya, ¿o tzʼel tnikʼa tiʼj tkyaqilju at tajbʼen tuʼn ttzalaj Jehová tiʼja?  Jaku tzeʼl tnikʼa tiʼj qa ma tzʼok tojtzqiʼna alkyexix Jehová. Tuʼntzunju, qo xnaqʼtzaʼn tiʼj oxe tiʼ. Tnejel, qo yolin tiʼj tzeʼn ok kyojtzqiʼn Noé, Daniel ex Job Jehová. Tkabʼ, alkye kʼiwlabʼil tzaj qʼoʼn kye tuʼnju ten kyojtzqibʼil. Ex toxin, tzeʼn jaku tten qʼuqbʼil qkʼuʼj ik tzeʼn kye.

4. a) ¿Tzeʼn ok tojtzqiʼn Noé Jehová? b) ¿Tiʼ onin tiʼj Noé tuʼn tokxix tojtzqiʼn Jehová?

⁴ Tzeʼn ok tojtzqiʼn Jehová. Atxix tej ttzaj ttzyet txʼolbʼabʼil tiʼj kyanqʼibʼil xjal, aʼyeqe xinaq ex xuʼj at qʼuqbʼil kykʼuʼj tiʼj Jehová, o tzʼok kyojtzqiʼn te toj oxe tten: aj tok kykeʼyin tbʼinchbʼen, aj tok kybʼiʼn junjuntl tmajen kukx in che ajbʼen te ex aj tok kykeʼyin kʼiwlabʼil in tzaj qa ma chex kynimen qe kawbʼil ex qe nabʼil in tzaj tqʼoʼn (Is. 48:18). Tej tok tkeʼyin Noé aju tbʼinchbʼen Jehová, el tnikʼ tiʼj qa ax tok at ex qa ateʼ nim tbʼanel tmod. Tuʼn jlu el tnikʼ tiʼj qa «aju tipumal mintiʼ bʼajsbʼil te», toj juntl yol, at nimxix tipumal Jehová, aju Dios axix tok (Rom. 1:20). Aju tbʼanel tzaj tuʼn jlu, nya oʼkx el tnikʼ Noé tiʼj qa at Jehová, sino ten nim qʼuqbʼil tkʼuʼj tiʼj.

5. ¿Tzeʼn el tnikʼ Noé tiʼjju tajtoq Jehová kye xjal?

⁵ In tzaj tqʼamaʼn Tyol Dios qa «in qo okslan tuʼnju yol in qbʼiʼn». A t-xilen jlu qa in nonin qiʼj aju in tzaj kyqʼamaʼn txqantl tuʼn tten qokslabʼil (Rom. 10:17). ¿Alkye yolin tukʼil Noé tiʼj Jehová? Jaku txi qqʼamaʼn qa e onin toj tja tiʼj, ik tzeʼn ttat, Lamec, jun xjal at nim qʼuqbʼil tkʼuʼj ex ul itzʼj tej kukxtoq at Adán. (Qʼonka twitza tiʼj tnejel tilbʼilal). Junjuntl xjal at kyxilen tukʼil Noé ten Matusalén, aju t-abuelo ex Jared, aju tatarabuelo, otoqxi tzikʼ oxe syent tukʼil 66 abʼqʼi tkyimlen tej tul itzʼj Noé (Luc. 3:36, 37). * Bʼalo xi kyxnaqʼtzaʼn te Noé kyukʼil kyxuʼjil qa tuʼn Dios e kubʼ tbʼinchaʼn qe xjal ex qa tajtoq tuʼn tten kykʼwaʼl, ex tuʼn tnoj twitz Txʼotxʼ kyuʼn ex tuʼn kyajbʼen te. Axlo ikx el tnikʼ Noé tiʼj qa mintiʼ e nimen Adán ex Eva Jehová, ex jakutoq tzʼok tqʼoʼn twitz kyiʼj nya bʼaʼn otoq tzaj tuʼn jlu (Gén. 1:28; 3:16-19, 24). Noq tiʼxku bʼaj, aju ok tojtzqiʼn Noé, kuʼpin toj tanmi ex onin tiʼj tuʼn tajbʼen te Jehová (Gén. 6:9).

6, 7. ¿Alkye tten onin qʼuqbʼil tkʼuʼj Noé tiʼj tokslabʼil?

⁶ In chʼiy qokslabʼil tuʼn qʼuqbʼil qkʼuʼj. Jaku kubʼ qximen tiʼ kubʼ tnaʼn Noé tej tok tbʼiʼn qa at toklen tbʼi tukʼilju tuʼn t-xi qʼuqbʼet kykʼuʼj xjal. Al-lo t-xilen tbʼi «Ojlabʼil» moqa «Qʼuqbʼel qkʼuʼj» (Gén. 5:29). Tuʼn tonbʼil Jehová tqʼama Lamec jlu tiʼj Noé: «Tzaj tqʼoʼn Qman sentens tibʼaj txʼotxʼ. Tuʼntzun jlu in qo aqʼnan nimxix. Atzunte kʼwaʼl lu kʼelel qʼinte aqʼuntl qiʼj, ex kqebʼel qkʼuʼj tuʼn». Ok qeʼ tkʼuʼj Noé tiʼj Jehová. Ex ik tzeʼn te Abel ex Enoc, ok qeʼ tkʼuʼj tiʼj qa kbʼel t-xiten «tiyjil xuʼj» twiʼ kan (Gén. 3:15).

⁷ Mintiʼlo el tnikʼ Noé tiʼj tkyaqil tqanil tiʼjju yol kyaj qʼamaʼn toj Génesis 3:15. Pero el tnikʼ tiʼj qa aqeju yol lu in tzajtoq tqʼuqbʼaʼn tkʼuʼj ex qa tuʼn tul jun kolbʼil. Otoq tpakbʼan Enoc jun tqanil chʼixmi ik tzeʼn jlu. Otoq txi tqʼamaʼn qa kbʼeltoq t-xiten Jehová qe xjal nya bʼaʼn (Jud. 14, 15). Aju tqanil lu, ok kjapunel mankbʼil maj twiʼ toj Armagedón, ex jaku txi qqʼamaʼn qa chʼiy tokslabʼil Noé tuʼn ex qa ten qʼuqbʼil tkʼuʼj tuʼn.

8. ¿Alkye tten ok xqʼuqin Noé tuʼnju tojtzqibʼil at tiʼj Jehová?

⁸ Tiʼ kʼiwlabʼil tzaj tkʼamoʼn Noé tej tok tojtzqiʼn Jehová. Tuʼn jlu ten nim qʼuqbʼil tkʼuʼj ex tnabʼil, aju tzaj tqʼoʼn Jehová. Ax ikx onin tiʼj tuʼn miʼn tkubʼ tbʼinchaʼn jun tiʼ nya toj tumel tuʼntzun miʼn ttzaj nya bʼaʼn tiʼj tamiwbʼil tukʼil Jehová. Jun techel, tuʼnju kukx bʼet Noé «tukʼil Dios», mintiʼ bʼet kyukʼil xjal mintiʼ xi kynimen Jehová. Ax ikx mintiʼ xi tqʼoʼn ambʼil tuʼn tkubʼ sbʼuʼn kyuʼn anjel e ok kyqʼon  kyibʼ te xjal. Atzun qeju xjal mintiʼ qʼuqbʼil kykʼuʼj, e jawlo labʼin tiʼj kyipumal qe anjel lu ex kubʼlo kyximen tuʼn kykʼulen kye (Gén. 6:1-4, 9). Atzunte Noé, ojtzqiʼntoq tuʼn qa otoq tzaj tqʼamaʼn Dios kye xjal tuʼn tten kykʼwaʼl ex tuʼn tnoj twitz Txʼotxʼ kyuʼn (Gén. 1:27, 28). Tuʼn jlu el tnikʼ tiʼj qa nya bʼaʼn tuʼn kykubʼ mojeʼ anjel kyukʼil xuʼj ex qa nya bʼaʼn tuʼn tul kykʼwaʼl kyukʼil. Ex mas el tnikʼ tiʼj jlu tej tok tkeʼyin qa matij qe kykʼwaʼl ex mastoq at kyipumal kywitz txqantl. Tej tbʼet ambʼil, tzaj tqʼamaʼn Jehová te Noé qa tzul tiʼn Nim Jbʼal. Ok qeʼ tkʼuʼj Noé tiʼjju tzaj tqʼamaʼn Jehová, tuʼntzunju kubʼ tbʼinchaʼn jun ark ex e klet qe toj tja (Heb. 11:7).

9, 10. ¿Tzeʼn jaku tzʼel qkanoʼn qʼuqbʼil tkʼuʼj Noé?

⁹ Tzeʼn jaku ten qʼuqbʼil qkʼuʼj ik tzeʼn te Noé. Jaku ten qʼuqbʼil qkʼuʼj ik tzeʼn te Noé qa ma qo ok te tbʼanel xnaqʼtzal tiʼj Tyol Dios, qa ma tzʼok qqʼoʼn toklen aju in nel qnikʼ tiʼj ex qa ma txi qqʼoʼn ambʼil te jlu tuʼn qbʼaj tchʼixpuʼn ex qa ma tzʼajbʼen quʼn aj tkubʼ qbʼinchaʼn jun tiʼ (1 Ped. 1:13-15). Iktzun tten kxqʼuqil qʼuqbʼil qkʼuʼj qiʼj ex qnabʼil kyiʼj qe tsbʼubʼil Satanás ex tiʼjju nya bʼaʼn at twitz txʼotxʼ (2 Cor. 2:11). Tuʼn sbʼubʼil lu in nok kykʼujlaʼn xjal bʼiybʼel ex yaẍbʼil, ex oʼkx in che ximen kyiʼj nya bʼaʼn achbʼil (1 Juan 2:15, 16). Axpe ikx qeju nya kyuw ateʼ toj kyokslabʼil, jaku tzikʼ tnaʼl kyuʼn qa noq chʼintl ambʼil atx tuʼn tul tqʼijlalil Jehová. Tej tok tmojbʼaʼn Jesús ambʼil jatumel in qo anqʼin tukʼilju te Noé, mintiʼ yolin tiʼj bʼiybʼel ex tiʼj yaẍbʼil, sino tiʼjju nya bʼaʼn jaku tzaj qa mintiʼ ma tzʼok qqʼoʼn qwiʼ tiʼj qajbʼebʼil te Jehová (kjawil uʼjit Mateo 24:36-39).

¹⁰ Jaku kubʼ t-xjelina jlu: «¿In kubʼpe nyekʼine tukʼil tten wanqʼibʼile qa ax tok ojtzqiʼn Jehová wuʼne? ¿In noninpe qʼuqbʼil nkʼuʼje wiʼje tuʼn t-xi nyekʼine qe tkawbʼil Jehová kye txqantl, ex nya oʼkx tuʼn kyxi nnimane?». Aju tzaqʼwebʼil in xi tqʼoʼna, in tzaj kyyekʼin qa in bʼeta junx tukʼil Dios axix tok.

11. a) ¿Alkye xnaqʼtzbʼil xi qʼoʼn te Daniel? b) ¿Alkye junjun tmod Daniel tajbʼila tuʼn tel tkanoʼna?

¹¹ Tzeʼn ok tojtzqiʼn Jehová. Jaku txi qqʼamaʼn qa xi qʼoʼn tbʼanel xnaqʼtzbʼil te Daniel kyuʼn ttat. Xi kyxnaqʼtzaʼn tuʼn tok tkʼujlaʼn Jehová ex Tyol. Mintiʼ chʼexpaj tkʼujlabʼil Daniel, quʼn ojtzqiʼn quʼn qa kukx xnaqʼtzan tiʼj Tyol Dios, axpe ikx tej ttijen (Dan. 9:1, 2). Aju tbʼanel tnaʼj Tdios Daniel in kanet quʼn toj Daniel 9:3-19, in tzaj tyekʼin qa ojtzqiʼnxix Jehová tuʼn ex aju otoq tbʼincha kyiʼj aj Israel. ¿Jakupe tzʼel qpaʼn ambʼil tuʼn tkubʼ quʼjin naʼj Dios lu ex tuʼn qximen tiʼj? Ximane tiʼj alkye xnaqʼtzbʼil jaku tzʼel tiʼna tiʼj Daniel.

12-14. a) ¿Tzeʼn kubʼ tyekʼin Daniel tnabʼil xi tqʼoʼn Jehová? b) ¿Alkye tten tzaj kʼiwlaʼn Daniel tuʼn Jehová tuʼnju kukx ajbʼen te ex tej mintiʼ tzaj xobʼ?

¹² Tiʼ kʼiwlabʼil tzaj tkʼamoʼn Daniel tej tok tojtzqiʼn Jehová. Kwest ela anqʼibʼil toj nya bʼaʼn tnam Babilonia kye aj Judiy kukx in che ajbʼen te Jehová. Jun techel, xi tqʼamaʼn Jehová kye aj Judiy tuʼn kyjyon tiʼj mojbʼabʼil toj tnam jatumel otoq che pon anqʼil (Jer. 29:7). Pero ax ikx tajtoq Jehová tuʼn oʼkx kyajbʼen te tuʼn tkyaqil kyanmi (Éx. 34:14). ¿Tzeʼn e japun kabʼe kawbʼil lu tuʼn Daniel? Tuʼn nabʼil xi tqʼoʼn Jehová te, el tnikʼ tiʼj qa il tiʼj tuʼn tniman tnejel te ex nya kywitz qe xjal in che kawin. Tej tikʼ nim syent abʼqʼi, kyaj t-xnaqʼtzaʼn Jesús ax tumel lu tzeʼn tuʼn qnimen kye aj kawbʼil (Luc. 20:25).

¹³ Ximana tiʼjju bʼant tuʼn Daniel tej tkubʼ qʼoʼn jun ley jatumel in tqʼamaʼntoq qa mintiʼ tuʼn kynaʼn xjal dios te alkyexku juntl qa nya twitz aj kawil toj 30 qʼij (kjawil uʼjit Daniel 6:7-10). Jakutoq kubʼ t-ximen Daniel: «Noq oʼkx 30 qʼij, nya te jumajx kbʼantel jlu wuʼne». Pero mintiʼ ok tqʼoʼn mas nim toklen jun ley twitzju tkʼulbʼil te Jehová. Ax tok, jakutoq  naʼn Daniel Dios toj ewaj tuʼntzun miʼn tok kyqʼoʼn txqantl kywitz tiʼj. Noqtzun tuʼnj, bʼintoq tuʼn qa ojtzqiʼn kyuʼn xjal qa naqʼli tuʼn tnaʼn Dios tkyaqil qʼij. Maske ojtzqiʼn tuʼn qa jakutoq tzʼok bʼinchaʼn nya bʼaʼn tiʼj, pero mintiʼ xi tqʼoʼn ambʼil tuʼn tkubʼ kyximen xjal qa ya mintiʼtoq in kʼulin te Jehová.

¹⁴ Tzaj kʼiwlaʼn Daniel tuʼn Jehová tej tklet tuʼn toj kytziʼ león, tuʼnju kukx ajbʼen te ex mintiʼ tzaj xobʼ. Tuʼn milagr lu bʼant tuʼn tok kybʼiʼn xjal tqanil tiʼj Jehová tzmax jatumel in pon bʼaj tkawbʼil tnam Medopersia (Dan. 6:25-27).

15. ¿Tzeʼn jaku ten qʼuqbʼil qkʼuʼj ik tzeʼn te Daniel?

¹⁵ Tzeʼn jaku ten qʼuqbʼil qkʼuʼj ik tzeʼn te Daniel. Tuʼn tten qʼuqbʼil qkʼuʼj, nya oʼkx tuʼn tjaw quʼjin Tyol Dios, sino il tiʼj tuʼn tel qnikʼ tiʼj (Mat. 13:23). Qaj tuʼn tel qnikʼ tiʼj tiʼ t-xim Jehová at kyiʼj qe tiʼchaq, ex at toklen jlu tukʼilju tuʼn tel qnikʼ kyiʼj nabʼil in tzaj tqʼoʼn Tyol. Tuʼntzunju, il tiʼj tuʼn qximen tiʼjju in jaw quʼjin. Ax ikx nim toklen tuʼn kukx qnaʼn Dios tuʼn tkyaqil qkʼuʼj, mas aj qok weʼ twitz nya bʼaʼn. Jaku tzʼok qeʼ qkʼuʼj tiʼj qa tzul tqʼoʼn Jehová qnabʼil ex qipumal in xi qqanin te (Sant. 1:5).

16, 17. ¿Tzeʼn ok tojtzqiʼnxix Job Jehová?

¹⁶ Tzeʼn ok tojtzqiʼn Jehová. Nyatoq aj Israel Job, noqtzun tuʼnj, attoq chʼin t-xilen tukʼil Abrahán, Isaac ex Jacob. Otoq txi tqʼamaʼn Jehová alkyeqe tmod at kye xjal lu ex aju t-ximbʼetz at kyiʼj xjal. Elxix tnikʼ Job tiʼj axix tok tiʼj Jehová toj jun tten mintiʼ ojtzqiʼn quʼn (Job 23:12). Tqʼama jlu te Jehová: «Noq jun tqanil o nbʼiye tiʼja» (Job 42:5). Ax Jehová tzaj qʼamante qa ax tok aju otoq tqʼama Job tiʼj (Job 42:7, 8).

¹⁷ Ax ikx ok tkeʼyin Job nim tbʼanel tmod Jehová tiʼj tbʼinchbʼen (Job 12:7-9, 13). Yajxitl ajbʼen techel tuʼn Jehová tiʼj tbʼinchbʼen, ax ikx ajbʼen tuʼn Elihú tuʼn t-xi kynaʼn te qa mas chʼin qoʼ qa ma tzʼok qmojbʼan qibʼ tukʼil Dios (Job 37:14; 38:1-4). Kuʼpin qe tyol Jehová toj tanmi Job ex kubʼ tin tibʼ tej tqʼama jlu: «Bʼaʼn wuʼne tkyaqil in bʼant tuʼna, ex misikyer jun mlaywit bʼant tuʼna». Ex tqʼamatl: «Ma tzaj nbʼise tuʼnju yol xi nmaʼne [...] ex lu qine qʼuql tuj quq ex tuj tzaʼj» (Job 42:2, 6).

18, 19. ¿Alkye tten kubʼ tyekʼin Job qa ax tok ojtzqiʼntoq Jehová tuʼn?

 ¹⁸ Tiʼ kʼiwlabʼil tzaj tkʼamoʼn Job tej tok tojtzqiʼn Jehová. In nelxixtoq tnikʼ Job kyiʼj nabʼil in tzaj tqʼoʼn Jehová. Ax tok ojtzqiʼn Jehová tuʼn Job ex onin jlu tiʼj tuʼn tkubʼ tbʼinchaʼn aju bʼaʼn. Jun techel, ojtzqiʼntoq tuʼn qa mlay tqʼama qa kʼujlaʼn Jehová tuʼn ex in nok tbʼinchaʼn nya bʼaʼn kyiʼj txqantl (Job 6:14). Mintiʼ kubʼ t-ximen qa at mas toklen kywitz txqantl, qa qʼinun qe ex qa prow qe, ax tmod kubʼ tyekʼin kyiʼj xjal in tzeʼn kyiʼj toj tja. Ex tqʼama jlu: «Axte Dios o bʼinchante qeye tuj talbʼil qtxuʼye» (Job 31:13-22). In nel qnikʼ tiʼj qa mintiʼ xi tqʼoʼn ambʼil te qʼinumabʼil tuʼn tten jun t-ximbʼetz nya toj tumel tiʼjx ex kyiʼj txqantl. Junxitl tmod Job ten kywitz qe xjal qʼinun ex at kyoklen toj ambʼil jaʼlo.

¹⁹ Mintiʼ ok tqʼoʼn Job mas nim kyoklen qe tiʼchaq te twitz txʼotxʼ twitz Jehová, nix kubʼ t-ximen toj tanmi. Ojtzqiʼntoq tuʼn qa noqwit bʼaj jlu, jakutoq txi tqʼamaʼn qa in nok jlu ik tzeʼn in kʼulin twitz juntl dios. Ex ax qʼamante qa kubʼwitlo tewin «aju Dios at tuj kyaʼj» (kjawil uʼjit Job 31:24-28). Ax ikx, xjantoq ela toj twitz aju tmejebʼleʼn. Axpe ikx kubʼ tqʼoʼn jun ley kyiʼj twitz tuʼn miʼn ttzaj anqʼin yaẍbʼil toj tanmi tiʼj ni jun xuʼj (Job 31:1). Bʼaʼn tuʼn ttzaj qnaʼn qa toj ambʼil aju, xi tqʼoʼn Jehová ambʼil te jun xinaq tuʼn tten mas te jun t-xuʼjil. Qa tajtoq Job, jakutoq ten juntl t-xuʼjil. * Noqtzun tuʼnj, kubʼ t-ximen tuʼn t-xi tbʼiʼn aju kawbʼil otoq kubʼ tqʼoʼn Jehová toj Tbʼanel Najbʼil te Edén tej tkubʼ tmojbʼaʼn Jehová oʼkx jun xinaq tukʼil junx xuʼj (Gén. 2:18, 24). Tej tikʼ junlo 1,600 abʼqʼi, kyaj t-xnaqʼtzaʼn Jesús qa il tiʼj tuʼn t-xi qbʼiʼn ax nabʼil lu tiʼjju tuʼn kykubʼ kuẍeʼ kabʼe xjal ex tiʼj mejebʼleʼn (Mat. 5:28; 19:4, 5).

20. Qa ma tzʼok qojtzqiʼnxix Jehová ex qe tkawbʼil, ¿alkye tten in nonin qiʼj tuʼn tjaw qjyoʼn qe qamiw ex qe qsaqchbʼil?

²⁰ Tzeʼn jaku ten qʼuqbʼil qkʼuʼj ik tzeʼn te Job. Juntl maj, il tiʼj tuʼn tok qojtzqiʼn Jehová ex tuʼn t-xi qqʼoʼn ambʼil te jlu tuʼn tjaw qyon aju tbʼanel toj qanqʼibʼil. Jun techel, in tzaj t-xnaqʼtzaʼn Tyol Dios qa in che el tikʼun Jehová qeju oʼkx «in che ximan tiʼj tuʼn tkubʼ jun xjal kyuʼn», ex mintiʼ tuʼn tok qmojbʼan qibʼ kyukʼil «xjal nikʼal yol» (kjawil uʼjit Salmo 11:5; 26:4). ¿Tiʼ xnaqʼtzbʼil in tzaj kyqʼoʼn taqikʼ Tyol Dios lu qe tiʼjju t-ximbʼetz Jehová? ¿Alkye tten jaku tzʼonin qiʼj aj tajbʼen Internet quʼn, aj tjaw qjyoʼn qe qamiw ex qe qsaqchbʼil? Kʼonil tzaqʼwebʼil qiʼj tuʼn tel qnikʼ tiʼj qa ojtzqiʼnxix Jehová quʼn. Qa nya qaj tuʼn tbʼaj qtzʼilsan qibʼ kyuʼn nya bʼaʼn, il tiʼj tuʼn t-xi qxnaqʼtzan qibʼ tuʼn ‹tok qnabʼil› tuʼntzun nya oʼkx tel qnikʼ tiʼj alkye bʼaʼn ex nya bʼaʼn, sino ax ikx tuʼn tel qnikʼ tiʼj tzeʼn jun xjal at tnabʼil ex jun xjal mintiʼ tnabʼil (Heb. 5:14; Efes. 5:15).

21. ¿Tiʼ kʼonil qiʼj tuʼn tel qnikʼ tiʼj tzeʼn jaku tzalaj Jehová quʼn?

²¹ Jyon Noé, Daniel ex Job tiʼj Jehová tuʼn tkyaqil kyanmi, tuʼntzunju xi tqʼoʼn ambʼil kye tuʼn tkanet kyuʼn. Ax ikx onin kyiʼj «tuʼn tel kynikʼ tiʼj tkyaqil», toj juntl yol, tuʼn tel kynikʼ tiʼjju at tajbʼen tuʼntzun ttzalaj kyuʼn. Iktzun tten e ok te jun techel tiʼjju tzʼaqli ex ax tok e tzalaj (Sal. 1:1-3). Tuʼntzunju, qxjelinku jlu: «¿Ojtzqiʼnpe Jehová wuʼne ik tzeʼn Noé, Daniel ex Job?». Toj ambʼil jaʼlo mas jaku tzʼok qojtzqiʼn Jehová, quʼn o tzaj tqʼoʼn mas tqanil qe tiʼjx (Prov. 4:18). Tuʼntzunju, qo xnaqʼtzanxix tiʼj Tyol Dios, qo ximen tiʼjju in jaw quʼjin ex qqaninx xewbʼaj xjan te Jehová. Iktzun tten mlay bʼaj qtzʼilsan qibʼ tukʼil nya bʼaʼn at. Tenx qnabʼil aj tkubʼ qbʼinchaʼn junjun tiʼchaq ex kʼonil jlu qiʼj tuʼn kukx tchʼiy qamiwbʼil tukʼil Jehová (Prov. 2:4-7).